EFESIOS 1:18 - Lengua Sur (Enxet) Nuevo Testamento

¹⁸ Elmaxnakkek cha'a ko'o Dios seltamho elya'ásásegwók kéxegke, yakwayam enxoho kólya'ásegwomhok kéxegke m'a ektémakxa nak kélhaxneykha, cham'a kélhaxneykha apmésa axta kéxegke Dios, tén han kólya'ásegwomhok ekwánxa ektakmela agko' ma'a aksok appagkanchesama nak Dios yakwayam egkések ma'a ektaha nak énxet'ák apagkok,

EFESIOS 1:18 Referans Kwoze

LOS HECHOS 26:18

Eyáphásek xép nepyeseksa xa énxet'ák nak, yakwayam enxoho elyekpelchásesamhok, tén han kamaskok apkelteyáseyncha'a ekyaktesakxaxma, wánxa aksa elteyésha m'a neyseksa elseyexma nak, yakwayam enxoho anhan kamaskok ekyetna ekmowána Satanás nepyeseksa xa énxet'ák nak, wánxa aksa elyetlakxak ma'a Dios; yakwayam enxoho etnahagkok mehey'áseyam ko'o, keñe anhan elxawagkok ma'a meyakmagkáseykekxa nak Dios apkeltémakxa melya'asáxma, tén han exkak yakwayam epáxakwók ma'a Dios énxet'ák apagkok apkelpagkanamap nak.

2 CORINTIOS 4:6

Dios apagko' axta apkeltémo katyapok aksa elseyexma neyseksa ekyaktesóxma, axta anhan apkeltémo katyapok elseyexma egwáxok negko'o m'a Dios, yakwayam enxoho agya'ásegwomhok ektémakxa nak Dios apcheymákpoho elyenmasama nak nápát ma'a Jesucristo.

SAN LUCAS 24:45

Apkelya'asásegwokmek axta Jesús ektémakxa eknaktáxésamaxche Dios appeywa xa énxet'ák nak.

EFESIOS 1:7

Segásekhayo ekyawe agko' axta keñamak Dios segmasésesa m'a ektémakxa axta nelmomaxche eñama m'a apyegkenma axta éma apagkok Apketche, meyakmagkásekxak nahan nentémakxa nak mólya'asáxma.

EFESIOS 5:8

Axta kólya'áseykegkok kéxegke Dios, máxa axta entemék kélheykencha'a enxoho ekyaktesakxaxma, wánxa agkok kéltemék eyke kaxwo' kélyepetcheyo Wese' egegkok, ékeso eñamakxa kélheyncha'a nak neyseksa elseyexma, kólteme kéxegke m'a apkeltémakxa nak énxet'ák apheykha nak neyseksa elseyexma.

EFESIOS 3:16

Elmaxnakkek ko'o Dios Egyap seltamho epekkenchesek kélwáxok kéxegke kélmowána, tén han ma'a kélwaskápeykekxoho eñama nak apméso Espíritu apkeñama nak Dios, eleñama nak ma'a ekheykegkaxa nak ekxámokma agko' aksok apagkok eltakmela eleñama nak néten.

EFESIOS 4:4

Negko'o nenteme wánxa xama Cristo apyókxa, wánxa nahan xama Espíritu, ekhawo m'a ektahakxa axta anhan kéxegkáxa apkelwónencha'a Dios yakwayam kóltehek wánxa xama kélhaxneykha.

TITO 3:7

yakwayam enxoho anxawak ma'a ekyennakte egnenyek megkatnegwayam enéxa nelhaxanma nak anxawa', cham'a senxéna enxoho Dios nentaha nelpéwomo eñama m'a segméso naksa nak segemleykekxoho.

2 TESALONICENSES 1:11

Cháxa keñamak nelmaxnésesa nak cha'a kéxegke xa, nelmaxnakkek cha'a Dios neltamho kaxének apwáxok ekpayhawo m'a apkelwóneykencha'a axta kéxegke, neltamhok nahan elának Dios eñama apmopwána m'a ekyókxoho aksok eltakmela kélmámenyého nak kóllának kéxegke, tén han elának ma'a ektémakxa nak kéllané kéxegke kéltamheykha eñama m'a megkólya'áseyam nak.

