La-ukei ta Pol atorou ili tiri lau badu kon Rom 12:7 - Nyindrou

⁷ Ya, i buku none iy tan ta anyo-ou iri lau ta Kindrei badeh, iy kanyo-ou oro kudu mwasin; ya, i buku none iy tan tanan ta leheya bolo budon ta sahou ta Kindrei badeh, iy kaleheya iri lau kudu mwasin.

La-ukei ta Pol atorou ili tiri lau badu kon Rom 12:7 Referans Kwoze

Epesus 4:11

Ndramak doh, iy amwenen edeu ndramas ili tiri mwan ma badih. Ma iy edeu ndramas i buku doh: Iy edeu ndramas ili tiri rayah ta amekes gok aposel. Rayah ta amekes gok propet, rayah ta atiye sahou tan ili kon rakon, rakon. Ma rayah iy edeu ndramas ta atondrok iri lau ta Kindrei, o lau ta leheya.

2 Timoti 4:2

Ou atiye sahou ta Kindrei. Ya, ou abudon ta lakou doh kameh asahan, ma ou atiye sahou ta Kindrei kili. Buku iri lau alokou iri ta anuhun sahou, o, iri balokou iri bwe, ndri-iy ai. Len marakon ou abadok ta atiye sahou tan kili. Sahou tam badeh, korou ndrine iri ta asor iri ta tobolowe ndrine iri, ma karuwe kandriyen ndra-in. Ou suruni ndrine iri ta a-en hamon ta kandriyen ta Kindrei. Ou leheya iri ki buku doh, arile ou winiyan bandra-i hawe iri bwe. Ou abo gok le, ta leheya iri.

1 Timoti 5:17

Iri lau ta bwena ta lau ta Kindrei amekes lahou mwasin, kameh akohok sihine iri solo-an labai. Arile, i toro ala atiye sahou ma leheya sahou, kameh oro akohok ere bwele-en ja.

Aposel 13:1

Udu bolo iri lau atehei budon tiri handru in ta Kindrei badu Antiyok badeh, iri propet rayah, ma hawe iri lau ta leheya rayah ale ado aliy. Nyara oro badeh, Banabas, Simiyon iri aloh iy Nijer, Lusiyus badu Sairini, hawe Mana-en iy mene asahan kawas ta kabin Herot na len iy atondrok kon, ma hawe Sol.

2 Timoti 2:24

Arile, are lau handru amekes gok ta Laban, iy badeh, sasahan ndramak ta tebelese hawe iri lau rayah ja. Iy badeh, kamekes kandriyen mwasin kili tiri lau. Iy ale kasahan ndramak ta leheya, ma iy samekes bundruwe losen sala tiri lau, ma iy kasahan ndramak ta udu le udu.

2 Timoti 2:2

Ya, iri sahou marakon ou ndranuhun jo ndrasehek udu bolo iri lau, idoh ou andrei, ma ou asehek kili tiri lau rayah ja, iri katondrok kamwenen, ma iri winiyan leheya iri lau rayah ja ale.

1 Timoti 4:16

Balem ki tam kamwenen ma balem ki ta sahou ou leheya. Ou saruwaniy labai; tasah lakou ou amekes badeh, winiyan sebenei koha iri are anuhun sahou, ma winiyan sebenei ou ale.

1 Timoti 3:2

Ndramak ta atondrok lau ta Kindrei, iy badeh ki ndramak, ari ndra-in badan bwe, ya iy badeh, kasoh badih ari le, iy badeh, ki ndramak ta budon mwasin; ma iy badeh ki ndramak ta atondrok badan kudu mwasin. Ma iy badeh, ki ndramak nyaran mwasin handru, ma lau kamasiye iy, ma iy badeh, ki ndramak ta asumon lau mari kame asiu, ma hawe iy badeh, ki ndramak ta tanan ta leheya;

1 Timoti 2:7

Eme ta katin doh baden adeh, jo asahan aposel ta atiye sahou, ma ta leheya iri lau badu leheleh. Ma iy atehei jo ta atiye sahou ta budon handru dah. Eme ya jo bawasai bwe, jo tiye sahou handru.

Kolosi 4:17

Ma aha katiye ta Akipus buku doh: “Ou atondrok gok dah, ou mene akohok badu mine Laban, ma ou amekes gok dah kamwenen.”

Galesiya 6:6

Are lau akohok tanan ta ndramak ta leheya iy na sahou ta Krais, mwasin ta iy kaseben ndramak ta leheya tan na lakou mwasin tan.

1 Korin 12:28

Udu bolo iri lau ta Kindrei, iy atehei iri aposel mwena, ano iri propet, hamon tiri propet, iri lau ta leheya. Ano iy ale atehei lau rayah ta amekes lahou tinan ma kalem, iri rayah ta anyumor lau abo sik, iri rayah ta aseben, iri rayah asahan kabin ta amekes lahou ta Kindrei, ma iri rayah ta asehek iri boho kon randrah labai ja.

Aposel 20:28

Ado badeh, katondrok ado kamwenen, ma hawe katondrok lau ta Kindrei mene Malawin Ndrabun atehei iri ado baha tondrok tado. Ado badeh, a buku lau ta atondrok sipsip, ado katondrok iri lau ta budon handru ta Kindrei, ala iy mene konohei iri na ndraye nadun amwenen.

Aposel 20:20

Ado badeh, tanan jo babisiniy ta atiye sahou ta aseben ado se bwe. Arile, jo badeh, asehek udu mada ado mari ma hawe jo ili asiu ra-em i ra-em.

Aposel 6:1

Na len doh badeh, kane iri lau nane a-en hamon ta Jises ma atehei budon tiri handru i ta Kindrei i sola le ai. Eme ma iri Juwis nane asehek boho iri Grik badu bolo iri lau ta Kindrei badeh, tebelese hawe iri Juwis rayah nane asehek boho Aramek. Iri Grik anya iri badih nyau tiri badeh, bakohok nyamon sola bwe.

Tarou ta Jon 3:2

Na ben ari Nikodemus ili anya kasehek sahou hawe Jises, eme ma iy asehek anya, “Ndramak ta leheya, ahi tanan, ou badeh, Kindrei suni ou ame ta leheya ahi. Ou badeh, ado hawe Kindrei ame. Ari ndramak winiyan bamekes kalem hawe lahou tinan buku ou amekes kede-eh bwe, tasah Kindrei badeh, udu hawen.”

Metiu 28:19

Ado kala kon mari, ya kamesekei iri lau mari kasahan lau tek, ado kalomwa iri na nyara tama, ma nadun ma hawe Malawi Ndrabun.

1 Korin 12:5

Taha winiyan amekes iri gok solo-an ta Laban. Arile, Laban badeh, ari le.

1 Korin 14:26

Aha kawas tek, buku aha anya katukum ta atudun nyara Kindrei, aha kamekes saba lakou handru? Gok taha marakon udu aliy: Iy ari badeh, ta wari ai, iy ari ta leheya lau, iy ari ta asehek sahou Kindrei edeu i tan ta tiye ili tiri lau, iy ari ta asehek boho kon rakon ja; gok ta iy ari ja ta tobolowe boho kon nane doh. Handru, aha kamekes iri lakou marakon doh, ta atadau aha lau ta Kindrei kales boto-on.