Yelemiya 3:6 - Luganuzi Luswanu Kuli Wanhu Wose 2002

⁶ Kanyhi mu vilo vyo mutemi Yosiya, u Muwaha Mulungu yakanonjela yakatya, “Alu wule, waziwona zono yetumile Isilayeli, mono si mwihuwilwa? Hambi nha yakondya kundeka 'ne, kawa kubita mu matunda matali gose, na hasi ye mabici gose gono gena mahamha gadedewaye, kawa kwituma zo wusenyha wakwe.

Yelemiya 3:6 Referans Kwoze

Ezekiyeli 23:11

“Ninga hamba nhavivyo, u mwanakwawe Oholiba, nayo yaziwona zizi, ninga nayo yakacila kuwa malaya muno sinha vyono yali yenha Ohola.

Ezekiyeli 20:28

Ninga nane, lono nawenjiza mu yisi yono nali nehuwiza nha vyono nowapela. Nawo wali weza kugawona matunda matali, hamonga ne mibici yono yidedewaye, ati hodu, wakawa kuvilavizya makumbiko. Nane nhondo, ho wakanghoza likuwo muno, so makumbiko gawo manyanywe, hamonga ne divayi yono wayilavya.

Ezekiyeli 16:31

Na mu zinzila zose zimbaha, agwe wuzenjile hanhu ha wuhembelo we vihwani, no kwituma zo wusenyha. Ninga nghani yo wizine, agwe si lunji wusina mapesa nha vyono wenha i wasenyha wanji, holeka wukwituma zizo, ng'o, wisimajiye ne wasenyha wanji.

Yelemiya 17:2

Hambi i wanhu wako nha wahembaga ha vikumbicilo hamonga ne vihwani vyo mulungu we cicekulu Ashela, behi ne mabici gono gena mahamha madece mu matunda matali,

Yelemiya 7:24

Ninga wene si wahulika 'ne, hamba kuzicelelela bwete, zono nawalonjela. Wene waketuma zimbi vyono wasakaga weneco mu zinhumbula zawo. Wakacila kuwa wabi muno, wakawuka ku wuswanu.

Yelemiya 3:8

Nayo Yuda, yaziwona, nha vyono nakondya kumuleka Isilayeli, namupela talaka, na vyono namuwinga, ku soko yandeka 'ne, no kuzityatya zo wusenyha. Ninga nayo Yuda munghalo lumbulye Isilayeli mono si mwihuwilwa, nayo hamba si yatuga woga yaye. Langa nayo yakawa musenyha,

Isaya 57:7

Sunga na hanji, mukubita mucanyha ye matunda matali, muwa kulavya makumbiko genyu kuko, muwa kunoza na zo wusenyha wenyu mumo mu matunda.

1 Watemi 14:23

Hambi nha wazenga hanhu ho kuhembela milungu yo wulambi, wakasimya masumbili ga mabwe, hamonga ne cihwani co mulungu we cicekulu Ashela, no kucihemba mumo mu vigongo vitali, na mu mibeho hasi ye mibici.

2 Zinghomo 34:1

Yosiya yali yaficile myaka munana du, lono yanziza kutema mu Yuda. Nayo yakatema mu Yelusalemi myaka makumi madatu na wumonga.

Yelemiya 1:2

Muwaha Mulungu yalonga na Yelemiya mu mwaka we likumi ne 'datu, wa mu wuteme wa Yosiya, u mwana wa Amoni, lono yali mutemi wa Yuda.

Yelemiya 5:11

Hambi anye nyo wanhu wa Isilayeli na Yuda, nha mwakondya kungalucila lukulu. Vyo nghutya ane no Muwaha Mulungu.”

Yelemiya 11:10

Alu nha wawuwuyila u wubi we walezi wawo, wono walemaga kwituma zono nawalonjelaga, wene wakayihemba milungu yinji. Holeka ku soko yiyo, wawa wose, Isilayeli na Yuda, wakondya kucibena cilagane cangu cono nacinoza ne walezi wawo.

Yelemiya 31:22

Alo ho mokangamyanga sunga nili lo, anye nyo wanhu wo wihuwilo wucefu? Hambi 'ne, nha nawumba nghani yinji mhya mono'nze, yono yisimajiye, nha vyono u mucekulu yo komulondola u mulume.”

Ezekiyeli 23:4

U muwaha yacemwaga Ohola, nha cinji yo Samaliya. Nayo u mwanakwawe, yacemwaga Oholiba, nha cinji yo Yelusalemi. Nawo vyono wejete, wakawa wangu wakandelela wana walume ne wacekulu.

Hoseya 4:13

Wakulavya makumbiko, mucanyha ye vizuli vye matunda, kanyhi wakufusa no wuvumba mucanyha ye matunda na ha masina ge mibici mitali. Vyono mibeho yayo yikwendeza muno! Ku soko yiyo, holeka wana wenyu we cicekulu, wekaye nha malaya, ne wakwe zenyu we cicekulu nawo wakusenyha.

Hoseya 11:7

Wene wakucila kuwuya ne nyuma. Ninga wololila ku soko yo lubano lono luli muli wene, hamba hasina munhu mono kololuwusa muli wene.

Walamuzi 2:17

Ninga hamba nhavivyo Waisilayeli siwasuma kuwahulika walongola wawa. Waisilayeli wakaleka wihuwilo wa kuli Muwaha Mulungu, wakajendelela du kuyihemba milungu yinji. Langa i wa kuku zawo, wali wagebate malajilizo go Muwaha Mulungu. Ninga u lulelo alu lwe kejete, wakagaleka musunho i malajilizo go Muwaha Mulungu.

Zabuli 106:39

Holeka wakehodanga ku soko ye metumo gawo, wakawa wasina wihuwilwa kanyhi kuli Mulungu, wakawa nhe wasenyha.

Isaya 57:3

Ninga anye nyo wabi, muze ho muling'anizwe! Hambi nha muli wabi kuciza no muhawi, hamba no musenyha hamba no mucekulu malaya.

Ezekiyeli 16:35

Holeka 'gwe go Yelusalemi go malaya! Alu wuhulicize zono Muwaha Mulungu yakulonga yakutya,