Luka 2:4 - Luganuzi Luswanu Kuli Wanhu Wose 2002

⁴ Yusufu nayo yakatuluka kulawa Nazaleti ya Galilaya, yakabita ku Betelehemu mu yisi ya Yudiya kono yalelelwa u mutemi Dawudi. Vyono mwene nayo yali we mhuga ya Dawudi,

I CILAGANE CIPYA 1991

⁴ Yusufu nayo yakatuluka kulawa Nazaleti ya Galilaya, yakabita ku Betelehemu mu yisi ya Yudiya kukaya ya Dawudi. Vyono mwene nayo yali we mhuga ya Dawudi,

Luka 2:4 Referans Kwoze

Mika 5:2

Muwaha Mulungu yakutya, “Agwe Betelehemu Efulata, agwe yo gwegwe wuli cikaya cidodo mu Yuda, ninga nomuhagula yunji ku wulawa muli'gwe mono kowa mutemi wa Isilayeli, mono wulawo wakwe wo we katali na katali.”

Yohana 7:42

I Mandiko Gono Gelile gakutya wule? Gakutya, “Kilisito kolawa mu lulelo lwa Dawudi, na kolelelwa ku Betelehemu, mu kaya ya Dawudi.”

1 Samwili 16:1

Muwaha Mulungu yakamutya Samwili, “Alu ho kojendelela kumulilila Sawuli sunga nili lo? Ane nakondya kumulema yalece kuwa mutemi we Waisilayeli. Ninga aluno, wusole mafuta, wubite ku Betelehemu, kuli munhu mono kacemwaga Yese. Hambi ne nha nakondya kumuhagula yumonga wa muli wanagwe yawe mutemi.”

Luka 4:16

Yesu yakabita ku Nazaleti kono yawilucila, yakenjila mu nhang'anilo yo wuhembelo mwizuwa lye sabato nha vyono yali yazoweye, yakema yasome Mandiko Gono Gelile.

Matayo 2:23

yakahamila mwi'kaya lyono likucemwa lya Nazaleti. Nhavivi vyo zaficilicila izinghani zono zalonjelwa mu nzila ye wawizi, zono zikutya vyono, “Kocemwa Munazili.”

1 Samwili 20:6

Na kolo sogo yakuwona vyono nili hasina ha zindigwa, ale, mulonjelaje vyono nghulomba agwe wunghombole, ho mbite ku Betelehemu, vyono aluno, lyo lipango lyo kulavya likumbiko kuko mu mwaka, so we mhuga yangu wose.

Lutu 4:17

Nawo i wacekulu wekalani wayagwe, wakamucemela umwana litagwa lya Obedi. Nawo wakawa kuwalonjela wanhu wose nha vyono lu, u mwana we cilume kalelwa kuli Nawomi. Obedi yakawa yo sogo wa Yese mono yali sogo wa Dawudi.

Lutu 4:11

Nawo wawaha, hamonga ne wanhu wose wakatya, “Heya, ase cili wahomelezi. Nayo Muwaha Mulungu yamunoze mucekulu wako yawe nha Laheli na Leya, wono walela wana wenji kuli Yakobo, nagwe wuwe mugoli mu lulelo lwa Efulata, no kuwa munhu muwaha mu Betelehemu.

Lutu 2:4

Hanyuma yayo Bowazi mweneco yakaza ku mugunda ku wulawa ku Betelehemu yakawalamusa i waduduzi. Yakatya, “Muwaha Mulungu yeze muli nyenye.” Nawo wakamutya, “Muwaha Mulungu nagwe yakulugute.”

Yohana 1:46

Nataneli yakamutya Filipo, “Hambi ku Nazaleti nako kosuma kulawa cinhu ciswanu?” Filipo yakamutya, “Wuze wulanje.”

1 Samwili 17:58

Sawuli yakamuwuza Dawudi yakatya, “Agwe muzelelo, alu wuli mwana nani?” Dawudi yakamupitula yakatya, “Ane nili mwana wo mwitumami wako Yese munya ku Betelehemu.”

1 Samwili 17:12

Ale, Dawudi yali mwana wo munhu mono yali wo mulango wa Efulayimu, mono yacemwaga litagwa lyakwe Yese, munya Betelehemu, mu yisi ya Yuda. Nayo yuyu Yese, yali yena wana munana we cilume. Na mwi'pango lyono, Sawuli yali yo yatemile, mwene Yese yali yawa mukombi muno.

1 Samwili 16:4

Nayo Samwili yakazinoza zose nha vyono Muwaha Mulungu yamulonjela yetume. Yakawa kubita ku Betelehemu, nawo i walongola we likaya, wali weza kumuwona yakuza, wakawa kubita kumuhinjiliza akuno wakucicima. Wakamuwuza wakatya, “Wukuza kuli'se wina no mulamu?”

Lutu 1:19

Wakawa kujendelela no muhinzo wose vyono wejete, sunga wakafika ku Betelehemu. Nawo lono waficililaga, mwi'kaya lya Betelehemu, likaya lyose likenjila sasamo mbaha, ne wacekulu wakalonga wakutya, “Mwene 'nye, yuyu mbeka yo Nawomi?”

Mwamulizo 48:7

Nalamula kunoza zizi, ku soko yo nyina yako Laheli. Ku soko lono nawuyaga nghulawa ku Padani, mwene yakafwila mu yisi ya Kanani, lono cali ceza cili behi no kufika ku Efulata, yakandecela wusungu wuwaha muno muno. Hodu nane nghawa kumuzika baho du, ha mhelo ye nzila yono yibitile Efulata, nha cinji yo Betelehemu.”

Mwamulizo 35:19

Hodu Laheli hobaho yakawa kufwa, wakawa kumuzika ha mhelo ye nzila yono yibitile ku Efulata, wo wutya Betelehemu.

Matayo 1:20

Ninga lono yali yakali yakuyihwesa inghani yiyo, malayika wo Muwaha yakamulawila mu ndoto, yakamulonjela, yakatya, “Gwe Yusufu go mwana wa Dawudi, wulece kogopa kumusola Malyamu yawe mugolece wako, hambi u muda wuwo wono yena nawo, nha kawutuga kwe vilungo vyo Muhe Mono Yelile.

Luka 2:3

Wose wakabita kwandikwa, munhu na kaya yakwe.

Luka 2:5

ho yandikwe hamonga na Malyamu, mono yali mubanywe nayo, lono yali yakataye ne'nda.