Yelemiya 4:7 - Luganuzi Luswanu Kuli Wanhu Wose 2002

⁷ Hambi mono yapejigwe u mulimo wuwo wo kongomeza, nha yakondya kuwikanizwa, nayo yehwanile simba yono yikuza yikulawilila ha wihundiko wayo. Yakuza yayongomeze Yuda. Ne makaya gose ga Yuda gololekwa matongo, hasina hamba munhu monga mono kolokwikala mumo.

Yelemiya 4:7 Referans Kwoze

Yelemiya 5:6

Na yiyi yo soko yono yoleka simba zilawe mu mbago zize ziwawulaje, nago maminzi gololawa mu nyika gaze gawahawanje no kuwalubutula mhonje mhonje. Nago masuwi golokwiwendya-wendya mu zikaya zawo. Nawo wanhu hono waze walawile kudeha, gaze gawahawanje nhugu nhugu, hambi u wubi wawo nha winji muno. Nawo wakacila kumuleka Mulungu yizuwa ne'zuwa.

Yelemiya 2:15

Alu lanje, wakumukolomela wenha simba. Ne yisi yakwe, wayinoza yawa nyika, ne vikaya vyayo, vyaweza matongo du, gono gagwiye hasi no kulekwa.

Isaya 6:11

Nane nghawuza nghatya, “Gwe Muwaha Mulungu, alu zizi zokwijela nili?” Nayo yakapitula yakanyitya, “Zizino zokuza kolo makaya gose gekala matongo gasina wanhu, sunga kolo zikaya zekala bwete, ne yisi yalekwa wuciwa wuwaha.

Isaya 1:7

Ne yisi yenyu yaweza yitongo, ne makaya genyu gatakamizwa no moto. Ne wajenzi wayisola yisi yenyu ha meso genyu, no kuyongomeza, hamonga na vyose vyono vili mumo.

Danyeli 7:4

Lilongozi lyali linha simba, ninga lyali lina mabawa genha ga numba. Nane lono nalangaga, mabawa galyo, gakapunyulwa mazoya gayo. Lilimu lilyo likasimywa, likema kwe migulu yalyo myejete nha munhu. Likapegwa mutima nha wa munhu.

Yelemiya 50:17

U Muwaha Mulungu yakutya nhavi, “I wanhu wa Isilayeli, wenha zingholo zono zawingwa ne simba, no kwiyagazwa ako na ako. Hambi ha lulongozi, nha wakahomwa no mutemi wa Ashuli, hanyuma yayo kanyhi, wakahomwa na Nebukadineza, u mutemi wa Babiloni, yakawabenanga mafupa gawo.

Yelemiya 25:9

‘Mulanje, ta! Nane nowatuma i wanhu wo lubavu lwa kusumuka, hamonga no mwitumami wangu Nebukadineza, u mutemi wa Babiloni. Waze wayihome yisi ya Yuda, ne wekazi wayo wose, hamonga ne makungugo gose gono gayipilime. Nane nolyongomezeza lukulu likungugo lili, hamonga ne wekalani wayawo wose, niwalece mu wongomele we cibitilila, wawe cinhu co kogofya no kuhowelezwa, hamonga no wucelewazwe wuwaha. Vyo nghutya ane no Muwaha Mulungu.

Yelemiya 49:19

Nane nolokuza niwanoze Waedomu wayitize nhinicizo yisi yawo, nha vyono simba yiswelepukaga nhinicizo, yikulawa mu mibici yono yititile muno, ya mu mwalambalo we likolongo lya Yoludani, mu wudimilo wono si wunyalaga. No mulongola mono nomuhagula nene, yuyo yo kololitema likungugo. Hambi nani lo mono yenha nene? Hamba nani lo mono konhemezezya madaha? Hamba mutemici mono kokwisumaniza nane?

Yelemiya 34:22

Nowalajiliza nawo wokuza kanyhi mwi'kaya lili. Wololihoma, walisole, no kulikongoga. Nane noganoza makaya ga Yuda, gawe nhe nyika, hawe hanhu hono hamba wanhu wo wose si wosuma kwikala mumo. Vyo nghutya ane no Muwaha Mulungu.”

