GÁLATAS 6:12 - Lengua Sur (Enxet) Nuevo Testamento

¹² Enxet'ák apkelyáteyeykegkoho nak cha'a kéxegke kóllának ma'a kélkahaso kélyenyekhamol'a egyempehek, hákho aptamhéyak xa apmenyék yepmenyéhok énxet'ák, yakwayam enxoho anhan megkólmenxenmakha eñama apkeltenneykha m'a apketsapma axta Cristo néten aksok ektegyéso.

GÁLATAS 6:12 Referans Kwoze

GÁLATAS 5:11

Ko'o nak se'e elyáxeg, elenxanakmók agkok makham ko'o seltémo kalanaxchek ma'a sẽlkahaso kélyenyekhamol'a egyempehek, meheyakmasha axta exaha ko'o énxet'ák judíos, hakte ektemék axta agkok ko'o xa, megkallókasek axta énxet'ák judíos ma'a amya'a ekxénamaxche nak Cristo kélyepetcheso axta aksok ektegyéso.

COLOSENSES 2:23

Máxa eykhe katnehek eñama enxoho ektémakxa nak negya'ásegwayam xa aksok nak, hakte kaltamhok cha'a antehek máxa ektakmela enxoho nentémakxa, kaltamhok nahan cha'a antehek máxa megkeymáxkoho egwáxok, kaltamhok nahan cha'a anlegásesagkohok negyókxa, yawanchek eyke kamagkok ma'a aksok ekyespagkamakxa nak negyókxa.

2 CORINTIOS 11:13

seykha amya'a apkelmopwancha'a amya'a eyke m'a, elyexanchesha nahan cha'a énxet'ák, exnésakpohok cha'a m'a Cristo seykha amya'a apagkok nak.

LOS HECHOS 15:1

Apkelwokmek axta nápakha énxet'ák Antioquía apkeleñama m'a Judea. Apkelxekmósek axta anhan ẽlyáxeg'a megkalepwagko axta elwagkasakpok teyp melánegko enxoho m'a eltémókxa nak antehek Moisés segánamakxa apagkok, cham'a sẽlkahaso kélyenyekhayol'a egyempehek.

GÁLATAS 2:3

Axta anhan kólyateyeykegkohok Tito elának kélkahaso kélyenyekhamol'a egyempehek, cham'a Tito aptaha nak Griego sekxegexma ko'o.

SAN LUCAS 16:15

Aptahak axta apkeláneya Jesús se'e: “Máxa cha'a kéltemék kéxegke ektakmela kéltémakxa nápakta'awo' énxet'ák, apya'ásegkok eyke Dios ektémakxa elchetamso kélwáxok kéxegke. Aksok apkenagkama nak katnahak ektakmela agko' énxet'ák, cháxa megkaleklama nak apwáxok Dios xa.

FILIPENSES 3:18

Hágkaxwe altennaksek kéxegke, eltennásekxók eyke makham yetlo sekwóno, hakte apxámok énxet aptaha apkenmexma m'a Cristo aksok ektegyéso apagkok nak,

FILIPENSES 2:4

Nágkólchetam aksa kélxakko' aksok yakwayam nak kapasmok kélxakko' kélxama enxoho, wánxa agkok, kólchetagkas nahan aksok yakwayam kapasmok ma'a kélnámokkok.

FILIPENSES 1:15

Nakso' nahan apkeltenneyncha'a nápakha énxet'ák amya'a eñama nak Cristo, eñama m'a apnathé nak pók, tén han eñama m'a apkelenmexamap nak, wánxa agkok, nápakha énxet akke apkeltennáha yetlo ektakmela elchetamso apwáxok.

GÁLATAS 6:13

Wánxa agkok, akke esawhomók nahan apkeláneyak eltémókxa antehek segánamakxa m'a énxet'ák ekha nak ma'a sẽlkahaso kélyenyekhamol'a egyempehek. Apmenyék cha'a kóllanagkok kéxegke sẽlkahaso kélyenyekhamol'a egyempehek xa énxet'ák nak, yakwayam enxoho kaleyxkohok apkelpeywa exének ektaha apkelyáteyeykegkoho kóllának kéxegke xa sẽlkahaso kélyenyekhamol'a egyempehek.

GÁLATAS 2:14

Xama axta sekwet'a ko'o melánegko m'a ektémakxal'a negyetlo tásek amya'a ekmámnaksoho nak, ektahak axta seyáneya Pedro nápakta'awo' énxet'ák nentémo xamo' magya'áseyam se'e: “Aptemék axta exchep máxa metnaha enxoho judío, xép aptaha nak judío; ¿yaksak ektaha apmoko nak xép elyáteyagkohok énxet'ák metnaha judíos, yakwayam etnahagkok ma'a apkeltémakxa nak énxet'ák judíos?”

2 CORINTIOS 10:12

Nakso' negko'o magmáheyo aghésaxkohok, esenhan agyetchesaxkohok ma'a énxet'ák eleymáxkohol'a apkelpakmeyesma exénakpekxohok apancha'awo'. Elyéháxma eyke aptamhágkok xa énxet'ák nak, hakte apkelyetsáteyak apancha'awo' aptamhágkok ma'a apkeltémakxa nak, cham'a aphésamo nak cha'a mók apkeltémakxa.

