1 Joon 4:1 - ŊWÀʼ NYÙY

¹ Ŋkàr sem, wíri wìy ne anín, a ghan virə́ʼ vidzə̀m, a boʼtí ji áwune fiʼtì kinyo a dzə̀ á ke tiísi Kiyoy ke Nyùy. Á lóo suúy bèy, lá vèn yòʼ kù nèn a biimé biimén. Vèn tòmbìy tàr vinyo vee shooy vi vidzə̀m, e bóo kiíy ji ví sà lò rú a dzə̀ fo Nyùy a?

1 Joon 4:1 Referans Kwoze

1 Tesalonika 5:21

Vèn kú a saáy vinyo ve vèn yii vi vidzə̀m, a lèm ve juŋ vi,

2 Pita 2:1

Mo vé‑eè tiísi a dzə̀ ntum Nyùy e wíri, yii bèy, wír ámóʼó‑oò ló a dzə sa ve vé‑eè lo a dzə̀ ntum kimboʼtì. A kù dzə̀ réŋréŋ sá mo aŋgàa yeʼéy ámóʼó wíy nànèn e věn mvəm, a boʼtí ven. Áwune wíy lì kimboʼtì, a woór e mvə̀m kinyò ke Nyùy, a tuŋ wuú Taàtá wòsən Jesus wo wù‑uù kpuun ji áwune fiʼ lùŋ. Aá wíy yiì bèy, é Nyùy ku nèn tsə̀m áwune e lòné.

1 Timoti 4:1

Kú a kiíy ji Kiyoy ke Nyùy ki suuy kiránén á jii, ghán sí wíy fəə, é wíri maʼti kinyo ke vèsən wayin shilív shó kìn, a yuurí a dzə̀ vifá ve ví ghán e ndzə, bóʼtí áwune, aá jùmrì yéʼéy a dzə̀ ye yí lo fo *anyùyi.

2 Joon 1:7

A m sáŋ bèn, bìʼ fo wír ámóʼó wìyìn ne anín, a ghan virə́ʼ vidzə̀m, a boʼtí wíri bóʼtín, a kìnèn ji bó Jesus yòʼ‑oò lo wìy e nsay fèn, e lì rú á mbom wìr. A wír vee shooyi dzə̀ vé fòn kimboʼtì wo dzəə̀n Ŋgaà Vibàn Kristu.

Ŋgàn 14:15

Njìʼ biíme kfə́ kinyo kidzə̀m biímén, a fiì yii kinyo, sə́ʼəmè.

1 Korin 14:29

Vèn fó sá kilíŋ e wíri abaà ve á yú kinyo fo Nyùy, tiísi e kintatì. Á lóo tiisí, wìr dzə̀m wàa yuurí kijuŋ, a sayrí.

1 Joon 2:18

Wòn vem, ghán se ndzə rə̀n wíy mày si sì fó mentsə̀m. A vé‑eè ló a suúy e vèn ji ndzə wíy lòo mày, é Ŋgaà Vibàn Kristu wàá wiy, aá wìy ne lèn anín. Mo á wìyìn ne, vèsən nèn a kiíy rú ji ndzə rə̀n waà sí mayì.

Ŋwàʼ Luk 12:57

«Bó yòʼ dzə̀ vèn kwàʼtì sá kinyo ke kí gheenen ji wìr yii a?

Ŋwàʼ Luk 21:8

Wù bìnèr jii, «Vèn wáa yen fo wìr wìy bòʼtí ven, é vèn jáy dzə́ə. Wíri wíy fəə anín, a teʼ mo é si, a suúy ji áwune dzə̀ Mfə̀ə́r woo shó, a ghán sí ghèén ne. Á wíy lóo suúy bèy, vèn wàa yen fó yuurí kinyo kév.

2 Timoti 3:13

é wír ve bi ve á ghán kév, bóʼti wíri bóʼtíné kú a màysì, a tavkír tavkín, a boʼtí wíri, e kfə̀n a boʼtí vév vee vitú.

Ŋgaà Yen 2:2

M kì vinyo ve juŋ ve vèn rə́si yii vidzə̀m, e kfə̀n kìíy mo vèn rə́si katìr e Nyùy kinyò, sə́ vinyo vidzə̀m, kù dzə́ ji nyaáŋ. A m kfə̀n kì sá ji bó vèn yòʼ biíme a ji wír ve bií wáa ghan e věn mvəm. Wíri‑iì lóo sə ŋgúm ji áwune dzə̀ aŋgàa ntum vém, vèn kù nèn tàr, e yèn ji á bóʼti a bòʼtín.

