Efesor 5:3 - ŊWÀʼ NYÙY

³ Mo vèn siìn ji wír wun woo Nyùy, kí yoʼ fə̀m ghèén ji vèn wáa ker kwaʼtì yímóʼó shishàr ji tàm wìr fo vèn wù lò a yiì kinyo ke kisaŋ ki. Kìn dzə̀ ji wìr jaŋ kinjàŋ, kìn wù ghán a dzə̀ viŋkar, kìn wù yii liì kisaŋ woo ka, kìn wù taʼ a dzə̀ kifàʼ.

Efesor 5:3 Referans Kwoze

Kolosia 3:5

Vèn ku nèn lì vitú vén ji á kpù ne a fo mbìv vinyò ve mensə́ men mè taʼ vidzə̀m. Lá vèn yòʼ a jàŋ kinjàŋ, a ghan viŋkar, a shii vinyo vee bey, kìn dzə̀ liì kisaŋ woo ka. Lá vèn yòʼ a way vifií é vinyò ve ví kér lóm, é la wìr yòʼ a tàʼ kifàʼ. Wìr wo wù taʼ kifàʼ lì ne vifá ve wù koŋ vee shooy ji Nyùy və.

Efesor 5:5

Vèn wáa kiíy kijuŋ ji wìr wo wù jaŋ kinjàŋ, yii liì kisaŋ, kìn wù taʼ a dzə̀ kifàʼ yòʼ dzə̀ wù wìy shòv sáʼ ye dzəə̀n yé Nyùy wùn Kristu e wùn si gheéy. A wìr taʼ kifàʼ, bo wù lì ne vifá ve wù koŋ vee shooy ji Nyùy və.

1 Tesalonika 4:3

Nyùy koŋ ji vèn wáa yiì moo wír və́ ŋkuuŋkùŋ, e làa yòʼ a jàŋ a kinjàŋ.

1 Korin 6:18

Kí nén a dzə jii, vèn léʼ á liì woo kùm kinjàŋ və̀n e dzə̀m. Vinyo ve bi vímóʼ ví ve wìr yii vi dzə̀, a bó wù yòʼ yii a dzə̀ e wún vəə́. Wìr wo wù jaŋ kinjàŋ nén a yiì a dzə̀ vinyo ve bi ví e və́ woo wúné.

1 Tesalonika 4:7

Bó Nyùy yòʼ‑oò lo shòʼ vèsən ji á wáa yiì liì joònè və̀n. Wù‑uù shòʼ ji á wáa ker liì a dzə̀ wo wìr ve dzəə̀n və́.

1 Korin 6:13

Yii bèy, a dzə̀ wùmòʼ kfə̀n a bìʼ sa jii, «Nyùy‑iì fèr vifá ve yi ji á wáa yi e bvə̀m, e fèr bvəm ji á yí vifá ve yi sho.» Yii bèy, vèn wáa kiíy ji Nyùy lèm ne a kishiíy ke wù wíy laàr vifá ve yi, é shúuyii may sá. A bó wúné yòʼ wíy mày bèy. Nyùy yòʼ‑oò lo bòm wún ji wìr li, a jàŋ a dzə̀ kinjàŋ sho. Wù‑uù bòm ji wìr wáa lìm sho a dzə̀ á fo Tàr wòsən Jesus Kristu, a dzə̀ wun woo Tàr wòsən wo wù kér wún wìr e dzə̀m.

Efesor 5:12

A dzə̀ woómé feyì fo wìr fə́m a fèr vinyo ve wíri yii e kilìtì vìn.

Matio 15:19

Kí kù yii lo a dzə̀ fó shiliv, bo wìr wáa kwàʼtì vinyo ve bi ví, lo, wù yùyrí wír, lo, wù lì wiiy wìr, e kfə̀n a jàŋ kinjàŋ, a ghan viŋkar. Wù lo, wù wàa shoŋ vishóŋ, e kfə̀n a toy wír e kinyò kisáŋ, a suʼ kinsuʼ.

Ŋgaà Yen 2:21

A mò‑oò fò ghán shó ji wù biner shilív sə́, wù tén fó màʼtì liì və visàkì woo shooy.

