Jemis 1:21 - Nyindrou

²¹ Eme ma, aha badeh, karuwani iri kandriyen ndra-in ta karei ma lomondra ndra-in nadah asahan solo-an labai udu bolo ndrine iri mwan ma badih. Ma aha katehei aha ka-au ka andri mara-ei ta akohok sahou nane Kindrei ndratahiy udu bolo ndrine aha. Sahou le doh badeh, winiyan andrei malawi aha mara-ei eme hamon ja.

Jemis 1:21 Referans Kwoze

Epesus 4:22

Sahou ta Krais dah badeh, i buku doh: Bwena mene, aha a-en hamon ta so-ok ta bada aha le amwenen. Iy aso-ok labai, iri kandriyen ta wasai, ma madalakis laleyah, ma hawe kandriyen doh badeh, bokoro-ei iy le. Eme ma, aha karuwi kandriyen malen doh udu ndrine aha keme len.

Epesus 1:13

Ma aha lau badu leheleh, aha ndrasahan lau ta Kindrei ale, kala le aha mene anuhun sahou handru. Sahou mwasin doh amekes, ma Kindrei atehei aha ahis hawe Krais. Aha atehei budon taha handru in ta Krais, ma Kindrei ndratehei Malawin Ndrabun ndrawek taha i buku kalem ta lakou, iy ndratandrakan ta edeu.

1 Pita 2:11

Aha kawas tek, jo asehek sahou dah ewek taha, buku none aha areu kon munyak, kon taha bwe. Aha lau ta teteheh le, eme ma aha satehei kandriyen ta budon ma ndrine aha ndra-in sa-en bwena taha, ndri-iy. Tasah, kandriyen ndra-in ta budon ma ndrine aha badeh, kameh amekes bahun hawe malawi aha mwasin.

Tarou ta Jon 6:63

Oda ndramak winiyan badeu kohan handru bala ta ndramak bwe. Idoh badeh Malawin Ndrabun edeu kohan handru. Sahou jo asehek ewek taha badeh, ta Malawin Ndrabun, ma iri sahou doh edeu koha iri ewek taha.

1 Pita 2:1

Aha ndrasahan ha-un ja na ndraye Jises Krais, eme ma aha karuwani iri kandriyen ndra-in. Aha sawasai, ma aha samekes kandriyen ndra-in sala ta ndramak ari ja. Mada aha salikis lakou ta ndramak ari ja, ma aha sasehek ndramak ari ja. Aha karuwani kandriyen ndra-in mari doh ki-iu.

Hiburu 12:1

Iri lau mwan hawe iri badih bwena mene awudi taha are le alih i buku asi kandrah, eme iri leheya taha ta kandriyen ta budon tataha kili ta Kindrei. Eme ma taha kamani iri lakou ale tawi taha winiyan basakaliye boto-on bwe, ma taha karuwani iri kandriyen ndra-in marakon ale tawi taha ihis. Eme ma, taha kamekes ndrine taha kabadok ta sakaliye ta akohok lakou mwasin doh, Kindrei ndraleheyani taha sakaliye ta aliy.

Jemis 4:8

Aha badeh, kala mirihik handru ta Kindrei, ya iy kameh eme mirihik handru taha. Aha lau mwan ma badih ta lomondra ndra-in ma ta karei, kandriyen taha badeh, kasahan mwasin i buku ndramak sikine minen asahan ha-un ja. Buku budon taha i lundra, baden eh, aha karuwani budon ndra-in nane udu ndrine aha badeh, ki-iu ai.

Taitus 2:11

Katin ta ou leheya, ma batanau iri lau ta Kindrei, ka-en hamon ta kandriyen doh badeh, asah i buku doh: Na tikisiy ta Kindrei le, eme la-u taha mari badeh, mesekei iy suni Jises Krais eme munyak, ta sikine karei ma lomondra ndra-in tataha.

La-ukei ta Pol atorou ili tiri lau badu kon Rom 1:16

Jo banoh ma bwilik bama ta sahou mwasin ta Krais bwe, tasah idoh badeh, boto-on ta Kindrei ta akohok are lau iri atehei budon tiri handru i ta sahou mwasin doh ame hamon. Sahou doh ma mwena i tiri Juwis, ano badeh, i tiri lau badu leheleh ale.

Hiburu 4:2

Taha ndranuhun iri sahou mwasin, i buku le bwena mene iri Isra-el anuhun. Iri anuhun, arile baseben iri bwe, tasah iri batehei budon tiri mara-ei bala ta sahou nane iri anuhun bwe.

Hiburu 2:3

Buku taha teleya lakou laba tinan ta akohok taha, taha katobwak barala buku sah handru? Laban ndrasehek nyala seben doh ma bwena ndrame tataha, eme iri lau nane anuhun sahou tan, ame asehek tataha ja, “Sahou doh ndra handru le.”

1 Korin 15:2

Sahou mwasin ta Kindrei le doh badeh, akohok aha ame hamon, buku aha a-en hamon handru ta sahou, jo mene ndrasehek taha. Arile, buku aha bala tanan saba lakou aha atehei budon taha in tan bwe, ma aha atehei budon taha laleyah, eme ma sahou mwasin doh baseben aha bwe.

