GÁLATAS 1:6 - Lengua Sur (Enxet) Nuevo Testamento

⁶ Etlakkasek ko'o sekwet'a enyahamo kélyensakmo kélyetlo kéxegke Dios, aptaha axta apkelwóneykha kéxegke eñama apkelásekhayo m'a Cristo, tén han kélyetlákxo m'a tásek amya'a mók ektémakxa nak.

GÁLATAS 1:6 Referans Kwoze

2 CORINTIOS 11:4

Kóllanha aksa anhan cha'a kéxegke yetlo ekpayheykekxa kélwáxok énxet ektahakxa enxoho apwé apkeltennasé apwesey pók Jesús, mexnawok m'a neltennáseykencha'a axta negko'o kéxegke; yetlo kélmáheyo nahan cha'a kólmok takha' m'a espíritu mexnawo nak ma'a Espíritu kélxawáya axta kéxegke, tén han kólmok takha' m'a tásek amya'a megkaxnawo nak ma'a kélmoma axta takha' kéxegke.

1 TIMOTEO 1:3

Exnekxa' sat xép Efeso, ekhawo sektahakxa axta seyáneya amonye sekmaheyak ma'a Macedonia, yakwayam enxoho yának melxekmósek nápakha énxet'ák ma'a nelxekmowásamáxche megkamámnaksoho nak,

1 CORINTIOS 4:15

Diez mil eykhe katnehek apyókxoho énxet apkelxekmóso kéxegke apkeltennaso m'a amya'a eñama nak Cristo, wánxa agkok apkantawók eyke m'a kélyepmeyk. Ko'o sekteme kélyap kéxegke hakte eltennasegkek axta kéxegke m'a amya'a segwagkasamo nak teyp, axta keñamak kélyepetcheykekxo kéxegke Cristo Jesús xa amya'a nak.

LOS HECHOS 15:11

Wánxa agkok, akke agya'ásekmok negko'o nenxaka aksa nelwagkásamáxche teyp eñama m'a segásekhayo nak Wese' egegkok Jesús, ekhawo nahan xa énxet'ák nak.

GÁLATAS 5:4

Kéxegke kélmámenyého nak exének Dios kéltaha kélpéwomo eñama kéllané m'a eltémókxa nak antehek segánamakxa, massék kéltaha kélyepetcheyo Cristo, kélyenyókek nahan kéxegke m'a memyagweykekxa nak segméso Dios ma'a segásekhayo nak.

ROMANOS 10:3

Melya'ásegkok ektémakxa m'a senteméseso nak nelpéwomo Dios, elenxanmok nahan cha'a eltemésesakpohok apancha'awok apkelpéwomo eñama m'a apkeltémakxa nak, melyaheykekxohok ma'a sempekkenchesama axta Dios yakwayam hentemésesek nelpéwomo.

1 TIMOTEO 1:14

Cháxa aptahakxa axta Wese' egegkok seyanchesáso segkésa aksa m'a ektémakxa nak segemleykekxoho, egkések axta may'áseyam, tén han ma'a negásekhayo ekyetnamol'a nenteme nak negyepetcheyo Cristo Jesús.

APOCALIPSIS 22:21

Wese' egegkok Jesús sat etnehek apméso naksa kélyókxoho kéxegke m'a ektémakxa nak segemleykekxoho.

2 TIMOTEO 2:1

Xép hatte, etne cha'a apwaskápeykekxoho eñama m'a aksok apxawé naksa axta exchep, ektaha axta apméso m'a Cristo Jesús.

2 TIMOTEO 1:9

Ẽlwagkasek axta negko'o teyp Dios, ẽlwóneyha axta nahan yakwayam ampagkanchesaxchek neyseksa negha makham, háwe eñama m'a aksok nenlané axta negko'o, wánxa agkok, akke keñamak ma'a ektémakxa axta apmopmenyého elának Dios, tén han eñama m'a segásekhayo nak neyseksa negyepetcheyo Cristo Jesús. Dios, aptaha nak segásekhayo eyeynamókxa axta sekxo' apkeláneya keso náxop,

2 TESALONICENSES 2:14

Axta keñamak apkelwóneykencha'a kéxegke Dios eñama m'a tásek amya'a neltennáseykencha'a axta negko'o kéxegke, yakwayam enxoho kólmok kéxegke ektémakxa nak Jesucristo Wese' egegkok apcheymákpoho.

ROMANOS 5:2

Cristo keñamak negkegwagko negko'o agyo'ókxak kaxwo' Dios eñama m'a magya'áseyam nak, yakwayam enxoho kalkohok apwáxok negko'o Dios. Magyensakmok nahan negyennaktésamo nenteme magya'áseyam, awanhek nahan negko'o ekpayheykekxa egwáxok neyseksók nelhaxanma hegwatámhok negko'oxa m'a ektémakxa nak Dios apcheymákpoho.

SAN JUAN 9:30

Aptahak axta apchátegmowágko énxet se'e: —¡Neykel'a kólya'ásegkok apteyapmakxa m'a, keñe nak ko'o seteyásekxoxma!

