GÁLATAS 2:16 - Lengua Sur (Enxet) Nuevo Testamento

¹⁶ Wánxa agkok, negya'ásegkók eyke negko'o mexeyenma cha'a Dios aptaha appéwomo xama énxet eñama apkelané m'a eltémókxa nak antehek segánamakxa, magya'áseyam Jesucristo akke keñamak senxeyenma negko'o Dios nentaha nelpéwomo. Cháxa keñamak nentéma nak han negko'o xa magya'áseyam Jesucristo xa, yakwayam enxoho henxének negko'o Dios nentaha nelpéwomo eñama m'a magya'áseyam nak, háwe eñama m'a nenlané nak eltémókxa antehek segánamakxa. Hakte méko xama énxet yakwayam exének Dios aptaha appéwomo eñama apkelané m'a eltémókxa nak antehek segánamakxa.

GÁLATAS 2:16 Referans Kwoze

FILIPENSES 3:9

tén han atnehek sekyepetcheyo. Maktámak ko'o yakwayam hexének Dios sektaha sekpéwomo eñama selyaheykekxoho m'a eltémókxa nak antehek segánamakxa, wánxa agkok emenyék ko'o hexének Dios sektaha sekpéwomo eñama sekteme may'áseyam ma'a Cristo; cham'a ektémakxa nak senteméseso nempéwomo Dios eñama magya'áseyam.

ROMANOS 9:30

¿Háxko sat kaxwo' antehek nempeywa anxének xa? Apxénchek axta Dios aptaha apkelpéwomo m'a énxet'ák metnaha nak judíos eñama apteme melya'áseyam, cham'a mektamsama axta nentémakxa ekpéwomo.

1 SAN PEDRO 3:18

Hakte apketsekkek axta anhan Cristo eñama m'a ektémakxa nak negko'o mólya'asáxma, wánxa nahan xama apketsapma, meyke teyp. Tásek axta aptémakxa Cristo, wánxa agkok, aplegágkok axta eyke aptaha segyanmaga negko'o nenteme nak ekmaso nentémakxa, yakwayam enxoho enaklakxak kéxegke m'a aphamakxa nak Dios. Apketsekkek axta ekhawo ektémakxal'a ótsapok nenteme nak énxet, wánxa agkok apxátekhágwokmek axta eyke eñama apteme apkeñamakxa apagko' ma'a néten.

ROMANOS 4:2

Aptemésesek axta agkok appéwomo Dios Abraham eñama m'a aksok apkelané axta, keytek axta yakwánxa etnehek keyxkohok appeywa Abraham, háwe eyke m'a nápakto' Dios.

1 SAN PEDRO 2:24

Appata apagko' axta aptahak Cristo mólya'asáxma cham'a ekyetlóko axta apkexnákpo axta néten aksok ektegyéso, yakwayam enxoho kamaskok nénmexo negko'o m'a ektémakxa nak mólya'asáxma ektémol'a ótsapok, yakwayam enxoho antehek nentémakxa ekpéwomo. Kélyensasegkek axta Cristo yakwayam enxoho kóltakmelwók kéxegke.

ROMANOS 8:3

Hakte apkelanak axta Dios ma'a megkawagko axta kalána' Moisés segánamakxa apagkok, yawanchek axta kalána' segánamakxa xa, eñama m'a ektémakxa nak melya'asáxma énxet'ák. Apcháphásek axta Apketche Dios apheyásamákpoho m'a énxet'ák ekha nak melya'asáxma, yakwayam etnehek apyanmaga m'a ektémakxa nak mólya'asáxma, yakwayam enxoho nahan kólmasesók ma'a ektémakxa nak mólya'asáxma, cham'a, ektémakxa nak ekyetno mey'asáxma énxet.

ROMANOS 3:30

hakte Dios aptaha apwánxa xama; cham'a Dios apxeyenmol'a aptaha apkelpéwomo énxet'ák apteme nak melya'áseyam, meyke apkelanyo m'a ekha nak kélkahaso esenhan ma'a meyke nak kélkahaso.

ROMANOS 1:17

Hakte cháxa amya'a senxekmósama nak negko'o ektémakxa apmasésama Dios ma'a ektémakxa nak nelsexnánémaxche: eñama m'a magya'áseyam nak, wánxa aksa m'a magya'áseyam nak. Hakte temék eknaktáxésamaxche s'e: “Etak sat ekyennakte apnenyek énxet apteme nak appéwomo eñama mey'áseyam.”