EFESIOS 4:1

Ekmések ko'o sekpeywa kéxegke keso sekha nak kaxwo' sẽlpextétamakxa seltamho kóltehek kéxegke m'a eyéméxchexa nak antehek negko'o ektaha axta sẽlwoneykha Dios, ekhawo m'a ektahakxa axta apkelwónencha'a Dios kéxegke.

1 TIMOTEO 6:12

Elenxanmoho apwaskápeykekxoho eñama nak ma'a ektémakxa nak mey'áseyam. Neygyoho aksa kagketek xép ma'a ekyennakte egnenyek megkamassegwayam nak, axta keñamak apwóneykencha'a exchep Dios xa, ékeso eñamakxa appékásawo axta apxeyenma exchep ektémakxa mey'áseyam nápakta'awo' ma'a apyókxoho énxet ektaha axta apweteykegkoho.

1 SAN PEDRO 5:10

Etnésesek sat kéxegke kélpéwomo Dios natámen kéllegeykegkoho yakwatakxoho, elyennaktésesek sat nahan kélteme megkólya'áseyam, etnésesek sat nahan ekha kélyennakte. Cháxa Dios sẽlwoneykencha'a axta eñama ekyawe segásekhayo xa, apkeltamhok axta hegwakxohok negko'oxa m'a ektémakxa nak apcheymákpoho megkamassegwayam eñama negyepetcheyo m'a Jesucristo.

EFESIOS 1:11

Ẽlyéseykha axta negko'o Dios sekxo' agko', yakwayam enxoho anxawak aksok sẽlpagkancheso yakwayam hẽlmések, eñama nenteme negyepetcheyo m'a Cristo, ekhawo m'a ektémakxa nak apmopmenyého apagko' elának Dios, aptaha nak cha'a apkelané ekyókxoho aksok ektakmelakxa enxoho apkelano.

HEBREOS 10:32

Wánxa agkok, kaxén kélwáxok kéxegke m'a nano' axta, cham'a sekxo' axta kélxawáya elseyexma, kélenmáxamáxkók axta kéxegke yetlo kélwaskápeykekxoho kéllegeykegkoho eñama m'a kélenxáneykmoho kélagko' axta.

1 TESALONICENSES 2:12

Neltennásek axta kéxegke neltamho kóltehek eyéméxchexa nak antehek nenteme nak Dios énxet'ák apagkok, cham'a Dios ektaha axta apkelwóneykha kéxegke apkeltémo kawakxohok kélteme Wese' apwányam kélagkok ma'a Dios, tén han kawakxohok kéxegke m'a ektémakxa nak apcheymákpoho.

2 CORINTIOS 4:4

Apkelya'ásekmek cha'a xa énxet'ák nak, hakte meyke apakta'ák temésesók ma'a dios ektaha nak eláneykha keso náxop, yakwayam enxoho melwetyehek ma'a tásek amya'a elseyexma agkok eñama nak ma'a Cristo ekha nak apcheymákpoho, aptaha nak aphémo apagko' ma'a Dios.

TITO 2:13

neyseksa nelhaxanma katnehek ma'a aptémakxa axta sempekkencháseykekxa appeywa Dios ektaha nak ektakmela: cham'a apkexyekmo sat Dios egagkok yetlo apcheymákpoho, cham'a aptaha nak Jesucristo segwagkasamo teyp.

2 TESALONICENSES 2:16

Nelmaxnakkek negko'o Wese' egegkok Jesucristo, tén han Dios Egyap, neltamho etnésesek kéxegke ekmayheykegkoho kélwáxok, tén han etnésesek kéxegke ekha kélwaskapma, yakwayam enxoho katnehek ektakmalma m'a ekyókxoho kéltahakxa enxoho kélpeywa, tén han ma'a kéllanakxa enxoho, cham'a Dios aptaha nak segásekhayo eñama m'a ektémakxa nak ektakmeleykha apwáxok, tén han segmésama negko'o ektakmelwayam egwáxok megkatnegwayam enéxa, tén han segmésama negko'o ektakmela nak nelhaxneykha.

