APOCALIPSIS 1:9 - Lengua Sur (Enxet) Nuevo Testamento

⁹ Ko'o Juan sektaha nak may'áseykmoho xamo' kéxegke Cristo, Jesús sekyepetcheyo keñamak sewákxoho nahan ko'o xa sekteme señama nepyeseksa Dios énxet'ák apagkok tén han sewákxoho seklegeykegkoho xamo' kéxegke, tén han sewákxoho m'a ektémakxa nak kélwaskápeykekxoho, yakwayam enxoho alenmaxaxkohok seklegeykegkoho ko'o. Elhésekmek axta ko'o yókxexma étkok ekwesey Patmos, eñama seklegaso m'a amya'a eñama nak Dios, cham'a aptemésesama axta ekmámnaksoho Jesús.

APOCALIPSIS 1:9 Referans Kwoze

APOCALIPSIS 3:10

Apkelanak axta exchep seltémókxa etnehek, cham'a meyensakmo nak. Ekeso eñamakxa sekmoko nak ko'o amyók xép ekwa'a sat ma'a ekhem ekyawe nenlegeykegkoho keso náxop, yakwayam enxoho keykkónek apyókxoho énxet'ák apheykha nak keso náxop.

LOS HECHOS 14:22

Apkelwaskakkásekxók axta énxet'ák apteme axta melya'áseyam xa yókxexma nak, apkeltennásek axta apkeltamho elenxanmohok apkelyennaktésamo apteme melya'áseyam. Apkeltennásek axta anhan megkatnehek manlegeykegkoho ekyókxoho aksok negmoko enxoho antexek ma'a aptémakxa nak Wese' apwányam Dios.

SAN JUAN 16:33

Eltennásek kéxegke ekyókxoho xa, yakwayam enxoho kólwetak meyke ektahakxa kélwáxok neyseksók selyepetcheyo ko'o. Kóllegagkohok sat kéxegke keso náxop; wánxa agkok, kólteme kélwaskápeykekxoho, ekmalanchek ko'o ektémakxa nak keso náxop.

APOCALIPSIS 1:2

Apkeltennáha axta Juan ekmámnaksoho agko' ekyókxoho aksok ektahakxa axta apweté, cham'a aptaha nak han apxeyenma m'a amya'a eñama nak Dios, cham'a amya'a apkeltenneykencha'a axta anhan Jesucristo.

APOCALIPSIS 13:10

“Enxet eyéméxko nak kólhésók sẽlpextétamakxa, kólhésók sat sẽlpextétamakxa; keñe m'a eyéméxko nak kólyakténchesagkok apyespa'ák sókwenakte, kólyakténchesagkok sat apyespa'ák etekyók.” Sat kataxchek ektémakxa nak apkelenmáxamákpoho Dios énxet'ák apagkok apkelpagkanamap xa, tén han ma'a ektémakxa nak melya'áseyam.

FILIPENSES 4:14

Wánxa agkok, tásek axta eyke kéltahakxa kéxegke sepasma m'a ektahakxa axta ekyentaxnamo sekha ko'o.

APOCALIPSIS 12:11

Apkelmalanchek axta ẽlyáxeg'a xa eñama m'a apyegkenma axta éma apagkok Nekkések Apketkok eñama nahan ma'a apkellegaso axta amya'a ektakmela agko' xa énxet'ák nak; axta elayeyk eletsapok apmayheykegkok axta aksa eletsapok.

APOCALIPSIS 7:14

“Wese', xép apya'ásegko'”, axta ektahak seyátegmowágko ko'o. Keñe axta aptaha seyáneya s'e: “Cháxa énxet'ák ektaha axta apkelyeykhé ekyawe apkellegeykegkoho xa, apkelyenyések axta apkelántaxno Nekkések Apketkok éma apagkok xa, kelmopeyásekxók axta anhan.

2 TIMOTEO 1:8

Neymegké' aksa eltennaha apwesey Wese' egegkok, neymegké' aksa hélanok ko'o keso sekmáxko nak eñama Wese' egegkok. Yoho kawakxohok xép xa nenlegeykegkoho nak eñama m'a ektémakxa nak nenlegaso amya'a ektakmela, yetlo m'a apwaskápeykekxoho apmésamol'a cha'a exchep Dios.