Yelemiya 33:10

U Muwaha Mulungu yakutya nhavi, “I wanhu wakutya nha vyono, i hanhu baha heza nhe nyika, hono hasina cinhu cono colokwikala cumi mumo, wanhu hamba malimu. Na zizi, wakulonga mbeka, hambi mbeka vikaya vya Yuda hamonga ne zinzila za mu Yelusalemi, nha zisina mbeka wanhu hamba malimu wono wekaye mumo. Ninga hamba nhavivyo, kolosuma kanyhi kuhulika mumo,

Yelemiya 26:9

Alu nhawule wukulonjela mwi'tagwa lyo Muwaha Mulungu, nha vyono Nyumba yiyi yo Mulungu, yolokwihwana Shilo, kanyhi na vyono, likaya lili lyolokongomezwa, na vyono kanyhi, holowa hasina hamba munhu monga mono kolokwikala mumo?” Hodu, hobaho i wanhu wenji wakawa kumhilima mbavu zose.

Yelemiya 25:38

U Muwaha Mulungu, yawaleka i wanhu wakwe, nha vyono simba yiyilekaga mhango yayo. Ne yisi yawo yakondya kuwa nyika ku soko ya wogofywe wuwaha wo wulugu, hamonga no wukali we likuwo lyo Muwaha Mulungu.

Isaya 5:9

Ninga ane hulika Muwaha Mulungu, u Mulungu Mudaha vyose yakutya, “Makaya gaga maswanu mawaha, gose golowa matongo gali wene gasina wekazi.

2 Watemi 24:1

Na lono Yehoyakimu yali yakali yatemile, yakaza Nebukadineza mutemi wa Babiloni, yakayihoma yisi ya Yuda, yakayisola. Nebukadineza yakamudindimiza Yehoyakimu, myaka midatu, yawe yali hasi yo wutemi wakwe. Ninga hanyuma Yehoyakimu yakamugaluka yakamubeza.

Danyeli 5:19

Nayo yali mogopwe ne wanhu wose we makungugo ne zimbeyu na we milonjele yose, wamogopaga muno muno no kucicima. Lono yasakaga kumuwulaga yunji, yamuwulagaga du. Na lono yasakaga kumuwopolela yunji yekale mumi, yamuwopolelaga du. Yawapelaga lilumbo wono yasakaga, na wono yasakaga kuwanyetye, yawanyetyaga.

Yelemiya 50:44

“Nane nolokuza niwanoze Wababiloni wayitize yisi yawo nhinicizo, nha vyono simba liswelepukaga nhinicizo, likulawa mu mibici yono yititile muno, ya mu mwalambalo we likolongo lya Yoludani, mu wudimilo wono si wunyalaga. Nane no Muwaha Mulungu, nowawinga nhinicizo i wanhu wakwe wawuce muli mwene. Nolomuwika mulongola mono nolomuhagula nene no mweneco. Hambi nani lo mono yenha nene? Nani lo mono kosuma kusitaka? Hamba mudimici mono kosima kunyimila?

Yelemiya 27:8

“Ninga hono haze hejele likungugo linji lyono si lyolosaka litemwe no mwene Nebukadineza, nane nololilipiciza likungugo lilyo no wulugu, ne nzala, hamonga ne matamwa, sunga kolo mutemi Nebukadineza yawe yakondya kulyongomezeza lukulu.

Yelemiya 9:11

U Muwaha Mulungu yakutya, “Nane noyinoza Yelusalemi yiwe malundo ge matongo, hawe hanhu hono macewe gowa kwikala, nago makaya ga Yuda, gowa nyika, hawe hanhu hono yunji si kosuma kwikala.”

2 Watemi 25:1

Ninga hanyuma yayo, mutemi Zedekiya, yakamubeza mutemi Nebukadineza, mutemi wa Babiloni. Na ku soko yiyo, mutemi Nebukadineza, yakawa kuza ku Yelusalemi, hamonga ne lipuga lyakwe lye wasilikale, mwi'zuwa lye likumi, lya mu mwezi we likumi, wa mu mwaka we licenda, wo wutemi wa Zedekiya. Wakasita nghambi kunze ye likaya, wakazenga magomawakali, wakalipilimya likaya lyose.

