EFESIOS 4:14 - Lengua Sur (Enxet) Nuevo Testamento

¹⁴ Mantehek sat kaxwo' negko'o máxa sakcha'a, ekmanyehel'a kayakmagkasek ektahakxa elchetamso awáxok, ektemésesamol'a ekhó exchahayam segyegeyak ma'a ekyókxoho ektémakxa nak axnagkok nelxekmowásamáxche, cham'a sakcha'a eyhayol'a elyexanchesha m'a énxet'ák apkelya'áseykegkoho nak apkeltémakxa hẽlyexanchesha, cham'a énxet'ák apkelyetleykekxo nak ámay senxegánegkesamo nak.

EFESIOS 4:14 Referans Kwoze

HEBREOS 13:9

Nágkólho aksa kamok kélwáxok kéxegke m'a nelxekmowásamáxche mók ektémakxa énatchásamáxkohol'a. Akke tásek katnésesek ekyennakwayam egwáxok neyseksa nenteme magya'áseyam ma'a Dios segásekhayo nak, megkaxnawok ma'a ektémakxa nak negyetleykekxa kéltémókxa antehek negmayhe antók; hakte axta kapasmók énxet xa kéltémókxa nak antehek.

1 CORINTIOS 14:20

Elyáxeg, nágkatne aksa elchetamso kélwáxok kéxegke ektémakxal'a sakcha'a elchetamso awáxok; kólhésaxkoho m'a ektémakxal'a sakcha'a megkalané aksok ekmaso. Kólteme elchetamso kélwáxok ma'a ektémakxal'a elchetamso apwáxok énxet apkelwányam nak.

1 SAN JUAN 4:1

Elyáxeg selásekhayo, nágkolána aksa nakso' aptahakxa apkelpeywa apyókxoho énxet'ák apkelxeyenma nak apyetna Espíritu apkeñama Dios, wánxa agkok, kólyekkón aksa sekxo', yakwayam enxoho kólya'asagkohok espíritu apkeñama Dios kexaha m'a apha nak apwáxok, háwe esenhan katnehek. Hakte apsawheykekxók náxop ma'a énxet'ák apkelmopwána amya'a nak, apkelxeyenmol'a apkelpeywa ektaha eñama Dios.

2 CORINTIOS 2:17

Mantahak cha'a negko'o aptamheykegkaxa nak nápakha énxet'ák apkelyanmagkásamakpo nak cha'a eñama nak Dios appeywa, wánxa agkok, neltennáha cha'a negko'o ekmámnaksoho agko' meyke negeyseykekxa nápakto' Dios, hakte negko'o nenteme Dios apkelásenneykha, eñama nahan negyepetcheyo m'a Cristo.

SANTIAGO 1:6

Tásek eyke kólmaxnak yetlo megkólya'áseyam, meyke kélya'áseyam xama enxoho. Enxama ektahakxa enxoho apya'áseyam, máxa etnehek ma'a ektémol'a kayeykesek yegmen exchahayam wátsam ekwányam.

EFESIOS 6:11

Kólahakkasaxkoho kélagko' cha'a m'a ekyókxoho kélmeykha ektaha axta Dios apkelmeyáseyak kéxegke, yakwayam enxoho kólewának kólenmexek ma'a sẽlyexancháseykha nak kelyekhama'.

SAN MATEO 24:24

Hakte elwak sat énxet'ák apkeltemesásamap nak Mesías, tén han ma'a Dios appeywa apkellegaso apkelmopwána amya'a nak; elának sat nahan aksok magkenatcheso agko' nak agweta', tén han ma'a sempelakkaso nak agweta', yakwayam enxoho elyexanchesha énxet'ák, kawomhok sat nahan apkelyexancháseykha m'a ektaha nak Dios apkelyéseykha, apkepwagko enxoho.

2 TIMOTEO 4:3

Hakte kammok sat ekhem yakwánxa etaknawágwók énxet'ák ma'a nelxekmowásamáxche ektakmela nak, eyánchesagkohok sat ma'a apmáheyókxa nak etnahagkok, cham'a apkeltémakxa apancha'awo nak, etegyagkok sat apxámokma m'a énxet apkelxekmósamol'a apnámokkok, yakwayam kólxekmósek wánxa m'a apmáheyókxa nak eleyxhok xa énxet'ák nak.

SAN JUDAS 1:12

Hegmegkaksohok nahan cha'a negko'o xa énxet'ák nak, cham'a kélanchesákxexa enxoho kéxegke ẽlyáxeg'a apkelásekhamakpoho nak, hakte etawagkok aksa aptéyak, tén han énagkok aksa apyenéyak yetlo meyke elnawagko xama enxoho. Cháxa keláneykha nekkések aptaha nak wánxa apkeltakmelchásamákpekxoho apancha'awo' xa. Máxa anhan ma'a yaphopé meyke ekmámeyel'a, kaswok aksa exchahayam. Máxa anhan ma'a yámet megkeyxnol'a kawakxak ekyexnamakxa, cham'a étsapmo agko' la'a, ekweykmohol'a kepmenák kélpátekkeso.

APOCALIPSIS 19:20

Máxchek axta xa aksok nawhak eklo nak, máxkók axta xamo' ma'a ektaha axta apkellegaso amya'a megkamámnaksoho nak, cham'a, apkeláneykegko axta cha'a aksok sempelakkaso nak agweta' nakto' xa aksok nawhak eklo nak. Apkelyexancháseykha axta énxet'ák xa ektaha nak apkellegaso amya'a megkamámnaksoho, eñama apkeláneyak ma'a aksok sempelakkaso nak agweta'. Axta apkelyexancháseyha m'a énxet'ák apchahayo axta keytek aksok nawhak eklo elkahaso, cham'a apkelpeykesamo axta kéleykmáseso kélheyáseykegkoho nak aksok nawhak eklo. Keñe axta kélyenyawa yetlo akta'ák neyseksa táxa xa aksok nawhak eklo nak, tén han yetlo apakta'ák ma'a ektaha axta apkellegaso amya'a megkamámnaksoho, cham'a eyálewomakxa nak táxa yetlo m'a aksok ánek eyálewomol'a.

