Daniel 7:14 - ŊWÀʼ NYÙY

¹⁴ Á fó wun vitaáví vé saʼ, e fò wun vikuʼùy, wù wáa saʼ vifon, é wìr dzə̀m fíʼ a lìm fo wun, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Sáʼ rəə́ dzə̀ sáʼ, a yí kù wíy a tiy fo, a bó yòʼ dzə̀ yí wìy mày. Vifon və́ ví dzə̀, a bó yòʼ dzə̀ kifá ki wìy laàr.

Daniel 7:14 Referans Kwoze

Ŋgaà Yen 11:15

M kfən yiì lòo yen, nshìylav Nyùy ye yì meen ji saàmbà tóŋ rə́ yee sóŋ. M yú, a jí si yor e yuv, jaŋ jii, «Ndzə dzə̀ lèn e dzə̀m, a wíy a saʼ Tàr wor Nyùy wùn Wan və woo *Mfə̀ə́r, a saʼ ghán sidzə̀m, viyá viyá là may.»

Daniel 7:27

Á bèy, á wíy fo vitaáví vé saʼ e wír Nyùy woo Taà Vituu, aá sə́ sáʼ yeé kitu ke nsay kidzə̀m, à vikuʼùy və́ ví. A vifon ve Nyùy woo Taà Vitu vi kù wíy a tiy fo, e dù, e jòʼsì, aàfon adzə̀me wíy a lìm fo wun, a yunín wun.

Joon 3:35

Nyùy Tàr koŋ Wán və, a wù wày ne vinyo vidzə̀m a dzə̀ e wùn kiwo.

Daniel 2:44

«Atǎr saʼ vìne wíy lóo saʼ, é Nyùy woó yuv neer á rə́ yee sáʼ ye yí yòʼ wíy mày, a bó wír ámóʼó yòʼ wíy yu a fó sə, a saʼ. Yí wíy laàr a sáʼ afòn vìy, é yí may ŋkuuŋkùŋ, é nèn kù a tiy a sáʼ Nyùy rə̀n fo, e dù, e jòʼsì.

Hibru 12:28

Mo sáʼ Nyùy ye vèsən wíy nəə́ shoo dzəə̀n, a bó yòʼ dzə̀ yí sə̀ʼ, vèsən ku nèn a beèrì wun bìʼ kee shooy, a ghvəm wun, a yu a dzə̀ fó fo, a kiíy ji dzə̀ vèsən wàa fàn a wun,

Ŋgaà Yen 17:14

Á wíy lò, aá nèn bàʼtí rə́r, a màʼ Wan Njiì Nyùy sho. Yii bèy, é Wan Njiì Nyùy wùn à wír vəə́ só áwune, bìʼ fo dzəə̀n wun woo Tàr fo atàrí adzə̀m, kfə́n a dzə wun Fon fo afone adzə̀m. A wír vìne dzə̀ ve wù liìn ji və́, á wáy shilív e wun wùn, a tiy a dzə̀ wùn áwune.

Matio 28:18

Jesus kóʼtí, e sùúy aáwune jii, «Nyùy wày ne sáʼ yeé yuv wùn à yeé nsayi e dzə̀m e mǒ kiwo.

Matio 11:27

Jesus nèn kfə̀n sùúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bó yòʼ dzə̀ sá wír, wù kìíy Tàr wor, kù jòʼsì mo woo Wán wùn à wír ve Wàn shoʼtin ji wun din Tàr wov shóo.

Aysaya 9:7

Sáʼ rəə́ kù wíy a kuy, a dù duùn fó mbìy, a kitúm kfə́ kí kù wíy a neŋ e mvə̀m vikùʼùy ji dèʼ. Wù wíy a saʼ ji njìlaʼ Fòn Davir, e kù a tiy a dzə̀ é kinyò kee réŋ kí, a saʼ vifon və́ tìítiy, là kiloʼ, a bó sáʼ rəə́ yòʼ wíy mày. Nyùy Tàr woo Taà Mànjòŋ kù wíy yiì kinyo kìn bìʼ shíi və.

