GÁLATAS 3:14 - Lengua Sur (Enxet) Nuevo Testamento

¹⁴ Temegkek axta xa, yakwayam enxoho kawakxohok apméso Dios aksok eltakmela eleñama néten ma'a énxet'ák metnaha nak judíos, eñama m'a Cristo Jesús, cham'a apkeltennasama axta Dios Abraham apmáheyo elána' xa; yakwayam enxoho nahan anxawak negko'o Espíritu apxeyenma axta hegmések Dios, eñama m'a magya'áseyam nak.

GÁLATAS 3:14 Referans Kwoze

1 CORINTIOS 12:13

Hawók nahan sentémakxa nak negyókxoho xa, ẽlyakpasásegkek axta yegmen yakwayam antemekxak xama negyókxa eñama apmopwána m'a aptaha nak apwánxa xama Espíritu, megkeyxek ma'a nenteme nak judíos tén han ma'a metnaha nak judíos, tén han ma'a nenteme nak negmomaxche esenhan ma'a magmomaxche nak; negyókxoho axta nenxakak yakwayam exek egwáxok xa Espíritu nak, ektémol'a agyenek ma'a negyamol'a.

EFESIOS 2:18

Cristo nahan keñamak negkegwagko negko'o antehek negyepetcheyo Dios Egyap negyókxoho nak, judíos tén han ma'a énxet'ák metnaha nak judíos, eñama m'a aptaha nak apwánxa xama Espíritu.

GÁLATAS 3:2

Wánxa aksa eltamhok ko'o helátegmowagkok sektahakxa nak selmaxneyeykha s'e: ¿Kélxawáyaya axta kéxegke Espíritu apkeñama Dios, eñama kélyaheykekxoho m'a eltémókxa nak antehek segánamakxa, enxeykel'a keñamak ma'a kélteme nak megkólya'áseyam tásek amya'a kélleg'a axta?

LOS HECHOS 2:33

Egmések axta negko'o Espíritu Santo, cham'a natámen apya'áseykekxa axta néten Dios ma'a Jesús, tén han ma'a aphésakxo axta ekpayhókxa nak apkelya'asamakxa, tén han ma'a natámen axta apméso Apyap Espíritu apxeyenma axta hegmések negko'o xa. Cháxa kélwetaya nak kéxegke, tén han ma'a kéllegaya nak.

1 SAN PEDRO 1:22

Kaxwo' eyke kéltemék kéxegke eyáxñeyo kélwáxok, yakwayam enxoho kólásekhohok ekmámnaksoho agko' ma'a ẽlyáxeg nentémo xamo' nak magya'áseyam, cham'a kélyahákxoho axta kéxegke amya'a ekmámnaksoho nak. Kéméxchek kéxegke kóltehek ekmámnaksoho kélásekhamaxkoho ekweykmoho kañók agko' kélwáxok.

SAN JUAN 7:39

Axta apxénak Jesús ma'a énxet ektahakxa enxoho apteme mey'áseyam peya exkak Espíritu, hakte axta eweyk makham Espíritu. Axta anhan kóltemésesók apcheymákpoho Jesús ma'a.

EFESIOS 4:30

Nágkóllapwagkas aksa Espíritu Santo apkeñama nak Dios, cham'a kélkahásamáxko nak kéxegke yakwayam enxoho kólyekpelchaxkohok kélteme nak Dios énxet'ák apagkok, cham'a ekwa'a sat ekhem yakwánxa hẽlwagkasek teyp.

EFESIOS 3:16

Elmaxnakkek ko'o Dios Egyap seltamho epekkenchesek kélwáxok kéxegke kélmowána, tén han ma'a kélwaskápeykekxoho eñama nak apméso Espíritu apkeñama nak Dios, eleñama nak ma'a ekheykegkaxa nak ekxámokma agko' aksok apagkok eltakmela eleñama nak néten.

EFESIOS 2:22

Ekhawo ektémakxa nak han kéxegkáxa, Cristo kélyepetcheyo keñamak kéltaha kélyepetcheykekxa kélmók, yakwayam enxoho kóltehek tegma appagkanamap aphamakxa Dios eñama m'a Espíritu apagkok nak.

GÁLATAS 4:6

Apcháphásek axta Dios Apketche Espíritu apagkok kañe' egwáxok negko'o, hakte nentemék negko'o kaxwo' Dios apketchek; etnehek nahan cha'a Espíritu ewónmakha s'e: “¡Táta!”

GÁLATAS 3:16

Appekkencháseykxek axta appeywa Dios Abraham tén han ma'a aptáwen neptámen. Megkaxeyenmak eknaktáxésamaxche “aptawan'ák neptámen” apxámokma enxoho, xama akke aksa xeyenmak; temék ekpeywa s'e: “xép aptáwen neptámen”, cham'a Cristo.

2 CORINTIOS 1:22

Ẽlkahásek axta anhan negko'o m'a apkelkahaso nak, empekkenchesek axta negko'o egwáxok Espíritu Santo, yakwayam katnehek nakso' nenxawé aksok peya nak anxawa'.

LOS HECHOS 5:32

Negko'o nentaha negweteykegkoho xa, Espíritu Santo nahan apteme apweteykegkoho, cham'a apmésa axta Dios énxet'ák ektaha axta apkelyaheykekxoho.

LOS HECHOS 4:12

Méko pók énxet ekyetna m'a nelwagkásamáxche teyp nak, hakte axta hegmeyásak negko'o Dios pók énxet yakwayam hẽlwagkasek teyp keso náxop.

SAN LUCAS 24:49

Wáphásesek sat kéxegke m'a apxeyenma axta egkések kéxegke Táta. Kólhakha sat kéxegke s'e tegma apwányam Jerusalén ekwokmoho kélxaka kélmowána eñama nak néten.

SAN LUCAS 11:13

Kélya'ásegkok agkok kélméso aksok eltakmela kélketchek, kéxegke kéltaha nak ekmaso kéltémakxa, ¡eyagwánxa agkok apmopwána egkések Espíritu Santo énxet ektahakxa enxoho apkelmaxnagko m'a Kélyap apha nak néten!

1 SAN PEDRO 3:9

Nágkólhésho cha'a mók kéltemésesakxa ekmaso, nágkólhésho nahan mók ma'a kélwanyencha'a enxoho, wánxa agkok kólmaxnéses aksa yakwayam enxoho epasmok Dios, hakte apkelwóneyha axta kéxegke Dios yakwayam kólxawak aksok eltakmela eleñama néten.