GÁLATAS 6:8 - Lengua Sur (Enxet) Nuevo Testamento

⁸ Enxet ektahakxa enxoho apkelenxáneykmoho apkelané m'a aksok ekmaso apyespagkamakxa nak ektémol'a agkenekxak aksok aktek, étak sat nétsapma ekyakmageykekxa xa, ektémol'a annakxek ekyexna aksok negkeneykekxa. Enxet ektahakxa enxoho apkelenxáneykmoho apkelané m'a ekleklamókxa nak apwáxok Espíritu, Espíritu sat nahan kañék exkak ma'a ekyennakte egnenyek megkatnegwayam enéxa nak, ektémol'a annakxek ekyexna aksok negkeneykekxa.

GÁLATAS 6:8 Referans Kwoze

ROMANOS 8:13

Hakte, kélyetlákxeyk agkok kéxegke m'a nentémakxa egagko' nak mólya'asáxma, kóletsapok sat; wánxa agkok kélmasések agkok kéxegke xa kéltémakxa kélagko' nak megkólya'asáxma eñama m'a appasmo nak Espíritu, megkóletsepek sat.

SANTIAGO 3:18

Enxet'ák ektaha nak apkelenxányam etekkesek meyke ektahakxa egwáxok, elanagkok nahan meyke ektahakxa egwáxok, yakwayam enxoho étak ma'a nentémakxa ekpéwomo nak.

2 SAN PEDRO 2:19

Eltennaksek cha'a kéxegke kélewagko kóllának kélmokókxa enxoho kóllának xa énxet'ák nak, kelmomchek eyke anhan apwáxók aksok apkelyespagkamakxa xa énxet'ák nak, cham'a apkeltémakxa segmaséseykmohol'a; apyókxoho énxet cha'a kamok apwáxok ma'a aksok ekmomakxa enxoho apwáxok.

GÁLATAS 6:7

Nágkólteme megkólakhémo kéxegke ektémakxa nak elchetamso kélwáxok: méko kawának kasmaksek Dios. Aksok kélcheneykekxa nak, kanakxaxchek nahan ekyexna.

ROMANOS 13:14

Kólteme kélahakkásamáxche Wese' egegkok Jesucristo, nágkóllána kaxwo' ma'a ektémakxa nak aksok ekmaso ekyespagko negyókxa.

APOCALIPSIS 22:11

Yoho elának aksok ekmaso m'a énxet ektaha nak ekmaso aptémakxa, yoho nahan elának aksok ekmanyása m'a énxet ekmanyása nak aptémakxa, wánxa agkok, elenxanmohok apagkok nahan apkelané aksok ektakmela m'a énxet ektaha nak ektakmela aptémakxa, tén han elenxanmohok apteme appagkanchásamap Dios ma'a énxet ektaha nak appagkanchásamap Dios.”

SAN JUAN 4:36

Enxet ektaha nak apnakxo ekyexna aksok namyep kélcheneykekxa exkak cha'a ekyanmaga, keñe m'a aksok apnakxo nak ekteme ekyennakte egnenyek megkatnegwayam enéxa, yakwayam enxoho kaxhok mók elpayheykekxa apwáxók ma'a ektaha nak apkeneykekxa tén han ma'a ektaha nak apnakxo ekyexna.

SAN JUDAS 1:21

Kóltakmelches ma'a segásekhayo eñama nak Dios, kólleyx nahan ma'a ekhem yakwánxa nak hegmések ekyennakte egnenyek megkatnegwayam enéxa Wese' egegkok Jesucristo, eñama m'a ektémakxa nak ektakmeleykha apwáxok henlano'.

SAN JUAN 6:27

Nágkóltemeykha aksa yakwayam kóltegyek ma'a nento eksawhomáxkohol'a, akke tásek kóltemeykha yakwayam kóltegyek ma'a nento ekyennaktésamo nak egnenyek ektaha nak han megkamassegwayam. Cháxa nento peya nak egkések kéxegke ektaha nak Apketche énxet xa, hakte apkelkahásek axta Dios Egyap xa.

ROMANOS 6:13

Nágkólmés kélyókxa mólya'asáxma, yakwayam enxoho kóltemésesek elané aksok ekmaso, akke tásek kólmések kélyókxa m'a Dios, kélhawók kéxegke m'a énxet'ák apkeletsapma axta, kélhawók nahan ma'a ektémakxa nak apnakxétekhágwayam, kólmés kélyókxa m'a Dios yakwayam enxoho kóltemésesek elané aksok ektakmela kélyókxa.