Ŋgaà Yen 3:21

Vèn wáa kiíy jii, wìr wo wù wíy so vinyo veé ndzə ye bi rə̀n, dzə̀ wo m wíy lì, é vèr wun wáa dzə e mǒ kàvàʼ, réŋréŋ sá mo mò‑oò soon vinyo veé ndzə, Tàr wor Nyùy lì mo, vèr wun wáa dzə e wùn kàvàʼ.

Ŋwàʼ Luk 1:33

é wù sáʼ wír ve á ràmèn fo Jakov adzə̀m, e dù, e jòʼsì. A bó sáʼ rəə́ yòʼ wíy mày.»

Mayka 4:7

M wíy lèm antèŋ vee kibér ke wíri, aá gwar kitúm ke sən kí, é wír ve vé‑eè jùmèn viné wìy a dzə kitúm ke kuʼùn kí, é mo woo Nyùy Tàr nèn a saʼ áwune fó Gwan Sion, e kèʼ fo lèn, e dù, e jòʼsì.»

Obadia 1:21

A vé saʼa kù wíy a koʼ e Gwan Sion, é wír veé Gwan Esavi kú a yu sáʼ a dzə̀ fó fo, é vifon vi wáa dzə vé Nyùy Tàr.

Daniel 3:4

Gwèy nèn a fuŋ jii, «Wìr dzə̀m yuúrí, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Fòn suuy jii,

Daniel 2:35

Á bèy, kibámmbó kí ku nèn keèsì, vifá ve á fèrìn shó vi bvə́ʼə́y vidzə̀m, a dzə vikpuún á moo mvə́y se ŋgwàsáŋ wo á buʼun. Kisha kee kisha ki bvə́ʼə́y, à nsay mbóm shó, à kisha kee brons ki, e bóo lì a kisha ke mbàm ke fəvír kí wùn à ke baar kí. Shwéri nèn wìy, e fèér, e dù a sho, la kfəʼ yòʼ kfə̀n à bèr. Yii bèy, kilán ke kí‑ii kèrìn kibámmbó kin ki nen lò, a kùʼ, e mèé e kirùmèn ke wiy kí, e sə̀tí a kitú ke nsay.

Aysaya 60:12

Á kù kér fóo wìy a wìy sho bèy, bìʼ fo, a kitúm ki tèn, bo á wíy tòn kitúm kee shooy, é kí lay ŋkuuŋkùŋ. Á wíy tatí vitúm vee shooy, e laàr vidzə̀m.

Nsùyrì Nyùy 146:10

Wír veé Sion, Nyùy Tàr wíy a saʼ vifon ghán sidzə̀m. Wun woo Nyùy won kù wíy a saʼ e ŋgwàʼ sí ŋgwàʼ si. Á wáa burí Nyùy Tàr.

Nsùyrì Nyùy 145:13

Vifon vé vi dzə̀ vifon, a bó yòʼ dzə̀ ví mày, a sáʼ yée kù wíy a tiy fo e ŋgwàʼ sí ŋgwàʼ si, là may. Nyùy Tàr kù yii tíy e wun jì, a vinyo ve wù yii vidzə̀m vi kù din mo wù dzəə̀n e juŋ.

Nsùyrì Nyùy 45:6

Á dzə̀ Nyùy, a sáʼ rəə́ kù wíy a tiy a fo, e dù, e jòʼsì. Sáʼ rə́ vifòne dzə̀ á sáʼ yee là kiloʼ.

Nsùyrì Nyùy 8:6

Wò‑oò fò wun vitaáví, wù wáa saʼ lim see wò wo sidzə̀m, a vifá vidzə̀m vi sì e wun sar saʼ,

Joon 12:34

Màŋgòŋ nèn a suúy sho jii, «Vèr kì kér fó Ŋwàʼ Nyùy ji *Mfə̀ə́r wo Nyùy‑iì kàʼàn wíy a dzə sho ghán sidzə̀m. À kfə́n a suúy ji á wíy koʼór ŋgaà wo yírí dzəə̀n *Wanwìr e kici moó le? À yoŋ wír və̀n a dzə̀ la?»

