EFESIOS 1:4 - Lengua Sur (Enxet) Nuevo Testamento

⁴ Dios axta sẽlyeseykha negko'o eñama Cristo, eyeynamókxa m'a sekxo' axta ekmáheyo kalanaxchek keso náxop, yakwayam enxoho antehek nempagkanchásamáxche Dios, tén han antehek meyke nensexnánémaxche nápakto' Dios. Segásekhayo axta keñamak Dios

EFESIOS 1:4 Referans Kwoze

2 TIMOTEO 1:9

Ẽlwagkasek axta negko'o teyp Dios, ẽlwóneyha axta nahan yakwayam ampagkanchesaxchek neyseksa negha makham, háwe eñama m'a aksok nenlané axta negko'o, wánxa agkok, akke keñamak ma'a ektémakxa axta apmopmenyého elának Dios, tén han eñama m'a segásekhayo nak neyseksa negyepetcheyo Cristo Jesús. Dios, aptaha nak segásekhayo eyeynamókxa axta sekxo' apkeláneya keso náxop,

EFESIOS 2:10

hakte Dios axta aptaha senlané negko'o; enlanak axta negko'o eñama m'a Cristo Jesús yakwayam enxoho anlának ma'a nentamheykha ektakmela nak, ekhawo m'a apkeláneykekxa apagko' axta Dios ma'a nano' axta.

SAN MATEO 25:34

Sat etnehek yának Wese' énxet'ák apheykha ekpayhókxa apkelya'asamakxa s'e: ‘Kólchexyem kéxegke kéltaha nak ektakmela apkelxeyenma Táta; Kólma m'a aptémakxa nak Wese' apwányam Dios, kéllánesamakxa axta kéxegke amonye apkelané Dios keso náxop.

SANTIAGO 2:5

Elyáxeg selásekhayo, kóleyxho hana s'e: Apkelyésáha Dios ma'a ektaha nak meyke aksok apagkok keso náxop, yakwayam enxoho kayáwak melya'áseyam, yakwayam enxoho nahan exkekxak ma'a aptémakxa nak Wese' apwányam Dios, cham'a apxeyenma axta egkések Dios ma'a ektaha nak apkelásekhayo;

1 SAN PEDRO 2:9

Kéxegke eyke kélteme énxet'ák ektaha axta Dios apkelyéseykha, kélteme anhan kélmaxnéseso Dios énxet'ák apagkok eñama apkelásenneykha m'a Wese' apwányam Dios, kélteme nahan Dios énxet'ák apagkok apkelpagkanamap, kélteme nahan énxet'ák ektaha axta Dios apkelma yakwayam etnehek énxet'ák apagkok. Temegkek kéxegke xa ektaha nak yakwayam enxoho kóllegaksek ma'a Dios aptamheykha ektakmela nak, cham'a Dios aptaha axta apkelwóneykha kéxegke yakwayam kólantépok neyseksa ekyaktésakxa exma yakwayam enxoho kólántexek ma'a neyseksa elseyexma apagkok ektakmalma nak.

APOCALIPSIS 13:8

Apyókxoho énxet'ák apheykha náxop sat nahan elpeykeshok xa, cham'a megkanaktáxesamaxko nak apkelwesey m'a weykcha'áhak ekyennaktésamo nak egnenyek, eyeynamókxa m'a sekxo' axta elánamáxko keso náxop, cham'a weykcha'áhak ektaha nak apagkok ma'a Nekkések Apketkok apmatñama axta.

SAN JUAN 15:16

Háwe axta kéxegke selyéseykha ko'o. Ko'o axta eyke selyéseykha kéxegke, ekmések axta ko'o kéltamheykha kéxegke seltamho kólxog yakwayam kayawhok agko' kéllané aksok eltakmela eñama kéltamheykha, cham'a nentamheykha megkamassegwayam nak. Keñe sat egkések kéxegke Táta ekyókxoho aksok kélmaxneyakxa enxoho eñama ko'o sekwesey.

