1 Joon 1:8 - ŊWÀʼ NYÙY

⁸ Kí kfə́n a dzə jii, a wìr lò, a kìnèn ji bó wun yòʼ kér jay, bo ŋgaàŋ bóʼti a dzə̀ kitú kfə́. Wù yòʼ tíy e kinyò ke dzəə̀n ke ru kí gheéy.

1 Joon 1:8 Referans Kwoze

Ŋwàʼ woó Rom 3:23

bìʼ fo wìr dzə̀m kù‑uù jayin ne, la liì wov yòʼ mèé e wo Nyùy taʼà gheéy.

Jeem 3:2

Dzə̀ rú, vèsən dzə̀ ben, a vèsən jáy vinyo vinín. Yii bèy, wìr lóo dzə a dzə̀ wù mèy kiliímé kfə́, e làa yòʼ a jay kinyo fo wùn shuù, bo ŋgaàŋ ghèén feyì. A dzə̀ wù kòytí kitú kfə́ dzə́ə sidzə̀m.

Ŋgaà Tàrvìnyò 7:20

Rúrú, bó wìr woo là nsem yòʼ dzə̀ shó e kitu ke nsay, wo wù kù yii vinyo a dzə̀ ve réŋ ví, a bó yòʼ dzə̀ wù jày kinyo.

Aysaya 53:6

Vèsən adzə̀me‑eè dzə́ fo mbìy, ján janén moo njiì wo wù jayin dzə́ə. Vèsən‑eè shwèy ne dzə́ə Nyùy, wìr wáa bìn e rə́ə yee dzə́ə. Yii bèy, Nyùy Tàr lí vinyo vesən ve bi ví vidzə̀m, e siìr e wìr və lìm və̀n kitu.

1 Joon 2:4

A wìr suuy ji wun kì Nyùy, a bó wù yòʼ lem nsər sə́, bo wù bóʼti, a bó wù yòʼ koŋ kinyo ke dzəə̀n ke ru kí gheéy.

1 Joon 1:10

Kí nen kfə̀n a dzə sa jii, wír wo wù kinèn ji bó wun yòʼ‑oo jáy ne kinyo sí yoŋ Nyùy a ji ŋgaà kimboʼtì, a bó wù yòʼ yú kinyo ke Nyùy suuyì.

Ŋgàn 20:9

A dzə̀ dzə̀v la nsaŋ jii, «M sù ne shilív shém, a m dzə̀ là jay.»

Ŋwàʼ Jov 15:14

Wìr msòŋ á ka, e bó a dzə là shilóm, wír, aá dzəə́ dzəə́n, é bo wù wáa dzə là nsem?

Galatia 6:3

A dzə̀ vèn kù a sənín vitú, bìʼ fo, a wìr lò, a ràʼsì wún ji wun yii vinyo shaa wùmòʼ, a bó wù yòʼ yii, bo wù bóʼti a dzə̀ á kitú kfə́.

Aysaya 64:6

Vèr kfə̀n ne ji vé *kifàné adzə̀m, fə̀m vinyo ve juŋ ve vèr yiìn ví kù kóʼoy kòʼòyín, kóʼoy, kù moo kinsàr ke ndzə̀y ke mensə́ mè lorin ne. Vinyo vér ve bi ví yiì ne, vèr soóy moo vav se vici, vav se shwéri feer, du sho.

Nsùyrì Nyùy 143:2

M dzə̀ ŋgaà wò lìm, lá à yòʼ wày mo é kibàʼ ke nsaʼ. Bó yòʼ dzə̀ wìr wàa dzə là jay e wò si.

Jeem 1:26

A wìr yoŋ kitú kfə́ ji wir Nyùy, a bó yòʼ dzə̀ wù mèy kiliímé kfə́, bo ŋgaàŋ bóʼti kitú kfə́, a kinyo ke wù yoŋ kitú kfə́ ji wir Nyùy ki lày kisáŋ.

1 Timoti 6:5

Aáwune táŋnin bèy, a dzə̀ bìʼ fo wìr yòʼ dzəə́ kér shilív she juŋ shi wùn wùmòʼ, a bó wìr yòʼ dzəə́ yéʼey áwune sá kinyo ke dzəə̀n ke ru kí. Á lò ne, a yeʼéy vinyo jeéy jeéy mo kinyo ke Nyùy ki dzə̀ á dzəə wày yìmòʼ bey, ye dzə̀ wìr kùʼ fó fo.

Ŋwàʼ Jov 25:4

A dzə̀ wìr msòŋ ghàn é le, e bó a dzə là jay e Nyùy si? Wír fo wìr, é bo wù wáa dzə là shilóm.

1 Afòn 8:46

«Mo bó wìr woo là jay yòʼ dzəə̀n, a wír vée lòo dzə, e jày e wò, à shwiíy kilòŋ, e màʼtì aŋgàa vibàn véví koórí áwune ji akwàn, e dù sho aáwuné wòŋ kwaʼda, kìn fó mentsə̀m,

1 Korin 3:18

La wìr yòʼ a boʼtí kitú kfə́. A wìr lò, a kwàʼtì ji wun sí kér və́ vee vifií mo wír veé ndzə fène kwaʼà, wù wàa kiíy jii, a dzə̀ wù kù lì kitú kfə́ ji kiyúŋ, e bóo fíʼ kiíy rú á kinyo ke dzəə̀n ke ru kí.