2 SAN PEDRO 1:3

Egmések axta negko'o Dios ekxámokxoho aksok eyéméxchexa nak negko'o yakwayam enxoho antehek negyetlo Cristo tén han antehek nempagkanchásamáxche Dios eñama m'a apmopwána nak, cham'a segyekpelchásesakmo axta Dios ma'a Jesucristo, cham'a Jesucristo aptaha axta segwóneykha negko'o eñama m'a ektémakxa nak apcheymákpoho, tén han eñama m'a ektémakxa nak ektakmela aptamheykha.

1 SAN PEDRO 1:15

Kólteme ektakmela agko' kéltémakxa, hakte Dios aptaha axta apkelwóneykha kéxegke apteme aptakmalma;

SAN MARCOS 6:6

Apkenatchesek axta apwet'a Jesús metnaha melya'áseyam xa énxet'ák nak. Apweynchámeyha axta Jesús nátegma eyágketexa apkelxekmósama cha'a énxet'ák.

ROMANOS 8:28

Negya'ásegkok negko'o apkelanésama cha'a ekyókxoho aksok Dios ma'a énxet'ák ektaha nak apkelásekhayo, yakwayam enxoho kapasmok, cham'a énxet'ák ektaha axta apkelwóneykha Dios, ekhawo m'a ektahakxa axta apmopmenyého.

ROMANOS 8:30

Apkelwóneyha axta anhan Dios ma'a énxet'ák ektaha axta apkelpagkanma sekxo' agko'; aptemésesegkek axta anhan apkelpéwomo m'a énxet'ák ektaha axta Dios apkelwóneykha; apmések axta anhan apkeleymákpoho m'a énxet'ák ektaha axta apteméseso apkelpéwomo.

2 CORINTIOS 2:17

Mantahak cha'a negko'o aptamheykegkaxa nak nápakha énxet'ák apkelyanmagkásamakpo nak cha'a eñama nak Dios appeywa, wánxa agkok, neltennáha cha'a negko'o ekmámnaksoho agko' meyke negeyseykekxa nápakto' Dios, hakte negko'o nenteme Dios apkelásenneykha, eñama nahan negyepetcheyo m'a Cristo.

GÁLATAS 1:7

Méko eyke mók tásek amya'a, apyetneyk eyke énxet apketsagkaseso nak elchetamso kélwáxok, apmenyék nahan étnakhásók ma'a ektémakxa nak amya'a ektakmela eñama Cristo.

GÁLATAS 1:11

Elyáxeg, kólya'ásegwomho kéxegke s'e: megkañamak énxet elchetamso apwáxok ma'a tásek amya'a seltenneykencha'a nak ko'o.

GÁLATAS 1:15

Wánxa agkok, Dios axta eyke selyéseykha ko'o amonye sekteyam, ewóneykha axta anhan eñama ekyawe seyásekhayo. Exekmósek axta Apketche, cham'a ekwokmo axta yakwánxa hexekmósek, yakwayam enxoho ko'o altennaha tásek amya'a nepyeseksa énxet'ák metnaha nak judíos. Axta ay'áyekmok xama énxet enxoho yakwayam heltennasagkohok ektémakxa;

GÁLATAS 2:2

Ekmahágkek axta ko'o m'a, hakte exekmósegkek axta ko'o Dios eyéméxko amhagkok ma'a. Xama axta sekwokmo ko'o Jerusalén, eyancháseykxeyk axta apxakcha'awók énxet'ák ektaha nak apkelámha apmonye'e kélakneykekxexa. Eltennáseyha axta m'a tásek amya'a seltennáseykencha'awol'a énxet'ák metnaha nak judíos. Elanak axta ko'o xa, hakte momenyék axta katnehek eyakhémo m'a aksok selané axta ko'o, keso selana nak makham sektamheykha.

GÁLATAS 2:5

Axta eyke óghayók negko'o henlekwomhok xa énxet'ák nak, hakte egmenyék axta negko'o keytek kélnepyeseksa kéxegke tásek amya'a ekmámnaksoho nak.

GÁLATAS 2:7

Apkelya'ásegkok axta eyke aptaha Dios seyásennagko ko'o altennaha tásek amya'a nepyeseksa énxet'ák metnaha judíos xa énxet'ák nak, ekhawo ektémakxa nak han apkelya'áseyak aptaha Dios apchásennagko Pedro eltennaha tásek amya'a nepyeseksa énxet'ák judíos.

GÁLATAS 2:14

Xama axta sekwet'a ko'o melánegko m'a ektémakxal'a negyetlo tásek amya'a ekmámnaksoho nak, ektahak axta seyáneya Pedro nápakta'awo' énxet'ák nentémo xamo' magya'áseyam se'e: “Aptemék axta exchep máxa metnaha enxoho judío, xép aptaha nak judío; ¿yaksak ektaha apmoko nak xép elyáteyagkohok énxet'ák metnaha judíos, yakwayam etnahagkok ma'a apkeltémakxa nak énxet'ák judíos?”

GÁLATAS 5:14

Hakte keso ektaha nak eksawhomo ekyókxoho ektémakxa nak eknaktáxésamaxche segánamakxa s'e: “Yásekhoho pók, ekhawo ektémakxa nak apchásekhamakpoho apagko' xép.”