1 Joon 1:9 - ŊWÀʼ NYÙY

⁹ Yii bèy, a wìr tuúne vinyo ve wù jayin, Nyùy kù nèn làysìn, e sù njò rə, wù wàa dzə là jay, bìʼ fo dzəə̀n kinyo ke wù‑uù kàʼàn, a wù kù yii yii vinyo və́ réŋ.

1 Joon 1:9 Referans Kwoze

Nsùyrì Nyùy 32:5

M nèn tuùné ajay vém e wò, e làa yòʼ lìtì kinyo kém ke bi kí. Mò‑oò sùúy jii, «Mo‑óò tuúné ajay vém e Nyùy Tàr.» Á bèy, Nyùy Tàr, à nèn làysìn ajay vém, e sù njò yem.

Ŋgàn 28:13

Wìr lóo lìtì ajay və́ lítin, bo bó yòʼ dzə̀ wù kùy. Wìr tuúne ajay və́, bin ndzə̀m shó, Nyùy shàm mendzən mvə.

Jeremia 33:8

M wíy làysìn ajay vév adzə̀m ve vé‑eè rə́si jáy e mò, e làysìn vinyo vév ve bi ví vidzə̀m ve vé‑eè buʼtì, tsə́y kóy vèr áwune, e nèn sù njò yev.

1 Joon 1:7

Yii bèy, mo Nyùy dzəə̀n é ndzə ye ranén, wíri lóo ghan sa e ndzə ye ranén, áwune nèn a dzə kintatì, a ghan kiwuú kév kimòʼón. Mo á ghán bèy, Nyùy nèn kfə̀n sù sa njò yev, á wàa dzə là jay. A wù su a dzə̀ e mensə́ me Wan və woo Jesus mè.

Esiker 36:25

M wíy tsəm shindzə́v she ranén shí e věn wùn, é vèn rán fó kifàn ke vèn‑eè liìn bìʼ vinyo vidzə̀m ve vèn‑eè lorin vitú vén shó. Vèn wíy ran fo kifàn ke vèn‑eè ghvəmen mebvə̀m, e lì.

Hibru 10:23

Vèsən ku nèn màysì, e tìír vifií é ŋkàʼmé wo vèsən fiʼtì ji vèsən kù wíy lùŋ ŋkuuŋkùŋ. Lá vèsən yòʼ a tùʼtìn, bìʼ fo vèsən kiìn ji Nyùy wo wù kàʼàn vèsən é kinyò fèn dzə̀ á wù kù yiì kíwun.

1 Timoti 1:15

Duŋrì yee jii, Jesus Kristu‑uù lo wìy e ndzə fèn ji wun sə́ aŋgàa vinyò ve bi ví, aá fíʼ lùŋe dzə̀ rú féyì. A dzə̀ wìr kù wày shilív sə́ shó shidzə̀m. A m dzə̀ fon aŋgàa vinyò ve bi vee shooy.

Nehemia 1:6

Ku mvə̀ʼ vituʼùr vé vi. Ku lèéy mo, a yuurí tóŋ ye ŋgaà lìm wò tóŋ e shùy, tóŋ vitsə́ʼə́, bìʼ aŋgàa lìm vé vee wír veé Isray. M tuúne ajay ve vèr à wír veé Israyi jayin e wò. Vèr à rám atàr vérí jày ne.

Esiker 37:23

Áwune yòʼ dzəə́ wìy a lor vitú vév e mebvə̀m me vé‑eè ghvə́m mè, kìn e vifá ve joònè vímóʼ ví, a bó á yòʼ dzəə́ wìy a tsəy kóy vèr áwune. M wíy yiì, é la áwune yòʼ dzəə wìy a kfənrí wuú, a bùʼtì vinyo ve vé‑eè rə́si buʼtì. M yii bèy, é m *kfə́mrí áwune, aá rán fó *kifàn ke vé‑eè liìn, e nèn gheén e wìr vém, é m wáa dzə Nyùy wov.›

1 Korin 1:9

A dzə̀ Nyùy kù wìy yiì kinyo kìn, bìʼ fo wù kù yii tíy e wùn jì. Yì‑iì lì wun ven, bo vèn à Wan və Jesus Kristu wo dzəə̀n Taàtá wòsən tátí ji wír amòʼón.

