EFESIOS 4:31 - Lengua Sur (Enxet) Nuevo Testamento

³¹ Kólwatés kélteme m'a ektémakxa nak eknatheyáseykha kélwáxok, tén han ma'a ektémakxa nak ekmanyehe kóllók, kólwatés kéllo, kólwatés nahan ma'a kélpaxameykha nak, tén han ma'a ekmaso nak kélpeywa kóllának kélmók, tén han ma'a ekyókxoho ektémakxa nak negmámenyého anlók.

EFESIOS 4:31 Referans Kwoze

COLOSENSES 3:8

Kólwatés kaxwo' kéxegke ekyókxoho s'e: nenlo, negyeykhásamáxkoho negmámenyého anlának aksok, ekmaso nentémakxa, negyamanma egmók, tén han ekmaso nak negya'áseyam.

1 SAN PEDRO 2:1

Kólyenyaw kéxegke m'a ekyókxoho ektémakxa nak nentémakxa ekmaso, tén han ma'a ekyókxoho ektémakxa nak nelyexancháseykha egmók, kólyenyaw nahan ma'a nelmeyókasamáxkoho egagko' nak nentémakxa, tén han ma'a nelyásekkáseykha, tén han ma'a ekyókxoho ektémakxa nak nenxeyenma naksa egmók.

SANTIAGO 1:19

Elyáxeg selásekhayo, kaxén kélwáxok se'e: kéméxchek kólpencheshok kélláneykekxa kéltahakxa kélyókxoho kéxegke yakwayam kóleyxho amya'a; wánxa agkok kéméxchek eyke kóltehek kéxegke megkólpekhéso kólpakmétek, tén han kóltehek megkólpekhéso kóllók.

COLOSENSES 3:19

Enxet'ák ekha nak apnakteyegka'a, kólásekhoho cha'a kélnakteyegka'a nágkólyennaktés cha'a kélpeywa kóllána'.

SANTIAGO 3:14

Kél'awók agkok kéxegke ektekkesa eklo kélwáxok ma'a kélyásekkáseykha nak, tén han kóllának aksok eñama m'a kélenmexamaxche nak, chakho' kapayhekxak kélwáxok kéxegke, kéllanak ma'a aksok enmexma nak amya'a ekmámnaksoho.

EFESIOS 4:26

Kéllókek agkok, nágkóllána megkólya'asáxma, kóllenxánem nahan cha'a megkólwagkasók kéllo xama ekhem.

1 SAN JUAN 3:12

Mantehek sat negko'o aptémakxa axta Caín, aptaha axta kelyekhama' énxet agkok, apchakhak axta apyáxeg. ¿Yaksak axta ektéma apchakhama apyáxeg Caín? Axta keñamak ma'a eyesagko axta aksok apkelané Caín, keñe axta apyáxeg apkelana aksok ektakmela.

SANTIAGO 4:11

Elyáxeg, nágkólxén ekmaso kélmók. Hakte negko'o ektahakxa enxoho nenxeyenma ekmaso egyáxeg, esenhan nentaha enxoho negyekpelchémo, sagkek katnehek nenxeyenma m'a eltémókxa nak antehek segánamakxa, antehek nahan nenyekpelchémo m'a segánamakxa. Aptemék agkok xép apyekpelchémo m'a eltémókxa nak antehek segánamakxa, aptemesásamákpoho apagko' etnehek xép apyekpelchémo m'a segánamakxa, yakwayam nak eykhe etnehek apkelyaheykekxoho exchep.

TITO 1:7

Enxet apteme nak apkemha apmonye kélakneykekxexa, elának cha'a m'a aptamheykha eñama nak Dios, ékeso eñamakxa eyéméxko nak etnehek ekpéwomo aptémakxa. Megkapayhawok etnehek ekyennakte apwáxok, megkapayhawok nahan etnehek ma'a ekmanyehe nak elwok, megkeyméxchek nahan etnehek ma'a anmenáto nak, metnehek nahan ma'a megyéso nak elwok, metnehek nahan ma'a ekmaso nak aptémakxa yepmenyéhok selyakye.

1 TIMOTEO 3:11

Hawók nahan ma'a kelán'ák apnakteyegka'a nak énxet'ák appasmeykha nak kéltamheykha kélakneykekxexa, kéméxchek nahan katnehek ekha kéláyo, háwe m'a eltennágwayam naksa nátegma, kéméxchek nahan katnehek ma'a ekmowána nak elaneykegkoho ektémakxa, tén han ma'a megkayenseyam nak elané ekyókxoho ektamheykha ektakmela.

2 CORINTIOS 12:20

Hakte eyekak ko'o alwetágwakxak megkóltaha kéxegke m'a sekmámenyého nak ótak kóltehek kéxegke, eyekak nahan ko'o xa helwetak kéxegke atnehek ko'o m'a megkólamenyého nak helwetak atnehek. Eyekak ko'o keytek kélnepyeseksa kéxegke kélenmexamaxche, kélnatha kélmók, kélló, kélmeyókasamáxkoho kélagko' kéllané aksok, kélxeyenma aksa kélmók, kélwanyeykha kélmók, eyeymáxkoho kélwáxok, tén han megkóltakmelchesamo kéltamheykha.