1 Korin 10:8

Lá vèsən yòʼ a jàŋ kinjàŋ mo wír vìn ámóʼó‑oò jaŋè, Nyùy nèn wìy lò e kishiíy kímóʼ kí, e yùyrí wír vee shooy nsə̀kì nshòv taár e mbaà.

Ŋgaà Yen 22:15

Wír ve á wíy a gòʼ kév a dzə̀ fó ndzəə dzə̀ á ve á yii joonè wùn à ve á sénin sə́m, à ve á jaŋ kinjàŋ wùn à ve á ghán viŋkari, à ve á yúyri wíri wùn à ve á ghvə́m vifá vímóʼ ví ji Nyùyi. A wír ve á koŋ kimboʼtì, tíy a dzə̀ shó adzə̀me kù wíy gòʼ sa fo ndzə.

Ŋgaà Yen 21:8

Yii bèy, ké wìr ámóʼó kí kù jòʼsì ne kimbiirìn ke və̀y fo və́yí bo, baári moo mekàŋ, a dzə̀ kpú yee akàŋ abaà. A kù dzə̀ áwune adzə̀m ve bó á yòʼ‑oò lo kùr shilív, a tiy e mǒ kinyò, e làa yòʼ a way shilív e mǒ wùn, tíy a dzə̀ é vinyò ve kisaŋ vi. Kìn dzə̀ wír wo wù yúyri wír, kìn ŋgaà kinjàŋ, kìn wo viŋkar, kìn wo wù sénin sə́m, kìn wo wù ghvə́m vifá vímóʼ ví ji Nyùy, e lì aŋgàa kimboʼtì adzə̀m.»

Ŋgaà Yen 2:14

Yii bèy, a vinyo vímóʼ ví dzə̀ shó ve vèn yii, la ví yòʼ a gheén mo. Wír ámóʼó dzə̀ e věn mvəm ve á yii vinyo, a dzə̀ ve Balaam‑eè yii. Wù‑uù táŋ mo dzə̀ Fòn Balak yiì, e bóo màʼ wír veé Isray. Wù‑uù din sho mo dzə̀ wù lèvtí wír veé Isray, aá wáa dù e virə̀ʼ vé anyùy, a yikír fo, e kfə̀n a jàŋ kinjàŋ.

1 Korin 5:1

M kér gháʼ feyì fó yu ji wìr wùmòʼ lò ne, e kèʼ joonè e věn mvəm, a bó yòʼ dzə̀ wo dzə̀ wìr wo bó wù yòʼ fə̀m kiìn Nyùy wàa mùm. M yú ji wìr wùmòʼ shìíy a e wiiy tàr wov.

Esiker 33:31

Áwune lo, á wìy, e yèn wò mo wìr yii du fo wìr wùn. Wiyì, á dzə̀ʼə̀m e wò si moo wír vém, a yuurí kinyo ké, a bó á yòʼ yíi yiì kinyo ke à suuyì. Lám wóví kù dzə̀ wó kinjàŋ.

Ŋwàʼ Fəə 20:17

«Lá wìr yòʼ siìmé kifá ke dzəə̀n ké wìr wùmòʼ. Lá wù yòʼ siìmé wiiy ŋgaàŋ, kìn kwàn və́ woo lumène, kìn woo wiíyi, kìn nàʼ və, kìn kimbèʼbìy kfə́, kìn ka ke dzəə̀n ké ŋgaàŋ.»

Ŋgaà Yen 9:21

Á kú a yiì bèy, e nèn tèn fó màʼtì fó a yuyrí wíri, a senín sə́m, a jàŋ kinjàŋ, a shoŋ vishóŋ.

2 Pita 2:3

Mo wír vìne kù taʼ a dzə̀ mbàm, á lo, aá nèn taà vinyo vinín, a boʼtí ven shó ji á fíʼ koóy. A Nyùy kù‑uù shòv ne áwune fó ŋgùʼ, e bàʼtí lòn wo áwune wíy nəə́ sho.

Hibru 12:16

Vèn kfə́n a yen sa fo wìr wáa ker liì kisaŋ, a jàŋ kinjàŋ, a ghan viŋkar. Lá wìr yòʼ kfə̀n a lì kinyo ke Nyùy fo tèr moo Esav wo wù‑uù fiìnèn kilíŋ ke Nyùy‑iì foon e wun ji wán woo ŋgàywìr bìʼ kimbéʼ ke kiban keé ghan see shó.

