GÁLATAS 3:17 - Lengua Sur (Enxet) Nuevo Testamento

¹⁷ Akke ko'o ekxénak se'e: apkelanak axta Dios ekhémo mók apkelpakhetchásamákpoho Abraham, ekmámnaksoho axta anhan aptemesásak. Ekeso eñamakxa megkawagko axta Moisés segánamakxa apagkok kamaseksek xa ekhémo mók apkelpakhetchásamákpoho nak, cham'a ektaha axta ekwé cuatro cientos treinta apyeyam natámen xa, yawanchek axta anhan katnésásekxak mékoho m'a appekkeneykekxa axta appeywa Dios.

GÁLATAS 3:17 Referans Kwoze

2 CORINTIOS 1:20

Cristo nahan keñamak eksawhomáxkoho ektéma m'a apxeyenma axta elának Dios. Ekeso eñamakxa nentéma nak cha'a nempeywa neltemésesa enxoho apcheymákpoho Dios se'e: “Katnahagkok sat” eñama m'a Cristo Jesús.

ROMANOS 3:3

¿Háxko katnehek apyensakmo enxoho apkelyetlo Dios nápakha xa énxet'ák nak? ¿Ekxak enxeykel'a Dios eñama aptamhéyak xa?

COLOSENSES 2:4

Eltennásek ko'o kéxegke xa, yakwayam enxoho megkalyexanchesha kéxegke m'a amya'a senlekweykmoho nak.

GÁLATAS 5:4

Kéxegke kélmámenyého nak exének Dios kéltaha kélpéwomo eñama kéllané m'a eltémókxa nak antehek segánamakxa, massék kéltaha kélyepetcheyo Cristo, kélyenyókek nahan kéxegke m'a memyagweykekxa nak segméso Dios ma'a segásekhayo nak.

GÁLATAS 3:15

Elyáxeg peyk ko'o altennaksek kéxegke m'a aptémakxal'a énxet: Apkelanak agkok xama énxet ma'a ekhémo nak mók apkelpakhetchásamákpoho, keñe epekkenek apwesey m'a weykcha'áhak, méko kawának kaxének ektaha mékoho xa, méko nahan kawának katáxesekxohok mók aksok.

1 CORINTIOS 1:17

Hakte axta heyaphásak ko'o Cristo yakwayam ayakpásesagkok yegmen énxet, wánxa axta aksa apkeltamho altennaha m'a ektémakxa nak amya'a nelmeyamáxche, háwe eyke yetlo m'a negya'ásegwayam eñama nak keso náxop, yakwayam enxoho megkamassegwomek ma'a ektémakxa nak ekmowána apketsapma axta Cristo néten aksok ektegyéso.

SAN JUAN 1:17

Moisés axta keñamak ekteyapma m'a segánamakxa, Cristo axta eyke keñamak segweyktámho negko'o m'a segásekhayo tén han ma'a ekmámnaksoho nak.

1 SAN PEDRO 1:20

Nano' axta kélpagkancheso Cristo katnehek xa ektaha nak, cham'a amonye axta elánamáxche keso náxop, wánxa agkok apwa'ak axta eyke Cristo keso negwánxa nak, eyágketexa nak ektemegwánxa néxa, yakwayam epasmok kéxegke.

HEBREOS 11:13

Apsawhomakpók axta apkeletsapma xa énxet'ák nak neyseksa melxaweyák ma'a aksok apxeyenma axta egkések Dios; nano' axta eyke apkelya'áseyak ekmáheyo katnehek ma'a ektémakxa axta appekkencháseykekxa appeywa Dios eñama m'a melya'áseyam axta, leklamók axta apwáxók xa, apkelyekpelchágweykmoho apancha'awo' axta aptamheykegkok aptaha apkelwé yakwatakxoho keso náxop, megkatnahakxa nak apkeleñémekxa.

