Hiburu 12:3 - Nyindrou

³ Taha katehei iri budon tataha marakon kili le ta Jises. Iy ales boto-on labai ta iri lau atehei kona iri i tan ta kandriyen ndra-in tiri. Eme ma, taha sawoyah ta asehek sahou ma taha satobwak.

Hiburu 12:3 Referans Kwoze

Galesiya 6:9

Eme ya, taha sawoyah ta amekes kandriyen mwasin; ya, i buku none taha baruwaniy bwe, badeh kameh, taha akohok ndramas ta aliy na len hamon. Idoh i buku ndramak ta bilin akohok sali nyamon ta lahou boto-on mene iy amekes.

2 Korin 4:16

Ahi abudon ta lakou doh kameh asahan. Eme ma, ahi bawoyah ta amekes gok ta Kindrei bwe. Idoh handru, oda ahi sudi boto-on ta nyamu iri, ma hamon kameh iri andra-i. Arile, ndri-iy ai, kohan mwasin Kindrei edeu eme tahi, iy bwidiy asahan ha-un mara-ei ta iri len ari, ari.

Rebelesen 2:3

Aha badeh, ndra-en hamon tek, ma aha ndratawi nyarak ndrahis mara-ei. Eme ma iri lau badeh, amekes ndra-in ewek taha. Arile, aha badeh, ales boto-on labai, ma bwese iri maha-an mari doh, ma jo tanan aha bawoyah ta aliy bwe.

1 Korin 15:58

Eme ma, aha nadu tine mwan ma badih i san ta Krais, aha kabadok, ma aha kado le rasi. Tasah aha ndratanan, lahou boto-on aha amekes ta Laban kameh winiya ba-au laleyah bwe.

Hiburu 12:2

Taha katehei mada taha kili le ta Jises, i buku le ndramak sakaliye ta nyorei, madan badeh, anyolom ili le bwena tan. Iy le ari kati budon tataha ma bwena, ma hamon kameh iy bwidi kundruh ta iri budon tataha marakon ano, ma udu mwasin labai ja. Iy ndrabwese-ei bwilima ta iri tatahi iy ili bada kei tondreh, arile iy babudon ta aliy bwe, tasah iy tanan hamon kameh iy udu ta sekesek ta iri lakou marakon iy ndrabwidiy. Na idah iy ndramanyah udu bada koyeu loboho mine Kindrei salin.

Hiburu 3:1

Ado nadu tine i san ta Jises, Kindrei udu kandrah kodo-oh iy aloh ado ale. Ado kabudon kamwenen kili le ta Jises, Kindrei tiye iy eme ta asahan aposel ma tinan tiri pris. Taha ale atehei budon in tan, ma asehek nyaran ili ta lau marakon.

2 Korin 4:1

Kindrei mwasin, ma iy tikisi ahi, ma iy mene atehei gok ta atiye sahou mwasin dah eme tahi. Eme ma, ahi bawoyah ta amekes gok dah bwe.

Tarou ta Jon 5:16

Jises amekes iri lakou doh udu bolo len ta amunyau tiri Juwis. Eme ma iri Juwis asilah madasan ta adi iy.

Hiburu 12:5

Buku sah? Sebwe aha ndramani sahou udu bolo buk ndrabun asehek, Kindrei badeh, aloh taha nadun amwenen: “Naduk, buku Laban amekes ari kandriyen ewek tam ta leheya ou, ou sabudon anya, idoh lakou ndra-in. Buku iy edeu maha-an ewek tam ta amekes ou amwenen, ya ndrinem sandra-i sala ta iri maha-an doh.

Tarou ta Luk 14:1

Na len ta amunyau ari, Jises aimon nyamon udu asiu ta tinan tiri Parasi ari. Eme iri badeh, atehei mada iri udu tan.

2 Tesalonaika 3:13

Aha nadu tine aso mwan ma badih rayah ja, aha sawoyah ta amekes kandriyen mwasin.

Tarou ta Jon 18:22

Jises asehek sahou doh kahis le badeh, ndramak tinan ari mudi minen i bolo kapan, ma iy asehek i buku doh, “I buku sah handru, ya ou asehek sahou boto-on labai i ta tinan tiri pris i buku doh?”

Tarou ta Jon 8:52

Ndrine iri Juwis irih ta sahou ta Jises, eme iri asehek sahou i buku doh, “Idah ahi ndratanan ndramwenen ai. Ou kede-eh malawin ndra-in udu bwele-em! Abraham ma hawe iri propet badeh, ndramak ndra bwena ndra-au. Arile ou anya ja, ‘Iy are lau iy anuhun ma iy in hamon ta leheya tek, iy winiyan bamak bwe.’