1 SAN JUAN 1:7

Negheyk agkok negko'o neyseksa elseyexma, ekhawo m'a ektémakxa nak Dios apha neyseksa elseyexma, antehek nahan negko'o móxpánchásamáxche, hegmasésesek nahan ekyókxoho nentémakxa mólya'asáxma m'a Jesucristo éma apagkok, aptaha nak Dios Apketche.

2 SAN PEDRO 1:1

Ko'o Simón Pedro sekteme Jesucristo apchásenneykha sekteme nahan seykha amya'a apagkok. Kéxegke ektáxesásak se'e weykcha'áhak nak, kéxegke ekyetna nak megkólya'áseyam ektakmela agko', ekhawo s'e ekyetna nak han negko'oxa, hakte ekpéwomo aptémakxa m'a Jesucristo segwagkasamo nak teyp, aptaha nak Dios egagkok.

APOCALIPSIS 7:9

Enmexawok axta ko'o natámen xa, ekwet'ak axta ko'o énxet apxámokma apyókxoho pók aptémakxa énxet nak, tén han ma'a móktémakxa nak apkelpakmeyesma. Amonye taháno ektakmalma axta apchakneykha m'a, nápakto' ma'a Nekkések Apketkok. Apxámok apagko' axta m'a, megkólwanchek axta kólyetsetek. Apkelmopé axta nahan apkelántaxno, áxa áwa' axta anhan apkelmeykha.

GÁLATAS 5:4

Kéxegke kélmámenyého nak exének Dios kéltaha kélpéwomo eñama kéllané m'a eltémókxa nak antehek segánamakxa, massék kéltaha kélyepetcheyo Cristo, kélyenyókek nahan kéxegke m'a memyagweykekxa nak segméso Dios ma'a segásekhayo nak.

1 CORINTIOS 6:11

Cháxa apkeláneykegko axta nápakha énxet'ák apkeleñama kélnepyeseksa kéxegke xa, wánxa agkok, kéltemésesegkek eyke kaxwo' kéláxñeyo kéxegke, kéltemésesegkek nahan kéxegke Dios apkelpagkanma, kéltemésesegkek nahan kélpéwomo eñama apwesey m'a Jesucristo Wese' egegkok tén han eñama m'a Espíritu apkeñama nak Dios egagkok.

SAN JUAN 20:31

Wánxa agkok, naktáxésamaxchek eyke weykcha'áhak xa yakwayam enxoho megkólya'asók kéxegke Jesús aptaha Mesías, aptaha nak Dios Apketche, yakwayam enxoho nahan kólwetak ekyennakte kélnenya'ák eñama Cristo, neyseksa kélteme megkólya'áseyam.

GÁLATAS 4:5

yakwayam enxoho hẽlhexyawásekxak negko'o neyseksa nenlané m'a eltémókxa nak antehek segánamakxa, yakwayam enxoho nahan hegmések negko'o Dios yakwayam antehek apketchek.

APOCALIPSIS 7:14

“Wese', xép apya'ásegko'”, axta ektahak seyátegmowágko ko'o. Keñe axta aptaha seyáneya s'e: “Cháxa énxet'ák ektaha axta apkelyeykhé ekyawe apkellegeykegkoho xa, apkelyenyések axta apkelántaxno Nekkések Apketkok éma apagkok xa, kelmopeyásekxók axta anhan.

1 SAN PEDRO 1:2

cham'a énxet'ák ektaha axta nano' apkelyéseykha Dios Egyap, ekhawo m'a ektémakxa axta apmopmenyého elának Dios. Espíritu axta anhan keñamak aptemésesama kélpagkanamaxche kéxegke Dios yakwayam enxoho kóltehek kélyaheykekxoho, yakwayam enxoho katnésesek kéláxñeyo kéxegke Jesucristo éma apagkok. Kólyánchesho kélma m'a ektémakxa nak segméso naksa Dios segemleykekxoho, tén han ma'a meyke ektahakxa kélwáxok.

ROMANOS 4:24

negko'o nahan nelxénamaxchek xa eknaktáxésamaxche nak, hakte magya'áseyam nahan negko'o xa keñamak senxeyenma Dios nentaha nelpéwomo, negko'o nentaha nak magya'áseyam ma'a apxátekháseykmo axta Jesús Wese' egegkok,

LOS HECHOS 4:12

Méko pók énxet ekyetna m'a nelwagkásamáxche teyp nak, hakte axta hegmeyásak negko'o Dios pók énxet yakwayam hẽlwagkasek teyp keso náxop.