1 Korin 12:10

Wù buʼ wùmòʼ, wù wàa yiì viŋgaʼnìn ve vinyò, wùmòʼ wàa tiisí vinyo ve wù yú a dzə̀ fo Nyùy shuù. Wù kfə̀n bùʼ wùmòʼ, wù yén kinyo, wù kìíy ji kí sà lò a dzə̀ fo Nyùy mo dzə̀ sə́m a. Lóo dzə wùmòʼ, wù nèn bùʼ e kiliímé ki, wù wàa suŋnín lám se bó wù yòʼ kiìn, e bùʼ wùmòʼ a dzə̀ e vituʼùr ví, wù wàa yu lám see shooy sho, a toʼtí e wíri.

Lim Aŋgàa Ntum 20:29

M suuy bèn, a m kì ji m wíy bìn ndzə̀m, é nyám se bi sí nəə́ é mvə̀m ŋgoo njiì fèn, e làa yòʼ a nyàʼ wóo lemér.

Maak 13:21

Jesus kfə́n a suúy jii, «A wìr wìy sùúy e vèn é ghan fóo fèy jii, ‹Vèn leéy, *Mfə̀ə́r və̀ne›, kìn jii, ‹Və̀sə›, lá vèn yòʼ biìmé.

Jeremia 5:31

Aŋgàa ntume sí tiísi a dzə̀ ntum kimboʼtì, aàtàá cùu fó sáʼ a dzə̀ ye yí gheen áwune. Wír vémé nén a kòŋ a dzə̀ kee shoon. Bo kimaysì kév kí wíy a dzə ka?»

Lim Aŋgàa Ntum 17:11

Wír veé Juda vee fóo wáa dzə wír, aá yii kwaʼtì kinyo, e shaà veé Tesalonika. Á nèn a ker shií fó a yuurí kinyo ke Por wùn Silar. Lóo yuurí, á wàa yòŋ Ŋwàʼ Nyùy vishiíy vidzə̀m, a leéy fo fo ji kinyo ke áwune suuy ki sà kù yòʼ dzə̀ réŋ á?

1 Afòn 13:18

Wù nèn sùúy e ŋgaà ntum Nyùy jii, «Mómò kitú kém, m dzə̀ sá ŋgaà ntum Nyùy moo wò. Nyùy Tàr kì tsə̀nsí nshìylav rə fo mǒ wùn, yì suúy e mò jii, ‹M li á wò, é wòsò kfə́n á e bàm e mǒ lav, áà yíkír, e nò mendzə́v.› » A ŋgaà ntum Nyùy və̀y suuy bèy, a wù bóʼti wun bóʼtín.

Jeremia 14:14

Nyùy Tàr nèn bìnèr e mò jii, «Aŋgàa ntume tèʼ ne mo é si, a boʼtí a dzə̀ kimboʼtì. Bó m yòʼ‑oò lo tùm áwune, a m yòʼ‑oò lo yòŋ ji á yii kinyo, fə̀m ji m yoŋ jí yìmòʼ aáwune. Áwune tiísi vinjeenjèm ve á yéné, a dzə̀ kimboʼtì, a vinyo ve á shwéŋ vi dzə̀ kisáŋ. Dzə̀ vinyo, a ví lò a dzə̀ fo áwuné kwàʼtì.

Jeremia 23:16

Nyùy Tàr woo Taà Mànjòŋ nén a suúy lèn e wír veé Jerusaleme jii, «Lá vèn yòʼ yuùrí kinyo ke aŋgàa ntume tiísi e vèn. Áwune tiísi a dzə̀ vinyo ve kisaŋ vi. Vinyo ve áwune fiʼtì ji Nyùy ghém a ndzə, aá yén e njà vinjeenjèm vi lo a dzə̀ fo áwuné vifii. Ví yòʼ lo a dzə̀ fo Nyùy Tàr.

1 Tesalonika 5:20

Lá vèn yòʼ a kay sa wír wo wù tiísi kinyo a dzə̀ ke wù yú fo Nyùy shuù.

2 Tesalonika 2:2

Mo léŋe sí du ji kishiíy ké Taàtá kin ki ghèén ne, vèr nén a lon ji lá vifií vén ví yòʼ nèn tàv bvəə̀rí, é vèn wáa tùʼtìn. A wìr fə̀m fer bèy a dzə̀ fo wùn kwàʼtì, kìn wù suuy ji sùúy Nyùy, kìn wù yoŋ fo ŋwàʼ ji sàŋ mo, lá vèn yòʼ biìmé.

1 Joon 2:7

Ŋkàr sem, nsər ye m sáŋ fo vèn lèn rə̀n yòʼ dzə̀ e fíy. Kù dzə̀ kinyo ke vèn‑eè sí yú fo ŋgùʼ, e kèʼ mo vé‑eè kèʼèn, a fìʼtì kinyo ke Nyùy e vèn.

3 Joon 1:11

Ŋkàr yèm, lá à yòʼ bìʼnìn liì wo bi. Kú a bìʼnìn a dzə̀ wo juŋ, a kiíy jii, wìr wo wù kér liì wo juŋ dzə̀ á wo dzəə̀n wan Nyùy. A bó wìr wo wù kér liì wo bi yòʼ fə̀m kì Nyùy gheéy.