यसैया 48:21 - लिम्‍बु

²¹ खुने़ॽ खे़ङ्‌हाॽ मुरे़क् खारे़क्‍पा ये़ःङ्‌घादे़न्‍लाम् तेॽरुसिल्‍ले़ खे़ङ्‌हाॽरे़ खुन्‍छिॽ वामे़मिःक्‍ते़ल्‍लो॥ खुने़ॽ खे़ङ्‌हाॽरे़ खुन्‍छिॽ लागि याक्‍पेॽओनु च्‍वाःत् लःत्तु पिरुसिरो॥ खुने़ॽ याक्‍पेॽइन् कुलुम्‍मो पक्‍क्रे़ॽ फःक्‍खुरो, हे़क्‍क्‍याङ् च्‍वाःत् कुक्‍से़ लःन्‍दे़रो॥

यसैया 48:21 Referans Kwoze

लाम्‍दिक् 17:6

आङ्‌गाॽ होरेब कोःक्‍माओ लत्‍छा याक्‍पेॽ थिक्‍ले़ कुदगि के़बेसाङ् ये़प्‍पा॥ खे़न् याक्‍पेःन् खे़ने़ॽ हिप्‍ते़ॽ हे़क्‍क्‍याङ् खे़प्‍मोनु मनाहाॽरे़ लागि थुङ्‌मा च्‍वाःत् लःन्॥” खे़ब्‍याङ् मोसाःल्‍ले़ इस्राइलबा लाम्‍लोबाहाॽरे़ खुन्‍छिॽ तगि हे़क्‍केए चोगु॥

निङ्‌वाॽफु साम्‍लोसुम् 105:41

खुने़ॽ पयम् यम्‍बा लुङ्‌ङिन् फःक्‍खुल्‍ले़ खे़प्‍मोलाम् च्‍वाःत् पुन्‍दे़लःन्‍दे़रो, हे़क्‍क्‍याङ् खे़न् च्‍वाःत्तिन् ये़ःङ्‌घादे़न्‍नो वहःङ् पोःक्‍खे़रो॥

यसैया 30:25

खे़न् मनासे़प्‍मा पयम् यम्‍बा ये़न्‍नो चङ्‌हिम्‍हाॽ थुप्, खे़ब्‍याङ् के़रे़क् केःम्‍ब केःम्‍बा नाङ्‌जङ्‌लुङ्‌हाॽ नु के़रे़क् थे़गुहाॽओ च्‍वाःत् वहःङ्‌हाॽ कुङ्॥

निङ्‌वाॽफु साम्‍लोसुम् 78:20

खुने़ॽ याक्‍पेन् हिप्‍तुल्‍ले़ खे़प्‍मोलाम्‍बा फजङ्‌जङ् च्‍वाःत् पुन्‍दे़लःन्‍दे़रो, हे़क्‍क्‍याङ् खे़न् वहःङ् पोःक्‍खे़आङ् वगुसे़बेरो॥ कन् पाःन्‍निन् से़क्‍खाएरो, कर थे खुने़ॽ चामा थुङ्‌माआङ् पिमा आसुक्‍पि? कुमनाहाॽ सा चामा पिमा आसुक्‍पि?”

खानिःत् 20:11

हे़क्‍क्‍याङ् मोसाःल्‍ले़ कुहुक्‍किन् फोःक्‍खुआङ् निरे़ङ् कुदक्‍काःत्तिल्‍ले़ याक्‍पेन् हिप्‍तु॥ खे़ब्‍याङ् खे़प्‍मोलाम् फजङ्‌जङ् लॽरिक् वे़त्ते़सरे़ च्‍वाःत् फक्‍ते़लःन्‍दे़, हे़क्‍क्‍याङ् सङ्‌जुम्‍भो नु पित् थक्‍साहाॽरे़ मे़धुङु॥

