14 खे़ल्ले़चोगुल्ले़ एलिरे़ मे़त्तु, “आभे़ल्ले़ थारिक् खे़ने़ॽ हाबा अक्खेलॽरिक् सेजङ्वाःल्ले़ के़मआङ् के़युङ्बाबे? खे़ने़ॽ के़सेजङ्वान् थुङ्मा ले़रे़ॽ॥”
के़रे़क् सिक्कुमा, सिक्पोःक्मा, याःक् ले़ॽमा, हयङ्किल्लिङ् चोःक्मा, चे़ॽया इङ्दो पाःप्मा हे़क्क्याङ् काक् परिक्पा मना चिःप्मा ले़रे़म्मे़ॽओ॥
खे़ल्ले़चोगुल्ले़ इङ्ले़क् पाःन्हाॽ खिनिॽ के़रे़क्ले़ ले़रे़म्मे़ॽआङ् खिनिॽ लुम्मो से़क्खा पारे़म्मे़ॽ, थेआङ्भे़ल्ले़ आनिॽग लत्छा थक्कोबा याम्लक्सिरो॥
ले़म्स्वाबे, खे़ने़ॽ आप्फाल्ले़ थारिक् के़इम्माङ् के़ने़बे? खे़ने़ॽ आप्फाल्ले़ के़मिक्युमोलाम् के़सोबे?
ताप्फे़ःम्बा पाःन्सुत्लान् के़म्ब्राओलाम् माःङ्घा वाॽररो, फे़क्के़लाॽबा ताॽजे़ङ्हाॽ के़म्ब्रासेॽओलाम् लाःत्लाःत् वाॽररो॥
आभे़ल्ले़ थारिक् लत्थिक् मनान् हिप्मा फाॽआङ् के़भत्तुम्ल के़ने़स्सिबाबे? चोःम्मा के़इःप्पा लुङ्धाक् नु फाङ्मनाबा वाःन्जोजोबा हे़क्तङ्बा मनान् के़दङ्ङासिआङ् के़सोःन्दुम्बाबि?
ओरो, खे़ने़ॽ चुङ्जिगे़न् नःम्नःम्बा के़बोङ्ङाङ् मुक्साम्दाङ्बाओ के़नुःङ्ने़भग्र हे़क्क्याङ् आबाङे के़हिम्मोबा के़रे़क् ताप्फे़ःम्बा पाःन्हाॽ के़ले़रुने़भग्र खे़ने़ॽ याम्मो पोःक्मा पोङ्लो॥
के़हिम्मोलाम्बा ताप्फे़ःम्बान् लःत्ते़देसे़ॽओ, हे़क्क्याङ् लायोन् खे़त्ते़देसे़ॽओ॥
हे़क्क्याङ् सेसेमाङ्ङिल्ले़ थुक्तुसिआङ् सेसेमाङ्ङिल्ले़ पिरुसिबा कुइसिक् वेॽ वेॽ मे़ल्ले़स्सुम्बा पाःन्दाङ्ङो पाःप्मा मे़हेःक्ते़रो॥
कर कुभारे़ किनाःन्दि मे़बिरुसिर चे़ल्ले़क्सेॽ थिःल्ले़ मयुसिआङ् वाॽ लॽरिक् मे़मे़त्तुसिरो॥