HEBREOS 1:3 - Lengua Sur (Enxet) Nuevo Testamento

³ Cristo keñamak ekwetamaxko m'a ektémakxa nak apcheymákpoho Dios, hakte aphawók apagko' Cristo m'a Dios, aptaha nak han appasmo ekyókxoho aksok yetlo m'a appeywa ekha nak ekmowána. Aphákxek axta néten ekpayhókxa nak nelya'asamakxa nekha Dios aptaháno, cham'a, natámen axta segmaséseso nentémakxa mólya'asáxma.

HEBREOS 1:3 Referans Kwoze

APOCALIPSIS 4:11

“Payhawók kóltemésesek Xép apcheymákpoho, Wese' egegkok Dios, tén han kóltehek kéláyo, payhawók nahan keytek ma'a apmopwána, hakte apkelanak axta exchep ekyókxoho aksok; Xép apmopmenyého axta keñamak ekheykegko ekyókxoho aksok, tén han elánamáxko.”

SAN JUAN 1:14

Enxet apagko' axta aptamheykekxak ma'a ektaha nak Appeywa, aphegkek axta nahan negyeseksa, negwet'ak axta anhan negko'o ektémakxa apcheymákpoho. Cháxa apcheymákpoho apmésa axta Apyap eñama apteme wánxa xama Apketche xa. Láneyok axta apwáxok segásekhayo tén han ma'a ekmámnaksoho nak.

2 CORINTIOS 4:4

Apkelya'ásekmek cha'a xa énxet'ák nak, hakte meyke apakta'ák temésesók ma'a dios ektaha nak eláneykha keso náxop, yakwayam enxoho melwetyehek ma'a tásek amya'a elseyexma agkok eñama nak ma'a Cristo ekha nak apcheymákpoho, aptaha nak aphémo apagko' ma'a Dios.

HEBREOS 12:2

Anlanok hana wánxa m'a Jesús, hakte cha'a keñamak magya'áseyam nak negko'o m'a, Jesús nahan apteme apteméseso ektakmela m'a magya'áseyam nak negko'o. Aplegágkók axta Jesús néten aksok ektegyéso, axta yenmexmók Jesús ma'a nétsapma segmegkasamo nak, hakte apya'ásegkok axta peya étak ekpayheykekxa apwáxok natámen aplegeykegkoho apketsapma; aphákxeyk axta anhan ma'a ekpayhókxa nak nelya'asamakxa nekha Dios aptaháno.

SAN JUAN 1:4

Yetnegkek axta nahan ekyennakte egnenyek ma'a. Elseyexma axta m'a ekyennakte egnenyek nak yakwayam enxoho kalsásesexma apyókxoho énxet'ák.

HEBREOS 10:12

Wánxa agkok, xama apmeyásamákpekxoho apagko' axta eyke Jesucristo m'a Dios, meyke teyp, keñe axta aphákxo m'a ekpayhókxa nak apkelya'asamakxa Dios,

HEBREOS 9:26

Temegkek agkok Cristo xa ektaha nak, kaleklemek axta cha'a emátog Cristo eyeynamo m'a sekxo' axta elánamáxko keso náxop. Wánxa axta eyke xama apwé Cristo keso negwánxa nak eyágketwokmo nak ektemegwánxa néxa, apmeyáseykpók axta apagko' Cristo m'a Dios yakwayam enxoho hegmasésesek nentémakxa mólya'asáxma wánxa m'a, meyke teyp.

1 SAN JUAN 1:7

Negheyk agkok negko'o neyseksa elseyexma, ekhawo m'a ektémakxa nak Dios apha neyseksa elseyexma, antehek nahan negko'o móxpánchásamáxche, hegmasésesek nahan ekyókxoho nentémakxa mólya'asáxma m'a Jesucristo éma apagkok, aptaha nak Dios Apketche.

HEBREOS 4:14

Jesús, Dios Apketche, apteme apkemha apmonye apagko' sempasmo sẽlmaxnéseso negko'o, cham'a apmeyeykekxo axta néten. Ekeso eñamakxa eyéméxko nak anlenxanmohok nelwaskápeykekxoho eñama m'a magya'áseyam nenxeyenma nak ekyetna negko'o.

1 SAN JUAN 3:5

Kélya'ásegkok eyke kaxwo' kéxegke apwaya axta Jesucristo keso náxop yakwayam emasésak mólya'asáxma, kélya'ásegkok nahan Cristo meláneya mey'asáxma xama enxoho.

2 SAN PEDRO 1:16

Hakte ekmámnaksoho agko' ma'a ektahakxa axta nelxekmóso negko'o kéxegke, cham'a ektémakxa nak Dios apmopwána tén han ma'a Jesucristo Wese' egegkok apkexyeyam sat, háwe m'a amya'a kéltenneykha naksal'a, cham'a apyeykháseykegkohol'a ektémakxa apkeltenneykha énxet. Hakte negweté egagko' axta negko'o m'a ektémakxa nak apcheymákpoho Wese' egegkok Jesús.

1 SAN PEDRO 3:22

cham'a Jesucristo apmeyeykekxo axta néten, aphákxeyk nahan ma'a ekpayhókxa nak apkelya'asamakxa Dios. Temék kaxwo' elyaheykekxoho Dios apkelásenneykha m'a Cristo, tén han ma'a aksok magweté nak ekyókxa ekheykencha'a nak tekhenxet, cham'a ekha nak kélyaheykekxoho, cham'a ekha nak han elmowancha'a.

