1 Timoti 1:1 - ŊWÀʼ NYÙY

¹ Ŋwàʼ və̀ne sàŋ mo woo Por wo dzəə̀n ŋgaà ntum Jesus Kristu. A m lò ntum rə̀n a dzə̀ mo Nyùy wùn Jesus Kristu‑uù suuyin. A dzə̀ wun woo Nyùy wo wù‑uù fəərin vèsən fó lòn ji á fiʼ wìy lùŋ. Kristu nén a dzə kfə́ wír wo vèsən tiir vifií é wùn wó ji wù wìy lì vèsən, e wày é vijùŋ ve Nyùy kàʼàn vèsən shó.

1 Timoti 1:1 Referans Kwoze

Titur 1:3

Ghán se wù‑uù sìysìn sí gheén lèn, wù nen yiì, á wáa fìʼtì kinyo kfə́, wíri wáa kiíy dzəʼə̀m yee shooy. A dzə̀ kíwun kee kinyo ke Nyùy wo wù luŋèr vèsən wayin e mǒ kiwo, e sùúy ji m wáa fìʼtì.

Kolosia 1:27

A kù dzə̀ mo wù‑uù sìysìn ji wun wíy yiì, é wír vəə́ kiíy á kinyo ke wù‑uù lìtìn kin, kee ji wun wíy bùʼ vitúm vidzə̀m e vijuŋ ve ghaʼán ví. Mo Jesus Kristu siìn e věn meliv, a dzə̀ vèn kìíy ji vèn wíy nəə́ e wun woo Nyùy mvə̀m vijùŋ veé yuv.

Lim Aŋgàa Ntum 9:15

Taàtá Jesus bìnèr sho jii, «Ku dù fo. M shòʼ ne wír woo shooy ji ŋgaà wom lìm, é wù wáa fìʼtì kinyo kém e wír ve bó yòʼ dzəə̀n veé Israyi, e kfə̀n a fìʼtì aàfon véví, a fìʼtì sa e wír veé Israyi.

Ŋwàʼ Jud 1:25

Á kú a beè Taàtá wòsən Jesus Kristu, a burí Nyùy wo wù luŋèr vèsən. Kù mày wun Nyùy. Kér wun vitaáví vidzə̀m. Á wáa ghvəm wun woo Fon, a yu a dzə̀ fó fo, é sáʼ rəə́ wáa dù fo mbìy mo yí‑iì siìn fó ŋgùʼ, e kfə̀n a dzə lèn, e wìy a dzə ghán sidzə̀m, là may. Amen.

1 Pita 1:3

Vèsən ku nèn a beèrì Nyùy woo Tàr à Taàtá wòsən Jesus Kristu. Wù‑uù rə̀r ne mendzən fo vèsən é ŋàŋ, e yiì, vèsən wáa dzə wír və́ bìʼ Jesus Kristu. Mo Kristu‑uù kpuun fo vèsən, e kfə̀n fəə̀ fó kpu, vèsən nén a dzə wír ve á dzəə̀n afíy. A vèsən sí dzə́ lèn, njeʼ feyì, leey a dzə̀ fó mbìy ji

1 Timoti 1:12

M nén a beèrì Taàtá wòsən Jesus Kristu feyì mo wù‑uù wayin shilív e mǒ wùn ji dzə̀ m yiì á lim rə̀n. A m lim a dzə̀ mo wù foon vitaáví ve m wáa lìm sho.

Galatia 1:1

Sàŋ mo woo Por wo dzəə̀n ŋgaà ntum Jesus Kristu ŋwàʼ və̀n fo vintatì ve wìr Kristu ve ví dzəə̀n é wòŋ woo Galatia vi. A ntum ye m fiʼtì rə̀n yòʼ lò a dzə̀ fo wìr. Bó yòʼ lèm wír mo, bo m wáa fìʼtì. Kù lèm Jesus Kristu wùn Tàr wòsən Nyùy, wo wù‑uù fəərin Kristu fo kpu. Vèr aàfə́r vén ve á dzəə̀n vèr áwune féne tàtí, a shàʼtì ven adzə̀m, a lon jii,

2 Korin 1:1

Sàŋ mo woo Por, vèr fər wòsən Timoti ŋwàʼ və̀n. Dzə̀ mo wo dzəə̀n ŋgaà ntum Jesus Kristu mo Nyùy‑iì sìysìn. A ŋwàʼ və̀ne dzə̀ fo vèn vee kintatì ke Nyùy ke kí dzəə̀n é Korin, e kfə̀n a dzə sa fo wír Nyùy ve á dzəə̀n e věn wòŋ woo Akayàa adzə̀m.

