Daniel 10:12 - ŊWÀʼ NYÙY

¹² Yì nèn yòŋ mo jii, «Daniel, lá à yòʼ a fàn. Nyùy kù‑uù yù ne tóŋ yé, e kèʼ fo kishiíy ké mbìy ke wò‑oò neèmèn e wun si, a lon ji wù ku yiì, áà kiíy jeéyjeey ntum ye yì‑iì wìyìn e wò. M wìy bèn, a dzə̀ bìʼ kinyo kee shooy.

Daniel 10:12 Referans Kwoze

Daniel 10:19

Wù nèn yòŋ mo jii, «Wò, wo Nyùy kòŋèn é ŋàŋ, lá à yòʼ a fàn. Nyaáŋ wáa dzə vèn wun. Á dzə kitávín, ku tàv ben, e kòŋrí.» Wù súŋnín bey, vitaáví ví ku nèn wìy e mǒ wùn. M bìnèr jii, «Tàr wor, kú a suŋnín. À kù kì tàvír ne mo, wún wómé kfə́n fó.»

Aysaya 58:9

Á bèy, vèn lóo bùnrì lèn, é mo woo Nyùy Tàr wáa yu, a sə ven. Vèn lóo toŋ e mò, é m biner jii, ‹M və̀ne, mo‑óò sə́ ven.› «Kù dzə̀ ji vèn yar fó a nyàvrì e wíri, e làa yòʼ a toy wír e kinyò kisáŋ, kìn ji á wáa roòmè wír là jay.

Matio 28:5

Nshìylav Nyùy rə̀y suúy e vikìy víyi jii, «Lá vèn yòʼ a fàn. M kì ji vèn taʼ a dzə̀ Jesus wo vé‑eè yuyrin é kintam.

Aysaya 65:24

Á wíy a jì ji á wáa toŋ e mò, a m biímé ne, lóo bunrì, aá dzəə́ bunrì bùnrìn, a m yú ne.

Aysaya 41:10

Lá vèn yòʼ a fàn, m dzə̀ vèsən. Lá kindzə́m kí yòʼ a gwàr ven, m dzə̀ Nyùy won. M kù wíy a fo ven vitaáví, a sə ven. M wíy a kìŋsìn ven e vitaáví vém ve ghaʼán ví.

Aysaya 41:14

Rúrú, rám Jakov, fə̀m mo vèn dzəə̀n là kitar moo kiŋgoóŋgoŋ, ven vee wír veé Isray, lá vèn yòʼ a fàn. Mómò, m wíy a sə ven. Suuy mo woo Nyùy Tàr woo Mfə̀ə́r won, mo woo Ŋgaà wo Ranén woó Isray.

Aysaya 35:4

Vèn suúy e wír ve á kù sí kér melív a dzə̀ é woo jii, «Vèn tiím kitávín, lá vèn yòʼ a fàn kifá. Vèn yén ri, Nyùy wòsən sí wiyì. Wù wiy ji wun kwaŋ vinyo vén vee ŋkfə́né, wiy ji wun siir ŋkfə́tír e wír ve á nəʼsì vené. Wúnwun kitú kfə́ wíy wìy, e bòyìr ven.»

Ŋwàʼ Luk 24:38

Wù dzə́r jii, «Kí tárir ven ben ji ka? Vèn méŋnin mo ji ka?

Cù 16:31

Kù wíy a dzə kishiíy ké meèmè kee jeéy kí fo vèn, ke vèn wáa dzə, a ten vifá veé shií. Kù wíy a dzə nsər ye vèn wíy a lèm, e dù, e jòʼsì.

Cù 16:29

«Nsər ye yì kù wíy a tiy ghán sidzə̀m nén a dzə jii, wíy lòo dzə e kishiíy ke kí meen ji ghvə̀m fo ŋwee wo wú meen ji saàmbà, é vèn nəʼsi vitú vén, e lèm kishiíy kee shooy ji ké bam, kìn dzə̀ ven vee wón nsay, kìn viŋgwìy ve ví dzə́ e věn mvəm.

Ŋgaà Yen 1:17

Mo m yenen wír və̀y, e nèn gbù e si wo, a m sì moo kimkpú ke kifa. Wù màʼ kiwó kfə́ ké yìy kí e mǒ wùn, e sùúy jii, «Lá à yòʼ a fàn. Dzə̀ mo wo dzəə̀n Keʼ, e kfə̀n a dzə Kinjòʼsì,

Lim Aŋgàa Ntum 27:24

e yòŋ mo jii, ‹Por, lá à yòʼ a fàn. À kér fó wìy tiím e Fòn woó Rom si, a Nyùy bùʼ ne wò jii, wìr fo ve vèn áwune dzəə̀n é kikoŋe yòʼ wíy lày.›

Nsùyrì Nyùy 69:10

Mò‑oò lèm jíŋ, a neŋ e wò si, kí nèn kfə̀n ji liy sém.

Ŋwàʼ Luk 2:10

Wù suúy jii, «Lá vèn yòʼ a fàn, m wiy a dzə̀ e sáʼka wo juŋ, a wù yíi fo kishéʼrì ke kuʼùn kí e wìr dzə̀m.

Ŋwàʼ Luk 1:30

Nshìylav Nyùy yòŋ jii, «Maria, lá à yòʼ a fàn. Nyùy bùʼ ne wò.

Ŋwàʼ Luk 1:13

Á bèy, nshìylav Nyùy rə̀y yòŋ jii, Sekariya, lá à yòʼ a fàn. Nyùy yù ne bunrì yé. Wiíy wò Lisaber wíy boŋ bvəm, e dzəə́ wán lumèn, aà kù wíy a yòŋ yír ji Joon.

Maak 16:6

Wù suúy jii, «Lá vèn yòʼ a fàn. M kì ji vèn taʼ a dzə̀ Jesus woó Naasarer wo vé‑eè yuyrin é kintam. Vèn leéy ri lèmé fo vé‑eè neèrìn wun. Wù yòʼ dzə̀ə́ fo. Wù fəə̀ ne fo kpu.

Matio 28:10

Jesus suúy jii, «Lá vèn yòʼ a fàn. Vèn wáa dù, e sùúy aàfə́r vémé jii, áwune wáa dù e Galeli, é vèr áwune tár á fo.»

Daniel 10:11

Nshìylav Nyùy rə̀y nèn yòŋ mo jii, «Daniel, wò wo Nyùy kòŋèn é ŋàŋ, Nyùy tùm ne mo fo wò wùn. Lò é yuv, e fò vituʼùr ví é kinyò ke m lo, a suúy e wò.» Kù mo wù suuy e mò bey, m túm, e tìím e yuv, a yàʼ yàʼàn.

Kintaŋ 29:7

«Wíy lóo dzə e ŋwee woo saàmbà, e kishiíy ke kí meen ji ghvə̀m, vèn bàʼtí, a bùnrì Nyùy Tàr. Vèn lem jíŋ, e làa yòʼ lìm lim.