Yelemiya 11:10 - Luganuzi Luswanu Kuli Wanhu Wose 2002

¹⁰ Alu nha wawuwuyila u wubi we walezi wawo, wono walemaga kwituma zono nawalonjelaga, wene wakayihemba milungu yinji. Holeka ku soko yiyo, wawa wose, Isilayeli na Yuda, wakondya kucibena cilagane cangu cono nacinoza ne walezi wawo.

Yelemiya 11:10 Referans Kwoze

Wukumbucize wo Wulajilize 31:16

Muwaha Mulungu yakamulonjela Musa yakatya, “Alu agwe Musa, weza wuli behi no kufwa, na lono kowa wakondya kufwa, hodu wanhu hamba si wowa wehuwilwa kanyhi kuli'ne, kanyhi wocibena ne cilagane cangu cono nalagana nawo. Wondeka, wawe kuhemba milungu yo wulambi yono yili mu yisi yono wene wokwinjila.

Ezekiyeli 16:59

U Muwaha Mulungu yakulonga yakutya nhavi, “Ane nomutendelenyi nha vyono munojeye. Hambi nha mwabedegala wihuwizo wenyu, no kucibena cilagane.

1 Samwili 15:11

“Nghukalala muno muno vyono namunoza Sawuli yawe mutemi, hambi 'lu nha yakondya kundeka, kanyhi yakondya kugabedegala ne malajilizo gangu.” Nayo Samwili yakawa kukolwa ne likuwo. Na mu cilo ci cilya cose, yakagona yakulomba kuli Muwaha Mulungu.

Walamuzi 2:19

Ninga lono mulongola yakufwa du, hodu nawo walekaga kumwitumamila Muwaha Mulungu no kuziwuyila kanyhi zinzila ze katali. No kwituma u wubi wono walajila mu vipango vivyo, vyono wali wucizize muno kuciza na wo lulelo lono lupulute. Wayihembaga no kuyitumamila milungu yinji. Wakajendelela du ne metumo gawo mabi.

Walamuzi 2:17

Ninga hamba nhavivyo Waisilayeli siwasuma kuwahulika walongola wawa. Waisilayeli wakaleka wihuwilo wa kuli Muwaha Mulungu, wakajendelela du kuyihemba milungu yinji. Langa i wa kuku zawo, wali wagebate malajilizo go Muwaha Mulungu. Ninga u lulelo alu lwe kejete, wakagaleka musunho i malajilizo go Muwaha Mulungu.

Wahebelaniya 8:9

Ne cilagane cico si cowa cihwanile ne cilagane acilya lono nawebatila muwoko niwahamye mu yisi ya Misili. Hambi nha si wekalaga mu cilagane cangu. Holeka nane sinawalanga, yakutya u Muwaha.

Zefaniya 1:6

Kanyhi nowawusiza lukulu na wawo wono wawuya ne nyuma hamba si wakunhyatya'ne kanyhi. Wawo wono si wakuza kuli'ne hamba si wendile kuwulondola wutonji wangu niwatonje.”

Hoseya 6:7

“Ninga wene weza nha Adamu, wacibena cilagane cono calagana nane.

Ezekiyeli 44:7

Hambi nha wawenjiza mu Nyumba yangu i wajenzi wono si walame, wono wasina cihuliko kuli'ne, ho wawe mugati, mwi'pango lono wakundavizya mafuta ne sakami vye makumbiko, vyono vikulavywa kuli'ne. Na mu nzila yiyo, wakawa kuyavufya Nyumba yangu. Holeka i wanhu wangu wakondya kucibena i cilagane, ku soko ye makani gawo gose ge mawifyo gono wakwituma.

Zabuli 78:57

Wakawa wasina cihuliko, hamba kuwa wehuwilwa, wakawa nha vyono wali wenha walezi wawo, wakayumba-yumba nhe songa yono si nghangale.

Wukumbucize wo Wulajilize 9:7

“Kanyhi mulecele lukulu kusemwa vyono mwamukoza likuwo Muwaha Mulungu kuko ku nyika. Ku wulawilila mwizuwa lyono mwawucila ku Misili, sunga mwizuwa lyono mwaficila bahano, mwamubeza Muwaha Mulungu.

Walawi 26:15

Na hono mulece kuwibata wulajilize wangu, hamonga ne malajilizo gangu, kanyhi mubene ne cilagane cono nacinoza nanye.

