EFESIOS 3:5 - Lengua Sur (Enxet) Nuevo Testamento

⁵ Axta kólhayok elyekpelkohok énxet'ák xa amya'a ekpowásamáxkoho nak, cham'a nano' axta, wánxa agkok, apxekmósek eyke kaxwo' Dios ma'a seykha amya'a apkelpagkanamap nak, tén han ma'a énxet'ák ektaha nak apkellegaso appeywa eñama m'a Espíritu apagkok nak.

EFESIOS 3:5 Referans Kwoze

SAN JUDAS 1:17

Elyáxeg selásekhayo, kaxénwakxoho kélwáxok kéxegke aptemésesakxa axta Jesucristo seykha amya'a apagkok,

2 SAN PEDRO 3:2

Kaxénwakxoho kélwáxok ektémakxa axta apkelxeyenma énxet'ák ektaha axta apkellegaso Dios appeywa apkelpagkanamap nano' axta, kaxén nahan kélwáxok ma'a apkeltémókxa nak antehek Wese' egegkok segwagkasamo nak teyp, cham'a apkelxekmósama axta kéxegke énxet'ák seykha amya'a.

EFESIOS 2:20

Kéxegke kélteme máxa xama tegma apkelánamapla'a néten tegma apówhak ekyennaktesol'a tegma, cham'a aptaha nak seykha amya'a, tén han ma'a énxet'ák Dios appeywa apkellegaso nak. Jesucristo eyke apteme meteymog apyennakteso xa tegma nak.

EFESIOS 3:9

Eyásennakkek axta anhan ko'o Dios yakwayam alya'asásegwók apyókxoho énxet'ák ma'a apmaheyókxa nak elának Dios ektaha nak ekpowásamáxkoho, cham'a aptéma axta cha'a appósamo Dios nano' axta, aptaha nak apkelané ekyókxoho aksok.

LOS HECHOS 10:28

Aptahak axta apkeláneya Pedro s'e: —Kélya'ásegkok kéxegke megkahayo xama judío épetchaha pók énxet ma'a ektémakxa nak apcháyo. Mopwanchek nahan etxek apxagkok. Wánxa agkok, exekmósek axta eyke ko'o Dios yakwayam maxének ekmaso émók esenhan altemésesek ekmanyása m'a aptémakxa enxoho.

SAN LUCAS 10:24

hakte eltennásek ko'o kéxegke apxámokma axta eykhe énxet'ák Dios appeywa apkellegaso apkeltémo étak xa kélwet'a nak kéxegke tén han ma'a kelwese'e apkelwányam nak, axta eyke elweteyk; apmenyék axta eykhe eñak xa kélleg'a nak kéxegke, axta eyke ellegeyk.”

SAN JUAN 14:26

Espíritu Santo sat eyke elxekmósek kéxegke ekyókxoho aksok, elya'asásegwakxohok sat nahan ma'a ekyókxoho sektémakxa nak selanagkama kéxegke, cham'a Espíritu aptaha nak Apmasma kéxegke, peya nak yáphásesek kéxegke Táta eñama ko'o sekwesey.

SAN MATEO 13:17

Apxámok axta énxet'ák Dios appeywa apkellegaso, tén han ma'a énxet'ák eltakmela nak apkeltémakxa apmopmenyého elwetak se'e kélwet'a nak kéxegke, axta eyke elweteyk; apmenyék axta eykhe ellegak xa kélleg'awo nak kéxegke, axta eyke ellegeyk. Nakso' xa sektahakxa nak seláneya kéxegke.

ROMANOS 16:25

Oltemésesek apcheymákpoho Dios, aptaha nak apmopwána etnésesek ekyennakte megkólya'áseyam kéxegke m'a ektémakxa nak tásek amya'a seltenneykha cha'a ko'o, tén han ma'a nelxekmowásamáxche ekxeyenma nak Cristo. Hawók ektémakxa aksok ekyexamaxche apkeláneykekxa axta Dios xa, cham'a senxekmósa axta, ekpowásamáxkoho axta cha'a nano' axta megkalánamáxchexa axta makham keso náxop,

SAN JUAN 16:13

Apxegakmek sat agkok Espíritu aptaha nak apmámnaksoho, elya'asásegwók sat kéxegke ektémakxa m'a ektaha nak ekmámnaksoho agko'; hakte metnehek sat apxeyenma apagko' ma'a aptahakxa enxoho appeywa, wánxa sat exének ma'a ekyókxoho ektémakxa nak aplegé, elya'asásegwók sat nahan kéxegke m'a peya nak katnehek.

SAN MATEO 23:34

Ekeso eñamakxa peya nak ko'o aláphaksek kélnepyeseksa kéxegke énxet'ák apkellegaso nak Dios appeywa, tén han ma'a énxet'ák apkelya'áseykegkoho nak ektémakxa Dios appeywa, tén han ma'a énxet'ák apkelxekmósamo nak apnámokkok. Kólnápok sat eyke kéxegke m'a, aksok ektegyéso sat nahan kólyepetchesek nápakha, kañe' apchakneykekxexa judíos sat nahan kólnáhapmakha m'a nápakha, kólántaxmakha sat nahan nátegma kólmenxenmakha.

SAN LUCAS 11:49

“Ekeso eñamakxa aptaha axta appeywa Dios yetlo apya'áseykegkoho s'e: ‘Aláphaksek sat ko'o énxet'ák apkellegaso nak sekpeywa, tén han ma'a énxet'ák seykha amya'a ahagkok nak, etekyók sat eyke nápakha xa énxet'ák nak, kólmenxenmakha sat nahan nápakha.’

1 CORINTIOS 2:10

Cháxa segya'asásegwokmo axta Dios eñama Espíritu Santo xa, hakte Espíritu Santo apteme apsawhomo apkelanyo xa ekyókxoho nak, ekweykmoho m'a ektémakxa nak elchetamso apwáxok Dios ektaha nak ekpowásamáxkoho.

SAN MATEO 20:7

Aptahak axta apkelátegmowágko s'e. ‘Méko eyke segmésama nentamheykha.’ Keñe axta aptaha apkeláneya s'e: ‘Kólmohok nahan kéxegkáxa kóltemeykha m'a seneykekxexa nak anmen yámet.’