1 Samuel 2:1 - ŊWÀʼ NYÙY

¹ Hanna wáa bùnrì jii, «Nyùy Tàr rùnér ne shilív shém e kishéʼrì ki. M yú vijuŋ bìʼ kinyo ke wù yiìn e mò, a m shéʼ aŋgaà vém vibàn shéʼén. Nyùy Tàr, m yú vijuŋ, bìʼ fo à səən ne mo.

1 Samuel 2:1 Referans Kwoze

Nsùyrì Nyùy 13:5

Yii bèy, m kù yéʼti a dzə̀ e wò wùn, wò wo à koŋ wír vé ghán sidzə̀m. M yíi a seŋ ji à fə̀ə́r ne mo fó ŋgeʼ.

Filipi 4:6

Lá vèn yòʼ a yaŋyáŋ bìʼ kinyo kímóʼ kí gheéy. Vèn kú a bùnrì a dzə̀ Nyùy, a neèr vinyo ve ví gháʼ ven ví e wùn si. Lóo bùnrì, á wàa beèrì sa wun fo vinyò ve wù rə́si yii e vèn.

Nsùyrì Nyùy 92:10

À tàvír ne mo, m táv moo nyar, e bùʼ mo e kishéʼrì ki.

Nsùyrì Nyùy 89:17

Dzə̀ wò kóy wór wo tavíné, wo vèr shéʼri. Kù yíi yiì tóm ye à tóm ver, é bo vèr ton aŋgaà vér vibàn.

Filipi 4:4

A m suuy e vèn adzə̀m jii, vèn wáa sheʼrí dzəʼə̀m ye vèn kér vèn à Tàr wòsən Jesus ghán sidzə̀m. A m suuy, kfə̀n lo li jii, vèn wáa sheʼrí.

Nsùyrì Nyùy 20:5

é vèr wìy a ndzəʼ ji fòn sò á ne aŋgaà və́ vibàn, a yòv nsiì e Nyùy yir, wun woo Nyùy wo wù sə́ ver. Nyùy Tàr ku fò fon kifá kidzə̀m ke wù lóné.

Nsùyrì Nyùy 9:14

é m fíʼ a sàmèr búrí yé e wír veé Jerusaleme, a sheʼrí wò bìʼ luŋèr ye à lùŋèrìn mo.

Nsùyrì Nyùy 35:9

Á bèy, é m yiì a seŋ, a sàvnìn. M yíi a sheʼrí Nyùy Tàr, wun wo wù faàsìn mo fo aŋgaà vém vibàné wo.

Filipi 3:3

Dzə̀ vèsən vin ve Nyùy naŋsin ne rú ji wír və́. Vèsən ghvə́m wun woo Nyùy, a bánri Kiyoy kfə́ vèsən. A vèsən sumrì wún bìʼ fo á dzəə̀n wír Jesus Kristu, a bó vèsən yòʼ wáy vifií é vinyò ve á yii ji bìʼ liì wòŋ gheéy.

Ŋwàʼ woó Rom 5:11

A bó yòʼ jòʼsì kishéʼrì ke vèsən wíy a ker e ghan see shooy. Vèsən sí yú vijuŋ lèn vèsən à Nyùy, mo Tàr wòsən Jesus Kristu yiìn ne, vèsən à Nyùy koó viŋkar.

Habakuk 3:18

bo m kù yíi a yu vijuŋ, a sheʼrí Nyùy Tàr. Dzə̀ wun ŋgaà lùŋèr wom.

Nsùyrì Nyùy 118:14

Nyùy Tàr dzə̀ vitaáví vém, a dzə̀ yòv wom, wù lò ne, e lùŋèr mo.

Nsùyrì Nyùy 89:24

M kù wíy a tiy vèr Davir, a kòŋ wun ghán sidzə̀m. M wíy sə wun, é wù ton aŋgaà və́ vibàn adzə̀m.

Ŋwàʼ Fəə 15:21

A Miriam tóri yòv, aáwune kooy jii: Vèsən yov luŋ, a sùyrì Nyùy Tàr, wù sò e viwìr vi. Wù màʼ nyam ŋkoʼ wùn à ŋgaà koʼ e rìbà ndzə̀v.

Ŋwàʼ Fəə 15:1

Mooser wùn à wír veé Israyi nèn a yòv luŋ, a sùyrì Nyùy Tàr. Vé‑eè yov jii: «M yíi a yòv luŋ, a sùyrì Nyùy Tàr, wù sò e viwìr vi. Wù màʼ nyamŋkoʼ, à ŋgaà koʼ e rìbà ndzə̀v.

1 Pita 1:8

Lèn və̀n, mo bó vèn yóʼ ne fə̀m yèn Kristu, vèn sí koŋ wun. Vèn kfə́n a way sa shilív é wùn wó, a bó á yòʼ yéné. Vèn nén a dzə, a ker kishéʼrì ke kuʼùn kí, a bó móo fìʼ yòʼ dzə̀,

Nsùyrì Nyùy 51:15

Éè Nyùy Tàr, mvə̀ʼ shuu wómé, é m yiì a burí wò.

