Zefaniya 3:4 - Luganuzi Luswanu Kuli Wanhu Wose 2002

⁴ Ne wawizi wayo si wehuwilwa, kanyhi wakonji. Wakohani nawo, wahatajila wavu i hanhu hono helile, kanyhi wakulipitula ne lilajilizo lyo Mulungu ku soko ye cambuzi cawo weneco.

Zefaniya 3:4 Referans Kwoze

Ezekiyeli 22:26

Nawo i wakohani, wakondya kubena lilajilizo lyangu, sunga nalu, hamba si wakuvicelelela kanyhi i vinhu vyono vyelile yaye. Hamba si wakusuma kuwika wisimajile we vinhu vyono vyelile, ne vinhu vyono si vyelile. Hamba si wakusuma kwijiza wanhu, ho wasume kutemanula i vinhu vyono vyavufywe, ne vinhu vyono si vyavufywe. Na kanyhi wayibedegala ne Sabato. Na yiyi yo yikuleka sunga ne wanhu wa Isilayeli hamba si wanyogopile 'ne yaye.

Malaki 2:8

“Ninga alu, anye nyo wakohani, mwakondya kuwuka mu zinzila ze ling'ani, no wijize wenyu, wukuwatonga wenji ku wituma zimbi. Mwabena icilagane cangu cono calagana nanye.

Hoseya 9:7

Ninga cipango co wulipicizwe cakondya kuza, icipango cono wanhu wolozituga zono ziwanojeye. Kolo zizi zikwijela, Isilayeli wolozimanya, nawo wololonga watye, “Muwizi ayu yapuwile! Munhu ayu mono yakutongwa no Mulungu yena lukwale.” Anye nyo wanhu, musulile 'ne ku soko yo winji wo wubi wenyu.

I Cililo 2:14

Sunga ne wawizi wako nawo, weza wasina cinji cono wokulonjela, langa zo wulambi-lambi du. No wuganule wawo wukukongaga du, hamba si wukuwa kukulajila zo wubi wako. Na mu nzila yiyo, wakukunoza agwe, ho wiwone nha vyono wusina soko yo kunena.

Yelemiya 5:31

Hambi i wawizi nha weza wasina nghani zo kulonga, langa wakuwila zo wulambi du. I wakohani nawo, wakulondola zawo du weneco. I wanhu wangu nawo, wasina hamba zo kulonga muli zizo wene wakuwona zose swanu du. Ninga lu magu ta, hamba wolotendaci nhondo, kolo zeza kuza baho ku ndumo yayo?”

Isaya 9:15

I wakombi ne wanhu watambule, wawo wo mutwe. Nawo mucila, wo wawizi, wono wafundaga zo wulambi!

Wugubule 19:20

Ninga lilimu lilyo likasolwa mateka, hamonga no muwizi wo wulambi, mono yanozaga mapoto ha mwande yalyo. (Na ku so mapoto gago, yasuma kuwajiliza wenji wono wali wena i citanjilo ce lilimu lilyo, kanyhi na wono wacihemba ne cihwani calyo.) Ne lilimu lilyo hamonga no muwizi yuyo, wose vyono wejete, wakagumilwa vyo womi du, mwilamba lyono lyakaga moto we cibiliti.

1 Yohana 4:1

Mo wendece wangu, mulece kumwihuwila munhu wo wose mono yakwiyitya yena Muhe wo Mulungu, langa mwamulaje mumulanjilile muno muno, ho muwone hono u munhu yuyo yakutongwa no Muhe wo Mulungu, hamba ng'o. Hambi i wawizi wenji wo wulambi nha wakwijela mononze.

2 Wakolinto 11:13

Hambi wawo nha wo watumwa wo wulambi, wetumami wo wukonji, wono wakwinoza nha watumwa wa Kilisito.