Remrí 7:9

«Bo dzə̀ ji vèn kiíy á ji Nyùy Tàr woo Nyùy won kù dzə̀ wun Nyùy. Wù dzə̀ Nyùy woo ŋgaà suuyrú, a wù yii tíy e wun mensàŋ, din koŋ rə́ ye wiyí e wír ve á koŋ wun, kfə̀n lem nsər səə́. Wù kù wíy a dìn bèy mo ŋgwàʼ sév sí wíy a koʼ viyá viyá là may.

Lim Aŋgàa Ntum 19:18

Wír ve vé‑eè biimen kinyo ke Jesuse wáa wìy anín, a toyrí mo vé‑eè rə́si yii shív.

Maak 1:5

Wír veé Jerusaleme nèn a fəəkír, a dù ji á yú á kinyo ke Joon. Á kfə́n a wìykìr fo ntèʼ seé wòŋ woo Juda foo fèy símóʼ sí sidzə̀m, a tuúne ajay vév, Joon wáa way áwune é ndzəv ye dzəə̀n Jordan.

Titur 2:14

Wù‑uù fò kitú kfə́, e kpù fo vèsən, e tìn vèsən fó vinyò ve bi ví vidzə̀m ji wun náŋsín wír ji və́, aá wáa dzə là jay, e tiír vifií ji á wáa yiì a dzə̀ vinyo ve juŋ vi.

Nsùyrì Nyùy 19:12

Yii bèy, wìr yòʼ yii yén ndzə̀m rə. Sù ajay vém ve á yòʼ yénsinèe.

1 Korin 6:11

Yì‑iì dzə̀ fó mbìy, a ven ámóʼó yii vinyo vee shoon. Nyùy nèn wìy sù vinyo vee shoon fo věn wùn, e lì ven ji və́ vee wír. A wù lèéy ne ji vèn sì á wír vee là njò, bìʼ kinyo ke Tàr wòsən Jesus Kristu wùn Kiyoy ke wun woo Nyùy ki‑iì yiìn fo vèn.

Yòvdìy 3:23

Wù kù yii tíy wùn à wír vəə́ ghán sidzə̀m, a koŋ rəə́ yénsin e fíy kijàvndzə kidzə̀m.

Hibru 6:10

Bó Nyùy yòʼ yii lóʼ wír. A bó yòʼ dzə̀ wù làysìn mo vèn rə́si lim e wùn kinyò. Wù yoʼ làysìn mo vèn koŋ wír ve dzəə̀n və́ adzə̀m, sə́ áwune. A vèn lim a dzə̀ fo wun réŋréŋ mo vèn kù yii, e shem lèn.

1 Afòn 8:47

aáwune dù e wòŋ foo fèy, e màʼtì jay wov, e bìnèr melív mev, a toŋ e wò, a suúy jii, ‹Vèr jày ne, vèr yiì ne yii ye bií,›

Ŋgaà Yen 15:3

a kùm, a yòv luŋ Mooser woo *ŋgaà ntum Nyùy, e kfə̀n a yòv wó Wàn Njiì Nyùy. Aá yov jii: «Éè Nyùy Tàr, wò woo Nyùy woo Ŋgaà Vitaàví Vidzə̀m, vinyo ve à yii vi dzə̀ féyì, a wíri leey, kér gháʼ. À dzə̀ Fon wo wù sáʼ vitúm vidzə̀m, a sáʼ yée du tìítiy, là kiloʼ.

