GÁLATAS 4:19 - Lengua Sur (Enxet) Nuevo Testamento

¹⁹ Etchek ahancha'awo nak, eklegágkok makham ko'o ekmáske, ektémol'a kañegkohok kelán'a amonye ektegkeso étche, alenxanmohok sat ko'o seklegeykegkoho ekwokmoho kélhágwákxoho kéxegke Cristo.

GÁLATAS 4:19 Referans Kwoze

ROMANOS 8:29

Apkelpagkanchek axta Dios ma'a énxet'ák ektaha axta apkelyekpelchémo nano' axta, yakwayam enxoho exnágwakxohok ma'a Apketche, yakwayam enxoho etnehek apwányam nepyeseksa apkelyáxeg ma'a Apketche.

EFESIOS 4:13

ekwokmoho nentaha meyke nelexpanchásamáxche eñama m'a magya'áseyam nak, tén han eñama m'a negyekpelchágwayam nak Dios Apketche. Keñe sat keynnakwók negko'o nenteme magya'áseyam, aghágwakxohok agko' sat ma'a aptémakxa nak Cristo.

ROMANOS 13:14

Kólteme kélahakkásamáxche Wese' egegkok Jesucristo, nágkóllána kaxwo' ma'a ektémakxa nak aksok ekmaso ekyespagko negyókxa.

EFESIOS 4:24

kóltemekxa nahan kéxegke axnagkok kéltémakxa ektémol'a antaxnekxak nentaxno aphaxnagkok, cham'a elánamáxche nak eñama Dios apmopmenyého, cham'a ekwetamaxkohol'a anhan nentaha nentémakxa ekpéwomo, tén han nentémakxa eyáxñeyo eñama m'a amya'a ekmámnaksoho eñama nak Dios.

COLOSENSES 4:12

Apcháphásesek nahan ekxeyenma apwáxok ma'a Epafras, aptaha nak han Cristo Jesús apkeláneykha; aptaha nak nahan apkeñama kélnepyeseksa kéxegke. Elmaxnéseshok nahan cha'a kéxegke, yakwayam enxoho keynnakwók kélteme megkólya'áseyam, tén han kólméshok agko' kélwáxok yakwayam kóllának ma'a Dios apmopmenyého nak.

COLOSENSES 3:10

kéltemék kéxegke axnagkok kéltémakxa nentémol'a antaxnekxak nentaxno aphaxnagkok: cham'a axnagkok nentémakxa nak, aptemesásegko nak cha'a axnagkok Dios, yakwayam kaxnágwakxohok ma'a aptémakxa nak, ektaha axta anhan apkelané, yakwayam enxoho agya'ásegwomhok ektakmela agko' ma'a aptémakxa nak Dios.

FILIPENSES 2:5

Katne kéxegkáxa elchetamso kélwáxok ma'a ektémakxa axta elchetamso apwáxok Cristo Jesús.

SANTIAGO 1:18

Egmések axta negko'o Dios ekyennakte egnenyek eñama m'a amya'a apagkok ektaha nak ekmámnaksoho, cháxa apkepmenyého axta Dios hegmések negko'o xa, yakwayam enxoho antehek negko'o máxa émha amonye ekyexna kélpagkanchesamol'a Dios, neyseksa m'a aksok apkelané axta Dios.

FILEMÓN 1:10

Eltamhok ko'o epasmok xép Onésimo, aptaha nak máxa hatte eñama nentémo xamo' magya'áseyam Wese' egegkok neyseksa sekha ko'o s'e sẽlpextétamakxa.

COLOSENSES 1:27

Apmenyék axta Dios elyekpelchásesók ma'a ektaha nak énxet'ák apagkok, cham'a ekwánxa nak ekxámokma aksok eltakmela apagkok, cham'a ektemésesama axta cha'a ekpowásamáxkoho énxet'ák metnaha nak judíos. Apheyk kélwáxok kéxegke Cristo, cháxa megkólya'áseykegko axta kéxegke xa, aptaha nak han eñamakxa nelhaxneykha m'a negeymáxkoho peya nak anxawak.

COLOSENSES 2:1

Eltamhok ko'o kólya'ásegwomhok selenxanakmoho sektamheykha ekyentaxno agko' yakwayam apasmok kéxegke, tén han ma'a énxet'ák apheykha nak tegma apwányam Laodicea, tén han ma'a apyókxoho énxet mehetaya nak makham sekyókxoho.

FILIPENSES 2:17

Kayegkenaxchek eykhe ko'o éma ahagkok yakwayam kasawhaxkohok ma'a ektémakxa nak kéxegke kélméso aksok Dios eñama m'a megkólya'áseyam nak, kapayhekxak akke aksa ko'o ewáxok, kawakxohok nahan kélyókxoho kéxegke ektahakxa enxoho ekpayheykekxa ewáxok ko'o.