Matayo 7:15

“Mwilanjililaje kuli iwawizi wo wulambi. Wono wakumuzizenyi, akuno wakwijela kunze nha ngholo, ninga mugati yawo ho maminzi makali.

Mika 2:11

“Wanhu awa, wakusaka muwizi mono yamemile wulambi no wukonji, mono yakutya ‘Nowila, divayi no wujimbi vilawile ko winji ku soko yenyu.’

Yelemiya 23:32

Alu muhulicize ta, zono nghutya ane no Muwaha Mulungu! Ane mbeka, nili mulugu we wawizi wawo, wono wendile kulonga ze zindoto zawo, zono zimemile wulambi wose du. Hambi nha wakwitumamila zizo zindoto zawo, no kuwajiliza wanhu ku soko yo wulambi wawo, hamonga no widunhumuzi wawo. Ninga ane hamba si niwatumile yaye, hamba kuwalajiliza kose. Kanyhi wasina hamba nghani yo yose, yono yosuma kuwataza wanhu. Vyo nghutya ane no Muwaha Mulungu.”

Yelemiya 8:10

Holeka nane lu, noyisola migunda yawo, niwapele wanhu wanji, sole ne wacekulu zawo nawo, mhele walume wanji. Alu lanje, vyono wanhu wose i wawaha ne wadodo, wakujela kwitujila pesa mu zinzila zo wukoci. Sunga ne wawizi, hamonga ne wakohani, nawo nhavivyo du, wekalaga wakukonga-konga wanhu.

1 Samwili 2:22

Nayo Eli mukohani, lono yali yakombipa muno, yakazihulika zinghani zose ze wanagwe we cilume zono wawatendelaga Waisilayeli. Kanyhi na vyono wagonaga ne wacekulu, wono wetumaga milimo ya ha mulango we Lihema lyono Lyelile.

Walamuzi 9:4

Baho wakamupela zifweza makumi mupunghati ku wulawilila mu nyumba ye cilagane ya Baali-beliti, zifweza zizi Abimeleki yakawafupa i wafyuzi ne wenyanyaguzi ho wamutyatye mwene.

Yelemiya 34:19

Ninga hamba nhavivyo, wacibena cilagane cangu hamba kucifisiliza yaye. Holeka nane nowatendela wanhu wawa nha vyono wene wayitendela yiyo ndama.

Ezekiyeli 44:23

“Kanyhi i wakohani yiwanojeye wawejize wanhu wangu wasume kumanya no kuziwagula zono zelile, na zono si zelile, no kuwamanyiza u wisimajile we vinhu vyavufuywe na vyono si vyavufywe.

Malaki 1:6

Muwaha Mulungu we mihanga yakuwatya wakohani, “Mwana kamogopaga sogwe, no mutumwa nayo kamogopaga u muwaha wakwe. Ane nili sogo yenyu, alu nhawule si mukunyogopa? Nane ho nili mutwa wenyu, alu nhawule nha si munyogopile, langa mukunyihepa? Akuno kanyhi mukuwuza ti mukutya, Cikukwihepa wule?

Malaki 2:7

Yinojeye wakohani wejize mafundo ge mbeka go Mulungu. Wanhu ho wabite kuli wene, wakelanjize wuhile wangu, hambi wene nha wetumami wo Muwaha Mulungu we mihanga.

Ezekiyeli 22:6

Ne walongola wose we Waisilayeli, nha weyitumbiye weneco vilungo vyawo, kanyhi wawulaji.

Mika 3:11

Nawo i walongola, wakulitema likaya kwe mafupo, nawo wakohani, wakuwejiza wanhu Wulajilize ho watuje musahala, nawo wawizi, wakulonga zo wugubulilwe wawo ho walipwe mapesa. Nawo wawa wose wakwiyitya ti, vyono Muwaha Mulungu yali hamonga nawo. Kanyhi wakutya, “Hasina zimbi zono zocagana, hambi Muwaha Mulungu nha yali hamonga nase.”