SAN MATEO 8:11 - Lengua Sur (Enxet) Nuevo Testamento

¹¹ Eltennásek ko'o kéxegke peya elwak énxet apkeleñama ekteyapmakxa ekhem tén han ma'a ektaxnegwánxa ekhem, exmakha sat xamo' nekha mésa Abraham, Isaac, tén han Jacob, cham'a aptémakxa nak Wese' apwányam Dios.

SAN MATEO 8:11 Referans Kwoze

EFESIOS 3:6

Keso ektaha nak amya'a ekpowásamáxkoho s'e: kaxhok sat mók apkelxawe aksok kélpagkancheso m'a énxet'ák metnaha nak judíos tén han ma'a énxet'ák judíos, eñama m'a tásek amya'a nak, hakte hawók mók appasmeykekxa Cristo apyókxa, weykekxók nahan apkelxaweyak ma'a apekkeneykekxa axta appeywa Dios eñama Cristo Jesús.

SAN LUCAS 12:37

Apkeleñémo apagko' wese' apkeláneykha apwakto enxoho m'a wese' apagkok, cham'a apwetágwakto enxoho menaktena. Yának sat nahan exmakha wese' apagkok ma'a nekha mésa, keñe sat elagkok aptéyak. Nakso' xa sektahakxa nak seláneya kéxegke.

COLOSENSES 3:11

Massegkek kaxwo' nenteme negyeykhamaxche egmók, megkeyxek nenteme enxoho griego esenhan nenteme enxoho judíos, megkeyxek nahan ma'a ekha enxoho sẽlkahaso kélyenyekhamol'a egyempehek, esenhan ma'a méko enxoho sẽlkahaso, megkeyxek nahan nenteme enxoho neñama mók nekha, megkeyxek nahan nenteme enxoho magya'áseyak aksok, megkeyxek nahan ma'a nenteme nak negmomaxche esenhan ma'a magmomaxche nak; Cristo eyke apwánxa apagko' meyke ekhémo, apheyk nahan kélwáxok Cristo kélyókxoho nak.

LOS HECHOS 11:18

Xama axta apkelleg'a énxet'ák ekha melya'áseyam apheykha Jerusalén xa, apkelwanmeyágkek axta, aptahak axta anhan apkeltemésesa apcheymákpoho Dios se'e: —¡Apmések neyke nahan Dios yakwayam elyakmagkasek apwáxók ma'a énxet'ák metnaha nak judíos, tén han peya elmésagkok ma'a ekyennakte apnenya'ák megkatnegwayam enéxa nak!

LOS HECHOS 10:45

Pelakkasek axta apkelwet'a m'a énxet'ák judíos melya'áseyam axta Jesús aptaha axta apkelxegexma'a Pedro apkelwokmo m'a, cham'a apkelxawágko axta Espíritu Santo énxet'ák metnaha nak judíos,

SAN MATEO 24:31

Eláphaksek sat apkelásenneykha yetlo ekyennakte apkelpáwaso apkelakkahaso yakwayam enxoho yánchásekxak ma'a ektaha nak apkelyéseykha apkeleñama ekyókxoho yókxexma: nexcheyha, nepyeyam, ekteyapmakxa ekhem, tén han ma'a ektaxnegwánxa ekhem, esawhekxohok sat keso náxop.

APOCALIPSIS 7:6

doce mil axta anhan apyókxoho kélkahasa m'a apkeleñama nak nepyeseksa Aser énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Neftalí énxet'ák apagkok, doce mil axta anhan apyókxoho kélkahasa m'a énxet'ák apkeleñama nak nepyeseksa Manasés énxet'ák apagkok,

2 TESALONICENSES 1:5

Cháxa senxekmóso ektaha ekpéwomo agko' ma'a ektémakxa nak segyekpelchémo Dios, cham'a ekxeyenma nak apwáxok ekpayhawo kólántexek kéxegke m'a aptémakxa nak Wese' apwányam Dios. Cháxa keñamak kéllegágkoho nak kéxegke xa.