2 Pita 1:1

Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

1 Timoti 2:7

Jesus Kristu nèn lì mo ji ŋgaà ntum və ji m wáa fìʼtì a dzə̀ kinyo kee shoon. Wù‑uù lo lì mo rú, a bó m yòʼ bóʼti. A wù‑uù lì jii, m wáa yeʼéy wír ve bó yòʼ dzəə̀n veé Isray kinyo ke dzəə̀n ke ru kí, aáwune wáy shilív e wun woo Kristu wùn.

2 Tesalonika 2:16

Vèr ku nèn a lon fo wúnwun woo Taàtá wòsən Jesus Kristu wùn Tàr wòsən Nyùy jii, á kú a bayrí melív men, a tavír ven, é vèn wáa suúy, a yiì a dzə̀ vinyo ve juŋ vi. A Nyùy wo vèsən lón fo fo və̀n‑eè lo dìn ji wun koŋ vèsən. Wù‑uù shàm vèsən, e yiì, melív mèsən mè wáa lùm ghán sidzə̀m, e kfə̀n yiì, vèsən wáa shìy a dzə̀ vijuŋ ve wù‑uù kàʼàn vèsən shó.

1 Korin 1:1

Sàŋ mo woo Por wo dzəə̀n ŋgaà ntum Jesus Kristu ŋwàʼ və̀n. A kù‑uù lì Nyùy mo mo wù‑uù sìysìn ji m wáa lìm a lim rə̀n. Dzə̀ vèr Sostener woo fər wòsən,

1 Joon 4:14

A ver vee aŋgàa ntume‑eè lo yèn sá Wán və wo wù‑uù tumen é nsay fèn ji wù wiy, e tìn wíri fó lòn.

1 Pita 1:21

Vèn nén a way shilív e Nyùy wùn lèn, a dzə̀ bìʼ Kristu wo wù‑uù tumen, wù wìy, e kpù fo vèn. Wù kfən fə̀ə́r fo kpu, e bùʼ e vikuʼùy və́ ví. Melív men mè nén a tiy lèn a dzə̀ e Nyùy wùn, vèn wáa leéy fó mbìy ji wù li sá ven, e wày e wùn mvə̀m vijùŋ foo fèy.

Titur 3:6

Wù‑uù lo fò Kiyoy kfə́ e vèsən nyanyày bìʼ kinyo ke Jesus Kristu‑uù yiìn, e tìn vèsən fó lòn.

Titur 3:4

Yii bèy, Nyùy wo wù luŋèr vèsən nèn wìy lò, e dìn mo wù koŋ vèsən, rə́r mendzən fo fo,

Titur 2:13

a shìy vijuŋ ve vèsən tiirin vifií shó, ji Jesus Kristu bvə́y, a wù sí kér vikuʼùy a dzə̀ veé yuv. Dzə̀ wun Nyùy wòsən wo ghaʼán wo wù luŋèr vèsən.

Titur 2:10

e làa yòʼ a shwìvìr kifá. Áwune kú a yiì vinyo tìítiy, a dìn ji áwune dzə̀ á wír vee réŋ. Á lóo yiì bèy, é wíri nèn a yen duŋrì ye vèsən duŋrì kùm Nyùy wo wù luŋèr vèsən ji kinyo.

1 Timoti 4:10

Á kinyo ke kí yii, bo vèr wáa ghìtìr, a lìm e Nyùy kinyò kitávín. Vèr lim, leey a dzə̀ fó mbìy, shiy vijuŋ ve Nyùy kàʼàn vèsən shó. Dzə̀ wun wo wù gòʼòn kàŋ mòʼón, kfə́n a dzə wun Ŋgaà Lùŋèr fo wìr msòŋ e dzə̀m, bo taaka fo ve á wayin shilív e Jesus Kristu wùné.

1 Timoti 2:3

Aá bunrì bèy, bo á yii kijuŋ feyì. Dzə̀ kinyo ke Nyùy koŋ ji vèsən wáa yiì, wun woo Nyùy wo wù‑uù fəərin vèsən fó lòn ji á fiʼ wìy lùŋ.

Galatia 1:11

Afə̀r vem, vèn wáa kiíy rú kijuŋ jii, sáʼka Nyùy wo juŋ wo mò‑oò wìyìn, a fìʼtì e vèn yòʼ dzə̀ á kinyo ke bomen wír,

Aysaya 45:21

Vèn wiy ri e nsaʼ yen, e naàrì. Vèn kfəynin, e rə̀tì, e fə̀ə́r kinyo ki. Vinyo ve ví kooy lèn, yì‑iì yìysí la fó ŋgùʼ? Feyì feyì, yì‑iì yoòyí la fó yàŋgùʼ? Bó yòʼ‑oò yoòyí mo woo Nyùy Tàr a? Nyùy wùmòʼ yòʼ kfə̀n dzə̀ shó, e shaà mo və̀n. M dzə̀ Nyùy wo wù yii vinyo tìítiy, a m dzə̀ Mfə̀ə́r, a bó Nyùy wùmòʼ yòʼ kfə̀n dzə̀.

