Metiu 13:44 - Nyindrou

⁴⁴ Jises asehek sahou ja anya, “Tondrok ta Kindrei kameh asahan buku none le ko-on iri lau ra-on tone ereu bolo bilin. Ndramak ari eme a-eh ndren ma iy atou, ma iy tone ja. Iy sekesek labai, ya ili mada ba-en, ma iy atehei iri lakou tan mari i ba-en, ma iri lau sihinei iu. Ya iy ili sihinei bilin nane ko-on ereu bolon, tasah idah ko-on nane ndrala tan ma iy winiyan akohok.”

Metiu 13:44 Referans Kwoze

Kolosi 2:3

Iy amwenen badeh, iy irek labai ta iri tanan mwasin dah, ma sahou aton ta Kindrei, ma iy le amwenen winiyan aseben aha atanan iri lakou marakon ta Kindrei doh.

Tarou ta Luk 14:33

I le buku aliy, i buku none are tado baruwani lakou tan mari bado api bwe, badeh, iy winiyan basahan lau tek bwe.

Metiu 6:21

Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.”

Metiu 19:29

Ya are mwan ma badih ale abudon nyarak, ma iy ruwani asiu tan ma nadu tinen mwan ma buru-un, ma taman uru tinen, nadun ma bilin tan, iy kameh akohok ndramas buku san rinek (100) ja i la-un, ma akohok kohan mwasin ta ereu le buku doh.

Rebelesen 3:18

Eme ma, jo anya kedeu sahou dah kewek taha. Aha mara-ei badeh, kame le hawek kasih bek nyikilikin tek. Jih badeh, ndrasulumwi lakou marakon udu bwele-en ndra-au, ma bwidiy ndra nyikilikin mara-ei. Ma aha kameh asahan nadu batun. Ya, aha kame kasih taha kolau belen ta tubuloh bada aha, ma iri mwan ma badih winiyan banyolom bada aha ndrakane ja bwe. Ma mwasin ale, ta aha kame hawek kasih rayah ndrelekei tek, ta adeu i mada aha, ta aha kanyolom kon ja. Ma aha winiyan atanan, buku aha badeh, bateu lakou handru ta Kindrei bwe. Ma aha kameh winiyan anyolom aha are buku sah handru.

Metiu 19:27

Ya Pita asumon bohon anya, “Ou atou, aso ndraruwani lakou mari, ya aso ndra-en hamon tam. Ya idah kameh aso kakohok sasah handru?”

Metiu 19:21

Eme Jises asehek tan i buku doh, “Buku none ou anya asahan ndramak mwasin handru, mwasin, ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”

La-ukei ta Pol atorou ili tiri lau badu kon Rom 15:4

Tasah, sahou mene ndratorowenei ndra-au ndra-au udu bolo tarou ta Kindrei badeh, ta leheya taha kado le, ma ta amekes taha kabadok ta abe-en lakou mwasin udu bwena tataha eme.

Metiu 13:24

Jises asehek sahou sokek ari ja i toro. Iy asehek i buku doh, “Tondrok ta Kindrei i buku none le ndramak ari atah buwa wit mwasin le udu bilin tan.

Hiburu 10:34

Aha amekes mwasin ili tiri lau ado bolo asiu lulik. Ma iri lau rayah akohok lokowa aha laleyah iu, arile aha babolosen ta aliy bwe, aha sekesek. Aha amekes i buku doh, tasah aha ndratanan lakou taha mwasin udu aliy. Iri lakou doh udu bwele-en labai ja tiri lakou badu munyak, ma iri kameh winiyan bandra-i bwe ta udu le buku doh.

Tarou ta Jon 6:35

Jises tiye i tiri i buku doh, “Jo le, jo jabi ramen handru kohan udu aliy. Are lau iy eme hawek, iy winiyan bamak son bwe, ma are lau iy atehei budon tan eme tek, balen kameh winiyan bamar ta gwa ja bwe.

Kolosi 3:16

Sahou ta Krais badeh, kihis handru kudu bolo ndrine aha. Aha badeh, kaleheya, ma kabatanau aha kamwenen na tanan handru doh. Aha kayah wari ta Debit, ma iri wari rayah ja ta salom, ma iri wari Malawin Ndrabun atehei udu ndrine aha ta atudun Kindrei.

Metiu 13:46

Ya buku iy atou ari sa-un mwasin handru, eme ya iy ili atehei iri lakou tan mari i ta ba-en, ma iy ili sihinei sa-un mwasin nane. Tasah, iy aso-ok sa-un nane handru sakalawiy iri lakou tan mari.”

Metiu 13:47

Jises asehek kundruh ili ja: “Sahou sokek ari ja i buku doh. Tondrok ta Kindrei i buku none le ari kubwin iri lau akahei ili bolo gwa li. Ya kubwin nane akohok iri ni buku liliy.