1 CORINTIOS 15:20

Nakso' agko' axta eyke apxátekhágweykmo Cristo. Cristo apteme aphawo m'a émha amonye eknakxamáxchel'a aksok ekyexna: Cristo axta nahan apmonye kélxátekháseyam.

1 CORINTIOS 6:9

¿Yagkólya'ásegkok kéxegke m'a énxet'ák elmasagcha'a nak apkeltémakxa peya mexkekxék ma'a aptémakxa nak Wese' apwányam Dios? Nágkólana aksa katakmelak ma'a kélanagkama nak katakmelak kéltahakxa, hakte mexkekxék sat aptémakxa nak Wese' apwányam Dios ma'a énxet'ák elmasagcha'a nak apkeltémakxa kalmopsexta'a, tén han ma'a énxet'ák apkelpeykesamo nak kéleykmáseso, tén han ma'a énxet'ák aptawáseykha nak ektémakxa sẽlyamhopma, tén han ma'a énxet'ák aphó kelwána nak, tén han ma'a énxet'ák apkelmenyexmo nak, tén han ma'a énxet'ák apkelmeyókásamákpoho nak aksok apagkok, tén han ma'a énxet'ák anmenát'ák nak, tén han ma'a énxet'ák aptekkesáseykha nak aksa apwesey pók, tén han ma'a énxet'ák apmopwána nak elyexanchesha pók yakwayam exkak selyakye.

LOS HECHOS 14:27

Xama axta apkelwákxo tegma apwányam Antioquía Pablo tén han Bernabé, apchánchesakxeyk axta m'a énxet'ák ektaha nak apkeltamheykha kélakneykekxexa, apkeltennáseyha axta ekyókxoho aptemésesamakxa Dios Pablo tén han Bernabé, apkeltennáseyha axta anhan ektahakxa apkelya'asásegwokmo Wese' egegkok ma'a énxet'ák metnaha nak judíos, yakwayam enxoho nahan etnahagkok melya'áseyam.

LOS HECHOS 14:22

Apkelwaskakkásekxók axta énxet'ák apteme axta melya'áseyam xa yókxexma nak, apkeltennásek axta apkeltamho elenxanmohok apkelyennaktésamo apteme melya'áseyam. Apkeltennásek axta anhan megkatnehek manlegeykegkoho ekyókxoho aksok negmoko enxoho antexek ma'a aptémakxa nak Wese' apwányam Dios.

SAN LUCAS 16:22

Xama ekhem axta apketsapak xa énxet meyke aksok apagkok nak, apyentamákxeyk axta anhan Dios apkelásenneykha yakwayam exnésekxak ma'a aphakxa nak Abraham, cham'a yókxexma ektakmelakxa nak. Apketsekkek axta anhan ma'a énxet ekxákma axta selyakye apagkok. Kélatawanyek axta anhan.

SAN MATEO 3:2

Axta etnohok cha'a apkeltenneykha s'e: “¡Kólyakmagkas kélwáxok, chágketwa'ak ma'a aptémakxa nak Wese' apwányam Dios!”

SAN MATEO 8:10

Pelakkasek axta apleg'a Jesús xa. Aptahak axta apkeláneya énxet'ák ektaha axta apkelyetleykha s'e: —Mateyk ko'o makham xama énxet Israel ekhawo mey'áseyam xa énxet nak. Nakso' xa sektahakxa nak seláneya.

SAN MATEO 21:41

Aptahak axta apkelátegmowágko énxet'ák se'e: —Elnápok sat wese' yetlo megkamopyósa elanok xa énxet'ák elmasagcha'a nak apkeltémakxa, keñe sat emásesha xóp kélcheneykekxexa anmen yámet ma'a pók énxet'ák apkeltamheykha nak. Egkések sat eyke wese' aksok ekyexna apnakxéyak ma'a ektahakxa enxoho apagkok ma'a wese', cham'a ekwokmo enxoho ekhem eknakxamáxchexa.