1 SAN PEDRO 1:2

cham'a énxet'ák ektaha axta nano' apkelyéseykha Dios Egyap, ekhawo m'a ektémakxa axta apmopmenyého elának Dios. Espíritu axta anhan keñamak aptemésesama kélpagkanamaxche kéxegke Dios yakwayam enxoho kóltehek kélyaheykekxoho, yakwayam enxoho katnésesek kéláxñeyo kéxegke Jesucristo éma apagkok. Kólyánchesho kélma m'a ektémakxa nak segméso naksa Dios segemleykekxoho, tén han ma'a meyke ektahakxa kélwáxok.

1 SAN PEDRO 1:20

Nano' axta kélpagkancheso Cristo katnehek xa ektaha nak, cham'a amonye axta elánamáxche keso náxop, wánxa agkok apwa'ak axta eyke Cristo keso negwánxa nak, eyágketexa nak ektemegwánxa néxa, yakwayam epasmok kéxegke.

COLOSENSES 3:12

Apkelásekha'awók kéxegke Dios, apkelyésáha axta nahan yakwayam kóltehek énxet'ák apagkok. Kólteme kélahakkásamáxche m'a ekmámnaksoho nak apmopyósa anlanok egmók, ektakmeleykha egwáxok, megkeymáxkoho egwáxok, meyke ekyenneykha egwáxok anlanok egmók, tén han ma'a mampekhésamaxche nak.

COLOSENSES 1:22

Wánxa agkok, aptemesáseykxeyk eyke kaxwo' kélásekhamaxchekxoho kéxegke m'a Dios eñama m'a apketsapma axta Cristo, cham'a ektahakxa axta eklegeykegkoho apyókxa. Apkelanak axta Dios xa, yakwayam enxoho etnésesek kéxegke kélpagkanamaxche enaklakxak ma'a aphamakxa nak, meyke ekyepetche xama aksok ekmanyása, tén han meyke kélxéncháseykekxoho kéltémakxa.

EFESIOS 5:27

yakwayam enxoho etnésesek apkeleymákpoho enaklakxohok apagko' ma'a aphamakxa nak, meyke ekyepetche xama aksok ekmanyása, esenhan ma'a aksok ekmaso nak, tén han meyke m'a xama aksok ekhawo nak xa, wánxa agkok apkelpagkanamap aksa etnésesagkok, tén han etnésesagkok apkelpéwomo.

APOCALIPSIS 17:8

Yáktegkek axta nano' xa aksok nawhak eklo apwet'a exchek xép, massegkek eyke kaxwo' ekyákto, kañe' máxek ekmatawóneg sat eyke kañentak katyapok amonye ekmaheyak ma'a yakwánxa nak kólmasesamhok agko'. Katlakkasek sat étak énxet'ák apheykha nak keso náxop, cham'a megkanaktáxesamaxko nak apkelwesey weykcha'áhak ekyennaktésamo nak egnenyek eyeynamókxa m'a sekxo' elánamáxko keso náxop, cham'a apwet'a sat xa aksok nawhak eklo ekyáktama axta nano' axta, massegkek eyke kaxwo' ekyákto, wánxa agkok kawatak sat eyke makham.

LOS HECHOS 13:48

Xama axta apkelleg'a énxet'ák metnaha judíos xa, kelpayhekxeyk axta apwáxók, apkelxénchek axta amya'a eñama nak Dios ektaha ektakmela; axta elya'ásekmok ma'a apyókxoho kélpagkancheso axta yakwayam elxawagkok ekyennakte apnenya'ák.

SAN JUAN 17:24

“Táta, egkések axta ko'o exchep xa énxet'ák nak, emenyék nahan ko'o hexhok xamo' xa énxet'ák nak, cham'a yakwánxa nak axnók ko'o, yakwayam enxoho elwetak ektémakxa nak ko'o seyeymáxkoho, cham'a seyeymáxkoho segkésa axta exchep; hakte eyásekhayók axta exchep amonye elánamáxche axta keso náxop.

