Daniel 1:17 - ŊWÀʼ NYÙY

¹⁷ Wónlě nsùm vee akweè vìne dzə̀, a Nyùy‑iì fò áwune vifií ve á wáa kiíy jeéyjeéy fó vinyò, e yiì, á fiír é ŋàŋ. Daniel ló kfə́, e kìíy kinyo kee kùm vinjeenjèm wùn à ké njèm se toʼtín sí é ŋàŋ.

Daniel 1:17 Referans Kwoze

Jeem 1:5

Wìr méŋ mo dzə̀ wù yiì, wù kù a lon a dzə̀ fo Nyùy, é wù naari mo dzə̀ wù ghàn. A dzə̀ mo wù kù yii kér shilív sə́ tèéter, naarì wir dzə̀m, e làa yòʼ a saʼ wír wo wù dzə́r dzə́ə.

1 Afòn 3:12

bo mo‑óò fó kifá ke à lonen. M sí fó wò vifií ve à wáa kiíy jeéyjeey vinyò, kfə́ə ve wìr yòʼ‑oò yiì ne a ker, a wìr yòʼ wíy a ker.

Daniel 2:21

Wù lo, wù kùvsín ghán sé vinyò, à seé kiya si. Kù kóʼor wun afon, a kù sə́ wun vifon fo áwune. Kù fó wun vifií áàfií, yii, a wír ve á fiiriné kiiy jeéyjeéy fó vinyò.

Ŋwàʼ Jov 32:8

Yii bèy, wìr dzə̀m kù kér vifií ve wù kwaʼtì vinyo sho, Ŋgaà Vitaàví Vidzə̀m yoy e wìr wùn, ŋgaàŋ nèn kù lì vifií fó fo.

Daniel 2:23

Éè Nyùy wo atàr vémé‑eè ghvə́mé, m beerì, kfə̀n búri wò. À fò ne mo vifií wùn à vitaáví ví, e yiì, m kiíy kinyo ke vèr‑ii lòn wò sho. À yiì ne, vèr kiíy kinyo ke fòn‑ee dzə́r e vèr.»

Kolosia 1:9

Kèʼ fo kishiíy ke vèr‑iì yuun mo vèn wayin shilív e Jesus Kristu wùn, vèr ku nèn a bùnrì fo vèn ghán sidzə̀m. A vèr lón ji Nyùy ku yiì, é vèn kiíy vinyo ve ví dzəə̀n e wùn shiliv, a kiíy ghán sidzə̀m mo wù koŋ ji vèn wáa yiì, é vèn nèn a kiíy rú vinyo.

Ŋgàn 2:6

Rúrú, kù fó Nyùy Tàr vifií ve ru ví. Kù yii jí sə́, é bo wìr wáa kiíy vinyo, e kfə̀n a gwàrìr vinyo kijuŋ.

Lim Aŋgàa Ntum 6:10

Wùn à Tefan wáa bìʼ bèy, a bó yòʼ‑oò dzə̀ áwune bìnèr kinyo kfə́ gheéy, bìʼ fo Kiyoy ke Ranén kí‑iì fó wun vifií é ŋàŋ.

Jeem 1:17

Vèn wáa kiíy jii, vinyo ve dzəə̀n ve ru vidzə̀m ve dzə̀ ví wàa fo vijuŋ vi kù lo a dzə̀ á fo Nyùy. A tsə́nsi wun woo Ŋgaà Mbom wo rán e dzə̀me lo a dzə̀ fó fo. A bó yòʼ dzə̀ wù kùvsín mo shùy yii lo, yì kèvrín, ndzə sə̀n wíri é ghan símóʼ sí gheéy.

Lim Aŋgàa Ntum 7:22

Á nèn yèʼéy Mooser vifií vé wìr veé Ejiv vidzə̀m. Wù wìy kùy, a dzə wir jì ye juŋ, e kfə̀n a dzə wír njiì kinyò.

Daniel 10:1

Wáa dzə e kiya ke kí‑iì meen ji taár, ke Sayrus‑iì sáʼ ji fon woó Persia, ntum Nyùy wìy fo Daniel wo yír yímóʼó‑oò dzəə̀n ji Belteshasar. Ntum rə̀n‑eè dzə̀ ntum ye ru, aá fínér, a yì‑iì tàv é ŋàŋ fo wìr kiíy mvə́m. Daniel wáy vifií é ntum fèy, kinjeenjèm ki wìy e wun si, wù kiíy mvəm ntum rə̀y.

Esiker 28:3

Ké ru kí, à fìír feyì, e shaà Daniel, bó kilìtì ke kinyò ke à méŋ ki yòʼ dzə̀.

2 Wòŋ 26:5

Wù kù‑uù yú fo Nyùy e ghan se taà cù woo Sekariya‑aà dzə̀ə́ sho, a wù tír wun e vinyò ve Nyùy. Mo wù‑uù jumrì Nyùy Tàr bey, Nyùy Tàr nèn səə̀vì wun.

Kintaŋ 12:6

Wù suúy jii, «Vèn yuúrí kijuŋ. *Ŋgaà ntum wom yii lóo dzə e věn mvəm, m wàa dìn kitú kém shó e njà vinjeenjèm, e kfə̀n a suŋnín sho e njèm.

