GÁLATAS 5:13 - Lengua Sur (Enxet) Nuevo Testamento

¹³ Elyáxeg kélwóneyha axta kéxegke yakwayam enxoho megkóltemésesek máxa kélmomaxche. Wánxa agkok, nágkólásenneykxa aksa kéxegke xa kélteme nak máxa megkólmomaxche, yakwayam kólyeykhasaxkohok kóllának ma'a aksok ekyespagko nak kélyókxa. Akke tásek kóltehek kéxegke m'a kélpasmomáxkoho nak eñama kélásekhayo.

GÁLATAS 5:13 Referans Kwoze

1 SAN PEDRO 2:16

Kólteme kéltémakxa m'a apkeltémakxa nak énxet'ák ektaha nak melmomap, nágkóláseneykxa aksa kéxegke m'a ektémakxa nak kélmowána kóllának kélmokókxa enxoho kóllána', yakwayam kóltegyaha yakwánxa kóltehek kóllának aksok ekmaso, akke tásek kóltehek ma'a apkeltémakxa nak Dios apkelásenneykha.

1 CORINTIOS 9:19

Mehetnesásak eykhe ko'o sekmomaxche xama énxet enxoho, ektemesásexkók ahagko' eyke ko'o máxa sekmomaxche nápakta'awo' apyókxoho énxet'ák, yakwayam enxoho axámásekxak énxet apteme mey'áseyam Cristo.

1 CORINTIOS 8:9

Nágkólho aksa kalanaksek melya'asáxma énxet'ák elyelkamáxkoho apteme melya'áseyam xa kélmowána nak kóllának kéxegke kélmokókxa enxoho kóllának.

GÁLATAS 5:14

Hakte keso ektaha nak eksawhomo ekyókxoho ektémakxa nak eknaktáxésamaxche segánamakxa s'e: “Yásekhoho pók, ekhawo ektémakxa nak apchásekhamakpoho apagko' xép.”

EFESIOS 5:21

Kólteme cha'a kélyaheykekxoho kélmók eñama m'a kélteme nak kéláyo Cristo.

GÁLATAS 6:2

kólpasmaxkoho cha'a kéxegke yakwayam enxoho kólenmaxaxkohok ma'a ektémakxa nak ekyentaxnamo kélha, kéltemék agkok xa, kóllának ma'a eltémókxa nak antehek Cristo segánamakxa apagkok.

SAN JUDAS 1:4

Apkelyexancháseykha keñamak apkelyexamakpoho appáxakwaya kéxegke nápakha énxet apkelmopwána amya'a nak, cham'a ekxeyenma nak eknaktáxésamaxche nano' axta, yakwayam kóllegásesagkohok xa énxet'ák nak. Sagcha'ak apkeltémakxa xa, apmeykha nahan cha'a m'a ektémakxa nak Dios segásekhayo apkeláneykegko m'a apkelyeykhásamákpoho nak apkeltémakxa ekmaso, mexeyenmak nahan cha'a apwesey m'a Jesucristo aptaha nak wánxa xama Wese' egegkok.

2 SAN PEDRO 2:19

Eltennaksek cha'a kéxegke kélewagko kóllának kélmokókxa enxoho kóllának xa énxet'ák nak, kelmomchek eyke anhan apwáxók aksok apkelyespagkamakxa xa énxet'ák nak, cham'a apkeltémakxa segmaséseykmohol'a; apyókxoho énxet cha'a kamok apwáxok ma'a aksok ekmomakxa enxoho apwáxok.

2 CORINTIOS 4:5

Manxénáxchekxohok cha'a negko'o egagko' neltenneyncha'a, wánxa cha'a nenxéna m'a Jesucristo aptaha nak Wese' egegkok; nenxénchek eyke cha'a negko'o nentaha sẽlásenneykha kéxegke eñama negásekhayo m'a Jesús.