1 SAN PEDRO 1:21

Cristo nahan keñamak kéltaha megkólya'áseyam kéxegke Dios, cham'a Dios aptaha axta apxátekháseyam Cristo, aptaha axta anhan apméso apcheymákpoho; cháxa keñamak kéltéma nak kéxegke megkólya'áseyam Dios xa, tén han ma'a ektémakxa nak elhaxneykha kélwáxok.

HEBREOS 8:1

Akke nenxénak negko'o ektaha ektakmela agko' se'e; yetneyk negko'o aptaha nak apkemha apmonye appasmo apkelmaxnéseso Dios énxet'ák apagkok, cham'a aphákxo nak ma'a néten ekpayhókxa nak nelya'asamakxa nekha Dios aptaháno.

SAN MARCOS 16:19

Kélya'ásekxeyk axta néten Jesús natámen apkelpakhetcheso apkeltámeséyak, aphákxeyk axta m'a ekpayhókxa nak apkelya'asamakxa Dios.

APOCALIPSIS 3:21

Enxet'ák ektahakxa enxoho apkelmalanma, agkések sat ko'o yakwayam exek nekha sektáhano sekhamakxa nak, ekhawo ektémakxa axta ko'o xa sekmalanmá, ekhákxek axta m'a nekha aphamakxa nak Táta.

HEBREOS 7:27

Mexnawok Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, apchakhamol'a cha'a aksok kélnaktóso yakwayam egkések Dios ekyókxoho ekhem, ekyanmaga m'a aptémakxa nak mey'asáxma, tén han ma'a ektémakxa nak melya'asáxma énxet'ák. Wánxa agkok, xama apmeyásamákpoho apagko' axta eyke Jesús ekyanmaga mólya'asáxma negko'o megkatnegwayam enéxa, cham'a apmeyáseykpoho axta apagko' yakwayam emátog.

LOS HECHOS 2:33

Egmések axta negko'o Espíritu Santo, cham'a natámen apya'áseykekxa axta néten Dios ma'a Jesús, tén han ma'a aphésakxo axta ekpayhókxa nak apkelya'asamakxa, tén han ma'a natámen axta apméso Apyap Espíritu apxeyenma axta hegmések negko'o xa. Cháxa kélwetaya nak kéxegke, tén han ma'a kéllegaya nak.

SAN JUAN 1:29

Mók ekhem axta entahak apwet'a Juan apxegakmo Jesús, aptahak axta Juan apkeláneya énxet'ák se'e: “¡Kóllano, cháxa Nekkések Apketkok apkeñama nak Dios xa, aptaha nak apmaséseso melya'asáxma énxet'ák keso náxop!

COLOSENSES 3:1

Kólchetam kéxegke aksok eleñama nak néten, cham'a aphamakxa nak Cristo ekpayhókxa nak apkelya'asamakxa Dios, hakte kélnakxátekháseykmek axta kéxegke xamo' Cristo.

ROMANOS 8:34

¿Yaksak sat kának kóllegásesagkohok? Cristo Jesús axta m'a apketsapa axta; háwe ekwánxa agkok ma'a apketsapa axta, apxátekhágwokmek axta anhan, apheyk nahan ma'a ekpayhókxa nak apkelya'asamakxa Dios, empakhetchesesek cha'a negko'o Dios.

LOS HECHOS 7:56

Keñe axta aptaha appakmeta s'e: —¡Kóllano! Ekwet'ak ko'o ekmayhekxo néten, ekwet'ak nahan apkenmeyncha'a ekpayhókxa apkelya'asamakxa Dios ma'a ektaha nak Apketche énxet.

ROMANOS 1:16

Mamegkayhek ko'o axének tásek amya'a, hakte cháxa Dios apmopwána xa, yakwayam enxoho elwagkasakpok teyp apyókxoho énxet apteme nak melya'áseyam, eyeynamókxa m'a énxet'ák judíos, wokmók eyke nahan ma'a énxet'ák metnaha nak judíos.

HEBREOS 9:16

Wokmek agkok yakwánxa kólmaha m'a weykcha'áhak ekxeyenma nak nenxaweykekxa aksok eltakmópeyak, cham'a sempekkencháseykekxa nak énxet ektaha apketsapma, kéméxchek sekxo' kólya'asagkohok ektakmela m'a apketsapa enxoho, cham'a énxet ektaha axta apkelané weykcha'áhak.

SAN MATEO 22:24

—Sẽlxekmóso, apxeyenmék axta Moisés ma'a apketsapa enxoho xama énxet méko enxoho apketche, keñe apyáxeg emekxak xa appepma aptáwa axta, yakwayam enxoho étaksek apketchek m'a apepma' apketsapma axta.

TITO 2:14

Apmeyásamakpók axta apagko' yakwayam emátog, negko'o eñamakxa, yakwayam enxoho hẽlwagkasek teyp neyseksa ekyókxoho nentémakxa ekmaso nak, tén han hentemésesek ektakmela nentémakxa, yakwayam enxoho nahan antehek énxet'ák apagkok, tén han agámenyéhok anlának ma'a aksok eltakmela nak.

HEBREOS 1:13

Metnék yának Dios xama apchásenneykha s'e: “Exa nehekha ko'o ekpayhókxa nak selya'asamakxa, ekwokmoho seknegkenchesa kóneg apmagkok xép ma'a apkelenmexma nak.”

2 SAN PEDRO 1:17

Axta negwethok negko'o m'a apmésa axta Dios Egyap ekyawe kéláyo tén han apcheymákpoho, cham'a nenleg'a axta anhan aptaha appeywa Dios se'e: “Keso hatte seyásekhayo nak ko'o s'e, aptaha nak selyéseykha ahagko' ko'o.”