La-ukei ta Pol atorou ili tiri lau badu kon Rom 6:17

Arile, wurah ki ta Kindrei! Tasah, na len ndra-au aha asahan bonyo-ou ta karei ma lomondra ndra-in; arile ano ja, aha anuhun sahou handru na ndrinem mari udu bolo leheya aha akohok dah.

Tarou ta Jon 6:68

Saimon Pita eme asehek ili tan i buku doh, “Laban, are handru kameh aso kala hawen? Sahou ou asehek badeh, kohan handru udu aliy iy winiyan bano bwe, iy kameh ta udu le buku doh.

1 Tesalonaika 2:13

Aso winiyan bamunyau ta adeu wurah ili ta Kindrei bwe. Tasah, ma bwena mene aha anuhun sahou ta Kindrei aso asehek ewek taha, ma aha a-en hamon ta aliy. Aha babudon anya, idah sahou ta lau le, bwe! Aha ndrandrei, buku sahou handru ta Kindrei, ma aha a-en hamon ta aliy. Ma sahou doh abadok ta amekes manyah ma budon taha mwan ma badih kudu mwasin ta madan.

2 Korin 7:1

Aha kawas tek handru, Kindrei edeu iri tandrakan doh eme tataha. Eme ma, taha badeh, karuwani iri kandriyen ndra-in ale taha amekes na bada taha o na budon tataha. Ya, taha badeh, kasahan ha-un mara-ei. Taha badeh, katehei budon tataha kili ta Kindrei, ma katehei koha taha mara-ei kili le tan, tasah taha anoh iy.

Aposel 13:26

“Ya ado nadu tine, lundriye Abraham hawe ado lau badu leheleh ala an hamon ta Kindrei. Sahou ta nyala seben badeh, ndrame tataha.

1 Pita 1:9

Tasah handru aha sekesek? Aha badeh, atehei budon taha boto-on labai i ta Kindrei, eme ma, kati budon taha doh anya kasahan keme lewan. I buku doh: Kindrei andrei aha ndrame hamon, buku none le iy mene ndratandrakan bwena.

La-ukei ta Pol atorou ili tiri lau badu kon Rom 11:17

Iri lau badu Isra-el badeh, i buku kei olip ateh udu bolo bilin. Kindrei eme tubwani andran rayah ma akahei iu. Ya, aha lau badu leheleh badeh, i buku andra kei olip ateh laleyah udu bolo lokei. Eme aha andra olip saniy badu bolo lokei doh badeh, Kindrei andrei aha ala ya tabahani aha ahas ala bada ndro-o andra olip rayah nane udu bolo bilin. Ma eme gwa edek bolo kandron eme ma nyohonei bakatabadah dah akuk ma andra iri basara bwe, uru asahan ari buruwen.

Aposel 10:33

Eme jo suni oro awek suwi ta atou ou, ma mwasin handru ta ou ame. Ya abo, aso mari kada-ah are mada Kindrei ta anuhun sasah Laban tiye ewek tam ta asehek eme taso.”

Metiu 5:5

“Sekesek handru i toro lau ala batudun oro ma nyara oro le bwe. Oro kameh akohok iri lakou mwasin badu munyak i buku le Kindrei ndratandrakan.

1 Tesalonaika 1:5

Ahi tanan, Kindrei badeh, ndratiye aha, ta sahou mwasin mene aso atiye ewek taha, badeh, winiyan basahan ndrine aha buku sahou laleyah bwe. Sahou taso badeh, nyamun labai. Ma boto-on ta Malawin Ndrabun ale amekes sahou abadok, ma iy tiye taso ta sahou dah handru. Aha marakon amwenen tanan kandriyen nane aso a-en hamon ta aliy udu ndrokowa aha. Aso amekes i buku doh ta aseben aha mari.

Epesus 5:4

Ma aha ale samekes sahou ndra-in, ma sahou konen bwe, ma sahou nyorei ndra-in. Idoh bamwenen bwe. Ndri-iy labai! Kindrei ndraruwi aha ndrame len ta kandriyen ndra-in, eme ma aha kadeu wurah kili tan, ta iy talawei aha are mine iri kandriyen doh.

Epesus 4:25

Eme ya, aha sasehek sahou wasai ja ai. Aha kasehek le sahou handru kili tiri mwan ma badih, tasah aha ado bada ndramak ari le.

Jemis 5:20

Aha katehei sahou dah kamwenen kudu budon taha: Buku ado ari ala hawe ndramak nane ta amekes kandriyen ndra-in, ma sebenei iy, ya iy ruwani kandriyen ndra-in tan mara-ei, ma iy eme hamon ta san mwasin ta Kindrei, mwasin handru. Tasah, nadu tine to nane doh ndrakuhi malawin mara-ei ndrame hamon, ya iy kameh winiyan bamak bwe. Ta kandriyen tan doh le, Kindrei kameh mani kandriyen ndra-in tan mara-ei iu.

1 Pita 1:22

Ya na idah, aha ndranuhun sahou handru nyala Krais, ma iy ndramani iri kandriyen ndra-in taha mari, ma aha ndrasahan lau ha-un. Ma iy ndramesekei aha ndraso-ok ndramak ari ja ta Kindrei. Aha badeh, kaso-ok ndramak ari ja na budon hawe ndrine aha handru na len mari.