2 Korin 12:21

A m kfə̀n fan fó wìy wìy, é Nyùy yii, é m wáa woomé, a sòv kitú fo wír ve vé‑eè yii vinyo ve kisaŋ vi, e làa yòʼ bìnèr melív mev, e shem lèn, kù jaŋ a dzə̀ kinjàŋ, yii kfə́ə joònè woo bey.

Titur 2:3

Kù dzə̀ sá mo à wáa tir vikìy vee aránsisi ji á wáa ker a liì a dzə̀ wo vikìy ve á yú fo Nyùy, e làa yòʼ a duu viduú, e làa yòʼ a fo kitú e meluʼ mè. Áwune wáa dìn a dzə̀ á liì wo juŋ,

2 Timoti 3:2

Wíri wíy a dìy a dzə̀ vitú vév, a kòŋ mbàm e ŋàŋ, a yu wún, a koʼnín. Á wíy a kuùnìn, a tav kitú fo atàr véví, e làa yòʼ a ker ghán fo wìr, a bó á yòʼ wíy a yen kímóʼ kí ji Nyùy gheéy.

Lim Aŋgàa Ntum 15:20

Á ku sàŋ fo áwune cáʼcáʼ jii, á wáa leʼ vifá ve á cuùn anyùy sho. Vee shooy vi kóʼoy kòʼòyín, e kfə̀n a leʼ liì woo kùm kinjàŋ, a leʼ nyám yee là seé, a leʼ mensə́.

Ŋwàʼ Fəə 18:21

Kiiyì, áà nèn nə̀ə́ e wìr dzə̀m mvəm, e shòʼtí wír vee jwáʼ ve á fan Nyùy, suuy suuyrú, kfə̀n ban yíkísáŋ, e lèm, aá wáa dzə vilìmbìy ve wíri. À shóʼti, áà javti é viliŋ viliŋ, é kilìmbìy kimòʼón kimòʼón fo kiliŋ kímóʼ kí wáa saʼ wír nsə̀kì nsə̀kì, é veé kiliŋ kímóʼ kí wáa saʼ wír wií wií, é vee kímóʼ kí wáa saʼ wír mtàn mtàn, é vee kímóʼ kí wáa saʼ wír e ghvə̀m ghvə̀m.

2 Pita 2:14

Wìr yén wiíy, wù kù a leéy a dzə̀ e sí yímóʼó. Vifií vév ví kù tíy a dzə̀ é vinyò ve bi ví ghán sidzə̀m. Áwune yén wír wo bó wù yòʼ kiìn fo wù dzəə̀n, á nèn bòʼtí, e wày é kinyò ke bi kí. Shií wov kù dzə̀ ji á leeri wír, e kòóy kifá. Á yii bèy, a lǒn Nyùyi koò ne áwune.

2 Pita 2:10

bo taaka ve á yú a dzə̀ fo wún wóví, yii joonè wo mensə́ mev mè taʼà, káy sáʼ e dzə̀m mo aŋgàa yeʼéy ve á bóʼti wíri víne yii. Aŋgàa kimboʼtì vìne guynìn e ŋàŋ, yén a dzə̀ vitú vév, ŋeʼrì gheéy, á wàa kay sa vifá ve ví ghán e ndzə fèn, a ví kér vitaáví.

1 Pita 5:2

A m tír ven jii, vèn kú a leéy a fo kintatì ke Nyùy wayin e věn kiwo ki, a dànèr mo wìr yii danèr njiì və. Vèn wáa leéy feyì kijuŋ ji kòŋ a ven, e làa yòʼ a leéy mo á kàn ven kánen. Lá vèn yòʼ a leéy, a dìy mbàm, bìʼ fo kee shooy ki dzəə̀n woómé se kuʼùn sí.

Titur 1:11

Á kér fó a sə̀r wír vee bey, bìʼ fo áwune bvəər vifií vé wíri. Lóo dzə láʼ yímóʼó, la à yòʼ dzəə yèn wír wo wù kiìn fo wù tíyí. Aá yéʼey vinyo ve bó yòʼ dzə̀ á wàa yeʼéy, bìʼ fo á kù kér shií a dzə̀ é mbàm.