Aysaya 45:15

Rúrú, Nyùy wìr veé Isray, wò woo Ŋgaà Lùŋèr, à dzə̀ Nyùy, aà yii vinyo e dzəə ye bó yòʼ jòʼ wir msòŋ, wù kìíy.

1 Korin 9:17

A dzə̀ ji kwàʼtì mo, e bó a yiì lim rə̀n, bo m kì taʼ vilaámé. Yii bèy, a bó yòʼ‑oò sìysì mo, kù‑uù wày Nyùy wáyín e mǒ kiwo.

Ŋwàʼ woó Rom 1:1

Ŋwàʼ və̀ne sàŋ mo woo Por, a m dzə̀ kém ji ŋgaà lìm Jesus Kristu. Wù‑uù lì mo ji m wáa dzə ŋgaà ntum və, e lèm ji m wáa fìʼtì a sáʼka Nyùy wo juŋ.

Ŋwàʼ Luk 1:47

a m yú vijuŋ, shéʼri Nyùy woo Ŋgaà Lùŋèr wom.

Hosea 13:4

Nyùy Tàr suuy jii: «Dzə̀ mo Nyùy Tàr woo Nyùy won, e kèʼ mo mò‑oò fəərin ven fó wòŋ woo Ejiv. Vèn yòʼ kfə̀n kér Nyùy wùmòʼ, e shaà mo, kù jòʼ mo cáʼ wo dzəə̀n ŋgaà lùŋèr won.

Aysaya 63:8

Wúnwun‑eè ló a suúy jii, «Rúrú, wír veé Israyi dzə̀ wír vém. Wón vém féyì, a bó á yòʼ wíy boʼtí mo.» Á bèy, wù ku nèn lì áwune é wùn, a dzə Mfə̀ə́r wov.

Aysaya 60:16

Vitúm vi yíi a fo bùʼ e vèn, kù mo kiyìy kí nyòór wán. Afone yíi a fo nyanyày vifa e vèn. Kí kooy bèy, é vèn nèn kìíy ji dzə̀ á mo və̀n wo mò‑oò bòyìrìn ven, mo woo Nyùy Tàr féyì feyì, mo woo Ŋgaà Vitaàvi Jakov, wo m dzəə̀n e gháʼtín, mo woo Mfə̀ə́r won.

Aysaya 49:26

M kér fó wìy yiì, é wír ve á nəʼsì vené kfə́r jáv yev wùn, e yiì, aá nó mensə́ mev, a tùŋkìr mo á nò a dzə̀ meluʼ. Á bèy, é wìr msòŋ e dzə̀m nèn kìíy ji mo woo Nyùy Tàr dzə̀ á Ŋgaà Lùŋèr won, mo woo Ŋgaà wo Ghaʼán wo Jakov ghvə́mé, a kù boyìr wun ven.»

Aysaya 43:11

Kù jòʼ mo cáʼ wo m dzəə̀n Nyùy Tàr. Wìr wùmòʼ yòʼ dzə̀ shó wo dzə̀ wù lùŋèr ven.

Aysaya 43:3

Dzə̀ mo Nyùy Tàr woo Nyùy won, Ŋgaà wo Ranén woó Isray, wo wù luŋèr ven. M lì ne wír veé Ejiv, e tìn ven shó. M ku kfə̀n tàŋ ven fo kpúu, e fò wír veé Etiopia wùn à veé Sebàa.

Aysaya 12:2

Rúrú, Nyùy dzə̀ ŋgaà wo wù luŋèr mo. M yíi a yeʼtí a dzə̀ e wun wùn, e làa yòʼ a fàn kifá. Feyì feyì, dzə̀ wun woo Nyùy Tàr wo wù távir mo, a kù dzə̀ wun wo m yov, suyrì. Wù dìn ne rú ji wun dzə̀ á ŋgaà wo wù luŋèr mo.»

Nsùyrì Nyùy 106:21

Áwune láysín Nyùy woo ŋgaà lùŋèr wov, wun wo wù‑uù yiìn viŋgaʼnìn ve vinyò e Ejiv,

Ŋwàʼ Luk 2:11

Á dzə̀ə́ ne wán e Fòn Davir ntèʼ é kishiíy ké lán ki, a wù wíy lùŋèr ven, bìʼ fo dzəə̀n *Mfə̀ə́r wo Nyùy‑iì kàʼàn, a dzə̀ wun Taà Ndzə.