Yelemiya 4:13 - Luganuzi Luswanu Kuli Wanhu Wose 2002

¹³ Ale, wulanje ta, i walugu wakuza wenji muno wenha mavunde. Ne magali gawo go wulugu, gehwanile libeho lyono likupilima-pilima, sunga ne zifwalasi zawo, zikumangha musunho muno muno kuciza 'ndi. Woyi hee! Alu langa cajilila! Alu ho cawona wusungu!

Yelemiya 4:13 Referans Kwoze

Isaya 19:1

Ayi yo nghani ya kuli yisi ya Misili. Muwaha Mulungu kokuza ku Misili, yapandile mwi'vunde lyono likumangha. Ne vihwani vya Misili, vikucicima hali mwene, ne wanhu wa Misili vilungo vyawo vyodejepa.

Isaya 66:15

Langa ta! U Muwaha Mulungu kolokuza nha moto. Kolokuziza mu mabawa ge civulavumbi, yawaling'anize wose wono yawakoleywe likuwo.

Habakuki 1:8

“Ne zifwalasi zawo zowa zikumangha mbela mbela zicizize masuwi, kanyhi nghali, zicizize ne maminzi gono gadabuce. Ne wajendela zifwalasi wawo, wokuza wakuzimasha ku wulawa ma'si go kutali, fwalasi zawo zikwipalila hasi. Zikukola musunho muno muno kotya numba vyono yibataga mapelembo gayo.

I Cililo 4:19

Nawo wono wacilondaga mu nyuma, wali wali musunho muno kuciza numba ya mu mwanya. Wakacityatya mu matunda, wakacisola, wakacitegula ku nyika.

Isaya 5:28

Ne zisonga zawo nghali muno, no wupinde wawo, wolowa wutawiciywe lukulu, wawuwikanize so wugume du. Ne magaga ge zifwalasi zawo, makavu gehwanile libwe lye ng'anga. Ne matuka gawo go wulugu, matayili gayo, gowa kupilima nhe civulavumbi.

Nahumu 1:3

Langa mwene Muwaha Mulungu, sikakolwaga ne likuwo mbela, ninga yali vilungo, hamba sikalekaga kuwulipiciza wubi. Ho hose hono Muwaha Mulungu yakukola, cijelaga civulavumbi. Ne mavunde, go manghundi gono galawaga mu magulu gakwe.

Isaya 13:5

Wakulawilila mu ma'si go kutali ku mhelo ye yinze. Nayo Muwaha Mulungu kokuza yayongomezeze yisi yose mwi'kuwo lyakwe.

Wukumbucize wo Wulajilize 28:49

Nayo Muwaha Mulungu, komuletelenyi likungugo ku wulawilila ku mhelo ye yinze, likungugo lyono hamba ne nonga yawo, anye si muyimanyile yaye. Ne wanhu wawo womuzizenyi nha numba.

Yelemiya 4:31

Nane hulika cililo, kotya nha cililo ca munhu wa cicekulu, mono yali mu nghunga yo lusawo. Cililo cinha co mucekulu mono yakulela mwanagwe mulongozi. Kumbe cililo cico ca Yelusalemi, mono yakukapilicila ha wehele, akuno yalaze ne miwoko yakwe yakutya, “Woyi nye, aga magayo gangu! Hambi nhumbula yangu nha yikuzilika, hambi nha weza kuza wambulaje.”

Wugubule 1:7

Langa ta! Yakuziza mu mavunde! Ne wanhu wose wolomuwona, sunga na walya wono wamucinya no mugoha. Ne makungugo gose ga kono'nze, gololila ku soko yo mwene. Heya! Vyo yiweze.

Matayo 24:30

Ale baho langa, icitanjilo co Mwana wo Munhu, ho cilejelela ku wulanga, we makungugo gose ga kono'nze baho ho wololilila, nawo wolomuwona u Mwana wo Munhu, yakuziza mu mavunde mucanyha, akuno yena ne vilungo vinji hamonga no lukumyo luwaha.

Hoseya 8:1

Muwaha Mulungu yakutya, “Towe ndulele lizi lye citanjilo! Hambi walugu nha wakuzumha hasi, nha numba, mu'si yangu! Wanhu wangu wabena icilagane cono nalagana nawo, wabedegala no wulajilize wangu.

Danyeli 7:4

Lilongozi lyali linha simba, ninga lyali lina mabawa genha ga numba. Nane lono nalangaga, mabawa galyo, gakapunyulwa mazoya gayo. Lilimu lilyo likasimywa, likema kwe migulu yalyo myejete nha munhu. Likapegwa mutima nha wa munhu.