Ŋwàʼ Jov 14:4

A dzə̀ fə̀ə́r la kifá kee là *kifàn fo ké kifàn kí mvəm? Bó wìr yòʼ dzə̀ shó.

2 Wòŋ 6:36

«Mo bó wìr woo là jay yòʼ dzəə̀n, a wír vée lòo dzə, e jày e wò, à shwiíy kilòŋ, e màʼtì aŋgàa vibàn véví koórí áwune ji akwàn, e dù sho e wòŋ wúmóʼó kwaʼda, kìn woo fó mentsə̀m,

2 Joon 1:2

Aá koŋ bèy, bìʼ fo vèsən áwune sí tíy e kinyò fo, wír adzə̀m, a dzə̀ mo kí wíy a lùm e vèsə́n meliv ghán sidzə̀m.

1 Joon 1:6

Kí nén a dzə jii, a wìr suuy ji wùn Nyùy dzə̀ kintatì, kfə̀n ghán e ndzə ye sənér, bo ŋgaàŋ bóʼti. Wù yòʼ dzəə́ yii kinyo ke Nyùy yén ji ke ru kí.

Jeem 1:22

Vèn kú a yuurí kinyo ke Nyùy ki, a yiì mo kí dzəə̀n. Lá vèn yòʼ a boʼtí vitú vén ji vèn néŋ e Nyùy si, a vèn yuúri kinyo kfə́ yuúrín, e làa yòʼ a yiì.

2 Timoti 3:13

é wír ve bi ve á ghán kév, bóʼti wíri bóʼtíné kú a màysì, a tavkír tavkín, a boʼtí wíri, e kfə̀n a boʼtí vév vee vitú.

Ŋwàʼ Jov 9:2

«Rúrú, m kì ji á mo kí waà yii dzə́. Yii bèy, a dzə̀ wìr ghàn é le, e bó a dzə là jay e Nyùy si?

3 Joon 1:3

Mò‑oò shéʼri feyì, bìʼ fo afə́r vesən ámóʼó‑oò wìyìn, a fèr ji à tíy e kinyò ke dzəə̀n ké ru kí á shilív shimòʼón, réŋréŋ mo m kiìn ji à tíyí.

2 Pita 2:13

Nyùy wíy màʼ ŋgeʼ aáwuné kitu réŋréŋ sá mo áwune bóʼti wíri, danèr, wáy e lòn. Áwune yéʼey kév wíri jii, a dzə̀ wìr kù a yiì a mo mensə́ mvə mè limè, e fíʼ a yu vijuŋ. Á ku nèn a yiì joonè vən, à e shùy sho. Wír vìne shoor kintatì kén féyì. Vèn áwune lo, á tàtí, a yikír, áwune bin fo bàm, á wàa bùʼtì vinyo ve mensə́ mev mè kér shií shó vidzə̀m.

Jeremia 2:35

a vèn kù yoŋ kén ji á yòʼ kì á fo kinyò, a bó yòʼ dzə̀ Nyùy wàa shwiíy a kilòŋ vèn áwune. Vèn wáa kiíy, m kù yíi tiír ven é kibàʼ ke nsaʼ, ven ve á yoŋ ji á yòʼ kér jay.

Joon 8:44

Tàr won dzə̀ Satan, a vèn nèn wáy vifií a dzə̀ é vinyò ve koŋ wóon woo tàr. Wù kù‑uù sì rim kèʼ fo ŋgùʼ, ban kinyo ke ru kí bánen, bìʼ fo wù yòʼ kér kinyo ke ru kí e wùn shiliv gheéy shishàr, e bó a dor. Wù lóo boʼtí kinyo, bo kù dzə̀ nóliì və, bìʼ fo wù dzəə̀n kfə́ ji ŋgaà kimboʼtì, a yì‑iì kèʼ wun kimboʼtì kidzə̀m.

Ŋwàʼ woó Rom 3:10

A dzə̀ kíwun ke vé‑eè saŋen jii: «Wìr wo wù gheenen Nyùy yòʼ dzə̀ shó gheéy fə̀m, e mòʼón.

1 Joon 4:20

A wìr lò, a suúy ji wun koŋ Nyùy, suuy bèy, kfə̀n ban fə́r və, bo ŋgaàŋ bóʼti. A wìr dzə̀ là fó a kòŋ fə́r və wo wù yéné, bo bó yòʼ dzə̀ wù wàa kòŋ Nyùy wo bó wù yòʼ yéné.

Cù 13:12

Yii bèy, a yàsí woó jùv wùn fəə̀, e laàkír e wìr wùn, taà cù yén, a wù laákír ne, e kèʼ fo kitu, e meé e wuù,

2 Afòn 20:15

Ŋgaà ntum Nyùy kfən dzə̀r jii, «Áwune kì yèn a dzə̀ ka e wò ntoʼ?» Fòn Hesekiya bìnèr jii, «Á kì yèn kifá kidzə̀m kee mǒ ntoʼ. Kifá ki yòʼ dzə̀ shó e mǒ kitàv ke m yoʼ lò dìn aáwune.»