HEBREOS 7:18

Kélmaseseykmek axta eyke m'a eltémókxa axta antehek Moisés segánamakxa apagkok, kélmeykencha'a axta cha'a nano' axta, momók agko' axta m'a, mékoho axta anhan,

EFESIOS 4:17

Elpakhetchesek ko'o kéxegke yetlo sekxeyenma Wese' egegkok apwesey, eltamhok ko'o megkóltemekxak makham ma'a apkeltémakxa nak énxet'ák melya'áseyak nak Dios, apkelyetleykekxo nak ma'a ektémakxa nak elchetamso apwáxók ektaha nak mékoho,

GÁLATAS 3:21

¿Kenmexmeya eltémókxa antehek segánamakxa m'a appekkeneykekxa axta appeywa Dios? ¡Ma', megkanmexmak! Awanchek axta agkok segánamakxa hegmések negyennakte, apwanchek axta anhan exének Dios aptaha appéwomo enxama eñama apkelané m'a eltémókxa nak antehek segánamakxa.

2 CORINTIOS 9:6

Kaxénwakxohok kélwáxok se'e. Enxet ektahakxa enxoho antawók apkeneykekxa aksok, antawók nahan katnehek apnakxo ekyexna. Enxet ektahakxa enxoho ekxámokma apkeneykekxa aksok, xámok nahan katnehek apnakxo ekyexna.

1 CORINTIOS 10:19

Akke ko'o axénak aksok kéleykmáseso ektaha ekha ekmowána sektaha sekpeywa xa; maltennásak ko'o ektaha ektakmela agko' ma'a ápetek kélmésol'a kéleykmáseso, keñe megkaxók ma'a mók ápetek nak, hawók mók.

1 CORINTIOS 7:29

Elyáxeg, akke eltamhok altennaksek kéxegke s'e: Yakwátegwokmek kaxwo' negheykha, ékeso eñamakxa seltamho nak kóltehek máxa meyke kéltáwa;

1 CORINTIOS 1:12

Eyke ekmokók ko'o altennaksek kéxegke kéltéma cha'a kélpeywa kélnápakha s'e: “ko'o sekteme Pablo apkelxekmóso”; keñe nápakha etnehek cha'a apkelpeywa s'e: “ko'o eyke sekteme Apolos apkelxekmóso”; keñe etnehek nahan cha'a nápakha s'e: “ko'o eyke sekteme Pedro apkelxekmóso”; keñe etnehek nahan nápakha apkelpeywa s'e: “ko'o eyke sekteme Cristo apkelxekmóso”.

ROMANOS 3:25

Aptemésesek axta Dios Cristo yakwayam etnehek apmaseso mólya'asáxma, cham'a apyegkena axta éma apagkok, hegwetaksohok cha'a megkólyakmagkáseykekxa nentémakxa mólya'asáxma xa, eñama m'a magya'áseyam nak. Enxekmósek axta Dios ektaha ekpéwomo aptémakxa, cham'a apkelana axta xa, metnésesamók axta cha'axma Dios énxet'ák apkeláneyak melya'asáxma nano' axta,

LOS HECHOS 7:6

Apxeyenmék axta anhan Dios peya etnahagkok Abraham aptawan'ák neptámen máxa pók énxet'ák apkekhegwayam megkatnahakxa xóp apagkok, tén han apxeyenma peya etnahagkok apkelmomap, tén han apxeyenma peya kólnaktawasagkohok ekweykmoho cuatrocientos apyeyam.

GÁLATAS 5:16

Ekeso eñamakxa sektaha nak seláneya kéxegke s'e: kólho kéxegke etnehek appeykesáseyak Espíritu, nágkóltegyaha cha'a yakwayam kagkések ekpayheykekxa kélwáxok ma'a aksok ekmaso kélyespagko nak.

EFESIOS 2:12

kaxénwakxoho kélwáxok kélheykencha'a axta kéxegke meyke Cristo nano' axta, axta kólpáxakxók kéxegke énxet'ák Israel, axta nahan kaweykekxohok kéxegke m'a ekhémo mók nelpakhetchásamáxkoho Dios nak, axta nahan kaweykekxohok kéxegke m'a sempekkencháseykekxa axta appeywa Dios. Kélheykha axta kéxegke keso náxop meyke Dios, tén han meyke elhaxneykha kélwáxok.