LOS HECHOS 15:5

Wánxa agkok, apchaknákxeyk axta néten nápakha fariseos ektaha axta apteme melya'áseyam. Aptahak axta anhan apkelpakmeta s'e: —Kéméxchek nahan anlanaksek sẽlkahaso kélyenyekhamol'a egyempehek ma'a énxet'ák metnaha nak judíos, kéméxchek nahan agának elának ma'a eltémókxa nak antehek Moisés segánamakxa apagkok.

SAN JUAN 7:18

Enxet ektahakxa enxoho apkeltenneykha m'a ektahakxa enxoho elchetamso apwáxok, eltennaha cha'a yakwayam enxoho katakmelek apxeyenma énxet; keñe m'a énxet apkeltémo nak katakmelek apxénamap ma'a ektaha axta apcháphaso, ekmámnaksoho cha'a katnehek apkeltenneykha xa, méko nahan katnehek xama aksok kélxéncháseykekxoho aptémakxa.

SAN LUCAS 20:47

elyementók nahan cha'a axanák ma'a kelán'ák tampe' nak, ahóxek nahan cha'a katnehek aptamhéyak nempeywa nelmaxnagko yakwayam ekpósek xa apkeltémakxa nak. Awanhek sat katnehek kéllegasáseykegkoho xa énxet'ák nak.”

SAN MATEO 23:28

Cháxa kéltémakxa nak kéxegke xa, máxa kóltehek ektakmela enxoho kéltémakxa nápakta'awo' énxet'ák, keñe kalánhok kélmeyókásamáxkoho kélagko' kéltémakxa m'a kañe' kélwáxok, tén han ma'a ekmaso nak kéltémakxa.

SAN MATEO 23:5

Exekmóshok nahan cha'a énxet'ák ma'a ekyókxoho aksok apkeláneyak nak. Apmenyék nahan keytek Dios appeywa kéltáxéso ekpayhakxa nápát, tén han ma'a apaktegák nak, apmenyék nahan elyáncheshok elmakheykha napwa'ék apkelántaxno.

SAN MATEO 6:16

“Agkok kóltáwak kélto kélpeykáso Dios, nágkayakhapmakha aksa kélwáxok, nágkólteme aksa aptamheykegkaxal'a énxet'ák apkelmeyókásamákpohol'a apancha'awók apkeltémakxa, máxa katnehek ma'a elyakhápencha'a enxoho apwáxók yakwayam enxoho étak énxet'ák apkelpeykáso Dios yetlo metéyak aptéyak. Apkelxawágkek aksok apkelxawé naksa eñama aptamhéyak xa. Nakso' xa sektahakxa nak seláneya kéxegke.

SAN MATEO 6:2

“Kélpasmeyk agkok kéxegke m'a énxet'ák ekha nak eyéméxchexa aksok, nágkóltekkesha aksa amya'a ekyókxoho yókxexma, nágkólteme apkeltémakxal'a énxet'ák apkelmeyókásamákpohol'a apkeltémakxa, cham'a apchakneykekxexa nak judíos tén han ma'a ámay nepyeseksa tegma apwányam nak, yakwayam enxoho katakmelek apkelxénamap xa énxet'ák nak. Apkelxakék aksok apkelxawé naksa eñama aptamhéyak xa. Nakso' xa sektahakxa nak seláneya kéxegke.

SAN MATEO 6:5

“Kéltemék agkok kéxegke nempeywa nelmaxnagko, nágkólteme aksa m'a aptamheykegkaxa nak énxet'ák apkelmeyókásamákpoho nak apancha'awók apkeltémakxa, cham'a apmáheyol'a etnamha kañe' apchakneykekxexa judíos aptaha enxoho nempeywa nelmaxnagko, tén han etnegwók ma'a máseyak yókxexma apheykegkaxal'a énxet'ák, yakwayam enxoho kataxchek aptahakxa. Apkelxakék aksok apkelxawé naksa eñama aptamhéyak xa. Nakso' xa sektahakxa nak sekpeywa seláneya kéxegke.

SAN MATEO 5:10

“Kéleñémo agko' kéxegke kéltaha nak kéllegeykegkoho kélmenxeneykha eñama kéllané m'a apkeltémókxa nak kóltehek Dios, hakte kéxegke kéltaha kéleñama m'a aptémakxa nak Wese' apwányam Dios.

SAN MATEO 23:27

“¡Kéxegkel'aye kéltaha nak kélxekmóso kélnámokkok ektémakxa segánamakxa, tén han kéxegke kéltaha nak fariseos, kéltaha nak kélmeyókásamáxkoho kélagko' kéltémakxa!, hakte máxa kéxegke tegma apketkók takhaxpop kélmópesamol'a, aptásek katnehek apyempe'ék, keñe m'a kañe', kalánhok apexchakkok ma'a ektaha nak apkeletsapma, tén han ma'a ekyókxoho ektémakxa nak ektahapma.