Efesor 4:5 - ŊWÀʼ NYÙY

⁵ Tàr wòsən wáa dzə sa e mòʼón, a dzə̀ Jesus Kristu. Vèsən kfən biìmé kinyo kimòʼón, á wáy vèsən é ndzəv a dzə̀ bìʼ kee shó kimòʼón.

Efesor 4:5 Referans Kwoze

1 Korin 8:6

késən kí dzə̀ jii, Nyùy kù mày e mòʼón, a dzə̀ á wun wo dzəə̀n Tàr wòsən, a bòm wun vifá vidzə̀m, ví wáa yu a dzə̀ fo wun. Taà Ndzə kù mày sa e mòʼón, a dzə̀ Jesus Kristu. Vifá ve Nyùy‑iì bomen vidzə̀m vi‑iì shaà a dzə̀ e wun woo Kristu kiwo, a kù yii wun, bo vèsən wáa dzə sho.

1 Korin 12:13

Vèsən dzə̀ wír jeéy jeéy, ámóʼó dzə̀ veé Juda, ámóʼó vitúm ve sən ví, ámóʼó akwàn, ámóʼó nén a dzə wón wòŋ. Yii bèy, a kù dzə̀ Kiyoy kee shó kimòʼón ke kí‑iì liìn vèsən adzə̀m, e tàtí ji wún e mòʼón, a dzə̀ kíwun ke Nyùy wayin e wìr mòʼón mòʼón shiliv.

1 Pita 3:21

Kinyo kee shooy ki wáa dzə kisəəm ké ndzəv ye á wáy wír sho lèn, wù ràn fo wun vinyò ve bi ví. A bó á yòʼ wáy bèy ji á su a dzə̀ lóm fo ŋgaàŋ wùn. Dzə̀ kisəəm ke kí din ji ŋgaàŋ lón fo Nyùy a ji wù ku sù shilív sə́, é shí rán. A wù bòy fo wùn ajay a dzə̀ bìʼ Jesus Kristu wo wù‑uù fəən fó kpu,

Ŋwàʼ woó Rom 3:30

A kù dzə̀ wun Nyùy woo shó e mòʼón. Wù li wir dzə̀m líin ji woo là jay, a kù dzə̀ mo wìr wayin shilív e Jesus Kristu wùn, kìn ŋgaàŋ dzə̀ wír woó Juda, kìn bó yòʼ dzə̀ woó Juda.

Matio 28:19

Vèn du ri, a ghan vitúm vidzə̀m, a yeʼéy wíri, a bìnèr ji wír vém, a way áwune é ndzəv e yír Nyùy Tàr wùn Wàn, à Kiyoy ke Ranén kí.

1 Korin 1:13

Mo vèn yii bèy, vèn sí tóʼti Jesus Kristu e vishev vishev. Vé‑eè kùm a dzə̀ la é kici, wù kpú fo vèn? Yì‑iì dzə̀ mo woo Por à? Vé‑eè wày ven é ndzəv ji vèn biìmé a dzə̀ fo Por à?

Ŋwàʼ Jud 1:3

Ŋkàr sem, mò‑oò ló a kwàʼ feyì ji m sáŋ ŋwàʼ fo vèn kùm vinyo ve Jesus Kristu‑uù yiìn, e tìn vèsən fó lòn, á lùŋ. M nèn yèn ji kinyo keé shií kí dzə̀ á ji m sáŋ ŋwàʼ fo vèn cér, a tir ven ji vèn wáa giìmè a kinyo ke Kristu ke Nyùy‑iì wayin ne e vèsən vee wír vəə́ kiwo. Wù kù‑uù fò a dzə̀ kinyo kee shoon kimòʼón, a bó kímóʼ kí yòʼ dzəə́ wìy a dzə.

2 Korin 11:4

M suuy bèn, bìʼ fo m yén ji vèn kù sí biíme vinyo vidzə̀m a biímén. Kìn wìr wìy, a fìʼtì Jesus wùmòʼ jeéy, a bó yòʼ dzə̀ wo vèr‑iì fìʼtìn e vèn, kìn wìr fiʼtì kifá kímóʼ kí ji Kiyoy ke Nyùy, a bó yòʼ dzə̀ ke Nyùy foon e vèn, kìn ŋgaàŋ neèr kfə́ kinyo ke sən kí ji sáʼka Nyùy wo juŋ, vèn kù biìmé biimén.

Sekariya 14:9

Nyùy Tàr wíy a dzə Fon woó kitu ke nsay kidzə̀m e ghan fóo fèy, a kù jòʼsì wun bèy, a kù mày yír rə́ ye á wíy a ghvəm.

Filipi 2:11

A wír vìn adzə̀me wíy a binsí kiránén ji Jesus Kristu dzə̀ á Taà Ndzə. Á lóo binsí bèy, bo dzə̀ búrí mo á búri Nyùy Tàr.

Efesor 4:13

é vèsən nèn màysì, a way shilív e wun woo Wan Nyùy wùn, a kiíy mo vinyo və́ ví dzəə̀n, a tiy sho ji wír amòʼón. Vèsən nén a dzə wír ve sí yéví ranen ne, a kiíy vinyo ve Jesus Kristu réŋréŋ mo wun woo Kristu kiìn.

