1 Joon 5:6 - ŊWÀʼ NYÙY

⁶ Jesus Kristu və̀n‑eè lo wìy, a dzə e nsay fèn, e dù, á wáy wun e ndzəv. Wù kfən dù, á yúyrí wun, mensə́ mvə mè cùrkìr. Mo wù wìyìn bey, e làa yòʼ dù a dzə̀ é ndzəv cáʼcáʼ. Wù‑uù dù sá, á yúyrí wun, mensə́ mvə mè cùrkìr. A Kiyoy ke Ranén kí bínsi sa ji kinyo kee shooy ki‑iì lo kòóy a bèy, a kí yii suuy kfə́ a dzə̀ kinyo ke ru kí.

1 Joon 5:6 Referans Kwoze

Hibru 9:14

Mo mensə́ me nyàm mè‑eè kér vitaáví fó naŋsín ŋgaà kifàn, bo me Jesus Kristu mè‑eè yiì kinyo, e shaà kee shooy feyì. Mo wù‑uù foon kitú kfə́, e kpù, a bó wù yòʼ kér njò yìmòʼ ye dzəə̀n ji rə́ə, Kiyoy ke Nyùy ke kí gòʼòn kàŋ mòʼón ki nèn yiì, woo shooy woo ntàŋrí náŋsín melív mèsən lèn, vèsən bóy fó vinyò ve vé‑eè yii, a bó yòʼ dzə̀ ví sə̀ wír wù ghèén fo Nyùy. Vèsən nén a dzə lèn vèsən à Nyùy, a lìm fo fo.

Joon 15:26

«Yii bèy, Ŋgaà Sə wo m suuyì wíy wìy, a wù lò a dzə̀ fo Tàr wor, a dzə̀ Kiyoy kfə́ ke kí yii din kinyo ke dzəə̀n ke ru kí. A wíy lon mo fo Tàr wor, e bóo tum fo vèn. Wù wíy wìy, é wù fiʼti e wíri mo m dzəə̀n,

Joon 16:13

Wun woo Kiyoy ke Ranén kí wíy wìy, é wù yii, é vèn kiíy vinyo ve dzəə̀n ve ru ví vidzə̀m, bìʼ fo kù yii din wun kinyo ke dzəə̀n ke ru kí. A bó wù yòʼ wíy a suúy kinyo ji suuy wun. Wù kù wíy a tiisí a dzə̀ kinyo ke wù yú, a fèr ven vinyo ve ví dzəə́ wìy a koóy.

Hibru 12:24

Vèn áwune wìy ne, e yèn Jesus wo wù‑uù tiimen e Nyùy wùn à wírí nsàn, bo wù gwar *mensaŋ me fíy mè wùn à wíri. Vèn nén a tiy a dzə̀ e wun woo Jesus kitu ke mensə me mè‑eè tinen ven tínén fó lòn, e làa yòʼ way ven é lòn wáyín mo me Abel mè‑eè wayin Keen.

Maak 14:24

Wù suúy aáwune jii, «Kin ki dzə̀ mensə́ mem me Nyùy gwar *mensaŋ sho, a mè leem fo wíri anín.

Joon 14:17

a dzə̀ Kiyoy ke Nyùy ke kí din kinyo ke dzəə̀n ke ru kí. A bó wír ve á kiìn vinyo a dzə̀ veé ndzə fène yòʼ dzə̀ á wàa ker Kiyoy kee shooy, bìʼ fo bó á yòʼ yén vinyo ve wù yii, nèn méŋ wun méŋén. Vèn dzə̀ kén, a vèn kì wun, bìʼ fo wù siìn e věn mvəm, a wù wíy a dzə a dzə̀ e věn meliv.

Ŋgaà Yen 7:14

M bìnèr jii, «Tàr, bó m yòʼ kì. Kù kì wò.» Wù nèn a naàrì jii, «Wír vee shoone dzə̀ á ve vé‑eè dzəə̀n é ghan sé ŋgeʼ ye tavín, e bóo bòy fo fo. Aá sù ne vikúm vév e mensə́ me Wàn Njiì mè, ví wáa ran, a fər.

Ŋgaà Yen 5:9

Á wáa gbù bèy, a yòv luŋ wo fíy wúmóʼó, a wú dzə̀ jii: «Kù dzə̀ wò, wo à gheenen fó sə ŋwàʼ və̀n, e bày mfìn, e mvə̀ʼ. Wò‑oò biìmé kpú, mensə́ mè mè leém, à tín wíri fó lòn, e siìr e Nyùy. A vé‑eè lò vitúm vidzə̀m, kìn dzə̀ ke kí súŋnin lám vəné, kfə̀n lò woŋ sidzə̀m wùn à rám wìr msòŋé e dzə̀m.

1 Pita 1:2

Nyùy woo Tàr wòsən‑eè shòʼ ven a dzə̀ mo wù‑uù sìysìn ne fo ŋgùʼ. Wù nèn wìy tùm Kiyoy kfə́, kí wìy, e nàŋsín ven ji və́ vee wír. A wù‑uù yiì bey, ji vèn wáa dzə, a yu a dzə̀ á fo Jesus Kristu, é mensə́ mvə mè táŋrí ven, é vèn boy fó njò. M nén a lon jii, Nyùy kú a shaà fo mbìy, a leéy fo vèn, a yiì, é melív men mè wáa dzə nyaáŋ.