Lim Aŋgàa Ntum 7:10

a sə wun fo ŋgeʼ se wù‑uù yén sidzə̀m. Wù kfən fò wun vifií, Farao woo Fon woó Ejiv wáa kòŋ wun, e fò sáʼ sho, wù wáa leéy fo wòŋ wùn à kfə́ə fòne.

Daniel 7:1

Wáa dzə e kiya ke mbìy ke Belshasar‑iì sáʼ ji fon woó Babilon, Daniel neém e wun kikun, e lòo buuné, njèm shí wun, kilìtì ke kinyò ki wíy e wun si e njà kinjeenjèm. Á bèy, vitú ve vinyò ve Daniel‑iì saŋen, e naàrì kùm njèm rə̀n vi víne.

Daniel 2:19

Yiì lòo dzə vitsə́ʼə́, kilìtì ke kinyò kìn ki wìy e Daniel si e njà vinjeenjèm. Á bèy, Daniel wáa burí Nyùy woó yuv.

Ŋwàʼ Luk 21:15

Wíy way mo jí si e věn shuù, e fo ven vifií, a bó yòʼ dzə̀ aŋgaà vén gòvi wìy kìíy mó a bìnèr, a kìnèn kinyo kén.

Aysaya 28:26

Kù sə́ Nyùy Tàr woo Nyùy wòsən ŋgaà sùm, é bo wù wáa kiíy kinyo ké a yiì e súmé, a yiì e ŋgoòy kifa.

Ŋgaà Tàrvìnyò 2:26

Nyùy yii fó vifií, fó kiíy wùn à vijuŋ vi e wìr wo wù yú wun. Yii bèy, lóo dzə wír wo wù ŋwáy wun, Nyùy nèn fò kfə́ ji wù wáa gisín, a baʼtí bùʼ, é ku yiì yòv wír wo wù yú Nyùy. Kin ki kù dzə̀ sá lím kisaŋe, a dzə̀ moo wír wo wù mum ji wun bám shwér.

2 Wòŋ 1:10

Ku fò ri mo vifií wùn à kiíyi, é m wáa saʼ wír vìn sho. Kí búŋ fó bèy, bo bó yòʼ dzə̀ wìr kìíy móo saʼ wír vé ve á dzəə̀n agháʼán vin.»

1 Afòn 3:28

Wír veé Israyi yú mo Fòn Solomon tinen nsaʼ rə̀n, e nèn a ghvəm wun, bìʼ fo wìr dzə̀m‑eè yenen ji Nyùy fò wùn a vifií ve wù wáa tinén a nsaʼ réŋréŋ mo yì dzəə̀n.

Daniel 8:1

Wáa meé ji viyá vitaár mo Belshasar‑iì sáʼ vifon, mo woo Daniel, m kfən yèn kinyo e njà kinjeenjèm, e bàr ké mbìy ke kí‑iì meésinè sho.

Daniel 5:14

M dzə̀ a m yú leŋ wó ji à kér a kiyoy ke anyùy ve á dzəə̀n aránén, aà fìír a e ŋàŋ, e kfə̀n a kiíy jeéyjeéy fó vinyò, a vifií vee jeéy ví kùʼ a e wò kitu.

2 Wòŋ 1:12

bo mo‑óò fó wò vifií wùn à kiíyi, e kfə̀n fo wò vikuʼùy, e fo mbàm, e fo ghvə́m, e dzəə ye bó fòn wùmòʼ wo wù‑uù saʼan ne e wò mbìy yòʼ‑oò yiì ne a ker, a bó wùmòʼ wo wù wiy fo wò bàm yòʼ wíy a ker.»

Daniel 1:4

A wónlě nsùm vìne kù kér fó a dzə ve á yòʼ kér ndzə́m, aá kér sí ye juŋe, kér mbùʼme vifiì, kiiy vinyo e ŋàŋ, kfə̀n táv gwarìr kinyo cér, aá dzə̀ ji wír ve á gheenen fó a lìm e ntoʼ. Wù shóʼti, é wù wáa yeʼéy áwune á mo á wáa saŋ, e kfə̀n a yòŋ lám woó Babilon.

Daniel 1:18

Viyá vee vitaár vi mày, fòn toóy ji á li lèn wír vìy, e wìy a sho e wun si. Kitú ke nsheèlav kìy ki nèn lì áwune, e kòʼtí sho e Fòn Nebukadnessar si.

Daniel 1:20

Fòn káʼáy vifií vév, à kiíy ye á kiiy jeéyjeéy fó vinyòo, e yèn jii, aá lòo dzə, e neèr vifií vév kirə́ʼ e ghvə̀m, la aŋgàa səm wùn à vé fù vee wun kitume yòʼ lì a kee kimòʼón ki.

Daniel 2:30

Fo kém kí, Nyùy nen yiì, m kiíy á kilìtì kìn, a bó yòʼ‑oo dzə bey a bìʼ fo m kér vifií é ŋàŋ, e shaà wir msòŋ e dzə̀m. Kí‑ii koóy bey, éè tàr wor, ji tàr wor ku yù á nsàv njèm rə, e kiíy a jeéyjeéy fó vinyò ve ví dzəə̀n e wun kwàʼtì.

Daniel 4:6

Á bèy, m nèn tòóy vé si veé Babilon ji á wiy, e tòʼtí a njèm rə̀n, e fò e mò.