Tarou ta Jon 8:59

Jises asehek sahou ano le badeh, iri lau akohok bek, iri ame anya korou iy. Arile Jises aton udu bolo asiu tinan ta Kindrei udu. Ano iy iu ili manan.

Tarou ta Jon 8:13

Arile iri Parasi asehek i ta Jises i buku doh, “Ou kede-eh asehek iri gok ma kandriyen tam amwenen, eme ma iri lau kameh winiyan batehei budon tiri bala ta iri sahou nane ou asehek bwe.”

Tarou ta Jon 7:12

Loboho doh badeh, iri lau solo-an labai. Iri badeh, suburuk i tiri ta Jises. Iri rayah asehek Jises i buku doh, “Iy ndramak ari mwasin.” Iri rayah ja asehek anya, “Iy ta wendreya iri lau.”

Tarou ta Luk 16:14

Eme oro Parasi badeh, oro lau ta aseken luk labai, eme oro anuhun sahou mari doh badeh, ma oro bobose iy.

Tarou ta Luk 15:2

Eme ya iri Parasi hawe iri lau ta leheya kandriyen tiri Juwis badeh, nunu-uh anya, “Iy ndramak kede-eh, aseken iri lau ta karei ma lomondra ndra-in hawe aimon nyamon hawe iri.”

Tarou ta Luk 5:21

Eme oro lau ta leheya kandriyen tiri Juwis, hawe oro Parasi badeh, asehek i toro ari ari anya, “Iy ndramak kede-eh bobose o! Iy aluhe Kindrei kede-eh! Ari ndramak winiyan basikine kandriyen ndra-in bwe; Kindrei le ari, kabwe!”

Tarou ta Luk 2:34

Ano, Simiyon atehei nyosowan i la-u oro, ano iy tiye i ta Mariya, “Iy nah le doh, Kindrei le edeu iy, ma idah kameh iy aseben iri lau badu Isra-el rayah, ya iri rayah kameh bwale iri iy. Ma idah kameh, iy i kalem ta lau kameh asehek sahou nyarahan i tan,

Metiu 22:15

Eme iri Parasi au ala manan atilik sahou tiri i se, ta takaleh madasan ta bolowa Jises ya sahou tan kinyon ma iri katehei iy ki mada sahou.

Metiu 21:46

Idoh mesekei budon toro ta ateu Jises handru, arile oro anoh iri lau mwan ma badih, tasah iri lau mwan ma badih anya Jises badeh, propet.

Metiu 21:23

Jises iu ili hamon ili asiu tinan ta Kindrei nane ja, ya iy leheya iri lau mwan ma badih ta bolo sahou mwasin. Eme ya iri lau tinan tiri pris ma hawe iri lau-en ame hawen, ya oro ndremenyani iy i buku doh, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”

Metiu 15:2

“Buku sah handru oro lau tam ba-en hamon ta sahou batanau mene iri tubu taha ndrasihidiy ndrame tataha bwena bwe? Buku none oro anya kaimon nyamon oro basikine mine oro bwe.”

Metiu 12:24

Arile, oro Parasi anuhun iri lau nane asehek sahou i buku doh, ma oro anya, “Bwe, iy ndramak nane Krais bwe, iy ndramak nane atikah malawin ndra-in ereu la-u ndramak nane iu badeh, na boto-on ta Belsabul, tinan tiri balik.”

Metiu 11:19

Ya, jo Nadu Ndramak Awas, jo eme aimon nyamon, ma a-un gwa waen hawe iri lau. Eme ma iri lau asehek jo i buku doh, ‘Aden, aha katou iy ndramak ta aimon nyamon tinan, ma iy ndramak ta a-un gwa waen solo-an labai. Iy ndramak ndra-in labai. Tasah handru iy amekes kawas hawe iri lau ta akohok takis, ma iri lau ba-en hamon ta batanau ta Moses bwe?’ Ehe, iri amekes sahou i buku doh. Arile, are lau mwan ma badih ale idih ta budon ta Kindrei, iy kameh amekes kandriyen mwasin, ya iri lau kameh atana iri buku none ndramak doh edek san mwasin handru.”

Tarou ta Jon 9:40

Iri Parasi rayah ado hawen ala anuhun iy asehek, eme iri ndremenya, “Ou tiye sah? Sebwe mada ahi kaseu ale?”

Tarou ta Jon 10:20

Iri solo-an asehek anya, “Iy badeh, malawin ndra-in udu bwele-en ma iy lolo-ou. Buku sah? Taha sanuhun iy!”

1 Pita 2:23

Iri aluhe iy, arile iy basumon ta luhe tiri bwe. Iy akohok sisi-in, arile iy bamekes ari lakou ndra-in bala hamon bala tiri lau, bwe. Iy atehei iy i le mine Kindrei, ndramak mwasin labai ta anuhun sahou tataha mari.