Ŋwàʼ Luk 10:22

Jesus kfə́n a suúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bo yòʼ dzə̀ sá wìr kìíy Tàr wor və̀n, kù jòʼsì mo woo Wán wùn à wír ve Wàn shoʼtin ji wun din Tàr wov shóo.»

Daniel 7:18

Yii bèy, a wír Nyùy woo Taà Vituu wíy sə sáʼ yeé wòŋ, e yòv, a ker a viyá viyá là may.

Daniel 6:26

Sáʼ ye m fóo dzə̀ jii, «A wìr dzə̀ feé e mǒ wòŋ, bo wù kù kér fó a yunín, a ghvəm Nyùy wo Daniel ghvə́mé. «Dzə̀ wun Nyùy wo wù gòʼòn kàŋ mòʼón, a wù kù dzə̀ ji wun, e dù, e jòʼsì. Vifon və́ ví dzə̀ ve bó yòʼ dzə̀ kifá ki laàr, a sáʼ rəə́ kù wíy a tiy fo, e dù, e jòʼsì.

Daniel 4:3

«Vinyo ve ví din vitaáví və́ ví shoò é ŋàŋ, a viŋgaʼnìn ve vinyò ve wù yii vi dzə̀ viwiíwíy. Kù dzə̀ wun fon ghán sidzə̀m, e dù, e jòʼsì, a sáʼ rəə́ kù wíy a tiy fo, mo ŋgwàʼ wíy a koʼ, a fo ghay e yìmòʼ.

Nsùyrì Nyùy 102:22

mo wíri wíy a wìy e Jerusalem, woŋ jeéy jeéy, a wìy vitúm vitúm ji á cu á Nyùy Tàr fó.

Nsùyrì Nyùy 72:17

Yír fòne kú a tiy fo ghán sidzə̀m, é leŋ vəə́ kú a dù duùn, mo woŋe wíy mày. Wíri kù wíy a lon kisəəvì fo Nyùy, a dzə̀ ke wù‑uù səə̀vìn fon sho, a vitúm vidzə̀m vi wíy a yòŋ wun ji ŋgaà mbùʼmé.

Nsùyrì Nyùy 72:11

Afon adzə̀me kú a dzə e wun sar saʼ, é wìr dzə̀m woó kitu ke nsay wáa lìm fo wun.

1 Pita 3:22

e kòʼ é yuv, fo wù dzə́ lèn e Nyùy koy yìyí, sáʼ nshèelav se Nyùy wùn à vitú vév ví, à vifá ve ví kér vitaáví é yuv ví vidzə̀m.

Ŋgaà Yen 1:6

A wù yiì ne, vèsən wáa dzə rám Fòn woo Nyùy, e kfə̀n a dzə atàá cù, a cù Nyùy woo Tàr wov. Vèsən ku nèn a kwa wun, a ghvəm vifon və́ ghán sidzə̀m, e dù, e mày. Amen.

Aysaya 16:5

Á bèy, bìʼ koŋ ye Nyùy koŋ wír və́, á wíy bùn wír woo Davir ram ji fon, a fòn və̀n wíy a suúy kinyo, e kù a tiy a dzə̀ e kíwun ki. Wù kù wíy a yiì kinyo a dzə̀ kee tìítiy, e way feyì kitávín ji á kú a tinén vinyo e nsànloŋ, a yiì vinyo və́ vidzə̀m a dzə̀ vee réŋ.

Daniel 2:37

Nyàr, á dzə̀ á fon fo afone. Nyùy woó yuv fò á ne wun kitúm ji á wáa saʼ, e fò á wun vitaáví wùn à vikuʼùy ví.

Nsùyrì Nyùy 103:19

Nyùy Tàr tùúy ne kàvàʼ və é yuv, a wìr dzə̀m dzə̀ e wun sar saʼ.

Aysaya 9:6

Kí dzə̀ jii, vèsən kòóy ne wán. Á fò ne vèsən wán lumèn. Wù wíy a saʼ vifon. Á wíy a yòŋ wun jii, Ŋgaà Ntir wo ghaʼán, Nyùy wo kuʼùn, Tàr wo wù gòʼòn kàŋ mòʼón, Wan Fòn woo Ŋgaà Nyaáŋ.