EFESIOS 2:15 - Lengua Sur (Enxet) Nuevo Testamento

¹⁵ Cristo apmasésakmo m'a ektémakxa axta segánamakxa eñama judíos, ekha axta eltémókxa antehek, tén han ma'a kéltémókxa nak antehek. Aptemesásekxeyk axta Cristo apyepetcheyo pók énxet'ák judíos, tén han ma'a énxet'ák metnaha nak judíos, aptemesásekxeyk axta wánxa xama énxet'ák aphaxnancha'ák eñama apyepetcheyo Cristo. Cháxa aptahakxa axta Cristo apmasésa ektémakxa axta nelenmexamaxche xa.

EFESIOS 2:15 Referans Kwoze

COLOSENSES 2:14

Apmasések axta Dios ekyókxoho ektémakxa axta eknaktáxésamaxche yakwayam eykhe kólyakmagkásekxak, ektémakxa axta mólyaheykekxa m'a eltémókxa axta antehek eknaktáxésamaxche, cham'a eknaktáxésamaxche sẽlyateyeykegkoho axta cha'a eltémo anlának ma'a eltémókxa nak antehek. Apmasések axta Dios xa, cham'a apyepetchesa axta néten aksok ektegyéso.

GÁLATAS 3:10

Enxet'ák ektaha nak apcháyo m'a eltémókxa nak antehek segánamakxa exkak sat Dios aplo, hakte temegkek eknaktáxésamaxche s'e: “Exkak sat Dios aplo énxet ektahakxa enxoho mesawhomo apkelané ekyókxoho ektémakxa nak eknaktáxésamaxche weykcha'áhak segánamakxa antehek.”

HEBREOS 8:13

Axta apxénak Dios ektaha ápak ma'a émha amonye axta ekhémo mók nelpakhetchásamáxkoho Dios, cham'a apxéna axta Dios ma'a axnagkok ekhémo mók nelpakhetchásamáxkoho Dios nak. Kaxwo' sat eyke kamassegwók xa ápak nak, ektémol'a kalesók aksok apák.

COLOSENSES 3:10

kéltemék kéxegke axnagkok kéltémakxa nentémol'a antaxnekxak nentaxno aphaxnagkok: cham'a axnagkok nentémakxa nak, aptemesásegko nak cha'a axnagkok Dios, yakwayam kaxnágwakxohok ma'a aptémakxa nak, ektaha axta anhan apkelané, yakwayam enxoho agya'ásegwomhok ektakmela agko' ma'a aptémakxa nak Dios.

COLOSENSES 2:20

Kéletsapawók axta kéxegke xamo' Cristo, massék elma kéxegke m'a aksok ekha nak elmowancha'a eláneykencha'a nak keso náxop. ¿Yaksak ektaha, máxa kéltahak kélyetlákxo enxoho makham kéxegke ektémakxa nak keso náxop? ¿Yaksak ektéma kélyaheykekxoho nak cha'a, ektéma nak cha'a amya'a agáneyxchek se'e?:

GÁLATAS 6:15

Méko katnehek ekyetna enxoho sẽlkahaso kélyenyekhamol'a egyempehek, esenhan ma'a méko enxoho; akke ektakmela agko' ma'a sentemesáseykekxa nak eghaxnagcha'ák Dios.

GÁLATAS 3:28

Méko kaxwo' negyeykhamaxche egmók, megkeyxek nenteme enxoho judío esenhan griego, megkeyxek nahan nenteme enxoho negmomaxche esenhan ma'a magmomaxche nak, énxet esenhan ma'a kelán'a, hakte kélyókxoho kéxegke kélteme wánxa xama kélteme nak kélyepetcheyo Cristo Jesús.

EFESIOS 4:16

Cristo nahan keñamak ektakmela ekyepetcheykekxa mók ektémakxa nak negyókxa. Tásek nahan ekyepetcheykekxa mók xa ekyókxoho nak eñama m'a ekyepetcheyo nak mók, tásek agkok nahan eltamheykha ekyókxoho ekhéyak nak negyókxa, kaxñegkok nahan éktegeyák ekyókxoho nak, kayawagkok nahan ektémakxa nak elásekhamaxkoho.

2 CORINTIOS 5:17

Negko'o ektahakxa enxoho negyepetcheyo Cristo, axnagkok nentémakxa katnehek, massegwokmek ma'a nentémakxa nano' axta, axnagkok nentémakxa eyke kaxwo' yetnak.

HEBREOS 7:16

cham'a Melquisedec aptaha axta appasmo apkelmaxnéseso Dios énxet'ák apagkok, hakte axta kañamak kélméso aptamheykha m'a segánamakxa ekxeyenma nak cha'a yakwánxa elenyék énxet'ák appasmo nak apkelmaxnéseso Dios énxet'ák apagkok, axta eyke keñamak kélméso aptamheykha Melquisedec ma'a aptémakxa axta, cham'a aptémakxa axta ektaha nak megkamassegwayam.

HEBREOS 9:23

Kélmenyék axta cha'a kólmések Dios xa aksok kélnaktóso ektekyawa nak, yakwayam enxoho katnésesek eláxñeyo m'a aksok ekyetchesamaxkoho nak ma'a ekhéyak nak néten; keñe m'a aksok ekhéyak nak néten kámenyeyhok cha'a kólmések ektakmela m'a aksok kélméso nak Dios, megkaxnawok xa aksok ekhéyak nak náxop.

EFESIOS 2:10

hakte Dios axta aptaha senlané negko'o; enlanak axta negko'o eñama m'a Cristo Jesús yakwayam enxoho anlának ma'a nentamheykha ektakmela nak, ekhawo m'a apkeláneykekxa apagko' axta Dios ma'a nano' axta.

EFESIOS 2:14

Cristo apteme senteméseso negko'o meyke ektahakxa egwáxok aptaha axta nahan appaxakteyáseykekxa énxet'ák judíos ma'a énxet'ák metnaha nak judíos, cham'a apmasésa axta ekhó kélhaxta nepyeseksa xa énxet'ák nak. Apyókxa axta keñamak

EFESIOS 2:16

Apketsapma néten aksok ektegyéso axta keñamak Cristo apmasésakmo apkelenmexamap énxet'ák judíos tén han ma'a énxet'ák metnaha nak judíos, aptemesásekxeyk axta nahan Cristo apkelásekheykekxoho Dios xa énxet'ák nak, aptemesásekxeyk axta anhan wánxa xama xa énxet'ák nak, ektémol'a wánxa xama negyókxa.

COLOSENSES 3:11

Massegkek kaxwo' nenteme negyeykhamaxche egmók, megkeyxek nenteme enxoho griego esenhan nenteme enxoho judíos, megkeyxek nahan ma'a ekha enxoho sẽlkahaso kélyenyekhamol'a egyempehek, esenhan ma'a méko enxoho sẽlkahaso, megkeyxek nahan nenteme enxoho neñama mók nekha, megkeyxek nahan nenteme enxoho magya'áseyak aksok, megkeyxek nahan ma'a nenteme nak negmomaxche esenhan ma'a magmomaxche nak; Cristo eyke apwánxa apagko' meyke ekhémo, apheyk nahan kélwáxok Cristo kélyókxoho nak.

COLOSENSES 3:15

Meyke ektahakxa egwáxok eñama Cristo sat katnehek ekpékesáseyak kélwáxok kéxegke. Axta keñamak apkelwóneykencha'a kéxegke Dios xa, yakwayam enxoho hentemesásekxak ektémakxal'a wánxa xama negyókxa. Kólmes nahan ekxeyenma kélwáxok Dios.