1 Joon 5:14 - ŊWÀʼ NYÙY

¹⁴ A bó vèsən yòʼ kfə̀n dzəə́ fan sa fó a koʼtí e Nyùy si, a lon kifá, bìʼ fo vèsən kiìn jii, a vèsən fèn lón ka fo wun, a bèn dzə̀ kifá ke wù koŋè, bo wù yuúri a kinyo késən.

1 Joon 5:14 Referans Kwoze

Joon 14:13

Kí nén a dzə jii, a vèn lón ka fo Nyùy, lón a dzə̀ e mǒ yir, m kù nèn yiì kíwun, é wíri fíʼ a yen kinyo ke mo woo Wan Nyùy yii, a burí a dzə̀ Tàr wor.

Jeremia 33:3

«Á mbaà a dzə̀ mo, é m yú tóŋ yé, e sùúy wò vinyo ve ghaʼtín ví ve ví dzəə̀n é kilìr, aà yóʼ ne kìíy.

Joon 15:7

A vèn fèn tíy e mǒ wùn, a jí sém sí tíy e věn meliv, bo dzə̀ vèn lòn kifá ke á lón fo Nyùy, a ker kíwun.

Matio 21:22

A vèn bunrì, lón ka, wáy shilív a dzə̀ e Nyùy wùn, vèn wàa ker kíwun.»

Nsùyrì Nyùy 34:17

Wír ve á yúnin Nyùyi tóŋ e wun, wù yù tóŋ yév, tóŋé, wù fə̀ə́r áwune fó mvə̀m ŋgeʼ.

Jeem 4:3

A vèn fə̀m kì lóné, la vèn yòʼ kòóy, bìʼ fo vèn yòʼ lón a dzə̀ kifá kee réŋ. Vèn lón kén a dzə̀ kifá ke mensə́ men mè tíy sho.

Joon 9:31

a vèsən kì kijuŋ ji bó Nyùy yòʼ yii yuúri kinyo ke wìr wo bi, wù kù yii yuúri kinyo a dzə̀ ké wìr wo wù ghvə́m wun, yii mo wù taʼà.

Efesor 3:12

Vèsən ve á tatin vèsən à Kristùu nén a dzə lèn, a kiíy ji dzə̀ vèsən wàa koʼtí e Nyùy si ghán sidzə̀m, là fan, bìʼ fo vèsən wayin shilív e Wan və́ wùn.

Joon 16:24

Kèʼ mo vèsən‑eè dzəə̀n, e meé lèn, vèn yòʼ‑oò yiì ne lòn kifá fo Nyùy e mǒ yir. M nén a suúy e vèn lèn jii, vèn wáa lon rì bèy, é Nyùy wàá fó, é kishéʼrì ki nèn màysì, e rùn e věn meliv.

1 Joon 2:28

Wòn vem, vèn ku nèn a suusín vèn à Jesus Kristu bèy, wíy lóo dzə e ghan se wù wiyì, é la vèsən yòʼ a woomé, a tàʼ, e laáy, aá fan a dzə̀ fó yen wun.

Ŋgàn 15:29

Nyùy Tàr kù yii yú bunrì wìr ve á yú wun, bin ndzə̀m e wír ve á méŋ wune.

Jeem 5:16

M nén a tir ven jii, wìr jáy kinyo e wìr, wù tuùné kitú kfə́ e ŋgaàŋ, é wìr kfə́n a lon ji Nyùy sə́ wùmòʼ woo wír. Vèn lóo yiì bèy, é Nyùy nèn a fèr ayàsí vén. Vèn wáa kiíy jii, a wìr tíy réŋ wùn Nyùy, e kàn wun e kinyò, Nyùy kù yiì kinyo ke tavín kí.

Nsùyrì Nyùy 69:33

Nyùy Tàr yii yú tóŋ aŋgàa ŋgeʼ. Wù yòʼ yii ŋwáy wír ve á dzəə̀n é sháŋ.

Nsùyrì Nyùy 31:22

Mò‑oò búʼ shirəə́, suuy jii, «Á jùm ne mo, m láy fo wò si.» Yii bèy, wò‑oò lo yù tóŋ yém, tóŋ ye mò‑oò tóŋ ji à sə́ mo.

Hibru 10:35

Mo vèn sí yén ŋgeʼ sinín, tiir a dzə̀ Nyùy fo mbìy, vèn ku nèn a yiì bèy, bìʼ fo vèn kiìn ji wù kù wíy a sə ven, a dù duùn fó mbìy.

Hibru 3:14

Kifá ke Kristu kér kidzə̀m ki sì sá késən, a vèsən fèn tíy a dzə̀ é kinyò ke vèsən‑eè wayin shilív shó fo mbìy, e dù, e jòʼsì.

Joon 11:42

A m kì jii, à kù yii yuúri kinyo kém ghán sidzə̀m. M nén a suúy kin a dzə̀ bìʼ wír ve á tíy fo ghaŋ vìn, aá fíʼ yìi biimé ji tùm rú wò woo Nyùy mo.»

Ŋwàʼ Jov 34:28

Áwune‑eè táy aghéʼncey, aá tóŋé, a Nyùy yú tóŋ yév, bìʼ fo wù kù yii yú tóŋ wìr ve á yén ŋgeʼ.

Hibru 3:6

Kristu nèn wìy wìy, a lìm kfə́ e Nyùy lav foo fèy shilív shimòʼón moo wán woo ŋgaà lav, a lav dzə̀ vèsən vin. Dzə̀ rú vèsən, a vèsən bèn ghár shilív, tiir vifií a dzə̀ é ŋkàʼmé wo Nyùy‑iì kàʼàn vèsən shó, e dù, e mày.

1 Afòn 3:12

bo mo‑óò fó kifá ke à lonen. M sí fó wò vifií ve à wáa kiíy jeéyjeey vinyò, kfə́ə ve wìr yòʼ‑oò yiì ne a ker, a wìr yòʼ wíy a ker.

Nsùyrì Nyùy 145:19

Wù fó vifá ve wír ve á ghvə́m wune kér shií shó, yú tóŋ yév, luŋèr áwune.

Ŋgàn 10:24

Kinyo ke wìr wo wù méŋ Nyùy, fanè, kí kù yíi koóy wun, a ké wìr wo wù yúnin Nyùy ki dzə̀, a wù kù yíi a ker ke shilív sə́ shí tíy sho.