Daniel 9:5 - ŊWÀʼ NYÙY

⁵ Vèr jày ne, e yiì kinyo ke bi kí. Vèr kù sì wír ve á méŋ wò, tsə́y kóy vèsən, ŋwáy nsər sé wùn à kinyo ke à tínen ki ŋwáyín.

Daniel 9:5 Referans Kwoze

Malakay 3:7

Vèn kù‑uù sí ŋwáy sáʼ yém, e kèʼ fo atàr véné ghan, tén fó a yunín nsər sém. Vèn kfə́n é bàm e mǒ wùn, é m binkir, e lèéy ven. Suuy mo woo Nyùy Tàr woo Taà Mànjòŋ. Yii bèy, vèn ló kén, a dzər jii, ‹Vèr yíi ghan e le, e bóo kfən fo wò wùn?›

Daniel 9:11

Rúrú, wír veé Israyi shòʼór ne nsər yè adzə̀m, e bìn ndzə̀m, e làa yòʼ dzə́ə a yunín jí yè. À nen lò, e màʼ lòn e věr kitu, bìʼ fo vèr jayin ne e wò, a kù dzə̀ lòn wo vé‑eè yiin kilìʼ, e lèm e Ŋwàʼ Nsər wo Mooser woo ŋgaà lìm wò‑oò saŋen.

Daniel 9:15

«Éè Nyùy Tàr woo Nyùy wor, wò‑oò fə̀ə́r wír vé fo wòŋ Ejiv e vitaáví vé vi, e yiì, vitúm vi kiíy vitaáví vé, e shem lán. Vèr dzə̀ kér, a vèr jày ne, e yiì kibí féyì e wò.

Nsùyrì Nyùy 106:6

Vèr jày ne, kù mo atàr vérí‑iì jáyí. Vèr kù‑uù táv a dzə̀ kitú, buʼtì vinyo ve bi ví.

Hibru 3:12

Afə̀r vem, vèn wáa yen rì fo wìr fo vèn wáa ker shilív she bi shí wùn Nyùy, a ŋway kinyo kfə́, é shí yii, é wù maʼay Nyùy woo rú.

Hosea 1:2

Yì‑iì dzə̀ é ghan se Nyùy Tàr‑iì kèʼèn, a suŋnín e Hosea ji wù lo ntum rə, wù‑uù sùúy shó jii, «Dùu, e tàʼ wiíy, e wày é lav, lóo way, à wàa kiíy ji yeè lav wò və̀n wíy a ghan a ghán kisaŋe, e dzəə́ wón é ndzə. Kù dzə̀ kíwun ke wír vémé yii e mò. Á ŋwày ne mo woo Nyùy Tàr, e toòmé liì kisaŋ, a cù anyùy ve səné.»

Esiker 6:9

Wír ve á bòyìn, á dú shó e vitume wíy a kuumé mo, a kiíy ji m màʼ ŋgeʼ aáwuné kitu, e shòór áwune, bìʼ á fo vé‑eè ŋwayin mo, a ghvəm a dzə̀ mebvə̀m, a tinsín mo. Á kuúme, aá wáa woomé, bìʼ liì wov kisaŋ, à vinyo ve joònè ve áwune‑eè yiìn ví vidzə̀m.

Yòvdìy 1:20

«Éè Nyùy Tàr, ku yèn, ŋgeʼ si sùm ne mo. M sì a dzə̀ é mvə̀m nyar, a shilív shí sí sáv mo sávín, a dzə̀ bìʼ fo m tavin kitú wòsò e ŋàŋ. Á fəə́ e dzəə sí, á yèn wír ve á kpuun rə́r, lóo nəə́ e mvə̀mlaʼ, á yèn ve á kpuun jíŋ.

Jeremia 14:7

Éè Nyùy Tàr, fə̀m mo vinyo vér ve bi ví koon ne ver, ku sə̀ ver bìʼ yír yé. Vèr bìn ne ndzə̀m e wò akàŋ aneénín. Vèr jày ne e wò.

Nsùyrì Nyùy 18:21

M kù‑uù ghán a dzə̀ e Nyùy Tǎr mbòv, m yòʼ‑oò lo màʼtì dzə́ə rə, e bìn e ye kisaŋ.

Jeremia 3:25

Vèr‑íì neem e woómé sí si, é joonè wórí kfə́vsí ver. Vèr aàtàr vérí‑iì jày ne e Nyùy Tàr woo Nyùy wor, e kèʼ, a vèr dzə̀ə́ e vinsùm vi, e wìy shem lán. Bó vèr yòʼ‑oò dzəə́ yúnin Nyùy Tàr woo Nyùy wor.»

Aysaya 59:13

Vèr tàv ne kitú, e mèŋ wò woo Nyùy Tàr. Vèr bìn ne ndzə̀m e wò woo Nyùy wor. Vèr nə̀ʼsì ne wír ámóʼó, e ŋwày kinyo ké. Vèr kù sí baʼrì a dzə̀ kimboʼtì e věr meliv, fəər a dzə̀ kíwun fo shuù.