1 TESALONICENSES 5:8

Keñe negko'o neleñama nak neyseksa ekteyapma ekhem, tásek cha'a antehek ekha negya'áseykegkoho. Kéméxchek negko'o agahakkasaxchek ma'a magya'áseyam nak tén han ma'a negásekhayo nak, keñe ótchesek empátek ma'a nelhaxanma nak yakwayam ólwagkasaxchek teyp ektémol'a sẽlpextétamo apketcheso apkátek.

EFESIOS 3:8

Ko'o eyke sekteme kónegók ahagko' nepyeseksa m'a elyáxeg'a ektaha nak Dios énxet'ák apagkok, cham'a apteme nak kóneg; Egkések axta eyke aksa ko'o Dios ektakmela sektamheykha yakwayam atnehek seltennáseykha amya'a ektakmela m'a énxet'ák metnaha nak judíos cham'a amya'a ekxeyenma nak ekxámokma agko' aksok eltakmela eleñama nak Cristo.

SAN MATEO 13:15

Hakte kalyeha'ak apwáxók xa énxet'ák nak, apkelapmeyk nahan apeyk'ák, apnaktenchesegkek nahan apakta'ák, yakwayam enxoho melwetyehe' tén han melegye', tén han melyekpelchágwome', yakwayam enxoho metnekxék mehey'áseyam ko'o, keñe ko'o mamasésesek ma'a ektamheykegkaxa nak.’

1 SAN PEDRO 3:9

Nágkólhésho cha'a mók kéltemésesakxa ekmaso, nágkólhésho nahan mók ma'a kélwanyencha'a enxoho, wánxa agkok kólmaxnéses aksa yakwayam enxoho epasmok Dios, hakte apkelwóneyha axta kéxegke Dios yakwayam kólxawak aksok eltakmela eleñama néten.

HEBREOS 6:4

Hakte apkelwátesagkek agkok apteme melya'áseyam ma'a énxet'ák ektaha axta apkelxawéyak elseyexma, cham'a énxet'ák apkelya'áseykegkoho axta ektémakxa m'a negmowána segmésamol'a cha'a Dios, cham'a énxet'ák apkelxaweykegko axta anhan Espíritu Santo,

COLOSENSES 3:15

Meyke ektahakxa egwáxok eñama Cristo sat katnehek ekpékesáseyak kélwáxok kéxegke. Axta keñamak apkelwóneykencha'a kéxegke Dios xa, yakwayam enxoho hentemesásekxak ektémakxal'a wánxa xama negyókxa. Kólmes nahan ekxeyenma kélwáxok Dios.

COLOSENSES 1:23

Cháxa keñamak eyéméxko nak kóltehek kéxegke kélwaskápeykekxoho eñama ekpasmo m'a megkólya'áseyam nak, meyke kélyenseyam ma'a kélhaxneykha ekyetna nak kéxegke eñama kéllegé m'a tásek amya'a kéltenneykha nak. Cháxa amya'a kéltenneykencha'a nak ekyókxoho yókxexma xa, sekpasmoma nak han ko'o xa ektémakxa kéltenneykha, ko'o Pablo.

COLOSENSES 1:5

cham'a kélásekhayo ektekkesesama nak kélhaxneykha yakwayam kólxawak ma'a aksok kéltakmelchesesama nak kéxegke m'a néten. Kéllegayak kéxegke kéltenneykha xa nelhaxneykha nak, cham'a kélleg'a axta kéltenneykha amya'a ekmámnaksoho, ektaha nak amya'a ektakmela agko'.

EFESIOS 2:12

kaxénwakxoho kélwáxok kélheykencha'a axta kéxegke meyke Cristo nano' axta, axta kólpáxakxók kéxegke énxet'ák Israel, axta nahan kaweykekxohok kéxegke m'a ekhémo mók nelpakhetchásamáxkoho Dios nak, axta nahan kaweykekxohok kéxegke m'a sempekkencháseykekxa axta appeywa Dios. Kélheykha axta kéxegke keso náxop meyke Dios, tén han meyke elhaxneykha kélwáxok.