Titur 1:7

Mo lèmèn Nyùy ŋgaàŋ ji kilìmbìy ke wìr və́, kí yoʼ ghèén ji wù wáa ker nsem e dzəə yìmòʼ. Kìn dzə̀ ji wù wáa koʼnín, e kfə̀n a nyarnín, a no meluʼ e ŋàŋ, a tàʼ melaà, a dìy a dzə̀ shuu və́.

1 Timoti 3:3

Bó yòʼ dzə̀ wàa dzə wír wo wù nó meluʼ e ŋàŋ, a bó yòʼ dzə̀ wàa dzə wo wù wámri wíri. Kù kér fó a dzə wir kiman, e làa yòʼ a taŋnín, é la yòʼ a dzə sa wír wo wù kér shií é mbàm.

1 Timoti 2:10

A dzə̀ viŋgòn vév ví kù a dzə liì wo juŋ wo áwune wáa yiì moo vikìy ve á yú a dzə̀ fo Nyùy.

Filipi 1:27

Á bèy lèn, kinyo ke vèn wáa yiì ki dzə̀ jii, vèn wáa ker liì a dzə̀ á wo wìr ve á jumrì rú kinyo ke Jesus Kristu. A ke m taʼ ki dzə̀ jii, kìn m wìy fo vèn, kìn bó m yoʼ wìy, m kù a yu a ji vèn tíy kitávín, kér shilív shimòʼón, e kfə̀n a yu ji vèn wày vifií, a fùnèn kinyo kimòʼón cáʼ ji sáʼka Nyùy wo juŋ wáa dù fo mbìy, é wíri wáa biimé.

Ŋwàʼ woó Rom 16:2

Wù wíy wiy fo věn wùn, vèn kù keèrí wun ji fə́r won wùmòʼ é kinyò ke Tàr wòsən Jesus Kristu réŋréŋ mo dzə̀ wír Nyùy, á wàa yiì. Vèn yén, a kinyo ki gháʼ wun, vèn kù sə̀ wun, a kiíy ji wù dzə̀ ben, a wù sə̀ ne wír anín feyì, e kfə̀n sə̀ sá mo.

Ŋwàʼ woó Rom 6:13

A wìr fə̀m yii ka, lá wù yòʼ biìmé, é kinyo ke bi kí nəə́ shó, é vèn binkir ji wír ve á tómri vinyo ve bi ví. Vèn ku tàtí kitú kén kidzə̀m, e fò a dzə̀ e Nyùy ji wír ve á kpuun ne fo mbìv vinyò ve bi ví, wù fəə́r ven fó kpu foo fèy, vèn wáa dzə lèn, a yu a dzə̀ fo Nyùy ji vèn fíʼ a tomrí vinyo a dzə̀ á ve ví gheenen wun woo Nyùy.

Ŋwàʼ woó Rom 1:29

Á nén a dzə ji afon vinyò ve kisaŋ vi, a yiì a dzə̀ vinyo ve bi ví, a siimé kinsiimè, a wìr kù leey wír a dzə̀ e sí ye bií. Aá kfə̀n gheʼ kighèʼ, lo, á yùyrí wír. Á lóo dzə, á kù a nyàmnìn nyàmnìn, ghán, kár a dzə̀ menàŋ, a kày kù kér a dzə̀ shilív she bi shí wùn kày, duú viduú,

Lim Aŋgàa Ntum 20:33

«Vèn kì sá mo mò‑oò dzəə̀n. Bó m yòʼ‑oò ló a siimé mbàm, kìn ndzə̀y sé wìr wùmòʼ gheéy. Mò‑oò lim lim a dzə̀ e wó yém rə́ne, bo vèr aàŋgaà vém ŋgoo wáa yikír.

Ŋwàʼ Luk 16:14

Jesus wáa fèr bèy, a wír veé mbìv *Farasi ámóʼó yú. Á nèn a ndzəə wun, bìʼ fo áwune yii koŋ mbàm e ŋàŋ.

Mayka 2:2

Á yén súm wìr, wú gheen áwune, á faàsì fáasin e vitaáví ví. Lav wìr boŋè, á kù sùm sùmèn. Á lo, á tàtí wír wùn à kfə́ə rəə́, e kù nyàvrì sho nyávrin. Yén vitsə́ʼ vé wìr, á kù faàsì faàsìn.