Zakaliya 1:4

Mulece kwihwana nhe wasogo zenyu wono katali i wawizi wawapela zinghani zangu ho wagalece metumo gawo mabi, hamonga no wubi wawo. Ninga wene siwahulika, hamba kumvumila 'ne yaye.

Hoseya 7:16

Vyo wakali du wakuwuya ne nyuma wakundeka, wakumutyatya mulungu wo wulambi, mono yasina vilungo. Waweza si wehuwilwa hamba hadodo, waweza nha wupinde wono si wukwiliye cinji. Hambi walongola wawo, nha wakulonga ko wivuni, ninga walekaje, wolofwa cifo cibi muno, sunga ne Wamisili wolowaseka.”

Hoseya 6:4

Ninga Muwaha Mulungu yakutya, “Isilayeli na Yuda, alo nghanici yono nomutendelenyi? Wendo wenyu kuli'ne wawuka musunho nha vyono nghungulyosi lye hakali mitondo, kotya buhe, yono siyitinyaga kunyala.

Yelemiya 31:32

Ne cilagane cico, si colowa cihwanile ne cilagane ce katali yaye, cono nacinoza ne walezi wawo, lono nawakamisa, nghawawusa mu yisi ya Misili. Hamba niwe nali nili mulume wawo, ninga wene si wacikamisa yaye cilagane cico.

Walamuzi 2:11

Hobaho i wanhu wa Isilayeli waketuma wubi hali Muwaha Mulungu, wakanza kanyhi kuyihemba Milungu ya Mabaali.

Yelemiya 7:28

Wuwalonjele nha vyono, likungugo lyawo lisina cihuliko kuli'ne, ane no Muwaha Mulungu, u Mulungu wawo, hamba si wakusuma kwifundila mu wulipicizwe wawo. No wihuwilwa wawo wakondya kuwucila lukulu muli wene, hamba no kuwuduwila du kose, si wawuduwilaga yaye.

Yelemiya 9:6

Wajendelelaga du kwituma zo wubi awu na awo, ne metumo gawo go wulambi, nago vyo getyatiliye du. Nayo u Muwaha Mulungu yakutya, vyono i wanhu wakwe wakondya kumulema.

Yelemiya 13:10

Hambi i wanhu wawa, nha wakulema kuzihulika zinghani zangu. Weza wanhu wabi ku wulawa na katali, wakuhemba no kuyitumamila i milungu yinji. Holeka nawo wokwihwana ne kaputula yiyino, yono yeza yisina kanyhi cambuzi co cose.

Yelemiya 17:23

Ninga i walezi wawo, hamba si wahulika 'ne yaye, hamba kuzitajila mu zinhumbula zawo ng'o. Langa wene wakacila kuwa wasina cihuliko du kuli'ne, hamba si wasaka kugabocela ne mafundo gangu yaye.

Yelemiya 44:5

Ninga 'nye si mwasacila lukulu kuzihulika hamba kuzicelelela yaye. Hamba si mwasaka ho mugalece gago metumo genyu mabi go kuyikumbika milungu yinji.

Yelemiya 44:16

“Gwe Yelemiya, ase cayilemela lukulu nghani yono wacilonjela, mwi'tagwa lyo Muwaha Mulungu.

Ezekiyeli 5:6

Ninga Yelusalemi yagabedegala malajilizo gangu, nokwilajila vyono yene yo 'mbi muno si nhe ma'si ganji gono galipilime. Hambi Yelusalemi nha yalema kuwibata malajilizo gangu, hamonga no wulajilize wangu.

Zakaliya 7:11

Ninga i wanhu wangu wangu wakawa wali cibede siwakasaka hamba no kuhuliciza, wakadinda ne makutu gawo ho walece kuhulika,

Zakaliya 7:13

Alu vyono siwahuliciza zangu, holeka nane sinawapitula no wulombe wawo.

Isaya 24:5

Ne wanhu wakondya kuyavufya yinze, so wubena malajilizo go Mulungu, no kudelengula cilagane cono yacinoza, ho cikale cibitilila.

Yelemiya 22:9

Ninga kanyhi wokwipitula weneco wose wawe kutya, vyono, zizi zimwaganenyi ku soko anye mwakondya kucileka i Cilagane cono mwacinoza nane, ane no Mulungu wenyu, mukawa kuyihemba no kuyitumamila milungu yinji.”