Hibru 11:11

Sara wáa dzə, a wù‑uù wày sá shilív e Nyùy wùn, Nyùy nèn yiì, wù tiím bvəm, a ghán sə́ sí‑iì bàŋrìn ne se dzə̀ wù kfə̀n dzə̀ə́. A Nyùy‑iì yii bèy, bìʼ fo Sara‑aà yú kfə́ a dzə̀ fo wun wo wù‑uù kàʼàn wun e kinyò fèn.

Matio 3:6

Á wáa wìy bèy, a tuuné ajay vév, Joon wáa way áwune é ndzəv ye á yoŋ ji Jordan.

Aysaya 45:21

Vèn wiy ri e nsaʼ yen, e naàrì. Vèn kfəynin, e rə̀tì, e fə̀ə́r kinyo ki. Vinyo ve ví kooy lèn, yì‑iì yìysí la fó ŋgùʼ? Feyì feyì, yì‑iì yoòyí la fó yàŋgùʼ? Bó yòʼ‑oò yoòyí mo woo Nyùy Tàr a? Nyùy wùmòʼ yòʼ kfə̀n dzə̀ shó, e shaà mo və̀n. M dzə̀ Nyùy wo wù yii vinyo tìítiy, a m dzə̀ Mfə̀ə́r, a bó Nyùy wùmòʼ yòʼ kfə̀n dzə̀.

Efesor 5:26

Wù‑uù kpù ji áwune fíʼ a dzə wír ve á gheenen fo Nyùy. Wù‑uù fìʼtì kinyo ke Nyùy aáwune, á wáy áwune é ndzəv ji wír ve Nyùy suùn ne njò yev.

Ŋwàʼ woó Rom 3:26

Wù nen dìn a dzə̀ lèn wo Jesus kpuun ji wun kù yòʼ sáʼ rú ajay wìr dzə̀m, aá wáa yen ji wù kù yii yii vinyo və́ tìítiy, là jay, e kfə̀n a yen mo wù li wír líin ji woo là jay, a dzə̀ woo shó wo wù wáy shilív e Jesus wùn.

Sekariya 9:9

Éè wìr veé Sion, vèn wáa sheʼrí e mbòómbòŋ. Éè wìr veé Jerusalem, vèn wáa ndzəʼ. Vèn yén mo fòn won wiyì, wiy e sáʼ yee tìítiyi, séŋ nsiì, e kù yòʼ lì kitú kfə́ shishàr, e kòʼ a dzə̀ kimbèʼbìy, kimbèʼbìy, a dzə̀ kee wán.

Ŋwàʼ Fəə 34:7

A m din koŋ yém e wíri, ŋgwàʼ si ansə̀kì ansə̀kì, laysìn vinyo ve á buʼtì, kfə̀n laysìn shóʼór ye á shóʼor nsər sém, su njò yev. Yii bèy, a bó yòʼ dzə̀ m màʼtì ŋgaà jay, é wù boy. M fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné.»

1 Afòn 8:30

Ŋgaà lìm wò lóo lon wò, kìn lón wír veé Isray, lóo kìʼ lav rə̀n, à kù yù bunrì yév. Kú a yu e wòŋ woó yuv fo à dzə́. À yú bèy, à kù nèn làysìn ajay vév.

Jeremia 3:13

Ku biìmé a dzə̀ liì kisaŋ wo wò‑oò yiìn. Wò‑oò táv kitú vèn Nyùy Tàr woo Nyùy wò, ghvə́m anyùy a dzə̀ vé vitum, du, cu e sar se vici ve rəŋsìn ví vidzə̀m, e làa yòʼ a yunín mo gheéy. Suuy mo woo Nyùy Tàr.

Joon 17:25

Éè Tàr, kù yii yii wò kinyo kee réŋ, a bó wír veé ndzə fène yòʼ kì wò. Yii bèy, a mò‑oò kìíy ne wò, a wír vém víne kìíy ne rú ji mò‑oò lò ntum a dzə̀ ye.

Ŋwàʼ Luk 22:57

Pita nèn shàʼnín jii, «Wiíy və̀n, bó m yòʼ kì wír wo à yoŋ və̀n.»