TITO 2:2 - Lengua Sur (Enxet) Nuevo Testamento

² Enxet'ák apkelwányam nak, kéméxchek etnahagkok meltemegweykmohóxma, etnahagkok nahan ektakmela apkeltémakxa, etnahagkok nahan apmopwána apkeláneykegkoho apkeltémakxa, tén han etnahagkok ekmámnaksoho melya'áseyam, tén han etnahagkok ekmámnaksoho m'a apkelásekhamakpoho nak, tén han elwaskápekxohok elenmaxakpohok ma'a ektémakxa nak nenlegeykegkoho.

TITO 2:2 Referans Kwoze

GÁLATAS 5:23

megkeymáxkoho egwáxok, tén han negmowána anlanagkohok nentémakxa. Méko xama segánamakxa enmexma xama enxoho xa.

1 SAN PEDRO 4:7

Kólteme kéxegke kélmowána kóllanagkohok kéltémakxa, kólteme nahan cha'a ekmámnaksoho nempeywa nelmaxnagko, hakte chágketwokmek yakwánxa nak kalmassegwók ekyókxoho aksok.

1 TIMOTEO 3:11

Hawók nahan ma'a kelán'ák apnakteyegka'a nak énxet'ák appasmeykha nak kéltamheykha kélakneykekxexa, kéméxchek nahan katnehek ekha kéláyo, háwe m'a eltennágwayam naksa nátegma, kéméxchek nahan katnehek ma'a ekmowána nak elaneykegkoho ektémakxa, tén han ma'a megkayenseyam nak elané ekyókxoho ektamheykha ektakmela.

1 SAN PEDRO 5:8

Kólteme ekha kélya'áseykegkoho, kólleyxmakha cha'a, hakte máxa entahak aksok nawhak eklo ekyexweweyncha'a ektegyeyncha'a ekyógkexma m'a kelyekhama' ektaha nak megkatnaha egmók.

TITO 1:13

Nakso' axta aptahakxa appeywa xa; ékeso eñamakxa seltamho nak megyésekxék xép egkések appeywa ekyennakte xa énxet'ák nak, yakwayam enxoho etnahagkok ekmámnaksoho melya'áseyam,

1 TIMOTEO 3:2

Ekeso eñamakxa eyéméxko nak etnehek meyke kélxéncháseykekxoho aptémakxa énxet ektaha nak apxegkeso kélakneykekxexa, kéméxchek etnehek wánxa xama aptáwa, etnehek nahan apmopwána apkeláneykegkoho aptémakxa, etnehek nahan ekha apya'áseykegkoho, etnehek nahan ektakmela aptémakxa. Kéméxchek cha'a emok takha' pók exnésók ma'a apxagkok; kéméxchek nahan etnehek ma'a apmopwána nak elxekmósek apnámokkok;

1 TESALONICENSES 5:8

Keñe negko'o neleñama nak neyseksa ekteyapma ekhem, tásek cha'a antehek ekha negya'áseykegkoho. Kéméxchek negko'o agahakkasaxchek ma'a magya'áseyam nak tén han ma'a negásekhayo nak, keñe ótchesek empátek ma'a nelhaxanma nak yakwayam ólwagkasaxchek teyp ektémol'a sẽlpextétamo apketcheso apkátek.

ROMANOS 12:3

Dios segkéso sektamheykha eñama seyásekhayo, keñamak seltennasa kélyókxoho kéxegke seltamho megkólyeykhasaxkók ekxéneykha kélwáxók kéxegke kélagko'. Emenyék ko'o kaxénmakha cha'a apwáxok kélxama kéxegke, yakwayam meyeykhasakpók ekxéneykha apwáxók apagkok apagko', cham'a ektémakxa axta apméso apmopwána Dios yetlo mey'áseyam.

1 SAN PEDRO 1:13

Kóllánekxa kéltahakxa, kólteme kélmowána kélláneykegkoho kéltémakxa, kólleyxmakha m'a aksok peya nak egkések Dios eñama m'a ektémakxa nak segemleykekxoho, cham'a senxekmowáseykpoho sat Wese' egegkok Jesucristo.

