१ सामुए़ल 2:11 - लिम्‍बु

¹¹ खे़न् एगाङ् एल्‍कानान् रामाबा कुहिम्‍मो नुःक्‍खे़॥ कर अङे़ःक्‌वा सामुए़ले़न् यहवे दाङ्‌बाओ माङ्‌से़वा चोःक्‍से़ निङ्‌वाॽफुसाम्‍बा एलिरे़ कुगम्‍ब्राङ्‌ङो सिलोओ याःक्‍ते़रो॥

१ सामुए़ल 2:11 Referans Kwoze

१ सामुए़ल 3:1

आल्‍ल एलिःल्‍ले़ कुयुक्‍को सामुए़लरे़ यहवे दाङ्‌बाल्‍ले़ कुदगि माङ्‌से़वा चोगुर वये़॥ खे़न् ये़म्‍मो यहवे दाङ्‌बाल्‍ले़ कुबाःन्‍जाःक्‍किन् चाॽरिक् खे़म्‍मे़दे़त्ते़न्, हे़क्‍क्‍याङ् खुने़ॽ ताॽदिगे़न् सुफोहाॽआङ् मनाहाॽ यरिक् ओसेःन्‍मे़धाक्‍तुसिन्॥

१ सामुए़ल 2:18

खे़न् ये़म्‍मो अङे़ःक्‌वा सामुए़ले़ङ्‌ग नाइनासुःत् एपोद चाङ् चाक्‍खुआङ् यहवे दाङ्‌बाओ चक्‍मे़ल्‍लॽए से़वा चोःक्‍मा हेःक्‍ते़॥

१ सामुए़ल 1:28

आल्‍ल आङ्‌गाॽ कन् अङे़ःक्‌वान् यहवे दाङ्‌बान्‍ने पिरुङ्‌ल पत्तारो॥ हे़क्‍क्‍याङ् कन् अङे़ःक्‌वान् कुहिङ्‌हिङ् थारिक् यहवे दाङ्‌बाले़न्‍नेरो॥” हे़क्‍क्‍याङ् खे़ङ्‌हाॽरे़ खे़प्‍मो यहवे दाङ्‌बे़न् सेसे माङ्‌से़वा मे़मे़त्तुरो॥

१ सामुए़ल 3:15

सामुए़ले़न् तानाम् खाओःत्ते़ थारिक्‍के हाबा इप्‍से़आङ् ने़स्‍से़॥ हे़क्‍क्‍याङ् पोगे़आङ् यहवे दाङ्‌बाल्‍ले़ कुहिम्‍मोबा लाम्‍धेःप्‍पाहाॽ हन्‍दु॥ खुने़ॽ निसुबा सुफोन् एलिन् मे़प्‍मा किसे़॥

१ सामुए़ल 1:19

कुदाःन्‍दिक्‍मा तानाम् एल्‍कानान् नु कुहिम्‍सामाहाॽ मे़बोगे़ हे़क्‍क्‍याङ् यहवे दाङ्‌बान् सेसे माङ्‌से़वा मे़मे़त्तु॥ हे़क्‍क्‍याङ् रामाबा आबाङे खुनिॽ हिम्‍मो मे़नुःक्‍खे़॥ हे़क्‍क्‍याङ् से़न्‍दिक् एल्‍कानाःन् कुमेत् हन्‍नाःन्‍नु इप्‍से़, खे़म्‍भे़ल्‍ले़ यहवे दाङ्‌बाल्‍ले़ हन्‍नाःल्‍ले़ कुबेलिन् निङ्‌वाॽ इःत्तु॥

१ सामुए़ल 1:1

एफ्राइम सुवाङ्‌समा एल्‍काना मे़प्‍मनाबा मनाधिक् वये़॥ खुने़ॽ एफ्राइम लाजेॽबा कोःक्‍माओ के़ने़बा रामाह पाङ्‌जुम् के़युङ्‌बा मना वये़॥ खुने़ॽ यरोहामरे़ कुस्‍सा, एलिहुरे़ कुम्‍मे़न्‍छाॽ वये़, तोहुरे़ कुजक्‍मे़न्‍छाॽ, सुपरे़ कुबे़म्‍मे़न्‍छाॽ वये़रो॥

१ सामुए़ल 7:17

कर खुने़ॽ रामाबा कुहिम्‍मोए नुःक्‍खे़॥ हे़क्‍क्‍याङ् खे़प्‍मोआङ् हाबा हे़क्‍केलॽरिक्‍के इस्राइलिहाॽ खासे़न् चोगु पिरुसि॥ खुने़ॽ खे़प्‍मो यहवे दाङ्‌बाल्‍ले़ कुलागि लत्‍छा ले़त्ति तोःम्‍मादे़न् चोगुरो॥