Jeremia 22:17

Yii bèy, à tìír ké sí wùn à shilív shí, a kù dzə̀ é kinyò ke kù‑úù luŋ wò fo fo. À yúyri alànjò, nyavrì, kfə̀n nəʼsì wíri.

Jeremia 8:10

Mo kí dzəə̀n ben, m wíy fo vikìy vév e wír ve səné, e fo kwáʼ sév e wír ve á wíy tòn fene, bìʼ fo wìr dzə̀m, à wo terí, à wo kuʼùn, kù sí diy a dzə̀ seʼ ŋgwaákínyé. Aŋgàa ntum Nyùy wùn aàtàá cùu, à wìr dzə̀m lò ne, a shwìv a dzə̀ kinshwìv.

Jeremia 6:13

«Wìr dzə̀m kù dzə̀ wir bvə̀mkúʼ, diy a dzə̀ seʼ ŋgwaákínyé. Feyì feyì, e kèʼ fo wo terí, e dù e wo kuʼùn, à wìr wo dzəə̀n ji ŋgaà ntum wom, à taà cù, wìr dzə̀m kù sí shwiv a dzə̀ kinshwìv.

Ŋgàn 28:16

Ŋgaà saʼ wo wù tan vifií lo, wù kfə̀n ji gáʼ e wírí kitu, a wo wù ban seʼ mbóʼmé dzə̀ wo wù wíy bonén, e saʼ ntàmda.

Nsùyrì Nyùy 119:36

Yìi, é shilív shém shí wáa lùm e vinyò ve à foon, é la m yòʼ a jùm a dzə̀ káv woó nsay.

Nsùyrì Nyùy 10:3

Wír ve á méŋ Nyùyi saa wún ji kév kí kù dzə̀ á ke mensə́ mev mè taʼà. Á búri vé bòŋáyimoó, ŋwáy Nyùy Tàr ŋwáyín.

1 Samuel 8:3

Bó áwune yòʼ‑oò ló a jùmrì liì tàr wov. Vé‑eè koŋ a dzə̀ yíkísáŋ, sə́ kòyàr, nèn shwiv nsaʼ si.

Joshua 7:21

vé‑eè lóo tòn ŋkàlaʼ, m tó é ndzə̀y yeé Babilon yìmòʼ, e kfə̀n yèn *kisha ke mbàm ke fəvír kí *ashekel ghii baà, à kóŋ kishà ke mbàm ke baar kí, shekel mtàn, e nèn a ker shií shó feyì, e nèn wòvír. Á yíi yen a m dzəə́mé e mǒ kibàn, à kisha ke mbàm ke fəvír kí shó, a kí dzə̀ fó sar.»

Kintaŋ 25:1

Wáa dzə e ghan sin, a kiláʼáy ké wìr veé Isray ki dzə̀ é Shittim, vilum veé Israyi nèn lò, a dù, a jàŋ vikìy veé Moav.

Ŋwàʼ Fəə 23:13

«Vèn lem vinyo vìn vi vidzə̀m ve mo woo Nyùy Tàr suuyin e vèn. Lá wìr yòʼ a ghvəm anyùy ámóʼó. Lá á yòʼ fə̀m yù, a wìr gáʼ yír sév fo wun shuù.

1 Timoti 6:10

Kfə́ə se vinyò ve bi ví sidzə̀m si kù ghán a dzə̀ é bǎm mbàm se wìr wáy vifií shó. Kù dzə̀ mo wír ámóʼó màʼàyìn ne kinyo ke Nyùy ke dzəə̀n ke ru kí, e nə̀ə́ e mvə̀m vinyò vinín, a rəsí, a rə̀m ntéŋ, a dzə̀ bìʼ shií wo á kér e mbàm.

Ŋwàʼ Luk 12:15

Wù nèn a suúy lèn e wìr dzə̀m jii, «Vèn wáa kìm vitú vén, a yen fó a tàʼ kifàʼ e dzəə sí dzəə sí. Dzəʼə̀m wìri yòʼ dzə̀ vifá ve wù kérí, a wù fə̀m kér bùʼ e le.»

Cù 15:18

A lùmèn shìíy e wiíy, shindzə́v shí fəə́, bo wùn wiíy su wún, a dzə e kifàn kí wùn, e dù, e meé e ŋkuùr.