Nsùyrì Nyùy 18:2

Rúrú, Nyùy Tàr dzə̀ kilán kém, kirə́ʼ ke kí kiŋsìn mo. Wù dzə̀ Mfə̀ə́r wom. Nyùy wom dzə̀ kirùmèn kém ké nsàm. Wù dzə̀ ŋkeè wom. Wù dzə̀ ntav wo wù luŋèr mo, kirə́ʼ kém ke tavín kí.

Habakuk 3:1

Bunrì *ŋgaà ntum Nyùy woo Habakuk.

Nsùyrì Nyùy 75:10

Nyùy Tàr wíy laàr vitaáví vé wìr ve á méŋ wun vidzə̀m. Yii bèy, wù wíy dzə̀sì vé wìr ve á yúnin wun dzə́sin.

Nsùyrì Nyùy 71:8

M búri wò ghán sidzə̀m. A m fiʼtì vikuʼùy vé ghán sidzə̀m.

Ŋgaà Yen 18:20

Wír vìn adzə̀me lóo dìy bèn, é wír ve á dzəə̀n é yuví wáa sheʼrí kév sheʼrín. Wír Nyùy wùn aàŋgàa ntum Jesuse wíy a sheʼrí adzə̀m, bìʼ fo Nyùy bìnèn ne nsaʼ yev, e màʼ ŋgeʼ e ŋkàlaʼ rə̀n kitu.

Ŋwàʼ Luk 1:69

Wù lèm ne wír wo ghaʼán wo wù wíy lùŋèr vèr, a wù lò fo Fòn Davir woo ŋgaà lìm və́ ram,

Nehemia 11:17

e lì sa Mattania woo wan Mika wo yì‑iì dzəə̀n wan Sabdi woo wan Asav. Mattania‑aà dzə̀ wír wo wù‑uù yíi kèʼ, a dànèr yòv nsùyrì Nyùy. Ámóʼó wáa dzə Bakbukiya wo yì‑iì dzəə̀n kisher ke Mattania, à Abda woo wan Shammua, Shammua wo yì‑iì dzəə̀n wan Galal woo wan Jedutun.

Remrí 33:17

Shúu rə́r Efrayim wùn à wó Manassèe dzə̀ ansə̀kì ansə̀kì. Wú kùʼ, e kfə̀n tàv é ŋàŋ moo ambòŋ vee dzə́ə mbìyi. Mo nyar yii kuur aŋgaà və́ vibàn e loŋ sə́ sí, dzə̀ mo rám Joosevi wíy a kuúr aŋgaà vév vibàn adzə̀m, a kuúy, a dù, a nəʼə́r e ndzəywoŋ.»

Ŋwàʼ Jov 16:15

«M kù màʼ ne a dzə̀ ndzə̀y sé kpu e wùn, aá sò ne mo ŋkuuŋkùŋ, m wáa ser a dzə̀ é kibvə̀r.

Nsùyrì Nyùy 148:14

Wù yiì ne, wír vəə́ wáa dzə agháʼtín. Wù nàn ne yír wìr və́ é yuv, yír wìr dzə̀m wo wù tíy e wun wùn, yír wìr veé Isray ve wù koŋ e ŋàŋ. Á wáa burí Nyùy Tàr.

1 Samuel 1:6

Pennina wùn Hanna wáa dzə, a sə kóy. Pennina wáa toònè Hanna e lámé, a tàʼ wun ntéŋ, bìʼ fo Nyùy Tàr yòʼ‑oò lo fò wun wán,

1 Samuel 1:7

kù bey, kù bèy mo viyá vi shaa. Á lóo koʼ e Nyùy Tǎr lav, Pennina kù màysì, a toònè shilív shé Hanna tóonen, wù wàa toŋ, a mùm ntéŋ fó yikír.

2 Wòŋ 20:27

Wír veé Juda adzə̀m wùn à veé Jerusaleme nèn a kfən e Jerusalem, a sàvnìn, bìʼ fo Nyùy Tàr‑iì tònèn aŋgaà vév vibàn, e fò aáwune. Vé‑eè kfə́n bèy, a Fòn Jehoshafat du fo áwuné mbìy.

Nsùyrì Nyùy 21:2

À fò ne wun kifá ke shilív sə́ shí tíy sho, bó à yòʼ‑oò lo ŋwèy wun kinyo ke wù‑uù lonen fo wun shuù.

Nsùyrì Nyùy 89:18

Rúrú, kér Nyùy Tàr ŋkeè wor rə̀r. Fòn wor kù dzə̀ a dzə̀ e wun kiwo, wun woo Ŋgaà wo Ranén woó Isray.