Galatia 5:6

A wíri tàtí ne wùn à Jesus Kristu, la wùmòʼ yòʼ dzə́ə a dzə jeéy ji wír wo á saŋen mbèʼ sə́ é liì wìr veé Juda, kìn wo bó á yoʼ sàŋ. Ke kuʼùn kí dzə̀ jii, wíri wáy á shilív e Kristu wùn, a kòŋnìn.

1 Korin 12:5

Kù dzə̀ réŋréŋ sá mo lim se wìr Kristu si dzəə̀n jeéy jeéy, a wun woo Tàr kù jòʼsì e mòʼón.

1 Korin 1:2

a m sáŋ a dzə̀ fo vèn vee wír veé Korin ve vèn tatin ji wír Nyùy. Kù‑uù shàv Nyùy ven ji vèn à Jesus Kristu tátí, é vèn wáa dzə wír wun woo Nyùy, mo wír ve á yoŋ yír Tàr wòsən Jesus Kristu adzə̀me dzəə̀n virə́ʼ vidzə̀m. Wù nén a dzə Tàr wòsən réŋréŋ mo wù dzəə̀n sá wóov.

Ŋwàʼ Jud 1:20

Ŋkàr sem, vèn ku nèn a kìm vitú vén, a tiy a dzə̀ e Nyùy kinyò ke vèn biimen, a dù duùn fó mbìy, a tiír Kiyoy ke Ranén kí fó mbìy, a bùnrì ghán sidzə̀m.

Hibru 13:7

Vèn wáa kuumé wír ve vé‑eè tòmbìy dàn ven é kinyò ke Nyùy fèn. Vèn kuúmé mo vé‑eè dzə́, yú a dzə̀ fo Nyùy, wíri yú vijuŋ bìʼ áwune. Vèn kú a bìʼnìn, a yu fo Kristu moo áwune.

Hibru 6:6

Wíri wáa dzə, a vé‑eè nə̀ə́ ne e mvə̀m vinyò fèn vidzə̀m, e kfə̀n nyèŋ, bo bó yòʼ dzə̀ á kfə̀n bìnèr áwune, bìʼ fo á sí nyéŋ bèy, keŋ Jesus kéŋen ji bó yòʼ dzə̀ Wan Nyùy, nèn taʼ ji á kfən yùyrí mo vé‑eè kùmèn é kintam e ghan siy.

Titur 1:4

M nén a saŋ ŋwàʼ və̀n a dzə̀ fo wò woo Titur. À dzə̀ wán wom féyì bìʼ kinyo ke Nyùy ke wòsò biimen adzə̀m. A m lón jii, Tàr wòsən Nyùy wùn Jesus Kristu wo wù luŋèr vèsən kú a leéy fo wò, a yiì, é shilív shé shi wáa dzə nyaáŋ.

Titur 1:1

Ŋwàʼ və̀ne sàŋ mo woo Por wo dzəə̀n ŋgaà lìm Nyùy, e kfə̀n a dzə ŋgaà ntum Jesus Kristu. A lim yémé dzə̀ ji m sə́ á wír ve Nyùy shoʼon ji və́, aá maysi, e wày shilív é wùn wó, e kìíy kinyo kfə́ ke ru kí, a ghan moo wír və́.

Filipi 3:8

A bó yòʼ jòʼsì kee shooy cáʼcáʼ. M sí yén vifá vidzə̀m ji kilày ji m fíʼ a ker ke kuʼùn kí, a dzə̀ á ji m maysi, e nəə̀nín vèr Tàr wòsən Jesus Kristu, e kìíy wun kijuŋ. M nen màʼày vinyo vìn vidzə̀m a dzə̀ bìʼ wun woo Kristu, a yen lèn, ví wáa koʼóy koʼoyín ji m fíʼ a tiy a dzə̀ á vèr wun,

Lim Aŋgàa Ntum 10:36

Vèn kù‑uù lo yù sá ntum ye Nyùy‑iì tsənsin fo wír veé Israyi ye yì dzəə̀n ji Jesus Kristu‑uù wìy ji wíri fiʼ kòóy nyaáŋ wùn à Nyùy. A Jesus Kristu və̀n dzə̀ Tàr à wíri adzə̀m.

Lim Aŋgàa Ntum 2:36

«Wír veé Isray adzə̀me ku nèn a kiíy kijuŋ jii, Jesus wo vèn‑eè taan é kintam və̀y dzə̀ á wùwun wo Nyùy lèmèn ne ji Mfə̀ə́r wo wù‑uù kàʼàn, e kfə̀n lèm ji Tàr à vifa vidzə̀m.»

2 Pita 1:1

Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

Jeem 2:18

A tàm wìr wùmòʼ wàa dzə jii, kfə́ kí dzə̀ á ji wun wáy shilív e Nyùy wùn, ké wùmòʼ woo wír a ji wù yii lim se Nyùy. M nén a ghay kém jii, wù din mo á mo wù wáy shilív e Nyùy wùn, a bó wù yòʼ yii mo Nyùy suuyì. A m yíi dìn sa sho mo m wáy kém shilív e Nyùy wùn a dzə̀ fó vinyò ve m yii mo Nyùy suuyì.