Hibru 13:20

Nyùy wo wù yii, a melív mèsən mè dzə́ nyaáŋ kú a leéy fo vèn. Dzə̀ wun wo wù‑uù fəərin Taàtá wòsən Jesus fo kpu, wù wáa dzə lèn ji Nshìy Njiì wo Kuʼùn, a leéy fo wír Nyùyi adzə̀m. Yì‑iì cùtì wun mensə́ mvə, e bóo way wíri e Nyùy mvə̀m *mensàŋ me bó yòʼ dzə̀ mè wìy mày.

Joon 4:14

Yii bèy, a bó kilòŋ kí yòʼ dzəə́ wìy yum wír wo wù nó mendzə́v a dzə̀ me foon mo. Mee shooy mè wíy a dzə e ŋgaàŋ wùn ji ntoò ndzə̀v ye yì fəə́ ghán sidzə̀m, fó wun dzəʼə̀m yee là may.»

Ŋwàʼ Luk 22:20

Wùn áwune yíkír, e lòo màysì, wù kfən lì sa bàr, e sùúy jii, «Bàr və̀n dzə̀ *mensaŋ me fíy mè me Nyùy wíy gwàr e mensə́ mem mè, a mè leem a dzə̀ bìʼ ven.]

Matio 26:28

Dzə̀ mensə́ mem me Nyùy wíy gwàr *mensaŋ sho, a mè leem fo wíri anín, é Nyùy laysin ajay vév.

Esiker 36:25

M wíy tsəm shindzə́v she ranén shí e věn wùn, é vèn rán fó kifàn ke vèn‑eè liìn bìʼ vinyo vidzə̀m ve vèn‑eè lorin vitú vén shó. Vèn wíy ran fo kifàn ke vèn‑eè ghvəmen mebvə̀m, e lì.

Cù 17:11

Dzəʼə̀m kifa ke ŋeʼèn kí e dzə̀me dzə̀ é mensə. M nen fò mensə́ ji á wáa cùtì e kiy cù, a taŋrí ven shó. Mensə́ mè dzə̀ dzəʼə̀m, nén a dzə mewun me mè mán ajay.

1 Joon 1:7

Yii bèy, mo Nyùy dzəə̀n é ndzə ye ranén, wíri lóo ghan sa e ndzə ye ranén, áwune nèn a dzə kintatì, a ghan kiwuú kév kimòʼón. Mo á ghán bèy, Nyùy nèn kfə̀n sù sa njò yev, á wàa dzə là jay. A wù su a dzə̀ e mensə́ me Wan və woo Jesus mè.

Titur 3:5

e tìn vèsən fó lòn, á lùŋ. A bó wù yòʼ‑oò luŋèr bèy ji vèsən‑eè yii a vinyo ve ví wáa gheén wun. Wù‑uù lùŋèr vèsən cáʼ bìʼ və́ə woo nshámmé. Wù‑uù sù vinyo vesən ve bi ví, e fò Kiyoy kfə́ ke Ranén kí, kí yiì, vèsən kfə́n ji wír ve á siìn afíy, a ker dzəʼə̀m ye fíyi.

Efesor 1:7

A kí dzə̀ jii, mo Jesus Kristu‑uù cùtìn mensə́ mvə fo vèsən, Nyùy làysìn ne vinyo vesən ve bi ví, vèsən vee wír Kristùu bóy á fo ŋgeʼ, e lùŋ. Á mo Nyùy kòŋèn vèsən é ŋàŋ, e bùʼ e lúm mbùʼmé və̀ne ben,

Joon 6:55

Wún wómé dzə̀ vifá ve yi ve ru ví, a mensə́ mem mè dzə̀ nó yee rú.

Joon 4:10

Jesus bìnèr jii, «Aà bèn kì fómo wo Nyùy taʼ, e fo wò, e kfə̀n kìíy mo wìr wo wù lón mendzə́v fo wò və̀n dzəə̀n, bo kì yíi lon wò fo ŋgaàŋ, é wù fó wò mendzə́v me mè léŋ ghán sidzə̀m.»

Joon 3:5

Jesus bìnèr jii, «Kinyo ke m suuy kìn ki dzə̀ ke ru kí. Aá dzə̀ là fó dzəə́ wír fo mendzə̀v, é Kiyoy ke Nyùy ki kfən dzə̀ə́ ŋgaàŋ, bo bó yòʼ dzə̀ ŋgaàŋ nə̀ə́ e Nyùy mvə̀m saʼ.

Sekariya 9:11

Nyùy Tàr suuy jii, «Fo kén kí, ven ve m gwàrìn ne *mensaŋ vèsən, mensaŋ me á fìnèrìn e mensə́ mè, m wíy bòyìr wír vén fó sháŋ, aá boy fó bií kpu.