1 CORINTIOS 15:34

Kólya'ásegwakxoho hana, nágkóllánekxa megkólya'asáxma, hakte melya'ásegkok kélnápakha kéxegke Dios. Ektemek ko'o seláneya kéxegke xa yakwayam enxoho kólmegkágwakxak.

2 SAN PEDRO 1:6

keñe m'a negya'ásegwayam nak, kólyepetchesek ma'a negmowána nak anlanagkohok nentémakxa; keñe m'a negmowána nak anlanagkohok nentémakxa kólyepetchesek ma'a mampekhésamaxche nak; keñe m'a mampekhésamaxche nak, kólyepetchesek ma'a nempagkanchásamáxche nak Dios;

TITO 2:7

etne exchep xa ektakmela aptémakxa, cham'a ekyókxoho aksok apkelanakxa enxoho, yakwayam enxoho elyetlakxak aptémakxa exchep xa wokma'ák nak. Apkelxekmósek agkok xép wokma'ák, etakmelchesho cha'a apkelxekmóso, ná etne aksa aptemesáseykha aksa apkelxekmóso,

TITO 1:8

Wánxa agkok, kéméxchek cha'a emok takha pók exnésók ma'a apxagkok, tén han etnehek ma'a énxet ektakmela nak aptémakxa, cham'a apmopwána nak elanagkohok aptémakxa, kéméxchek nahan etnehek ma'a ekpéwomo nak aptémakxa, etnehek nahan appagkanchásamap Dios, etnehek nahan cha'a meyenseyam apkelané aptamheykha.

1 TIMOTEO 3:4

Kéméxchek nahan etnehek ma'a apmopwána nak apkelmeykha ekheykha nak apxagkok, etnésesek nahan apketchek ekha apkelyaheykekxoho, tén han ekha elnawagko.

1 TIMOTEO 1:5

Emenyék axta ko'o keytek nelásekhamaxkoho sektaha seyáneya exchep xa, cham'a negásekhayo eñama nak nenteme eyáxñeyo egwáxok, tén han eñama m'a megkaxénweykekxohol'a egwáxok nentémakxa, tén han eñama m'a magya'áseyam ekmámnaksoho nak.

1 TESALONICENSES 5:6

Ekeso eñamakxa eyéméxko nak negko'o mannaktének, mantehek ma'a aptamheykegkaxa nak énxet'ák apnakteyenmo nak. Tásek mannaktének negko'o, tén han antehek ekha negya'áseykegkoho.

FILIPENSES 4:8

Amonye selwateso elyáxeg, kaxén kélwáxok ma'a ekyókxoho aksok ektaha nak ekmámnaksoho, tén han ma'a ekyókxoho aksok eyéméxko nak antehek negáyo, tén han ma'a ekyókxoho aksok ektaha nak elpéwomo, tén han ma'a ekyókxoho aksok ektaha nak eláxñeyo, tén han ma'a ekyókxoho aksok ekleklamókxa nak kélwáxok kataxchek antehek, tén han ma'a ekyókxoho aksok ektakmela nak cha'a ekxénamaxche. Kaxén kélwáxok ma'a ekyókxoho aksok ektakmela nak, eyéméxko nak katakmelek nenxeyenma.

2 CORINTIOS 5:13

Sẽlyéháxma agkok negko'o, Dios akke keñamak xa. Agkok antahak negko'o sẽlyéháxma, kéxegke eyke yakwayam kapasmok xa.

1 CORINTIOS 9:25

Enxet'ák ektahakxa enxoho apkeláneykekxa aptahakxa yakwayam epasmok apkelteyásamap, melanyek ma'a xama aksok sẽtsagkasamo nak. Etnahagkok cha'a xa ektaha nak, yakwayam enxoho emok ma'a nenteté empátek elánamáxchel'a yámet áwa' ekmanyehel'a kalyameyk; wánxa agkok, nenlenxanakmek eyke negko'o yakwayam agmok ma'a ekyanmaga megkatsagkásamáxche nak.