ROMANOS 8:25

Nelhaxneyha agkok ma'a aksok magwetayo nak, kéméxchek anleyxmakha meyke nelwáteseyam.

APOCALIPSIS 14:12

Sat kañék ekwetamaxche ektémakxa nak apkelwaskápeykekxoho Dios énxet'ák apagkok apkelpagkanamap nak, cham'a melwateseyam nak apkelané apkeltémókxa nak antehek Dios, cham'a meyenseyam nak han apteme mey'áseyam Jesús.

HEBREOS 10:36

Kéméxchek kéxegke kólwaskápekxohok neyseksa kéllegeykegkoho, yakwayam enxoho kóllának ma'a ektaha nak Dios apmopmenyého, yakwayam enxoho nahan kólxawak ma'a apxeyenma axta egkések kéxegke Dios.

FILIPENSES 1:7

Payhawók agko' ko'o katnehek ekxeyenma ewáxok kélyókxoho kéxegke xa ektaha nak, hakte awanhok agko' ko'o selásekhayo kéxegke, hakte wákxók nahan kéxegkáxa kélxawé naksa m'a ektémakxa nak segemleykekxoho Dios, cham'a segkésa axta aksa ko'o, megkeyxek ma'a sekha enxoho sẽlpextétamakxa, esenhan selyentama enxoho nápakta'awo' ma'a kelwese'e ekha nak kélyaheykekxoho, yakwayam amyók tén han axének ektaha nakso' ma'a amya'a nelmeyamáxche nak.

APOCALIPSIS 11:7

Apsawhakyek sat agkok apkeltenneykha m'a amya'a eñama nak Dios, keñe sat katyapok aksok nawhak eklo eñama nak kañók agko' máxek, kanmexek sat xa énxet'ák nak, kamalánek sat nahan nepyeseksa, kalnápok sat nahan.

ROMANOS 8:17

Hegwakxohok sat nahan negko'o xa nenxawé m'a sempagkanchesama axta Dios hegmeyásekxak, cham'a sẽltennasama axta, cháxa peya sat anxawhok xamo' Cristo xa, eyámnaksoho enxoho nenlegagkoho xamo' ma'a Cristo, yakwayam enxoho ampasmok ma'a ektémakxa nak apcheymákpoho.

APOCALIPSIS 19:10

Eltekxekkek axta ko'o etapnák náxop ekpayhókxa apkenmágkaxa Dios apchásenneykha, yakwayam alpeykesho', wánxa agkok, aptahak axta seyáneya s'e: “Ná etne aksa xa, ko'o sekteme Dios apchásenneykha, ekhawók ko'o exchep, ekhawók nahan ma'a apkelyáxeg'a ektaha nak melyenseyam apkeltenneykha Jesús apwesey. Elpeykesho m'a Dios.” Hakte, cháxa eyewáneseso énxet'ák ektaha nak apkellegaso Dios appeywa xa apkeltenneykha nak Jesús apwesey.

APOCALIPSIS 12:17

Ekeso eñamakxa ektaknókoho agko' axta kelán'a m'a yéwa ekwányam nak, keñe axta elnápexko aksa m'a apkeleymomap nak atawan'ák natámen xa kelán'a nak, axta kelenmexak ma'a énxet'ák ektaha nak apkelyaheykekxoho apkeltémókxa nak antehek Dios tén han ma'a meyenseyam nak apkelxeyenma apwesey Jesús.

APOCALIPSIS 6:9

Xama axta ekwokmo cinco apleklo yampápa kélapma Nekkések Apketkok, ekwet'ak axta ko'o m'a énxet'ák aptekyawa axta eñama apkellegaso Dios appeywa kóneg ma'a ekwatnamáxchexa axta cha'a aksok nawha'ák ekyanmaga mólya'asáxma.

APOCALIPSIS 1:4

Ko'o Juan, ektáxésesek ko'o siete apchakneykekxexa nak ma'a yókxexma Asia. Kólma kéxegke segméso naksa nak Dios segemleykekxoho, tén han ma'a meyke ektahakxa egwáxok eñama nak ma'a Dios, cham'a apha nak kaxwo', cham'a aphama axta nahan nano' axta, cham'a peya nak han ewata', cháxa eleñama nak han ma'a siete espíritu apheyncha'a nak nápakto' Wese' apwányam Dios aphamakxa xa,

2 TESALONICENSES 3:5

Wese' egegkok sat epasmok kéxegke yakwayam enxoho kóltehek kélásekhamaxkoho ekhawo m'a ektémakxa nak segásekhayo Dios, tén han egkések kéxegke m'a ektémakxa axta apwaskápeykekxoho Cristo neyseksa aplegeykegkoho.