1 TESALONICENSES 4:7

Hakte axta hẽlwóneyha negko'o Dios yakwayam antehek ekmanyása nentémakxa, wánxa apkeltémo antehek wánxa nempagkanchásamáxche m'a Dios.

FILIPENSES 2:15

yakwayam enxoho megkataxchék ekyetna kéxegke kélsexnánemaxche tén han eyesógwayam kéllané xama aksok enxoho. Kólteme kéxegke Dios apketchek meyke elenchahamaxche kéltémakxa nepyeseksa xa énxet'ák elmasagcha'a nak apkeltémakxa, cham'a apkelxegányam nak. Máxa yaw'a kéltahak kélápogwata kéxegke nepyeseksa xa énxet'ák nak, keso náxop ekyaktésamakxa nak exma,

2 TIMOTEO 2:19

Wánxa agkok, appekkenchek axta eyke Dios xama aksok ektaha nak ekyennakwákxexa, ekyetna nak eknaktáxésamaxche s'e: “Ekpelkohok cha'a Wese' egegkok ma'a énxet'ák ektahakxa enxoho apagkok”, “kéméxchek nahan ényók nentémakxa ekmaso apyókxoho énxet ektaha nak apkelwóneykha Wese' egegkok apwesey.”

LOS HECHOS 18:10

hakte ko'o sekxegexma exchep. Méko sat kawának katnésesamhoxma, apxámok ko'o énxet'ák ahagkok se'e tegma apwányam nak.”

2 TIMOTEO 2:10

Ekeso eñamakxa selenmáxexkoho nak ko'o m'a ekyókxoho ektémakxa nak seklegeykegkoho, yakwayam apasmok ma'a énxet'ák ektaha nak Dios apkelyéseykha, yakwayam enxoho anhan elwagkasakpok teyp xa énxet'ák nak, eñama m'a Cristo Jesús, cham'a nelwagkásamáxche teyp megkatnegwayam nak enéxa, ekha nak han eyeymáxkoho.

EFESIOS 4:2

Kólteme megkeymáxkoho kélwáxok, kólteme nahan ektakmeleykha kélwáxok; kólteme megkólpekhésamaxche, kólteme nahan kélenmáxamáxkoho kélmók yetlo kélásekhayo.

1 CORINTIOS 1:8

Dios sat elyennaktésesek kéxegke kélteme megkólya'áseyam ekwokmoho ektemegwánxa néxa ekhem, yakwayam enxoho megkólxénchásekxók kéltémakxa kéxegke apwakto sat Jesucristo Wese' egegkok.

SAN MATEO 24:31

Eláphaksek sat apkelásenneykha yetlo ekyennakte apkelpáwaso apkelakkahaso yakwayam enxoho yánchásekxak ma'a ektaha nak apkelyéseykha apkeleñama ekyókxoho yókxexma: nexcheyha, nepyeyam, ekteyapmakxa ekhem, tén han ma'a ektaxnegwánxa ekhem, esawhekxohok sat keso náxop.

EFESIOS 5:2

kóllenxanmoho kélteme kélásekhamaxkoho, ekhawo m'a ektémakxa axta segásekhayo Cristo, apyenyawákpók axta apagko' yakwayam etnehek segyanmaga negko'o ektémol'a aksok ektekyawa kélméso Dios, tén han ma'a ektémol'a aksok ekwatnamáxche ekmátsal'a etekhánek ekpakneyam Dios.

SAN JUAN 10:16

Yetneyk nahan ko'o nekkések megkatnaha nak apkeleñamakxa s'e kañe' apxagkok nak; kéméxchek eyke anaklantak nahan ma'a. Elyahakxohok sat nahan sekpeywa ko'o m'a. Xama apyáktamakxa sat katnekxa, xama sat nahan etnehek ma'a ektaha nak apkeltakmelcheso.

1 TESALONICENSES 3:12

Wese' egegkok sat eyanchesesagkohok makham kélteme kélásekhamaxkoho, tén han eyanchesesagkohok kélásekhayo m'a apyókxoho énxet'ák nak, ekhawo ektémakxa nak nelásekhayo negko'o kéxegke.

