Yelemiya 8:13 - Luganuzi Luswanu Kuli Wanhu Wose 2002

¹³ “Nali nina wuhile wo kuwakongholela hamonga wanhu wangu, nha vyono munhu kakongholezaga nhwanga yakwe, ninga wanhu wangu wehwanile no mubici wo muzabibu, wono wusina zabibu, hamba mukuyu, wono wusina zinghuyu, wono sunga ne mahamha gayo gakondya kunyala. Holeka nane nghawaleka i wanhu wanji wayisole yisi.

Yelemiya 8:13 Referans Kwoze

Matayo 21:19

Yakawuwona mukuyu wunji ha mhelo ye nzila, yakawubitila, ho yahepe imikalo yayo, ninga yakawagana wusina mikalo hamba hadodo, langa go mahamha du gali wene. Hodu yakawa kuwulonjela yakawutya, “Wulecele lukulu kulela kanyhi mikalo cibitilila!” Hobaho baho du, no mukuyu wuwo wukawa kunyala.

Yoweli 1:7

Zahodanga sunga ne mizabibu yetu, zakondya kulya ne mikuyu yetu, zayikubulanga ne mabada gayo gose, ne manhambi gayo geza mazelu swee.

Yelemiya 17:8

Hambi u munhu yuyo, nha kowa yehwanile no mubici wono wukuwilucila behi ne cikolongo, wono wuhimbize milela yayo mu malenga. No mubici wuwo, si wogopaga lizuwa hamba likalipe muno. Hambi i mahamha gayo, nha gekalaga gadedewaye du. Hamba mvula yilece kuwutonyela, wene wikalaga wusina mahwele yaye, langa wene wujendelelaga kulela mikalo du.

Yakobo 1:11

Hambi lizuwa nha lidulaga, na kolo likukalipa linyazaga mahanze, ne maluwa gayo gakung'unhikaga, no wuswanu wayo wose wuhodanjikaga. Ale nhavivyo, no mugoli nayo, kolo kongomezezwa mu metumo gakwe.

Hagayi 2:17

Nategula mbeho yono yanyaza, ne mvula ye mabwe, yikavihodanga vinhu vyose vyono mwahilaga kuviwilusa. Ninga hamba nhavivyo, si mwanena yaye.

Hagayi 1:11

Nane nghayimila mvula yilece kutonya mu yisi, na mu matunda gayo, na mu migunda yo wuhemba, na mu migunda ye zabibu, na mu migunda ye mibici yono yilelaga mikalo, muli vilimwa vyose vyono yisi yilavyaga, na muli wanhu, ne zinimu, na muli vyose vyono mukuhila kuviwilusa.”

Habakuki 3:17

Ninga hamba mikuyu yilece kubonhola maluwa, ne zizabibu yilece kulela zabibu, hamba mizeyituni nayo yiwe si yikujela, zeyituni, nayo migunda yiwe si yikulavya wuhemba, hamba ne zingholo nazo ziwe zose zafwiza, ne mabululu ge zimitugo geza gali bwete.

Yelemiya 5:17

Nawo wololya vya mu nhwanga yenyu, hamonga ne zindigwa zenyu. Wolowawulaga i wana wenyu we cilume hamonga na we cicekulu. Wololya matewa ge zing'ombe zenyu, ne zingholo zenyu. Woloyihodanga ne mizabibu yenyu, hamonga ne mibici yenyu ye mikuyu. Ne makaya genyu gono mwitumbiye, gono gena magomawakali, gose gago, golokongomezezwa lukulu ne wasilikale wo wulugu.

Isaya 5:10

Ne mizabibu, yono mihadice mu wugunda wa eka yikumi, wololavya lita munana du za divayi. Na mono kohadika kilo yigana limonga za mbeyu, yuyo kolodudula kilo yikumi du za wuhemba.”

Walawi 26:20

Sunga ne milimo yenyu yose yono mokwituma muhidimbaye, yowa nghani ya bwete du, hamba si mokwambulila cinji co cose, hambi yisi nha si yosuma kulela kanyhi, sunga ne mibici yenyu siyolela mikalo yaye.

Yelemiya 7:20

Holeka lu, ane no Muwaha Mulungu, nane nolijidila likuwo lyangu mumu mu Nyumba yangu. Hamonga na zizo, nolijidila sunga na muli wanhu, na muli vilimu, na mu mabici gose, sunga na mu vilimwa. Ne likuwo lyangu, lyowa lihwanile moto mukali, wono howa hasina munhu wo wose, mono kosuma kuwuzimya yaye.

Yelemiya 14:12

Nawo hamba walece kulya, ninga 'ne hamba si nowahuliciziza lukulu cililo cawo ho niwaponye, ng'o. Hamba wandavizye ne cilavywa cinyanywe, hamonga ne cilavywa co wusaje, ane si nokwendezwa nawo yaye. Langa 'ne nowawulajila wose ku wulugu na mu nzala, na mu matamwa.”

Hoseya 2:12

Noloyihodanga mizabibu yakwe ne miganhi, yono yakutya wendece wakwe wamupela ho yawetumamile. Nolopitula migunda yakwe ye mizabibu, ne migunda ye mibici yono yilelaga mikalo, yiwe mbago, ne vilimu vya mu mbago vyoloyihodanga.

Yelemiya 14:15

Ninga ane no Muwaha Mulungu, nokulonjela luno zono nowanoza, i wawizi wawa wono wakwisolela zinghani weneco, wono ane si niwatumile yaye, wawa kulonjela mwi'tagwa lyangu, wakutya vyono ati wulugu ne nzala si vyosuma kwinjila mu yisi yiyi. Ane nowawulaga i wawizi wawa ko wulugu ne nzala.

Ezekiyeli 22:31

Holeka ku soko yiyo, nane nowamwajila likuwo lyangu, niwakongoje mu moto, ku soko ye metumo gawo.” Vyo yakutya Muwaha Mulungu.

Malaki 3:11

Hamba sinoleceleza mang'onyo gahodanje nhwanga yenyu hamba hadodo, sunga ne mizabibu yenyu, yolela zabibu nyinji muno muno.