SAN MATEO 19:29

Kéxegke ektahakxa enxoho kélyamasma kélxagkok, kélyepma, kélyáxa, kélyepmeyk, kélchána, kélketchek, xóp kélagkok esenhan, eñama selyetlo ko'o, kayeykhágwomhok sat kélxawé aksok, kólxawak sat nahan ekyennakte kélnenya'ák megkatnegwayam enéxa.

TITO 3:7

yakwayam enxoho anxawak ma'a ekyennakte egnenyek megkatnegwayam enéxa nelhaxanma nak anxawa', cham'a senxéna enxoho Dios nentaha nelpéwomo eñama m'a segméso naksa nak segemleykekxoho.

SAN JUAN 4:14

énxet ektahakxa enxoho apya yegmen peya nak agkések ko'o, megkakhekxék sat cha'a ekhem. Hakte katyapok sat aksa apwáxok énxet yegmen peya nak agkések ko'o, ektémol'a m'a ekteyapmakxal'a yegmen, kagkések sat nahan ekyennakte egnenyek megkatnegwayam enéxa.

SAN LUCAS 18:30

kayeykhágwomhok sat kélxaweykekxa aksok kélagkok keso náxop, keñe sat kólxawak ekyennakte kélnenya'ák megkatnegwayam enéxa m'a ektaha sat axnagkok kélheykha. Nakso' xa sektahakxa nak sekpeywa seláneya kéxegke.

2 SAN PEDRO 2:12

Melya'ásegkok aksok xa énxet'ák nak, máxa aksok nawha'ák, elanagkok aksa m'a apmokókxa enxoho elanagkok, yakwayam elmakpok nahan cha'a appaleykmok, tén han yakwayam etekyók. Asagkek nahan cha'a katnehek apxeyenma m'a aksok melya'áseykegkaxa nak; wánxa agkok, kaxhok sat eyke apkeletsapma m'a ektémakxal'a kamaskok aksok nawha'ák.

1 TIMOTEO 1:16

Ekeso eñamakxa meyakmagkáseykekxo nak Dios sektémakxa ko'o: yakwayam enxoho kañék ko'o ekwetamaxche m'a ekyókxoho ektémakxa nak mepekhésamap Jesucristo. Cháxa setnamakxa axta ko'o xa yakwayam enxoho elwetak ma'a énxet'ák peya nak han etnehek melya'áseyam Cristo, yakwayam enxoho étak ekyennakte apnenya'ák megkatnegwayam enéxa.

SAN MATEO 25:46

Cháxa peya nak elmahagkok megkatnegweykenxa nak néxa sẽllegasáseykegkoho xa, keñe m'a énxet apkelpéwomo nak peya elmahagkok ma'a megkatnegweykenxa nak néxa ekyennakte egnenyek.”

ROMANOS 6:23

Nétsapma ekteme ekyanmaga m'a mólya'asáxma nak, wánxa agkok, ekyennakte egnenya'ák megkatnegwayam enéxa eñama negyepetcheyo Cristo Jesús Wese' egegkok akke m'a aksok segméso naksa nak Dios.

ROMANOS 8:6

Xénaha agkok aksa egwáxok wánxa m'a nentémakxa egagko' nak, cháxa segya'asamol'a nétsapmakxa xa; keñe m'a ekxéneykha nak egwáxok aksok apkeltémókxa nak anlának Espíritu, cháxa segmésamol'a ekyennakte egnenya'ák xa, tén han meyke ektahakxa egwáxok.

ROMANOS 8:11

Apheyk agkok kélwáxok kéxegke m'a Espíritu apkeñama nak Dios, cham'a apxátekhásekmo axta Jesús, etnésesók sat kéxegke kélhaxnagcha'ak natámen kéletsapma m'a Dios apxátekhásekmo axta Cristo, eñama apha kélwáxok ma'a Espíritu apkeñama nak Dios.

1 CORINTIOS 15:42

Hawók nahan ektémakxa apnakxátekhágwayam ma'a apkeletsapma axta, negyókxa eyátawanyamáxkohol'a cha'a ekteme étsapmo, keñe m'a negyókxa ektaha nak ekxátekhágwayam ekteme megkatsapma.