Yelemiya 4:29

Ne wanhu wose wolotiza no kwiyagala ako na ako, ku soko ye lizozo lye wapanda fwalasi, ne waguma wupinde wanji wolotiziza ku mbago, na wanji wolobita mucanyha ye mabwe mawaha. Ne vikaya vyose vyololekwa visina wanhu, na holowa hasina hamba munhu monga mono kolokwinjila kanyhi yekale mumo.

Yelemiya 22:7

Hambi nha notuma wanhu wabite wakayongomeze, ne wanhu wawo, woteguliza hamonga ne zinhemo zawo, wakayitemanje ne mihagata, i mibici yayo miswanu muno, wayipembele mu moto.

Yelemiya 44:2

Muwaha Mulungu, we mihanga, u Mulungu wa Isilayeli, yakalonga yakatya, “Anye nyo weneco mwewonelela i mabi gose gono nagaleta mu Yelusalemi, na mu makaya gose ga mu yisi ya Yuda. Na vyono gekala matongo sunga nalu. Hasina hamba munhu yumonga kanyhi mono yekaye mumo,

Ezekiyeli 12:20

Holeka makaya gose gono aluno gamemile wanhu, gose gokongomezwa, ne yisi nayo, yowa nyhiwa yisina wanhu. Nawo baho nhondo, ho womanyila vyono, ane yo nene Muwaha Mulungu.”

Ezekiyeli 21:31

Nagwe koliwona likuwo lyangu, lono lyeza kukuziza nhe malambi go moto. Nane nokuwika mu miwoko ye wanhu i wakali wono wali nzizila, wono wamanyile mulimo wo kongomeza.

Ezekiyeli 32:2

“Gwe go munhu, wubite wukamukaje Falawo u mutemi wa Misili, wumulonjele zono nghumutya. Ane nghumutya nhavi, Agwe go mutemi wa Misili wukwiwona nha wuli simba muli makungugo. Ninga hamba nhavivyo, vyo winha mamba du mu malenga wukuzumhya malenga mwikolongo. Kanyhi kugatibulaga malenga ga mu makolongo ne magulu gako sunga gawa nhope, no kugahodanga makolongo.

Walawi 26:31

Noganoza makaya genyu gawe matongo, nohahodanga hanhu henyu ho wuhembelo, nogalemela lukulu no kugabocela ne makumbiko genyu.

Walawi 26:33

Noleta wulugu muli'nye, kanyhi nomwiyagazenyi mwiyagalile mu zi'si zo wujenzi. Ne yisi yenyu yowa matongo, ne makaya genyu golekwa gagwiye caka.

Yelemiya 8:16

Ne walugu wetu nha wakondya kwinjila mwi'kaya lya Dani, nase sunga nalu, cikugahulika i mazi ge zifwalasi zawo vyono zikuzoza. Sunga ne yisi yose yikucicima ku soko ye mililo ye zifwalasi zawo. Ne walugu wetu wawo, nha wakuza ho wayongomeze yisi yetu, hamonga ne vinhu vyose vyono vili mumo, i makaya hamonga ne wanhu wose wono wekaye mumo.

Yelemiya 22:6

“Ninga ku lubavu lwangu, ane nghuyiwona kaya yo wutemi wa Yuda, swanu muno yihwanile nhe yisi ya Gileyadi, nhe matunda ga Lebanoni. Ninga ane noyinoza yiwe yisi nyhiwa, yono yowa yisina munhu wo wose mono kokwikala mumo kanyhi.

Yelemiya 46:18

Ane yo nene u Muwaha Mulungu, we mihanga, yo nene mutemi kanyhi yo nene Mulungu mumi. Nha vyono yinha minala ye litunda lya Taboli, yigasulutiye matunda kucanyha, na vyono litunda lya Kalimeli, nalyo lijeye mucanyha ye lilenga, Ale, ne vilungo vya mono yakukuhoma, vyo vyowa vinha.