ले़बि 26:19 - लिम्बु19 आङ्गाॽ खिनिॽ यम्बा हे़न्छिङ्मान् नु हादिङ् थक्मान् थेनाधेबा चोगुङ्ॽ॥ खिनिॽ सम्धाङ्बा ताङ्साङ्बान् फे़न्जेॽ हे़क्तङ्बा नु खिनिॽ सिगाङ्बा खाम्बेःक्मान् कासा कुइसिक् के़साक्पा चोगुङ्ॽ॥ Gade chapit la |
खे़ल्ले़ याःन्दिक् आङ्गाॽ ले़प्माङ् के़जोगुम्बा खिनिॽ के़रे़क् फे़न्याःम्बक्किल्ले़ चोगुल्ले़ खिनिॽ नारा सिरेःप् लॽमा मे़बोङ्ने़न्लो॥ थेआङ्भे़ल्ले़ खे़न् ये़म्मो खुन्छिॽ आङ्दिङ् लॽमाओ के़सःप्पाहाॽ आङ्गाॽ कन् ये़क्यक् लुम्मोलाम् लःत्तुङ्देसुङ्सिङ्लो॥ आङ्गाॽ आसेसे कोःक्माओ याम्मो आभे़ल्ले़आङ् खिनिॽ याम्मो यम्बा के़हे़न्छिङ्बा के़म्बोःक्खिन्लो॥
आल्ल आङ्गाॽ, नबुकदनेसररे़ साङ्ग्राम्पेदाङ्बा पयम् हाङ्ङिल्ले़ कुनारा, कुमिङ्सो कुधाःङ्सो फोसुङ्ॽ हे़क्क्याङ् मिमिदिङ् पिरुङ्ॽ, थेआङ्भे़ल्ले़ खुने़ॽ थे़मा चोगुसाङ् नुबा चोगुॽ, हे़क्क्याङ् कुयाःम्बक्हाॽ के़रे़क् कुदोःप्मा चोक्॥ हे़क्क्याङ् खुने़ॽ यम्बा के़हे़न्छिङ्बाहाॽ नःम्नःम्बा चोःक्मा सुक्तुसिरो॥
“थेआङ्भे़ल्ले़ आङ्गाॽ यहवे दाङ्बे़ल्ले़ अक्खे पाःत्तुङ्लो— मिस्ररे़ के़रे़क् कुजुम् कुदेःङ्हाॽ मे़मे़क्लो, हे़क्क्याङ् खे़ल्ले़ कुमुक्साम्मिल्ले़ कुआङ्दिङ् नुप्लो॥ थो मिग्दोललाम् यो आस्वान थारिक् खे़ङ्हाॽ के़रे़क् ताभेःल्ले़ मे़से़रुसिरो, मुक्साम्दाङ्बा यहवे दाङ्बे़ल्ले़ पाःत्तुङ्लो॥
वरक् के़जाःक्पा मनाःल्ले़ वरक्के़न् चोगुल्ले़ आक्खेलॽरिक् कुहुक्के़न् सन्छुॽ, हे़क्केलॽरिक्के आबाङे से़ःप्सिङ्मारे़ लागि हुक्हाॽ मे़सन्छुरो॥ खे़ङ्हाॽरे़ खुन्छिॽ हुक्हाॽ ओगप् चोःक्मा के़ले़बा मे़ले़ङ्सिङ्साङ् निङ्वाॽफुमाङ्ङिल्ले़ खे़ङ्हाॽरे़ खुन्छिॽ आङ्दिङ् लॽमान् यो थासु पिरुसिरो॥
यहवे दाङ्बे़ल्ले़ आङ्दिङ् के़लॽबाआङ् यम्बा के़ले़ङ्सिङ्बाहाॽ मे़नःम्सिङ्ल याःन्दुसिरो॥ चन्जम्बादे़न्नो के़ने़बा ये़क्यक्हाॽ खुने़ॽ यो मे़धार याःन्दुसिरो, कोःक्माओ के़ने़बा खे़न् ये़क्यक्हाॽ खुने़ॽ यो खाम्बेःक्किन्नु तङ्ङाङ् ने़र मक्थाःन्दुसिरो हे़क्क्याङ् खुने़ॽ खे़ङ्हाॽ खाम्हिःक्को लाप्फुसुसिरो॥
