25 कर ङासिगेक्पा तङ्बेओ खे़ल्ले़ कुजाॽइन् खिनिॽ चामा नुॽ॥ हे़क्केलॽरिक् कन् पाःन्निन् के़इःत्तुम् के़नाःत्तुम्ने़भग्र खे़न् यरिक् कुजाॽ थोःक्ल पेक्॥ आङ्गाॽ यहवे दाङ्बा खिनिॽ निङ्वाॽफुमाङ्आ॥
लिसिगेक्पा तङ्बेओ चाहे के़रे़क् सिङ्सेॽहाॽ सेसेबा पोङ्ॽ, हे़क्क्याङ् यहवे दाङ्बाओ नाराफोमा सिदुङ्जभा पोङ्ॽ॥
“‘कुभा थक्सा पुसान् खे़ल्ले़ कुमाक्खिन्नु सोरिक् खिनिॽ मे़जे़म्मिन्ने़ॽ॥ “‘खिनिॽ थुम्म्या मे़इसे़म्मिन्ने़ॽ हे़क्क्याङ् कित्चाक् मे़जोगे़म्मिन्ने़ॽ॥
“‘खिनिॽ के़रे़क्ले़ आबाङे पानुदिङ् पाहाॽ थामे़न्दिङ् माहाॽ मिङ्सो इङ्धाङ् पिरे़म्सिम्मे़ॽ, हे़क्क्याङ् आङ्गाॽ आनाःम्सिङ्मा सबाथ ये़न्निन् ने़त्ते़म्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥
“‘नावाइत्लाहाॽ ले़प्माङ् खिनिॽ मे़बत्छे़म्मिन्ने़ॽ, हे़क्क्याङ् खिनिॽ योःम्मनाबा माङ्हाॽआङ् मे़जोगे़म्सिम्मे़न्ने़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥
खिनिॽ चे़ल्ले़क्सेॽ इक्ताप्पो कुजाॽहाॽ वरे़ङ्ले़ङ् मे़दुबे़म्मिन्ने़ॽ, हे़क्क्याङ् चे़ल्ले़क्सेॽ इक्ताप्पो मक्के़धाबा कुजाॽहाॽ मे़सुप्से़म्मिन्ने़ॽ॥ खे़ङ्हाॽग याङ्गे़साॽबा नु वेॽ लाजेॽबा मनाहाॽरे़ खुन्छिॽ लागि ले़रे़म्धे़म्मे़ॽ॥ आङ्गाॽ यहवे दाङ्बा खिनिॽ निङ्वाॽफुमाङ्आ॥
खिनिॽ कन् सिदुङ्जभान् आप्फेक् यहवे दाङ्बे़ल्ले़ कुलागि के़न्दारुम्मिल्ल थारिक् खरे़ःङ्, नमनाबा कुजा नु कुरेःत्ला चादाप्मा थे़माआङ् मे़जाम्मिन्ने़ॽ॥ खिनिॽ आत्ति के़युङि के़वयिसाङ् खिनिॽ थाःक्थाःक्को थारिक् कन् आप्फाल्ले़साङ् के़वाॽबा थिम् पोङ्लरो॥