FILIPENSES 1:8

Hakte apya'ásegkok Dios ekwánxa nak ko'o sekmámenyého alwetekxak kélyókxoho kéxegke, eñama aptekkeso ewáxok seyásekhayo m'a Jesucristo.

1 SAN JUAN 5:21

Etchek selásekhayo nak, kólawho sat kéxegke m'a kéleykmáseso megkamámnaksoho kélheyáseykegkoho nak dios.

1 SAN JUAN 2:12

Kélketchek, kéxegke ektáxesásak se'e weykcha'áhak nak, hakte axta eyakmagkásekxak Dios ektémakxa megkólya'asáxma eñama m'a ektahakxa axta aksok apkelané Jesucristo.

1 SAN JUAN 2:1

Etchek selásekhayo nak, ektahak ko'o sektáxéseso kéxegke xa ektaha nak, yakwayam enxoho megkóllanyek megkólya'asáxma. Apkelanak agkok mey'asáxma enxama, yetneyk eyke negko'o énxet negásenneykekxa apwesey Jesucristo, aptaha nak appéwomo, yakwayam henlánekxések nápakto' ma'a Dios Egyap.

HEBREOS 5:7

Ennaktéshok axta cha'a appeywa Cristo neyseksa apha axta keso náxop, yetlo apwóno axta anhan cha'a etnehek nempeywa nelmaxnagko ewónmakha Dios, aptaha nak apmopwána emyók emátog, aplegayók axta cha'a Dios xa, hakte apkelyaheykekxoho axta eghak Jesús.

TITO 1:4

Tito, ektáxésesek xép se'e weykcha'áhak nak, xép aptaha nak ekmámnaksoho hatte eñama s'e ektémakxa nak nenteme magya'áseyam egkánet nak. Emenyék ko'o etnehek apméso naksa Dios Egyap, tén han Jesucristo segwagkasamo nak teyp ma'a ektémakxa nak segemleykekxoho, tén han ma'a meyke ektahakxa apwáxok xép.

FILEMÓN 1:19

Ko'o Pablo, ko'o ahagko' sektáxéso s'e weykcha'áhak nak, ko'o sat ayánmagkasek. Ewanchek eykhe ko'o altennásekxohok ekyetna seméyak xép, cham'a sekyakmagkasesama axta apwáxok.

1 TIMOTEO 1:2

Timoteo, ektáxésesek xép se'e weykcha'áhak nak, aptaha nak máxa hatte eñama sektémo xamo' may'áseyam. Emenyék ko'o etnehek apméso naksa exchep Dios Egyap, tén han Cristo Jesús ma'a ektémakxa nak segemleykekxoho, tén han egkések ma'a ektémakxa nak ektakmeleykha apwáxok henlano', tén han keytek xép ma'a meyke ektahakxa egwáxok eñama nak Dios.

SAN LUCAS 22:44

Apwaskápekxók axta aptaha nempeywa nelmaxnagko Jesús neyseksa ekyawe aplegeykegkoho, kelsekkenánteyk axta apyemes, máxa axta entahak ma'a ektémol'a kasekkenek éma náxop.

2 CORINTIOS 12:14

Ekpenchesek ko'o selaneykekxa sektahakxa yakwayam katnehek antanxo sekteme meyk'a kéxegke, malmaxneyhek sat nahan yakwayam helpasmok kéxegke. Mategyáha ko'o m'a aksok kélagkok ekyetna nak kéxegke, kéxegke eyke elchetámak; hakte kéméxchek cha'a yanchesásekxak selyakye apketchek ma'a énxet'ák ekha nak apketchek, háwe eyke kélketchek yakwayam yanchesásekxak selyakye m'a apyepmeyk.

1 TESALONICENSES 2:7

Egwanchek axta eykhe agyennaktésaxkohok negko'o agásenneykxa ma'a ektémakxa nak sẽlyaheykekxoho, nenteme nak Cristo seykha amya'a apagkok, wánxa agkok, negheyásexkók axta eyke sakcha'a kélnepyeseksa kéxegke, negheyásexkók axta nahan ma'a ektémakxal'a kelán'a éktegkeso étchek, cham'a kelán'a eltakmelchesol'a étchek,

3 SAN JUAN 1:4

Awanhok agko' ko'o ekpayheykekxa ewáxok sekleg'a amya'a apkelenxanakmoho apkelané amya'a ekmámnaksoho m'a sektéma nak étchek eñama sektémo xamo' may'áseyam.