Aysaya 53:6

Vèsən adzə̀me‑eè dzə́ fo mbìy, ján janén moo njiì wo wù jayin dzə́ə. Vèsən‑eè shwèy ne dzə́ə Nyùy, wìr wáa bìn e rə́ə yee dzə́ə. Yii bèy, Nyùy Tàr lí vinyo vesən ve bi ví vidzə̀m, e siìr e wìr və lìm və̀n kitu.

Nsùyrì Nyùy 119:102

M kù jumrì vinyo ve à tinen, e wày ji nsər, a bó m yòʼ yáʼay kímóʼ kí, bìʼ fo kù duŋrì wò mo.

Esra 9:6

a lon jii, «Éè Nyùy wom, m woóme kfə̀n kér dzə̀rkìtu, a bó yòʼ dzə̀ m yù fó nàn sí, a leéy wò. Nyùy wom, vinyo vér ve bi ví kùʼ ne e shaà ver, a lǒn ajay wórí kòʼ ne e mèé e ntoò yùv.

Nsùyrì Nyùy 119:176

M sí ján janén moo njiì wo wù làyìn ne, ku tàʼ ŋgaà wò lìm və̀n. M yòʼ laysìn nsər sé.

Jeremia 44:3

a kù dzə̀ bìʼ vinyo ve kisaŋ vi ve áwune‑eè yiìn. Vé‑eè ŋàʼár dòʼshwíiy wom e kiláy ke áwune ton, cu anyùy sho ki. Anyùy ve bó áwune yòʼ‑oò lò ghàn sìíy e kìíy, a bó vèn yòʼ kì sá, aàtàr véné yòʼ kì.

Yòvdìy 1:18

«Kinyo ke Nyùy Tàr yiìn e mò kí dzə̀ réŋ. M yòʼ‑oò lo yùnín nsər sə́. Wìr dzə̀m ku yuùrí, e yù, e lèéy ŋgeʼ sém sí. Aŋgàa vibàné koòrí ne wónlě nsùm vém, e koòrí wónlě ŋgòn vém, e dù sho e kwaʼ nsàm.

Yòvdìy 3:42

«Éè Nyùy Tàr, vèr jày ne, e kfə̀n tàv kitú vèsən, à nen tèn fó làysìn ajay vér.

Daniel 9:9

Yii bèy, Nyùy Tàr woo Nyùy wor, à dzə̀ ké, aà kù yii shám wír vé shámén. À lo, à làysìn ajay vér, fə̀m mo vèr tsəyin kóy vèsən.

2 Afòn 18:12

Vinyo vìn vi‑iì kooy bèn bìʼ fo wír veé Israyi yòʼ‑oò ló a yunín Nyùy Tàr woo Nyùy wov. Áwune‑eè shòʼór *mensaŋ me Nyùy Tàr, e shòʼór nsər sidzə̀m se Mooser woo ŋgaà lim Nyùy Tàr‑iì foon aáwune. Áwune yòʼ‑oò ló a yu kinyo, a bo áwune yòʼ‑oò ló a yiì mo nsər dzəə̀n.

2 Afòn 21:15

M wíy yiì bèy, bìʼ fo áwune kù‑uù yii vinyo ve bi ví e mǒ si, ŋáʼar dòʼshwíiy wom shó, e kèʼ fo kishiíy ke atǎr atàr véví‑iì fəən fó wòŋ Ejiv, e wìy shem lán.»

Aysaya 64:4

Kèʼ fo ŋgwàrìn wòŋ, bó wìr yòʼ‑oò ghàn ne yù, a bó wìr yòʼ‑oò ghàn ne yèn Nyùy wo wù dzəə̀n moo wò, Nyùy, wo wù leey fo wír ve á yoy, tiir e wun wùné.

Jeremia 14:20

Éè Nyùy Tàr, vèr jày ne e wò, a vèr sí tuúne ajay vee shoon wùn à vé atàr vérí.

Jeremia 30:14

Vé kikòŋnìn vén adzə̀me làysìn ne ven, á yòʼ dzəə́ gwarìr kinyo kee kùm ven. M dzə̀v ne ven, a dzə̀ mo a kì dzə̀ dzə̀v ŋgaà vibàn, m taàmé ne ven moo ŋgaà vibàn woo mbuù mendzə̀n, a dzə̀ bìʼ fo ajay véné kùʼùn ne e ŋàŋ, vinyo vén ve bi ví sì ŋkóŋkóŋ.

Esiker 5:6

Jerusalem lò ne fo fo, e bìn ndzə̀m e mǒ nsər si, e ŋwày sáʼ yém. Áwune yiì ne liì kisaŋ, wù shaá wo vitum ve ví kaarin áwune, e tàr.»