LOS HECHOS 20:35

Alxekmóshok axta cha'a kéxegke eyéméxko antehek nentamheykha xa, ampasmok ma'a énxet'ák ekha nak eyéméxchexa aksok yetlo ekxeyenma egwáxok aptémakxa axta appeywa Wese' egegkok Jesús se'e: ‘Kapayhekxak cha'a egwáxok negmésa enxoho aksok egmók, kaxnók ma'a nenxawé nak aksok.’ ”

GÁLATAS 5:22

Akke ektaha nak aptekkeso Espíritu s'e: nelásekhamaxkoho, ekpayheykekxa egwáxok, meyke ektahakxa egwáxok, mampekhésamaxche, negapeykha egmók, ektakmeleykha egwáxok, mantemeseseykmohoxma egmók,

SAN LUCAS 4:18

“Wese' egegkok Espíritu apagkok ko'o sekxegexma, hakte epagkanchek axta ko'o yakwayam asókasek amya'a ektakmela m'a énxet'ák meyke nak aksok apagkok; Elaphásek nahan ko'o yakwayam altennaksek kélchexeykxo m'a énxet apkelmomap nak, tén han óteyásekxaxma m'a énxet'ák meyke apakta'ák nak; keñe anhan akxeykxak ma'a énxet'ák kélnaktawáseykegkoho nak;

GÁLATAS 4:22

Xeyenmék axta segánamakxa apwetaya apkánet apketchek Abraham: xama sakcha'a axta étche m'a kelán'a ektaha axta ekmomaxche keñe axta pók sakcha'a étche m'a kelán'a ektaha axta aptáwa apagko' Abraham, ektaha axta anhan megkamomaxche.

1 TESALONICENSES 1:3

Mehẽlwagkágwokmok cha'a negko'o ekxeyenma egwáxok kéxegke nápakto' Dios Egyap, cham'a kéltamheykencha'a nak yetlo ekyawe agko' megkólya'áseyam neyseksók kéltamheykha, tén han kéltamheykencha'a yetlo ekyawe agko' kélásekhayo, mehẽlwagkágweykmok nahan ektémakxa nak ekpasmo yakwayam kólenmaxaxkohok kéllegeykegkoho yetlo kélwaskápeykekxoho m'a kélhaxneykha nak Wese' egegkok Jesucristo.

2 CORINTIOS 12:15

Mamyágwakxék sat amha ko'o m'a ekyókxoho aksok ekyetna nak ko'o, kawomhok sat nahan sekyamasma sekyókxoho, yakwayam apasmok kéxegke. ¿Kasextegwóya sat selásekhayo kéxegke m'a ekyágwokmoho enxoho selásekhayo ko'o kéxegke?

2 CORINTIOS 3:17

Hakte Wese' egegkok apteme Espíritu; keytek nahan segyenyeykekxa ekyókxoho aksok ma'a aphakxa enxoho Espíritu apkeñama nak Wese' egegkok.

GÁLATAS 2:4

Nápakha megkatnaha ekmámnaksoho ẽlyáxeg axta eyke apkelyexákpohok sempáxakwa'a negko'o, yakwayam elyexakpohok etyánegwohok ektémakxa nak negko'o negkegwagkexa antehek eñama Cristo Jesús, apmenyék axta anhan hentemesásekxak negko'o nelyaheykekxoho segánamakxa, ektémol'a negmomaxche.

GÁLATAS 5:1

Egmések axta negko'o Cristo yakwayam hẽlchexeykxa' nentéma axta máxa nelmomaxche, yakwayam enxoho antehek mólmomaxche. Ekeso eñamakxa seltamho nak ko'o kólwaskápekxohok kéxegke kólmeyók xa kéltemésesama nak kaxwo' megkólmomaxche, nágkóltemekxa makham kéxegke máxa kélmomaxche.

2 CORINTIOS 2:8

Ekeso eñamakxa seltamho nak kóxekmowásekxohok kélásekhayo kéxegke xa énxet nak.