Yelemiya 12:10 - Luganuzi Luswanu Kuli Wanhu Wose 2002

¹⁰ Ne wadimi wenji wakondya kuwuhodanga u mugunda wangu we mizabibu wayikanyanjiza migunda yangu no kuyinoza yisi yangu yono niyendile yiwe nyika.

Yelemiya 12:10 Referans Kwoze

Yelemiya 23:1

Ninga u Muwaha Mulungu, kolowalipiciza wulipicizwe wuwaha muno, i walongola wono wakuwahodanga, no kuweyagaza wanhu wakwe!

Isaya 63:18

Ase co wanhu wako wasiwanulwe, cali cakondya kusolwa ne walugu wetu kwa cidaha cidodo du, nawo wakawukanyajizanga wuhembelo wako.

Yelemiya 6:3

Ne watemi wolokuza wasite nghambi baho he 'kaya, hamonga ne wasilikale wawo wo wulugu. Wolokoma ne mahema gawo walipilime likaya. Na muli wene wose, munhu wo wose kolosita nghambi yakwe hono kowa yakusaka mweneco.

Yelemiya 3:19

U Muwaha Mulungu yakutya nhavi, “Gwe Isilayeli, ane nasakaga nghubocele 'gwe kotya wuli mwanangu, nghupele ne yisi swanu muno, i hanhu haswanu hono hacizize yinze yose. Ane nasakaga agwe wunyheme'ne, baba, ho wulece kundeka 'ne kanyhi.

Wugubule 11:2

Ninga wulece kulipima libululu lyono lili kunze yo wuhembelo, hambi libululu lilyo, nha lyapegwa wanhu we makungugo ganji, wanhu wono wolikanyanjila i likaya lyono lyelile mu myezi makumi mane na myejete.

Luka 21:14

Holeka mwikamise mu zinhumbula zenyu, mulece kwiyandila kwihwelela vyono mokwitetela,

Yelemiya 39:3

(Na lono Yelusalemi yali yakondya kutekwa, i wetumami wawaha wose wo mutemi wa Babiloni, wakawa kubita, wakawa kutandala ha mulango wa haciligati. Ne wetumami wawo, wali wali hamonga ne wanhu awano. Neligali Salezeli, na Samugali Nebo u muwaha we wapaswe na Selisekimu, hamonga na Neligali Salezeli yunji kanyhi.)

Yelemiya 25:9

‘Mulanje, ta! Nane nowatuma i wanhu wo lubavu lwa kusumuka, hamonga no mwitumami wangu Nebukadineza, u mutemi wa Babiloni. Waze wayihome yisi ya Yuda, ne wekazi wayo wose, hamonga ne makungugo gose gono gayipilime. Nane nolyongomezeza lukulu likungugo lili, hamonga ne wekalani wayawo wose, niwalece mu wongomele we cibitilila, wawe cinhu co kogofya no kuhowelezwa, hamonga no wucelewazwe wuwaha. Vyo nghutya ane no Muwaha Mulungu.

Isaya 43:28

Sunga ne watemi wenyu, nawo wakahavufya i hanhu hangu hono helile. Holeka ku soko yiyo, nane nghaleta wongomezwe kuli Isilayeli. Nghawaleka wanhu wangu Isilayeli watovulwe.”

Yelemiya 9:10

Nane Yelemiya nghatya, “Ale, nane nogalilila matunda, no kugalavya mahozi gangu ku soko yo wudimilo. Hambi wudimilo wose nha wanyala hasina hamba yunji kanyhi mono yakukolela mumo. Ne mazi ge zimitugo, gapela no kuhulikwa mumo. Sunga ne malimu gose hamonga ne zindeje, vyose vyakondya kuwuka mumo.”

Ezekiyeli 34:2

“Gwe go munhu, wuwalonjele no kuwawilila, i wadimi wose we yisi ya Isilayeli, wuwamanyize zono ane no Muwaha Mulungu nghuwalonjela nghutya, Woyi hee, anye nyo wadimi wa Isilayeli! Hambi nha mwiyilisaga nyo weneco du, hamba si mukuzilisa zingholo yaye.

Danyeli 8:13

Hanyuma yayo, nghahulika malayika yakumuwuza malayika muyagwe, yakutya, “Alo zizi zono zijeye mu wugubulilwe, ho zojendelela sunga nili lo? Hamba wuwu wubi wono wukuwimila u wulavye we makumbiko, nawo wojendelela sunga nili? Ma, lipuga lya ku wulanga nalyo, hamonga ne Nyumba yo Mulungu, navyo ho vyojendelela kukanyanjilwa sunga nili?”

Zakaliya 7:14

Na ku soko yiyo holeka nghawafwagula, no kuwawinjila ku zi'si zo wujenzi. Ne yisi ayi swanu, yikekala nyhiwa musina munhu mono yasigala yekale mumu.”

Isaya 3:14

Muwaha Mulungu, yakuwacema wanyamhala we wanhu wakwe, hamonga ne walongola we wanhu wakwe, ho yawaling'anize. Nayo yakuwasitaka yakutya, “Yo nyenye mono mwapumha migunda ye mizabibu, ne zikaya zenyu, zimemile vinhu vyono mwawaboka waciwa.

Yelemiya 25:37

no kuyileka yisi yenyu yo mulamu yeza matongo gose.

Yelemiya 25:38

U Muwaha Mulungu, yawaleka i wanhu wakwe, nha vyono simba yiyilekaga mhango yayo. Ne yisi yawo yakondya kuwa nyika ku soko ya wogofywe wuwaha wo wulugu, hamonga no wukali we likuwo lyo Muwaha Mulungu.

Ezekiyeli 34:5

Alu, zingholo vyono zali zeza zisina mudimi, zikeyagala caka, ne malimu ga mu mbago gakaziwulaga no kuzilya.