EFESIOS 3:17

Elmaxnakkek nahan ko'o Dios seltamho exek kélwáxok kéxegke Cristo eñama xa megkólya'áseyam nak. Keñe sat keytek kéxegke kélwaskapma tén han kóllenxanmohok kélyennaktésamo kélteme kélásekhamaxkoho.

GÁLATAS 5:13

Elyáxeg kélwóneyha axta kéxegke yakwayam enxoho megkóltemésesek máxa kélmomaxche. Wánxa agkok, nágkólásenneykxa aksa kéxegke xa kélteme nak máxa megkólmomaxche, yakwayam kólyeykhasaxkohok kóllának ma'a aksok ekyespagko nak kélyókxa. Akke tásek kóltehek kéxegke m'a kélpasmomáxkoho nak eñama kélásekhayo.

ROMANOS 8:33

¿Yaksak sat awanchek kasexnenak ma'a ektaha nak Dios apkelyéseykha? Dios apteméseso apkelpéwomo xa.

SAN MATEO 24:24

Hakte elwak sat énxet'ák apkeltemesásamap nak Mesías, tén han ma'a Dios appeywa apkellegaso apkelmopwána amya'a nak; elának sat nahan aksok magkenatcheso agko' nak agweta', tén han ma'a sempelakkaso nak agweta', yakwayam enxoho elyexanchesha énxet'ák, kawomhok sat nahan apkelyexancháseykha m'a ektaha nak Dios apkelyéseykha, apkepwagko enxoho.

SAN MATEO 24:22

Apwenakteyások agkok Dios xa ekhem nak, méko kawagkasaxchek teyp; eyakwataksohok sat eyke eñama apkelásekhayo m'a ektaha nak apkelyéseykha.

1 SAN JUAN 4:16

Cháxa keñamak negya'ásegwokmo negko'o segásekha'awo Dios xa, magya'ásekmok nahan. Dios apteme eñamakxa m'a negásekhayo nak, negko'o ektahakxa enxoho nelásekhamaxkoho, negyepetcheyo antehek Dios, hegyepetkohok nahan Dios.

2 SAN PEDRO 3:14

Elyáxeg selásekhayo, kóllenxánem cha'a yakwayam enxoho elwetágwatak kéxegke Dios ekyetna meyke ektahakxa kélwáxok, tén han meyke elenchahamaxche kéltémakxa ekmaso, tén han meyke kélsexnánemaxche, neyseksa kélhaxanma katnehek xa.

COLOSENSES 2:2

Ekwaskápeykxók ko'o yakwayam enxoho elxawagkok ekmayheykegkoho apwáxók xa énxet'ák nak, yakwayam enxoho megyexpanchesakpek eñama m'a apkelásekhamakpoho nak, yakwayam enxoho nahan katnehek ekyawe agko' apkelya'ásegwayam, cham'a ekmowána nak kalya'asásegwók ma'a megyahayo axta kólya'asagkohok Dios, cham'a aptaha nak Cristo.

GÁLATAS 5:22

Akke ektaha nak aptekkeso Espíritu s'e: nelásekhamaxkoho, ekpayheykekxa egwáxok, meyke ektahakxa egwáxok, mampekhésamaxche, negapeykha egmók, ektakmeleykha egwáxok, mantemeseseykmohoxma egmók,

GÁLATAS 5:6

Nentemék agkok negko'o negyepetcheyo Cristo, méko katnehek ekha enxoho sẽlkahaso kélyenyekhamol'a egyempehek esenhan ma'a méko enxoho. Akke tásek keytek negko'o m'a magya'áseyam nak, cham'a magya'áseyam sentemésesamol'a ekha nelásekhamaxkoho.

LOS HECHOS 15:18

Cháxa aptémakxa nak appeywa Wese' egegkok xa, aptaha nak nano' segya'asásegwayam negko'o xa.’