GÁLATAS 3:1

¡Elyéháxma kéxegke kélheykha nak Gálatas! ¿Yaksak elyeykesáxma kéxegke? Tásek axta neltennáseykha negko'o kéxegke m'a Jesucristo kélyepetchesama axta aksok ektegyéso.

SAN MATEO 24:11

Elántépok sat Dios appeywa apkellegaso apkelmopwána amya'a nak, apxámok sat nahan etnehek énxet apkelyexancháseykha.

1 SAN JUAN 2:26

Ektáxésesek kéxegke seltennasa m'a énxet'ák apkelenxáneykmo nak elyexanchesha kéxegke.

2 TIMOTEO 3:13

Kayágwomhok sat ekmaso apkeltémakxa m'a énxet elmasagcha'a nak apkeltémakxa, tén han ma'a énxet'ák sẽlyexancháseykegkohol'a, elyexanchesha sat pók, kólyexanchesha sat nahan.

2 CORINTIOS 4:2

Negyenyókek axta negko'o m'a aksok segmegkasamo apkelyexamakpoho axta cha'a apkeláneykegko énxet; manlanak nahan cha'a yetlo negmáheyo ólyexanchesha egnámokkok, Magyetnakháseykmok nahan cha'a m'a ektémakxa nak Dios appeywa. Wánxa agkok, ekmámnaksoho eyke nentémakxa nak cha'a negko'o nempeywa, cháxa ektahakxa nak cha'a ektakmela ekxeyenma apwáxók negko'o énxet'ák nápakto' Dios xa ektaha nak.

SAN MATEO 11:7

Xama axta apkeltakháwo énxet ektaha axta apkeláphaso Juan, apkeltennáseyha axta Jesús énxet'ák apxéna m'a Juan. Aptahak axta s'e: “¿Yaksak axta kélteyánegwokmoho kéxegke yókxexma meykexa énxet? ¿Pa'at elyawheyáseykha exchahayamya axta kélteyánegwokmoho'?

1 CORINTIOS 12:2

Kélya'ásegkók kéxegke megkóltémakxa axta makham megkólya'áseyam Cristo, kélhayók axta ekmoma kélwáxok kéleykmáseso meyke ekpeywa ektemésesama kélxegányam kéxegke.

LOS HECHOS 23:21

Ná elyahakxoho aksa exchep, hakte cuarenta teyp apyókxoho énxet'ák apkelyexákpoho nak apkelhaxna Pablo, apkelxénchek axta apkeltamho ellegásesagkohok Dios melánegko enxoho m'a apkelxeyenma axta elanagkok, cham'a apkelxéna axta metawagkok aptéyak tén han ménagkok yegmen ekwokmoho apchakha Pablo; kaxwo' eyke appenchesek apkeláneykekxa aptamhágkaxa, xép appeywa aksa apkelhaxnak kaxwo'.

1 SAN JUAN 2:19

Negyeseksa nahan apkeleñamak apkelánteyapma xa énxet'ák nak; wánxa agkok, háwe axta eyke nelxegexma'a negko'o xa énxet'ák nak, kaxtemek axta ekmámnaksoho apkeleñama negyeseksa negko'o, hempaxkaha axta. Temegkek axta eyke xa ektaha nak, yakwayam enxoho katakmelek ekwetamaxche metnaha apyókxoho énxet apkeleñama negyeseksa negko'o.

2 SAN PEDRO 2:18

Máxa cha'a katnehek ektakmela enxoho aksok apkelxeyenma xa énxet'ák nak, cham'a ektaha nak mékoho, ellekwomhok nahan cha'a m'a énxet'ák eyáskexho nak apkelwáteséyak appaxkeykha m'a énxet'ák megyakhémo nak apkeltémakxa, eñama m'a ektémakxa nak aksok negyespagko nenteme nak énxet.

SANTIAGO 3:4

Kóllano nahan ektémakxa nak yántakpayhe, ekwányam eykhe katnehek, kayhek eykhe nahan katnehek ma'a exchahayam ektaha nak ekyégeyak, ketsék eykhe m'a appeykesáseykegkaxa nak ekxega m'a ektaha nak apkelpeynchámeyak, ey'aksek ma'a apmokókxa enxoho ey'aksek.

1 TIMOTEO 3:6

Ekeso eñamakxa megkapayhawo nak etnehek énxet apxegkeso kélakneykekxexa m'a kaxwé apyakmagkaso nak apwáxok, hakte kayeykhágwomhok katnehek eyeymáxkoho apwáxok, keñe kaxhok apsexnánemap ma'a ektahakxa axta eksexnánémaxche kelyekhama'.

2 TIMOTEO 1:15

Apyókxoho énxet apheykha yókxexma Asia massak selano ko'o, ekhawo ektahakxa nak apya'áseykegkoho exchep, wákxók nahan mehelanyo m'a Figelo tén han ma'a Hermógenes nepyeseksa xa énxet'ák nak.

1 CORINTIOS 3:19

Ekyéháxma cha'a etnéseshok Dios negya'ásegwayam eñama nak keso náxop, hakte temegkek eknaktáxésamaxche weykcha'áhak se'e: “Apmáha cha'a Dios ma'a ektémakxa nak apkelya'áseykegkoho apancha'awók énxet ekha nak apkelya'áseyak, yakwayam enxoho elmok”.