यसैया 25:9 - लिम्बु9 कन् हिन्दोःक्के़न् पोङ्ङे़ल्ले़ के़रे़क् मनाहाॽरे़ मे़बाःत्तुरो, “से़क्खासाङ् खुने़ॽए आनिॽ निङ्वाॽफुमाङ्लो! आनिॽ खुने़ॽ कुलाम् ओआमे़त्तुम्लो हे़क्क्याङ् खुने़ॽए आनिॽ ताङ्आसे़ःप्ते़आङ् आवाॽरो॥ खुने़ॽए यहवे दाङ्बारो! खुने़ॽओ आनिॽ निङ्वाॽ आयुक्खुम्लो खुने़ॽ आनिॽ ताङ्आसे़ःप्ते़आङ् आवाॽरो, आनिॽ सःत्तिआङ् ये़ये़ लॽरिरो॥” Gade chapit la |
यसैया 25:9
53 Referans Kwoze
मुरे़क् खारे़क् थेआङ् के़होप्पा लाजेन् सःत्ताङ् साम्लोरो, खे़न् साॽरिक् कुसिराॽधाङ्ङाङ् अःक्लो॥ खे़ल्ले़ ले़बनानबा कुघे़म्सिङ्मे़न् खोसुरो, हे़क्क्याङ् खे़ल्ले़ कर्मेल कोःक्मान् नु सारोनबा ते़ल्लक्किल्ले़ कुहाङ्वा कुमाङ्वान् खोसुरो॥ खे़ङ्हाॽरे़ यहवे दाङ्बे़ल्ले़ कुमिमिदिङ् नु आनिॽ निङ्वाॽफुमाङ्ङिल्ले़ कुहाङ्वा कुमाङ्वान् मे़निसुरो॥
“सियोनबा मनाहाॽओ सुनाइङ् के़से़बासे, खे़निॽ केःम्बा नाङ्जङ्लुङ्ङो पेगे़म्मे़ॽओ॥ यरुसले़म ये़क्यक्पा मनाहाॽ सुनाइङ् इङ्भन् के़हाबासे, साॽरिक् अःक्ते़म्मे़ॽओ, अःक्ते़म्मे़ॽओ, मे़गिसे़म्मिन्ने़ॽओ॥ यहुदा पाङ्जुम्मोबा मनाहाॽ मे़त्ते़म्सिम्मे़ॽओ, ‘ओमे़त्ते़म्मे़ॽ, खे़निॽ निङ्वाॽफुमाङ्ङिन् हाबा कॽयो वाॽरो!’
हे़क्क्याङ् यहवे दाङ्बे़ल्ले़ कुमे़ल्लुङ् हुङुआङ् थे़ॽरुसिबाहाॽ मे़नुःङ् मे़भे़न्लो॥ खे़ङ्हाॽ साम्मे़लोर यरुसले़म ये़क्यक्को मे़लाःत्लो, सदादिङ् के़वाॽबा सःप्मान् खे़ङ्हाॽरे़ खुन्छिॽ तिच पोङ्लो॥ खे़ङ्हाॽ आभे़ल्ले़साङ् मे़सःत् मे़येःत्लो, हे़क्क्याङ् निङ्वाॽ तुक्मा मे़रिङ् थक्मा मे़बोङ्ने़ल्लो॥”
हाङ्माल्ले़ कुनु के़धुङ्बा अङे़ःक्वा हे़क्केए मुक्साम्साबा हाङ्हाॽ नु मुक्के़गुबा मे़न्छाम् सुवाङ्हाॽरे़ खे़ने़ॽ चाहा के़जोःक्पा पाःन्हाॽओ के़निङ्वाॽ के़म्दा के़म्बिरो॥ आङ्गाॽ, यहवे दाङ्बा, के़से़न्लप्दाङ्बा, खे़ब्याङ् खे़ने़ॽ के़धे़ॽबा, हे़क्क्याङ् इस्राइलबा मुक्साम्दाङ्बाआ फाॽआङ् खे़ने़ॽ कुसिङ्गे़निःत्तुरो॥
यहवे दाङ्बे़ल्ले़ पाःत्तुॽ, “सियाेनरे़ कुस्सा मे़न्छुमाए, साॽरिक् सःत्ते़ॽओ! यरुसले़मरे़ कुस्सा मे़न्छुमाए, खे़ने़ॽ साॽरिक् अःक्ते़ॽओ! ओमे़त्ते़ॽ, खे़ने़ॽ के़हाङ्ङिन् खे़ने़ॽओ तार पत्लो, खुने़ॽग से़न्लप्दाङ्बा नु साम्योबा चोक्लो, खुने़ॽ नःम्नःम्बा चोक् हे़क्क्याङ् अदङ् सम्धाङ् अदङ्ङिल्ले़ कुस्सा लत्छा अदङ्साःत्तिन् युक्तुआङ् तार पत्लो॥
खे़ने़ॽ के़लागि हाङ्हाॽ पानुदिङ् पा हे़क्के हे़क्क्याङ् हाङ्माहाॽ मा हे़क्के कम्ब्राङ् के़मे़प्पा मे़बोङ्लो॥ खे़ङ्हाॽरे़ खे़ने़ॽ खाम्बाङ्ङो थारिक् अःक्खुम् मे़भन्छिङ्ङाङ् से़वा के़म्मे़त्लो, हन्नाङ् नःम्नःम्बा मे़बोङ्ङाङ् मिङ्सो इङ्धाङ् के़म्बिरो॥ हे़क्केलॽरिक् यहवे दाङ्बाआ फाॽआङ् खे़ने़ॽ निङ्वाॽ के़घोसुरो, आङ्गाॽ आलाम् ओगे़मे़प्पाहाॽ निङ्वाॽ तुक्मो मे़न्धाने़ल्लो॥”
“यहवे दाङ्बे़ल्ले़ से़क्खासाङ् यरुसले़म के़युङ्बाहाॽ हाङ्हाङ् मे़त्तुसिरो, हे़क्क्याङ् खुने़ॽ खे़न् के़लुःम्बा हिम्यःक्हाॽ लुङ्माॽ तुक्तुआङ् ओमे़त्तुरो॥ खे़ब्याङ् खे़प्मोबा मुरे़क् खारे़क्पा ये़ःङ्घादे़न्निन् अदन सिङ्सेॽइक्के़न् कुसिङ् चोगुरो, हे़क्क्याङ् चा मे़न्नुॽमनाबा खाम्बेःक्के़न् यहवे दाङ्बे़ल्ले़ कुसिङ्सेॽइक् हे़क्के चोगुरो॥ पसःत् सःप्मा नु निङ्वाॽ तामा, हे़क्क्याङ् नुगे़न् पिमा नु साम्लोमारे़ इक्लान् खे़ॽयो खोदे़त्लो॥
आङ्गाॽ यहवे दाङ्बाओ साॽरिक् सःत्तारो, आनिङ्वाॽफुमाङ्ङो आयाम्साम्मिन् साॽरिक् सःत्लो॥ थेआङ्भे़ल्ले़ निङ्वाॽफुसाम्बान् हे़क्के मेःक्खिम्साबे़ल्ले़ कुधे़गेःक्किन् चोःक्तुबा हे़क्के, हे़क्क्याङ् मेःक्खिम्सामे़न् आबाङे साम्म्याङ् युप्पा वाःत्छिङ्बा हे़क्के खुने़ॽ से़न्लप्ले़न् चाङ् चाक्ताङ्ङाङ् वाॽरो, हे़क्क्याङ् साम्योनिमा चाङ्ङिल्ले़ ते़प्ताङ्ङाङ् वाॽरो॥
Piblisite