Yelemiya 10:19

Nawo i wanhu wa Yelusalemi wakalila wakutya, “Woyi hee, catamiswa nye, ne zinghomele zetu, hamba si zolopona yaye. Nase cehwesaga nha vyono cosuma kuwukangalila u wugaye wono winha vivi!

2 Samwili 1:23

“Sawuli na Yonazani wo wanhu wo wizine, kanyhi weyendile. Wali wali hamonga mu wumi, na mu wufwe, kanyhi wali wamanyhi kuciza Ndi, wali wali vilungo kuciza simba.”

Isaya 3:8

Heya, mbeka, Yelusalemi yongomezwa! Nayo Yuda yikuvulumuka! Ku soko vyono mu zinghani zawo na mu metumo gawo, wamubedegalaga Muwaha Mulungu, no kumutovula calinze.

Yelemiya 4:12

Langa yowa mbeho yono yikuziza mu wulajilize wo Muwaha Mulungu. Nayo yowa mbeho yono yili vilungo muno si nhe civulavumbi! Nayo yo Muwaha Mulungu du, mono kolavya ze ning'aniza kuli wanhu wakwe.

Yelemiya 9:19

Ale, ta muhulicize cililo cono cikulawa ku Sayuni cono wakutya, “Alu langa congomela! Cakozwa cevu muno muno! Nalu yicinojeye ciyilece yisi yetu hambi zikaya zetu nha zamwagulwanga.”

Yelemiya 49:22

Nawo walugu woloyihoma Bozila kotya numba yiguluce, akuno yigolose ne mabawa gayo. Na mwizuwa lilyo, i wasilikale wa Edomu, wolokwinjilwa no woga wuwaha muno, nho mucekulu mono yali mu nghunga yo lusawo.”

Ezekiyeli 26:10

Ne manghundi gono golowa kutimulwa ne zifwalasi zawo zi nyinji, golokufuniciza. Ne misindo ye mazozo ge wapanda zifwalasi, hamonga ne magali go wulugu gono gakukwegwa ne zifwalasi, gologasinjisa majinji gako, kolo yeza kwinjila mu milago yako, nha vyono wanhu wenjilaga mu kaya yono yibenigwe hanji.

Ezekiyeli 38:9

Nayo mutemi Gogu ne lipuga lyakwe lye wasilikale, hamonga ne wanhu wenji wono wololawa mu makungugo menji, woloyihungucila yisi nhe mbeho mbaha yo mukukunzo, kanyhi wolotandala mu yisi yose nhe mavunde.”

Danyeli 11:40

“Ne madaha ge ndumo go mutemi wa Siliya kolo geza kufika, u mutemi wa Misili kolomuhoma. Ninga mwene mutemi wa Siliya, nayo kolokwitaza, yehome no mutemi wa Misili kwe vilungo vyakwe vyose, akuno yakwitumamila ne matuka gakwe go wulugu, ne zifwalasi, hamonga ne zingalawa nyinji muno. Nayo kolozisuma zi'si nyinji, kolokwinjila mu zi'si zizo yakuhuluma nhe 'hwazi lya malenga.

Mika 2:4

Ne vilo vivyo, kolo vikuza, wanhu wolosimulila ze mikalile yenyu yo wugaye, ciwe colecezo, nawo wawe kwimba no lwimbo aluno lwe cililo, lono lukulajila zono zamutujenyi, wawe kutya, ‘Cakondya kuhodanjilwa lukulu! Muwaha Mulungu yakondya kuyisola yisi yetu, no kuwapela wono wacinozize mateka.’ ”

Yelemiya 6:23

Wakondya kwibata no wupinde wawo mu miwoko, hamonga ne mimaje yawo. Kanyhi wene, wo wanhu wakali muno, kanyhi wasina hamba lusungu yaye. Nawo wakukoloma wenha i mawingo ge lilenga lono wapandile mu zifwalasi zawo. Nawo wakondizye kwiwikaniza waze wayihome Sayuni.”

Yelemiya 46:18

Ane yo nene u Muwaha Mulungu, we mihanga, yo nene mutemi kanyhi yo nene Mulungu mumi. Nha vyono yinha minala ye litunda lya Taboli, yigasulutiye matunda kucanyha, na vyono litunda lya Kalimeli, nalyo lijeye mucanyha ye lilenga, Ale, ne vilungo vya mono yakukuhoma, vyo vyowa vinha.

Yelemiya 48:40

U Muwaha Mulungu yehuwiza nha vyono, likungugo lyolokuza, nalyo lyologuluka nha 'ndi, no kugoloza mabawa gayo mucanyha ya Mowabu.

Zakaliya 6:1

Kanyhi nghenula meso gangu, nghawona magali mane go wulugu gakuza gakulawilila haciligati ye matunda mejete ga shaba.