LOS HECHOS 24:25

Xama axta apxéna Pablo m'a nentémakxa ekpéwomo nak, tén han ma'a ektémakxa nak negmowána anlanagkohok nentémakxa, tén han ma'a yakwánxa sat etnehek segyekpelchémo Dios egmonye sat, apyegwakkek axta Felix, aptahak axta apcháneya Pablo s'e: —Etakhekxa sat kaxwo', wáneyha sat makham méko enxoho selanakxa xama ekhem.

SAN LUCAS 8:35

Apkelxegkek axta énxet apteyánegwokmoho m'a ektahakxa axta. Xama axta apkelwokmo aphakxa Jesús, apwetágwokmek axta apha ekpayhókxa Jesús apmagkok ma'a énxet elántepa axta kelyekhama' apwáxok. Yetlo apkelnakta axta aphak ma'a, yetlo apya'áseykegkoho exma axta anhan. Apkelakak axta xa énxet'ák nak.

SAN MARCOS 5:15

Xama axta apkelwokmo énxet'ák aphakxa Jesús, apwetágwokmek axta apha énxet elántaxnama axta apwáxok kelyekhama' ekxámokma yetlo apkelántaxno, tén han ekha apya'áseykegkoho. Apkelakak axta anhan.

1 TIMOTEO 3:8

Hawók nahan ma'a énxet ektaha nak appasmeykha kéltamheykha kélakneykekxexa, kéméxchek etnehek ma'a énxet ekha nak kéláyo, metnehek ma'a apmopwána amya'a nak, metnehek nahan ma'a apyeykhásamákpoho nak apya anmen, metnehek nahan ma'a ekmaso nak aptémakxa yepmenyéhok selyakye,

1 TIMOTEO 1:2

Timoteo, ektáxésesek xép se'e weykcha'áhak nak, aptaha nak máxa hatte eñama sektémo xamo' may'áseyam. Emenyék ko'o etnehek apméso naksa exchep Dios Egyap, tén han Cristo Jesús ma'a ektémakxa nak segemleykekxoho, tén han egkések ma'a ektémakxa nak ektakmeleykha apwáxok henlano', tén han keytek xép ma'a meyke ektahakxa egwáxok eñama nak Dios.

1 TIMOTEO 1:10

tén han ma'a énxet'ák apkeláneyak nak ekmaso nentémakxa mansexta, tén han ma'a énxet'ák aphésamo nak apkeltémakxa kelán'a, tén han ma'a énxet'ák apkexeykekxa nak apnámokkok aptegyeykekxa selyakye yakwayam kóltemésesha aksa, tén han ma'a énxet'ák apkelmopwancha'a amya'a nak, tén han ma'a énxet'ák apteméseso nak ekmámnaksoho m'a amya'a megkamámnaksoho nak, cham'a énxet'ák apkeláneykegkohol'a m'a enmexma nak nelxekmowásamáxche ekmámnaksoho nak.

1 TIMOTEO 1:14

Cháxa aptahakxa axta Wese' egegkok seyanchesáso segkésa aksa m'a ektémakxa nak segemleykekxoho, egkések axta may'áseyam, tén han ma'a negásekhayo ekyetnamol'a nenteme nak negyepetcheyo Cristo Jesús.

1 TIMOTEO 5:1

Ná egkes aksa appeywa ekyennakte énxet apwányam nak, wánxa agkok, ey'ásesagkoho aksa ekhawo aptemésesamakxal'a apyap; etne nahan elána' wokma'ák ma'a aptemésesamakxal'a elának apkelyáxeg apancha'awo nak.

FILEMÓN 1:9

wánxa agkok, emenyék eyke agkések xép sekpeywa ektakmela eñama m'a ektémakxa nak nelásekhamaxkoho. Ko'o Pablo, ekwanakmek kaxwo' ko'o, elhésekmek nahan sẽlpextétamakxa sekmáxko, eñama seklegaso apwesey Cristo Jesús.