1 CORINTIOS 14:20

Elyáxeg, nágkatne aksa elchetamso kélwáxok kéxegke ektémakxal'a sakcha'a elchetamso awáxok; kólhésaxkoho m'a ektémakxal'a sakcha'a megkalané aksok ekmaso. Kólteme elchetamso kélwáxok ma'a ektémakxal'a elchetamso apwáxok énxet apkelwányam nak.

1 TIMOTEO 5:13

Kamhagkok nahan cha'a nátegma, megkamáheyo katneykha nahan katnekxa', háwe ekwánxa agkok ma'a megkamáheyo nak katneykha, wánxa agkok, eltennágwayam nátegma nahan katnehek, ñohok nahan katnehek ma'a ektahakxa enxoho amya'a, kaxénwók aksa ma'a megkapayhawo nak kaxének.

GÁLATAS 5:20

etnehek nahan cha'a apkelpeykesamo m'a aksok kéleykmáseso nak, etnahagkok nahan cha'a m'a apkeltémakxal'a kelyohóxma. Melwátésemek nahan aptaknagko pók, tén han apkelenmexamap, tén han apnatha pók. Ñohok nahan cha'a ellók, etekkesesek cha'a apkelenmexamap énxet, tén han etekkesek cha'a apkexpanchásamap énxet, etnahagkok nahan cha'a apkelánesamakpoho mók nekha.

1 CORINTIOS 5:8

Kéméxchek negko'o ólsawáseshok Pascua egagkok nak, yetlo magyexamaxkoho, tén han antemésesek ekmámnaksoho agko' nentémakxa, ekyetchesamaxkoho nak ma'a pan meyke kempáseyak nak; akke katakmelak ólsawáseshok yetlo ekmaso nentémakxa, tén han ma'a nentémakxa nak mólya'asáxma, ekyetchesamaxkoho nak kempáseyak apák.

ROMANOS 3:14

Láneyok nahan apatña'ák ma'a aptakneyeykegkoho nak pók, sagko' nahan cha'a katnehek apkelpeywa ellók.

APOCALIPSIS 12:10

Ekleg'ak axta ko'o kélpeywa ekyennakte agko' ma'a néten. Entahak axta amya'a s'e: “Wa'ak kaxwo' nelwagkásamáxche teyp, tén han ma'a Wese' egegkok Dios apmopwána nak, wa'ak nahan kaxwo' negyeseksa m'a aptémakxa nak Wese' apwányam Dios, tén han ma'a ektémakxa nak kélyaheykekxoho Mesías apagkok; hakte kéltekkesegkek axta m'a elsexnenagkama axta ẽlyáxeg cham'a elsexnenagkama axta cha'a ekyókxoho ekhem, tén han ekyókxoho axta'a nápakto' ma'a Dios egagkok.

1 SAN JUAN 3:15

Negyókxoho ektahakxa enxoho nentaknagko egyáxeg nentémo xamo' nak magya'áseyam, cháxa nentaha negakhé egmók xa, kélya'ásegkok nahan kéxegke énxet'ák ekyetno nak apyógkexma megkeytek ma'a ekyennakte egnenyek megkatnegwayam enéxa nak.

TITO 2:3

Hawók nahan ma'a kelán'ák elwányam nak, kéméxchek katnahagkok ma'a ektémakxal'a kelán'ák ekteme nak eyáyo Dios. Megkatnehek ma'a eltennágwayam aksa nak nátegma ekmowána amya'a, megkatnehek nahan ma'a anmenáto nak, kéméxchek kaxekmóshok ektakmela ektémakxa námokkok,

2 TIMOTEO 2:23

Néwhánekxoho aksa exchep ektémakxa nak elenmexamaxche apkelpakmeyesma énxet, cham'a ektaha nak amya'a ekyéháxma, tén han ekteme mékoho; apya'ásegkok xép katekkeshok cha'a nelenmexamaxche xa.

1 TIMOTEO 3:3

megkatakmelak etnehek ma'a anmenáto nak, megkatakmelak nahan etnehek ma'a megyéso nak elwok, akke tásek etnehek ma'a ektakmeleykha nak apwáxok, tén han etnehek meyke ektahakxa apwáxok, tén han ma'a megkaxéneykha nak apwáxok selyakye.

LOS HECHOS 21:30

Sawhékxók axta apyennegkesóxma énxet'ák ekyókxoho nepyeseksa tegma apwányam, apnaktémágkek axta nahan énxet'ák apkelwokmo m'a tegma appagkanamap. Apmákpek axta Pablo, kélyegenteyk axta kéltekkesa m'a kañe' tegma appagkanamap, ñohok axta anhan kélapégkakxo atña'ák.

2 TIMOTEO 3:3

Metnehek sat apchásekhayo pók, megyepyósek sat nahan elanok pók, apkelya'áseyam ekmaso sat etnahagkok, mopwanchek sat elenmaxakpohok ma'a aksok ekmaso apkelyespagko nak, ellegásesagkohok sat nahan apnámokkok, etaknók sat ma'a ekyókxoho aksok ektakmela nak.

EFESIOS 4:22

Kólwatés kéllané kéxegke m'a nano' nentémakxa axta, cham'a eyesógwokmoho agko' nak eñama ektawáseykha m'a aksok ekmaso ekyespagko nak.

EFESIOS 4:25

Nágkólteme kaxwo' kéxegke kélmowána amya'a, kólteme cha'a kaxwo' ekmámnaksoho kélpeywa kóllának kélmók, hakte negyókxoho nenteme neleñama Cristo apyókxa ektaha nak wánxa xama.