हे़क्क्याङ् इस्राइलबा थक्सुबाहाॽ यक्को मे़नुःक्खे़ मे़द्ये़आङ् इस्राइलबा साम्योसिक्साम्बाहाॽरे़ मे़बाःत्तु, “आइन् आनिॽ थेआङ् यहवे दाङ्बे़ल्ले़ पलिस्तिहाॽलाम् हारिआद्ये़र आयाःन्दे़बाबे? आनिॽ यहवे दाङ्बे़ल्ले़ कुसन्दोःक्किन् सिलोओलाम् थाक्तुम्, खे़न् आनिॽलुम्मोए वाॽर हे़क्क्याङ् आनिॽ निङ्मिहाॽरे़ खुन्छिॽ हुक्कोलाम् आसे़ःप्ल॥”
“आदाङ्बारे़ के़मनाहाॽरे़ आदाङ्बारे़ के़दक्ले़ङ्वाओ लायो मे़जोगुबाल्ले़ चोगुल्ले़ ताङ्साङ्बे़न् सुप्सिङ्ङाङ् वहित् मे़न्धाए वाॽ, हे़क्क्याङ् आदाङ्बारे़ खे़ङ्हाॽ तुक्खे के़जाःत्तुसिबाल्ले़ चोगुल्ले़ आदाङ्बारे़ के़मिङ्ङिन् पाःप्मा मे़दे़न् हे़क्क्याङ् खुन्छिॽ लायोलाम् खे़न् ते़न्नो मे़नुःङ् मे़दाआङ् पेलिगे़न् तुवा मे़जोःक्किल्ले़,
चिःत्ते़आङ्लक् स्ये़रो, सामरिया ये़क्यक्पा आङ्दिङ् के़लॽबाहाॽरे़ आक्तङ्बा तुक्खेन् मे़दुमुइरो— इस्राइलबा थिमसाङ्हाॽरे़ खुन्छिॽ हाङ्वा माङ्वा तिचःन्॥ कङ्ग चा के़नुॽबा ने़ने़बा ते़न्निल्ले़ कुजङ्ओ ने़रो, कर खे़ल्ले़ नुमा कुघे़म्सिङ्मे़न् फुङ् हे़क्के इरे़म्बेःक्लो, कङ्ग सेजङ्वाःल्ले़ फे़त्लाःन्दुबा मनाःल्ले़ कुआङ्दिङ् लॽमारो॥
कन् इङ्घङ्ङिन् इस्राइलबा हिम्सयङ्हाॽ मे़त्ते़से़ॽ, ‘मुक्साम्दाङ्बा यहवे दाङ्बे़ल्ले़ अक्खे पाःत्तुॽ—खिनिॽ कम्ब्राङ् मे़प्मालाम् नु खिनिॽ ने़बो पप्मा, खिनिॽ सिक्कुम् निङ्वाॽ सःप्मादे़न्, आङ्गाॽ आहिम्मिन् आसुत्थो चोगुङ्ॽ॥ यहुदाओ के़ले़रुम् के़धाम्सिम्बा खिनिॽ ये़म्बित्छासाहाॽ नु मे़न्छुमा साहाॽ ताभेःल्ले़ मे़से़रुसिॽ॥
हे़क्क्याङ् यहवे दाङ्बे़ल्ले़ कुसाक्के़न्निन् खिनिॽ तक्ले़ङ्वाओ थारो, खे़ब्याङ् वहित् मे़धाने़न्ल हे़क्क्याङ् खाम्बेःक्को पोगुगे़न् कुजा मे़धोःक्ने़न्ल फाॽआङ् खुने़ॽ ताङ्साङ्बोबा वगेःङ्मान्ने साक्तुॽ, हे़क्क्याङ् यहवे दाङ्बे़ल्ले़ खिनिॽ पिमा के़इःत्तिबा खे़न् लाजेॽलाम् खिनिॽ हाराए के़मे़गि के़मारिॽ॥