GÁLATAS 5:5

Wánxa agkok nelhaxneyk negko'o henxének Dios nentaha nelpéwomo eñama m'a Espíritu, tén han eñama m'a nenteme nak magya'áseyam.

1 SAN PEDRO 1:3

Oltemésesek hana apcheymákpoho Dios, Jesucristo Wese' egegkok Apyap, entemésesek axta negko'o eghaxnancha'ák Dios eñama m'a ekyawe ektakmeleykha nak apwáxok henlano', eñama nahan ma'a apxátekhágwayam axta Jesucristo. Cháxa segmésa nak nelhaxneykha ektaha nak ekmámnaksoho agko' xa,

LOS HECHOS 16:14

Lidia axta ekwesey xama xa kelán'ák nak, tegma apwányam Tiatira axta keñamak. Apáwa hómáyok apkeltakmalma axta exeykekxa. Kalpeykeshok axta cha'a Dios xa kelán'a nak, haxnawók axta kéltenneykha, keñe axta aptemésesa Wese' egegkok yakwayam katakmelcheshok agko' ekháxenmo ektahakxa apkeltenneykha Pablo.

FILIPENSES 3:14

yakwayam enxoho awomhok néxa, tén han amok ma'a ekyanmaga, cham'a segwónencha'a axta Dios peya hegmések eñama Cristo Jesús.

SAN MARCOS 10:17

Xama axta peya exñekxak makham Jesús yakwayam elenxanmohok apxega, apkétchágkók axta xama énxet apwokmo m'a, apkeltekxekwokmek axta aptapnák apkenmágkaxa Jesús. Aptahak axta apkelmaxneyeyncha'a s'e: —Sẽlxekmóso aptakmalma, ¿Yaksak eyéméxko alának ko'o yakwayam ótak ekyennakte egkenyek megkatnegwayam enéxa?

ROMANOS 2:4

Etaknók cha'a exchep ma'a Dios segásekhayo megkamassegwayam nak, tén han ma'a mepekhéso nak elwok Dios, tén han ma'a ektémakxa nak mepekhésamap Dios, neyseksa mékpelche Dios segásekhayo, ektaha nak cha'a ekyentameykekxa yakwayam etnekxak mey'áseyam Dios.

ROMANOS 11:29

Mehegyementemekxék Dios ma'a aksok segméso nak, melwátésemek nahan segwóneykha.

COLOSENSES 1:12

kólmések sat nahan kéxegke ekxeyenma kélwáxok Dios Egyap yetlo ekpayheykekxa kélwáxok, aptaha nak apkeláneseykekxa kéltahakxa yakwayam kawakxohok kélxaweyák ma'a aksok kélpagkancheso nak yakwayam elxawagkok énxet'ák ektaha nak Dios énxet'ák apagkok, eleñama m'a neyseksa elseyexma aptémakxa nak Wese' apwányam Dios.

COLOSENSES 1:27

Apmenyék axta Dios elyekpelchásesók ma'a ektaha nak énxet'ák apagkok, cham'a ekwánxa nak ekxámokma aksok eltakmela apagkok, cham'a ektemésesama axta cha'a ekpowásamáxkoho énxet'ák metnaha nak judíos. Apheyk kélwáxok kéxegke Cristo, cháxa megkólya'áseykegko axta kéxegke xa, aptaha nak han eñamakxa nelhaxneykha m'a negeymáxkoho peya nak anxawak.

COLOSENSES 2:2

Ekwaskápeykxók ko'o yakwayam enxoho elxawagkok ekmayheykegkoho apwáxók xa énxet'ák nak, yakwayam enxoho megyexpanchesakpek eñama m'a apkelásekhamakpoho nak, yakwayam enxoho nahan katnehek ekyawe agko' apkelya'ásegwayam, cham'a ekmowána nak kalya'asásegwók ma'a megyahayo axta kólya'asagkohok Dios, cham'a aptaha nak Cristo.