Ŋgaà Yen 1:5

A m kfə̀n lón fo Jesus Kristu wo kù yii din wun kinyo ke dzəə̀n ke ru kí e vèsən. Dzə̀ wun wir mbìy wo wù‑uù kèʼèn, e fəə̀ fó kpu, a kér wun afon ve á sáʼ nsay adzə̀m. Vèsən kú a burí wun wo wù kòŋèn vèsən, e cùtì mensə́ mvə, vèsən bóy fo vèsə́n lǒn vinyò ve bi ví.

1 Pita 3:21

Kinyo kee shooy ki wáa dzə kisəəm ké ndzəv ye á wáy wír sho lèn, wù ràn fo wun vinyò ve bi ví. A bó á yòʼ wáy bèy ji á su a dzə̀ lóm fo ŋgaàŋ wùn. Dzə̀ kisəəm ke kí din ji ŋgaàŋ lón fo Nyùy a ji wù ku sù shilív sə́, é shí rán. A wù bòy fo wùn ajay a dzə̀ bìʼ Jesus Kristu wo wù‑uù fəən fó kpu,

Hibru 10:29

Mo kí dzəə̀n bey, bo bó wìr wo wù leey kfə́ a dzə̀ Wan Nyùy ntéŋ yòʼ wíy a ker ŋgeʼ ye yì shaàn yee shooy feyì à? A dzə̀ wù kù a ker, bìʼ fo wù yii bèy, káy a dzə̀ kpú ye Wàn Nyùy‑iì kpuun, e bóo gwàr *mensaŋ me Nyùy liìn ŋgaàŋ ji və́ə woo wír. Ŋgaàŋ kfə́n a meŋ sa a dzə̀ Kiyoy ke Nyùy ke kí yii, a wìr kiiy mo Nyùy shám wun.

Hibru 9:7

A kù nəə taà cù wo kuʼùn é mbìv yee fó mvəm kàŋ mòʼón e kitu ke kiya. Wù lóo nəə́, wù kù a ker mensə́ me nyàm me wù nəə, a kwàŋrì vinyo və́ wùn à ve wír ámóʼó jáy là kiíy sho.

Kolosia 1:4

bìʼ fo vèr yén ji vèn wày shilív e Jesus Kristu wùn kitávín, kfə̀n yú sa mo vèn koŋ wír ve dzəə̀n vé Nyùy adzə̀m.

Ŋwàʼ woó Rom 3:25

Wù‑uù tùm Jesus Kristu ji wù kpú fo wíri, e tàŋrí áwune, é wun fíʼ làysìn ajay wìr ve á biimen ntàŋrí woo shooy. A Nyùy‑iì yii bèy, fó dìn ji wun kù yii sáʼ ajay ve wíri jáy adzə̀m. Yii bèy, mo wíri kù‑uù jáy fo ŋgùʼ, la wù yòʼ a saʼ, wù‑uù kfə̀mén, e tìír nsaʼ yev.

Lim Aŋgàa Ntum 8:36

Wùn wun kú a dù e dzəə. Á meé é kirə̀ʼ kímóʼ kí, a ndzə́ví dzə̀ fó, wìr wo kuʼùn və̀y suúy jii, «Ndzə́ví rə̀ne, a dzə̀ kfə̀n jìvír ka fo à wáy mo é ndzəv?» [

Joon 14:6

Jesus bìnèr jii, «Dzəə̀ kù dzə̀ mo və̀n, a kinyo ke dzəə̀n ke ru kí kù lo a dzə̀ fo mò, a kù fó mo dzəʼə̀m yee là may. A bó yòʼ dzə̀ wìr shaà, e dù, e yèn Tàr wor, a bó ŋgaàŋ beé a dzə̀ mo.

1 Joon 4:10

A dzə̀ vèsən kù lèéy kinyo ke Nyùy mùmèn, e bóo kiíy rú kinyo ke dzəə̀n ji koŋ. Wù‑uù koŋ vèsən, a bó vèsən yòʼ fə̀m sí koŋ wun. Wù nèn tùm Wán və é nsay fèn ji wù wiy, e kpù, e tàŋrí vèsən, é wun fiʼ làysìn ajay vesən.

1 Timoti 3:16

A dzə̀ vèsən wàa binsí ji kinyo ke toʼon Nyùy, é bo vèsən kiíy mo dzə̀ á ghvə̀m wun kìn kí dzə̀ rú kinəə́nén. A kí dzə̀ jii: Kristu‑uù wìy, e lì mbom wìr, Kiyoy ke Ranén kí bínsí wun, nshèelav se Nyùy si kfən yèn wun. Á wáa fìʼtì woŋ sidzə̀m mo wù dzəə̀n, wíri wáa way shilív é wùn wó virə́ʼ vidzə̀m. Nyùy kfən lì wun, e kòʼór e wùn ghaŋ.

Matio 3:16

e wày wun e ndzəv. Kù mo Jesus fəə́ fo ndzəv, shúu yuví mvə̀ʼə̀m, wù yén, a Kiyoy ke Nyùy ki sə́ʼəy fo fo e njà kibìŋ. Kí wìy, e dzə̀ʼə̀m e wùn kitu.