खे़ङ्हाॽ मे़भुङ्सिङ्ङाङ् नाम्धा पिसाङ्बा फिलिस्ति लाजेॽओ के़ने़बा याक्केःक्केःक्पादे़न्नो मे़सःक् मे़बेःक्लो॥ खे़ङ्हाॽ मे़दङ्सिङ्ङाङ् नाङ्गे़न् पिसाङ्बा मनाहाॽ मे़नाप्तुसिरो, खे़ङ्हाॽरे़ ए़दोम नु मोआब लाजेॽहाॽ मे़लिसुरो, खे़ब्याङ् अम्मोनबा मनाहाॽ खे़ङ्हाॽरे़ युक्को मे़दारुसिरो॥
सपन्याह 2:9 - लिम्बु9 कल्ले़चोगुल्ले़ मुक्साम्दाङ्बा यहवे, इस्राइलबा निङ्वाॽफुमाङ्ङिल्ले़ उवा चोगुरो, “आङ्गाॽ कुहिङ्वे़त् वाॽआबा कुइसिक्, से़क्खाए मोआबे़न् सदोम हे़क्तङ्बा पोङ्लो अम्मोनिहाॽ गमोरान् हे़क्के ताम्भुङ् याःन्सुङ् नु युम् के़याक्पा पाक्लुम्लुम्बादे़न् पोङ्लो, हे़क्क्याङ् सदादिङ्ले़ लागि चा मे़न्नुॽमनाबा लाजेॽ पोङ्लो॥ के़वाॽबा के़याःक्पा आमनाहाॽरे़ खे़ङ्हाॽ मे़नाप्तुसिरो, खे़ब्याङ् के़हिङ्बा के़याःक्पा आङ्गाॽ आसुवाङ्हाॽरे़ खे़ङ्हाॽरे़ खुन्छिॽ लाजेन् मे़युक्तुरो॥” Gade chapit la |
सपन्याह 2:9
27 Referans Kwoze
यहवे दाङ्बे़ल्ले़ खुने़ॽ किप्मा के़घुबा कुसिक् पोःक्मो सदोम नु गमोरा, अद्मा नु सबोयिमे़न् खाप्पुथ्यःङ् चोगुबा कुइसिक् लाजेॽओ के़रे़क् कान्धाक् नु युम् मिगे़दिक्पा मिघाङ्ग्रोक्लक् पोङ्ॽ॥ खे़न् थे़माआङ् मे़ल्लेःत्तेबा, थे़माआङ् मे़ल्लिङ्मनाबा नु याःन्सुङ्ङाङ् मे़ल्लिङ्मनाबा याक्चाना पोङ्ॽ॥
मोआबरे़ कुयाःम्बेओ कन् इङ्घङ्ङिन् के़रे़आङ् वये़॥ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुरो, “चिःत्ते़ स्ये़, नेबोबा ये़क्यक्किल्ले़ के़साक्पा तुक्खेन् हाङ्घुआङ् ने़रो, कन् ये़क्यक्किन् हाराए खाप्पुथ्यःङ् पोङ्लो! किर्यातैमबा ये़क्यक्किन् नःम्नःम्बा पोङ्ङाङ् मनाहुक्को थारो, हाङ्यक्किन् नःम्नःम्बा पोङ्ङाङ् लुःन्लो॥
खे़निॽ मिक्के़ल्ले़ के़रे़क् पिसाङ् थे पोङ्ल पत् खे़न् ओमे़त्ते़म्मे़ॽओ, खे़निॽ मनाहाॽ मे़जुम्ल मे़बत् खे़ङ्हाॽ हिम्मो मे़दार मे़बत्लो॥ आङ्गाॽ सदादिङ् कुहिङ्वे़त् वाॽआबा कुइसिक् यहवे दाङ्बे़ल्ले़ पाःत्तुरो, ‘सिसामेःत्तिन् वाःत्ति सामापुमाहाॽ नु हाङ्हाङ् लॽबा कुसिङ् खे़ने़ॽ के़मनाहाॽनु हाङ्हाङ् के़लॽरो॥’
इस्राइलबा के़दाङ्बा के़याःक्पा मनाहाॽरे़ थे़माआङ् याःम्बक् मे़म्भेःन्दुन्लो॥ खे़ङ्हाॽरे़ मे़न्वाॽमना पान् मे़म्बाःत्तुन्लो, खुन्छिॽ मुराओ इङ्ले़क् पाःन्नाङ् खोमे़दे़त्ने़न्लो, खे़ङ्हाॽरे़ मे़ज मे़धुआङ् मे़ले़ङ्ङाङ् मे़ने़रो, हे़क्क्याङ् खे़ङ्हाॽ हाःत्ले़आङ् यङ्मा मे़से़रुसिन्लो॥”
थक्सालुप् नु थक्सा सुम्, के़रे़क् कुसक्मा के़याक्पा परिक् परिक्पाहाॽ खे़प्मो मे़ने़ मे़इम्लो॥ मुरे़क् खारे़क् थेआङ् के़होःप्पादे़न्नोबा फक्थिःम्बा नु के़अःक्पा फक्थिःम्बे़ल्ले़ खे़प्मोबा सित्लाङ्ङो हाप् चोगुरो॥ खे़ङ्हाॽ मे़अःक्पा इक्लाःल्ले़ पेधाःप्हाॽओलाम् लोःक्खुरो, लाम्धाःत्हाॽओ लुङ्जिगेःक्हाॽ नु लुङ्घे़ल्ले़क्हाॽ ने़रो, पे़रे़म्बा साम्माङ्सिङ् कुदाॽमाहाॽ यःक्पे़त् निधाःप्लो॥
खे़न् यहुदा हिम्सयङ्बा के़हिङ्बा के़याःक्पाहाॽरे़ लागि पोङ्लो, खे़प्मो खे़ङ्हाॽरे़ मे़ल्लुक् चाराम्दे़न् मे़घोसुरो॥ युःन्छिक् खे़ङ्हाॽ अस्कलोनबा हिम्हाॽओ मे़इम्लो॥ यहवे खुन्छिॽ निङ्वाॽफुमाङ्ङिल्ले़ खे़ङ्हाॽ ओमे़त्तुसि कम्ब्राङ् मे़त्तुसिरो खुने़ॽ खे़ङ्हाॽ नुॽमादामे़न् याम्मो नुःक्तु पिरुसिरो॥
सदोम नु गमोराःन् खाप्पुथ्यःङ् पोःक्खे़बा कुइसिक् हे़क्क्याङ् खे़न् पेसाङ्बा पाङ्जुम्हाॽ खाप्पुथ्यःङ् पोःक्खे़बा कुइसिक् कन् ये़क्यक्किन्नाङ् खाप्पुथ्यःङ् पोङ्लो,” यहवे दाङ्बाल्ले़ अक्खे पाःत्तुरो॥ “खे़प्मो आत्तिन्हाॽआङ् मे़न्वाॽने़न्लो, कप्मो हाःत्छिआङ् मे़न्युङ्ने़न्लो॥
Piblisite