SAN MATEO 20:23

Aptahak axta apchátegmowágko Jesús se'e: —Kóllegagkohok sat kéxegke xa nenlegeykegkoho nak, cham'a ekyetchesamaxkoho nak xama egheykok negyal'a aksok ekmáske, akke ko'o hepayhawok wának exek énxet ekpayhókxa nak selya'asamakxa tén han ma'a nésagkalwa. Appagkanchesek eyke Táta m'a énxet ektaha nak apkelyéseykha.

SAN MARCOS 10:39

Aptahak axta apkelátegmowágko s'e: —Egwanchek neykhe. Aptahak axta apkeláneya Jesús se'e: —Kóllegagkohok sat kéxegke xa nenlegeykegkoho nak, cham'a ekyetchesamaxkoho nak xama egheykok negyal'a aksok ekmáske peya nak ko'o eynek, kólxawak sat nahan nétsapma peya nak ko'o axka' ekyetchesamaxkoho nak yakpasama yegmen;

LOS HECHOS 1:15

Yáma wenaktémok axta, keñe axta apkeltennáseyncha'a Pedro apnámokkok ektaha axta melya'áseyam xamo', ciento veinte axta apyókxoho énxet. Aptahak axta apkeláneya s'e:

2 CORINTIOS 1:7

Yawanchek kamaskok ektémakxa nak negáyo kéxegke, hakte negya'ásegkok ekwákxoho kéxegkáxa nenlegeykegkoho, ekhawo ektémakxa nak han ekweykekxoho kéxegke ekpayheykekxa egwáxok eñama nak Dios.

1 SAN PEDRO 5:1

Emenyék ko'o agkések kaxwo' sekpeywa m'a énxet'ák apkelámha apmonye'e nak kélakneykekxexa kéxegke, ko'o sektaha nak han sémha emonye sekhawo xa énxet'ák nak, sektaha nak han sekweteykegkoho m'a ektémakxa axta aplegeykegkoho Cristo, hewatámhok sat nahan ko'o xa Cristo apcheymákpoho, cham'a peya nak hẽlxekmósho', ekhawo nak han xa énxet'ák nak.

APOCALIPSIS 1:1

Keso ektahakxa axta aksok apxekmósamo Dios Jesucristo s'e, yakwayam enxoho elxekmósek Cristo m'a ektaha nak apkelásenneykha peya kañehémhok katnehek xa. Apya'asásegwokmek axta Jesucristo apchásenneykha apwesey Juan xa, cham'a apcháphasa axta aphakxa xama apchásenneykha apkeñama néten.

APOCALIPSIS 1:6

entemésesek axta anhan negko'o nenlánamáxkoho nempasmo nelmaxnéseso Dios énxet'ák apagkok yakwayam anlának nentamheykha eñama nak ma'a Dios, aptaha nak Jesucristo Apyap. ¡Apagkok sat cha'a etnehek Jesús ma'a ektémakxa nak apcheymákpoho tén han ma'a ektémakxa nak apmopwána! Katnahagkok sat.

APOCALIPSIS 20:4

Ekwet'ak axta ko'o taháno ektakmalma yetlo apheykha néten ma'a apkelxawágko axta kélyaheykekxoho yakwayam etnehek apkelyekpelchémo apyókxoho énxet'ák. Ekwet'ak axta nahan ko'o aphagák ma'a ektaha axta kélyaktencháseyak apyespa'ák eñama meyenseyam apkeltenneykha Jesús apwesey tén han ma'a amya'a eñama nak Dios. Axta elpeykesamok aksok nawhak eklo xa énxet'ák nak, axta nahan elpeykesamok ma'a kéleykmáseso kélheyásekegkoho nak aksok nawhak eklo, axta nahan yahayók keytek elkahaso aksok nawhak eklo m'a ekpayhakxa nápát, esenhan ma'a apmek. Ekwet'ak axta nahan ko'o apnakxétekhágwokmo xa énxet'ák nak. Kelwese'e axta aptamhágkok xamo' Cristo ekweykmoho mil apyeyam.