यसैया 49:10

खे़ङ्‌हाॽरे़ खुन्‍छिॽ सिक्‍मे़लाःक्‍ने़न् वाआङ् मे़मिःक्‍ने़ल्‍लो, मुरे़क् खारे़क्‍पा ये़ःङ्‌घादे़न् इग्र नाम्‍से़ःक्‍मे़ल्‍ले़ खे़ङ्‌हाॽ मे़ओॽरुसिन्‍लो, थेआङ्‌भे़ल्‍ले़ खे़ङ्‌हाॽ लुङ्‌माॽ के़दुक्‍पे़ल्‍ले़ खुन्‍छिॽ लाम्‍लोसुसिरो खे़ब्‍याङ् च्‍वाःत् के़बुम्‍बादे़न्‍नो खे़ङ्‌हाॽ लाम्‍लोसुसिरो॥

नहेम्‍याह 9:15

खे़ङ्‌हाॽरे़ खुनिॽ से़त्‍लाःक्‍ते़ल्‍ले़ साङ्‌ग्राम्‍पेदाङ्‌लाम्‍बा खरे़ःङ् चामा के़बिरुसिरो, खे़ङ्‌हाॽरे़ खुनिॽ वामिःक्‍ते़ल्‍ले़ पयम् यम्‍बा लुङ्‌ङोनु च्‍वाःत् थुङ्‌मा के़बिरुसिरो॥ आत्तिन् लाजेन् खे़ङ्‌हाॽ पिमासि माङ्‌हुप् के़जोगुआङ् वये़, खे़न् लाजेन् युक्‍मा इङ्‌जाङ् खे़ने़ॽ के़बिरुसिरो॥

यर्मिया 31:9

आङ्‌गाॽ आमनाहाॽ नुःक्‍तुङ् तारुङ्‌सिङ्‌ङिल्‍ले़ मे़हाःप्‍लो हे़क्‍क्‍याङ् पेलिगे़न् तुवा चोःक्‍नु मे़नुःङ् मे़दारो॥ आङ्‌गाॽ मनाहाॽ वहःङ् यङ्‌घङ्‌लाम्‍बा लाम् तोःन्‍दुङ्‌सिङ्‌लो, आघघबा के़होप्‍पा के़दङ्‌बा लाम्‍मो लाङ्‌घेःक्‍खुङ्‌सिङ्‌लो॥ आङ्‌गाॽ इस्राइलिहाॽरे़ लागि खुन्‍छिॽ पानुदिङ् पाआरो खे़ब्‍याङ् एफ्राइम्‍मिन् आङ्‌गाॽ आस्‍सा तुम्‍बारो॥

निङ्‌वाॽफु साम्‍लोसुम् 78:15

खुने़ॽ मुरे़क् खारे़क् थेआङ् के़होप्‍पादे़न्‍नो याक्‍पेन् पक्‍क्रे़ॽ फःक्‍खुरो, हे़क्‍क्‍याङ् आत्तातान्‍ने यरिक् च्‍वाःत् लःत्तुआङ् खे़ङ्‌हाॽ थुङ्‌घुसिरो॥

निङ्‌वाॽफु साम्‍लोसुम् 74:15

खे़ने़ॽए वाबुन्‍दाक्‍हाॽ पुन्‍दे़लःन्‍दे़र के़याःन्‍दुरो हे़क्‍क्‍याङ् यङ्‌घङ्‌हाॽ कुक्‍से़र के़जोगुरो॥ खे़ब्‍याङ् उन्‍छेःन्‍नाङ्‌धोए वागे़गुबा आभे़ल्‍ले़आङ् मे़न्‍जप्‍मनाबा वहःङ्‌हाॽ चप्‍प्रे़क् के़जप्‍सुरो॥

निङ्‌वाॽफु साम्‍लोसुम् 78:16

खुने़ॽ याक्‍पेओलाम्‍बा वाधारा पुन्‍दे़लःन्‍दे़र याःन्‍दुरो, हे़क्‍क्‍याङ् खे़न् वहःङ् कुइसिक् कुक्‍से़बेर चोगुरो॥

नहेम्‍याह 9:20

सदादिङ्‌बा नुबा के़याम्‍साम्‍लाम् खे़ङ्‌हाॽ निसाम् के़बिरुसिरो, चामारे़ लागि मन्‍न नु थुङ्‌मारे़लागि च्‍वाःत् के़बिरुसिरो॥